ಮಧ್ಯಪ್ರದೇಶದ ರಾಯಸೇನ್ ನಲ್ಲಿ ಮೂರು ದಿನಗಳ 'ಕೃಷಿ ಮಹಾಕುಂಭ' ನಡೆಯಲಿದೆ, ಇದು ಬೆಳೆಗಳ ಮೇಲೆ ಮಾತ್ರವಲ್ಲದೆ ಡೈರಿ, ಕೋಳಿ, ಮೀನುಗಾರಿಕೆ, ಮೇಕೆ ಸಾಕಣೆ, ಗ್ರಾಮೀಣ ಮಹಿಳೆಯರಿಗೆ ರೈತ ಉತ್ಪಾದಕ ಸಂಸ್ಥೆಗಳು (ಎಫ್.ಪಿ.ಒ.ಗಳು) ಆಧಾರಿತ ಮಾರುಕಟ್ಟೆ ಮತ್ತು ಜೀವನೋಪಾಯದ ಅವಕಾಶಗಳ ಮೇಲೆ ಕೇಂದ್ರೀಕರಿಸುತ್ತದೆ, ಇದು ರೈತರಿಗೆ ಆದಾಯದ ಬಹು ಬಲವಾದ ಸ್ತಂಭಗಳನ್ನು ಸೃಷ್ಟಿಸುವ ಗುರಿಯನ್ನು ಹೊಂದಿದೆ. ಕೇಂದ್ರ ಕೃಷಿ ಮತ್ತು ರೈತರ ಕಲ್ಯಾಣ ಮತ್ತು ಗ್ರಾಮೀಣಾಭಿವೃದ್ಧಿ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು, ಈ ರಾಷ್ಟ್ರೀಯ ಮಟ್ಟದ ಕಾರ್ಯಕ್ರಮವು ಗ್ರಾಮೀಣ ಆರ್ಥಿಕತೆಯ ಸಂಪೂರ್ಣ ಮೌಲ್ಯ ಸರಪಳಿಯನ್ನು - ಬೀಜದಿಂದ ಮಾರುಕಟ್ಟೆಯವರೆಗೆ ಮತ್ತು ಮೀನಿನಿಂದ ಮುತ್ತಿನವರೆಗೆ - ಒಂದೇ ವೇದಿಕೆಯಲ್ಲಿ ತರುತ್ತದೆ ಎಂದು ಹೇಳಿದರು.

‘ಕೃಷಿ ಮಹಾಕುಂಭ’: ಒಂದೇ ವೇದಿಕೆಯಲ್ಲಿ ಕೃಷಿಆಧಾರಿತ ಸಂಪೂರ್ಣ ಮೌಲ್ಯ ಸರಪಳಿ ಪ್ರದರ್ಶನ

ಏಪ್ರಿಲ್ 11 ರಿಂದ 13 ರವರೆಗೆ ರಾಯಸೇನ್ ನಲ್ಲಿ ನಡೆಯಲಿರುವ ಈ ಕೃಷಿ ಉತ್ಸವವು ಉತ್ಪಾದನೆ, ಜಾನುವಾರು, ಸಂಸ್ಕರಣೆ, ಮಾರುಕಟ್ಟೆ ಮತ್ತು ಉದ್ಯಮಶೀಲತೆಯನ್ನು ಒಳಗೊಂಡ ಸಂಪೂರ್ಣ ಮೌಲ್ಯ ಸರಪಳಿಯನ್ನು ಒಂದೇ ಸ್ಥಳದಲ್ಲಿ ಪ್ರಸ್ತುತಪಡಿಸುತ್ತದೆ, ಇದು ರೈತರು ಕೃಷಿಯಿಂದ ಮಾರುಕಟ್ಟೆಗೆ ಮತ್ತು ರಫ್ತುಗಳಿಗೆ ಸಂಪೂರ್ಣ ಪ್ರಯಾಣವನ್ನು ಅರ್ಥಮಾಡಿಕೊಳ್ಳಲು ಅನುವು ಮಾಡಿಕೊಡುತ್ತದೆ ಎಂದು ಕೇಂದ್ರ ಕೃಷಿ ಸಚಿವ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು ಹೇಳಿದರು. ರಾಯಸೇನ್ ನಲ್ಲಿರುವ ದಸರಾ ಮೈದಾನವು ಮೂರು ದಿನಗಳ ಕಾಲ ನೇರ ಪ್ರದರ್ಶನಗಳು, ತಾಂತ್ರಿಕ ಅವಧಿಗಳು, ತರಬೇತಿ ಸರಣಿಗಳು ಮತ್ತು ವ್ಯಾಪಾರ ಸಭೆಗಳಿಗೆ ಕೇಂದ್ರವಾಗಿ ಕಾರ್ಯನಿರ್ವಹಿಸುತ್ತದೆ. ವಿಜ್ಞಾನಿಗಳು, ನವೋದ್ಯಮಗಳು, ರೈತ ಉತ್ಪಾದಕ ಸಂಸ್ಥೆಗಳು (ಎಫ್.ಪಿ.ಒ.ಗಳು), ಸ್ವ-ಸಹಾಯ ಗುಂಪುಗಳು (ಎಸ್.ಎಚ್.ಜಿ.ಗಳು) ಮತ್ತು ಗ್ರಾಮೀಣ ಉದ್ಯಮಿಗಳು ನೇರ ಸಂವಾದ ಮತ್ತು ವಿಚಾರ ವಿನಿಮಯದಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳಲಿದ್ದಾರೆ.

ಸುಧಾರಿತ ಜಾನುವಾರು ಪ್ರದರ್ಶನ ಮತ್ತು ವೈಜ್ಞಾನಿಕ ಪಶುಸಂಗೋಪನಾ ಮಾದರಿಗಳು

ಈ ಮುಂದುವರಿದ ಕೃಷಿ ಉತ್ಸವದಲ್ಲಿ, ಕೇಂದ್ರ ಪಶುಸಂಗೋಪನೆ ಮತ್ತು ಡೈರಿ ಇಲಾಖೆ ಮತ್ತು ರಾಜ್ಯ ಸರ್ಕಾರವು ಆಯೋಜಿಸುವ ಜಾನುವಾರು ಪ್ರದರ್ಶನಗಳು ಗಿರ್, ಸಹಿವಾಲ್, ಥಾರ್ಪಾರ್ಕರ್ ಮತ್ತು ಮಾಲ್ವಿಯಂತಹ ಸುಧಾರಿತ ಜಾನುವಾರು ತಳಿಗಳನ್ನು ಪ್ರದರ್ಶಿಸುತ್ತವೆ. ಹಾಲು ಮತ್ತು ಮಾಂಸ ಉತ್ಪಾದನೆಗೆ ಸೂಕ್ತವಾದ ಮೇಕೆ ತಳಿಗಳಾದ ಜಮುನಾಪರಿ, ಬಾರ್ಬರಿ, ಸಿರೋಹಿ, ಬೀಟಲ್ ಮತ್ತು ಸೋಜತ್ಗಳನ್ನು ಸಹ ಪ್ರದರ್ಶಿಸಲಾಗುತ್ತದೆ. ಇದರ ಜೊತೆಗೆ, ಕಡಕ್ನಾಥ್ ನಂತಹ ವಿಶೇಷ ಕೋಳಿ ತಳಿಗಳು ರೈತರು ಹೆಚ್ಚಿನ ಮೌಲ್ಯದ ಮಾರುಕಟ್ಟೆಗಳೊಂದಿಗೆ ಸಂಪರ್ಕ ಸಾಧಿಸುವ ಮಾರ್ಗಗಳನ್ನು ಪ್ರದರ್ಶಿಸುತ್ತವೆ.

ಮೊಬೈಲ್ ಪಶುವೈದ್ಯಕೀಯ ಘಟಕಗಳ ಮೂಲಕ, ಪ್ರಾಣಿ ಆರೋಗ್ಯ ಶಿಬಿರಗಳು, ವ್ಯಾಕ್ಸಿನೇಷನ್ ಡ್ರೈವ್ ಗಳು ಮತ್ತು ಪೌಷ್ಟಿಕಾಂಶ ನಿರ್ವಹಣೆ, ಸಂತಾನೋತ್ಪತ್ತಿ ಮತ್ತು ಆನುವಂಶಿಕ ಸುಧಾರಣೆಯ ಕುರಿತು ತಜ್ಞರ ಮಾರ್ಗದರ್ಶನವನ್ನು ಒದಗಿಸಲಾಗುತ್ತದೆ. ಇದು ಸಣ್ಣ ಮತ್ತು ಅತಿ ಸಣ್ಣ ಜಾನುವಾರು ರೈತರು ಕಡಿಮೆ ವೆಚ್ಚದಲ್ಲಿ ಉತ್ಪಾದಕತೆಯನ್ನು ಹೆಚ್ಚಿಸಲು ಪ್ರಾಯೋಗಿಕ ವಿಧಾನಗಳನ್ನು ಕಲಿಯಲು ಅನುವು ಮಾಡಿಕೊಡುತ್ತದೆ. ಡೈರಿ ಸಹಕಾರ ಸಂಘಗಳು, ಮೇವು ನಿರ್ವಹಣೆ, ಗೋಬರ್ ಆಧಾರಿತ ಶಕ್ತಿ ಮತ್ತು ಸಾವಯವ ಒಳಹರಿವಿನ ಬಗ್ಗೆ ಮಾರ್ಗದರ್ಶನವನ್ನು ಸಹ ನೀಡಲಾಗುವುದು, ಇದರಿಂದಾಗಿ ಜಾನುವಾರುಗಳನ್ನು ಕೃಷಿಯೊಂದಿಗೆ ಸಂಯೋಜಿಸಬಹುದು ಮತ್ತು ವೃತ್ತಾಕಾರದ ಮತ್ತು ಸುಸ್ಥಿರ ಕೃಷಿ ಮಾದರಿಗಳನ್ನು ರಚಿಸಬಹುದು.

ಮೀನುಗಾರಿಕೆ, ಜಲಚರ ಸಾಕಣೆ ಮತ್ತು ನೀರು ಆಧಾರಿತ ಉದ್ಯಮಗಳು

ಕೇಂದ್ರ ಮೀನುಗಾರಿಕೆ ಇಲಾಖೆ ಮತ್ತು ರಾಷ್ಟ್ರೀಯ ಮೀನುಗಾರಿಕೆ ಅಭಿವೃದ್ಧಿ ಮಂಡಳಿ (ಎನ್.ಎಫ್.ಡಿ.ಬಿ.) ಬಯೋಫ್ಲೋಕ್ ವ್ಯವಸ್ಥೆಗಳು, ಮರುಬಳಕೆ ಜಲಚರ ಸಾಕಣೆ ವ್ಯವಸ್ಥೆಗಳು (ಆರ್.ಎ.ಎಸ್.), ಜಲಚರ ಸಾಕಣೆ, ಅಲಂಕಾರಿಕ ಮೀನು ಸಾಕಣೆ ಮತ್ತು ಮುತ್ತು ಕೃಷಿಯ ನೇರ ಮಾದರಿಗಳನ್ನು ಪ್ರಸ್ತುತಪಡಿಸುತ್ತವೆ. ಈ ಪ್ರದರ್ಶನಗಳು ರೈತರು ಮತ್ತು ಯುವಕರಿಗೆ ಆಧುನಿಕ ಮೀನುಗಾರಿಕೆ ಮಾದರಿಗಳು ಸೀಮಿತ ನೀರು ಮತ್ತು ಸ್ಥಳಾವಕಾಶವಿದ್ದರೂ ಸಹ ಹೆಚ್ಚಿನ ಆದಾಯವನ್ನು ಹೇಗೆ ಗಳಿಸಬಹುದು ಎಂಬುದನ್ನು ಅರ್ಥಮಾಡಿಕೊಳ್ಳಲು ಸಹಾಯ ಮಾಡಲಿವೆ.

ಪ್ರಧಾನ ಮಂತ್ರಿ ಮತ್ಸ್ಯ ಸಂಪದ ಯೋಜನೆ, ರಾಷ್ಟ್ರೀಯ ಮೀನುಗಾರಿಕೆ ಅಭಿವೃದ್ಧಿ ಕಾರ್ಯಕ್ರಮ (ಎಫ್.ಎಫ್.ಡಿ.ಪಿ.), ಮೀನುಗಾರಿಕೆ ಮೂಲಸೌಕರ್ಯ ಅಭಿವೃದ್ಧಿ ನಿಧಿ (ಎಫ್.ಐ.ಡಿ.ಎಫ್.) ಮತ್ತು ಇತರ ಉಪಕ್ರಮಗಳಂತಹ ಯೋಜನೆಗಳ ಬಗ್ಗೆಯೂ ಮಾಹಿತಿಯನ್ನು ಒದಗಿಸಲಾಗುತ್ತದೆ. ಇದು ರೈತರು ಕೃಷಿಯ ಜೊತೆಗೆ ನೀರು ಆಧಾರಿತ ಉದ್ಯಮಗಳನ್ನು ಅನ್ವೇಷಿಸಲು ಅನುವು ಮಾಡಿಕೊಡುತ್ತದೆ, ಉದಾಹರಣೆಗೆ ಕೊಳಗಳು, ಮರುಬಳಕೆ ಟ್ಯಾಂಕ್ಗಳು ಅಥವಾ ಜಲಚರ ಸಾಕಣೆ ಘಟಕಗಳು ಮತ್ತು ವರ್ಷಪೂರ್ತಿ ಆದಾಯದ ಮೂಲಗಳನ್ನು ಅಭಿವೃದ್ಧಿಪಡಿಸಲು ಅನುವು ಮಾಡಿಕೊಡುತ್ತದೆ.

50+ ಎಫ್.ಪಿ.ಒ.ಗಳು ಮತ್ತು ಮಾರುಕಟ್ಟೆ ವಿಭಾಗ: ಬ್ರಾಂಡೆಡ್ ಗ್ರಾಮೀಣ ಉತ್ಪನ್ನಗಳಿಗೆ ರಾಷ್ಟ್ರೀಯ ವೇದಿಕೆ

ಮಾರ್ಕೆಟಿಂಗ್ ವಿಭಾಗದ ಅಡಿಯಲ್ಲಿ, 50 ಕ್ಕೂ ಹೆಚ್ಚು ರೈತ ಉತ್ಪಾದಕ ಸಂಸ್ಥೆಗಳು (ಎಫ್.ಪಿ.ಒ.ಗಳು) ಭಾಗವಹಿಸುತ್ತವೆ, ಜಿಐ-ಟ್ಯಾಗ್ ಮಾಡಲಾದ ಚಿನ್ನೋರ್ ಅಕ್ಕಿ, ಶರ್ಬತಿ ಗೋಧಿ, ರಾಗಿ ಆಧಾರಿತ ಉತ್ಪನ್ನಗಳು (ಕೊಡೋ ಮತ್ತು ಕುಟ್ಕಿ ಸೇರಿದಂತೆ), ದ್ವಿದಳ ಧಾನ್ಯಗಳು, ಕಡಲೆ ಹಿಟ್ಟು, ಸೋಯಾ ಉತ್ಪನ್ನಗಳು, ಅರಿಶಿನ, ಬೆಳ್ಳುಳ್ಳಿ ಮತ್ತು ಮೊರಿಂಗಾ ಪುಡಿ, ಸಾಸಿವೆ ಮತ್ತು ಅಗಸೆಬೀಜದ ಎಣ್ಣೆ, ಜೇನುತುಪ್ಪ, ಉಪ್ಪಿನಕಾಯಿ, ಬೆಲ್ಲ, ಬೆಲ್ಲದ ಪುಡಿ, ಬೆಲ್ಲ ಕ್ಯಾಂಡಿ, ಕಡಲೆಕಾಯಿ ಚಿಕ್ಕಿ ಮತ್ತು ಎಳ್ಳು ಲಡ್ಡುಗಳಂತಹ ಮೌಲ್ಯವರ್ಧಿತ ಉತ್ಪನ್ನಗಳನ್ನು ಪ್ರದರ್ಶಿಸಿ ಮಾರಾಟ ಮಾಡುತ್ತವೆ. ಈ ವೇದಿಕೆಯು ಸ್ಥಳೀಯ ಉತ್ಪನ್ನಗಳು ರಾಷ್ಟ್ರೀಯ ಗೋಚರತೆಯನ್ನು ಪಡೆಯಲು ಮತ್ತು ಉತ್ತಮ ಮಾರುಕಟ್ಟೆ ಬೆಲೆಗಳನ್ನು ಪಡೆಯಲು ಸಹಾಯ ಮಾಡಲಿವೆ.

ಏಪ್ರಿಲ್ 12 ರಂದು ನಡೆಯಲಿರುವ ಎಫ್.ಪಿ.ಒ. ಸಮ್ಮೇಳನವು ಸಾಂಸ್ಥಿಕ ನಿರ್ವಹಣೆ, ಬ್ರ್ಯಾಂಡಿಂಗ್, ಪ್ಯಾಕೇಜಿಂಗ್, ಕೋಲ್ಡ್ ಚೈನ್, ಲಾಜಿಸ್ಟಿಕ್ಸ್ ಮತ್ತು ಇ-ಟ್ರೇಡ್ ಪ್ಲಾಟ್ಫಾರ್ಮ್ಗಳ ಕುರಿತು ವಿವರವಾದ ಚರ್ಚೆಗಳನ್ನು ಒಳಗೊಂಡಿರುತ್ತದೆ. ಸಣ್ಣ ರೈತ ಸಂಸ್ಥೆಗಳು ಇ-ಕಾಮರ್ಸ್ ಮತ್ತು ಆಧುನಿಕ ಚಿಲ್ಲರೆ ವ್ಯಾಪಾರ ಮಾರ್ಗಗಳ ಮೂಲಕ ತಮ್ಮ 'ಸ್ಥಳೀಯದಿಂದ ರಾಷ್ಟ್ರೀಯ' ಪ್ರಯಾಣವನ್ನು ವೇಗಗೊಳಿಸಲು ಸಹಾಯ ಮಾಡುವುದು ಇದರ ಉದ್ದೇಶವಾಗಿದೆ.

ಗ್ರಾಮೀಣ ಮಹಿಳೆಯರ ಜೀವನೋಪಾಯ ಮತ್ತು ಸ್ವಸಹಾಯ ಗುಂಪುಗಳ ಬಲವಾದ ಭಾಗವಹಿಸುವಿಕೆ

ಕೇಂದ್ರ ಗ್ರಾಮೀಣಾಭಿವೃದ್ಧಿ ಸಚಿವಾಲಯವು 'ಕೃಷಿ ಸಖಿಗಳು', 'ಆಜೀವಿಕಾ ದೀದಿಗಳು', 'ಡ್ರೋನ್ ದೀದಿಗಳು' ಮತ್ತು ಸ್ವ-ಸಹಾಯ ಗುಂಪುಗಳ (ಎಸ್.ಎಚ್.ಜಿ.) ವಿಶೇಷ ಭಾಗವಹಿಸುವಿಕೆಯನ್ನು ಖಚಿತಪಡಿಸುತ್ತದೆ, ಅವರು ಗ್ರಾಮೀಣ ಮಹಿಳೆಯರ ನೇತೃತ್ವದ ಉದ್ಯಮಗಳ ಯಶಸ್ವಿ ಮಾದರಿಗಳನ್ನು ಪ್ರಸ್ತುತಪಡಿಸಲಿದ್ದಾರೆ. ಅವರ ಮಳಿಗೆಗಳು ಸಾವಯವ ಮತ್ತು ನೈಸರ್ಗಿಕ ಉತ್ಪನ್ನಗಳು, ಸಂಸ್ಕರಿಸಿದ ಆಹಾರಗಳು, ನವೀನ ಕೃಷಿ ಮಾದರಿಗಳು, ಬಹು-ಪದರದ ಕೃಷಿ, ಡ್ರೋನ್ ಸೇವೆಗಳು, ನರ್ಸರಿಗಳು, ಕೃಷಿ ಯಂತ್ರೋಪಕರಣಗಳ ಬ್ಯಾಂಕ್ಗಳು ಮತ್ತು ಗ್ರಾಮೀಣ ಸೇವಾ ಮಾದರಿಗಳನ್ನು ಒಳಗೊಂಡಿರುತ್ತವೆ.

ಈ ಉಪಕ್ರಮಗಳು ಗ್ರಾಮೀಣ ಮಹಿಳಾ ಉದ್ಯಮಶೀಲತೆಯನ್ನು ಬಲಪಡಿಸುವ, ಸಾಮೂಹಿಕ ಬ್ರ್ಯಾಂಡಿಂಗ್ ಅನ್ನು ಉತ್ತೇಜಿಸುವ ಮತ್ತು ಸ್ವಾವಲಂಬಿ ಗ್ರಾಮೀಣ ಆರ್ಥಿಕತೆಯನ್ನು ಹೆಚ್ಚಿಸುವ ನಿರೀಕ್ಷೆಯಿದೆ.

ತರಬೇತಿ, ನವೋದ್ಯಮ(ಸ್ಟಾರ್ಟ್-ಅಪ್)ಗಳು ಮತ್ತು ವೈಜ್ಞಾನಿಕ ಸಂವಹನ: ಯುವಕರಿಗೆ ಹೊಸ ದಿಗಂತಗಳು

ರೈತರಿಗೆ ಉಚಿತ ತರಬೇತಿ, ಸರ್ಕಾರಿ ಯೋಜನೆಗಳ ಕುರಿತು ನೇರ ಮಾಹಿತಿ, ಕೃಷಿ ನವೋದ್ಯಮ(ಸ್ಟಾರ್ಟ್-ಅಪ್ ) ಗಳಿಂದ ಪ್ರಸ್ತುತಿಗಳು ಮತ್ತು ವಿಜ್ಞಾನಿಗಳೊಂದಿಗೆ ನೇರ ಸಂವಾದವು ಈ 'ಕೃಷಿ ಮಹಾಕುಂಭ'ದ ಮೂರು ಪ್ರಮುಖ ಸ್ತಂಭಗಳಾಗಿವೆ. ಈ ಪ್ರಯತ್ನಗಳು ಕೃಷಿ ಉತ್ಪಾದಕತೆಯನ್ನು ಹೆಚ್ಚಿಸುವುದು ಮಾತ್ರವಲ್ಲದೆ ಗ್ರಾಮೀಣ ಯುವಕರಿಗೆ ಉದ್ಯೋಗ ಮತ್ತು ಉದ್ಯಮಶೀಲತೆಯ ಹೊಸ ಮಾರ್ಗಗಳನ್ನು ತೆರೆಯುವ ಗುರಿಯನ್ನು ಹೊಂದಿವೆ ಎಂದು ಕೇಂದ್ರ ಕೃಷಿ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು ಹೇಳಿದರು.

 

*****

(ಪ್ರಕಟಣೆ ಐ.ಡಿ.: 2249784) ವಿಸಿಟರ್ ಕೌಂಟರ್ : 8