ଇସ୍ରାଏଲ ଗସ୍ତ ସମୟରେ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୨୦୨୬ ମସିହା ଫେବୃଆରୀ ୨୬ ତାରିଖରେ ଜେରୁସେଲମରେ ଇସ୍ରାଏଲ ପ୍ରଧାନମନ୍ତ୍ରୀ ମହାମହିମ ଶ୍ରୀ ବେଞ୍ଜାମିନ ନେତାନ୍ୟାହୁଙ୍କ ସହ ଆନୁଷ୍ଠାନିକ ଆଲୋଚନା କରିଥିଲେ।

ଉଭୟ ପ୍ରଧାନମନ୍ତ୍ରୀ ଭାରତ-ଇସ୍ରାଏଲ ସହଭାଗୀତାର ସମସ୍ତ ପ୍ରାସଙ୍ଗିକ ଦିଗକୁ ନେଇ ବ୍ୟାପକ ଆଲୋଚନା କରିଥିଲେ। ଦୁଇ ଦେଶ ମଧ୍ୟରେ ପ୍ରଗାଢ ବିଶ୍ୱାସ ଓ ବନ୍ଧୁତାକୁ ପ୍ରତିଫଳିତ କରି, ନେତାମାନେ ଦ୍ୱିପାକ୍ଷିକ ସମ୍ପର୍କକୁ "ଶାନ୍ତି, ନବସୃଜନ ଏବଂ ସମୃଦ୍ଧି ପାଇଁ ସ୍ୱତନ୍ତ୍ର ରଣନୈତିକ ସହଭାଗୀତା" ରେ ପରିଣତ କରିବାକୁ ନିଷ୍ପତ୍ତି ନେଇଥିଲେ। ଏହି ସ୍ୱାର୍ଥ ନିହିତ ଉନ୍ନତିର ବର୍ଦ୍ଧିତ ସମନ୍ୱୟ ଏବଂ ଏକ ସୁରକ୍ଷିତ ଓ ସମୃଦ୍ଧ ଭବିଷ୍ୟତ ପାଇଁ ଉଭୟ ଦେଶର ସମାନ ଦୃଷ୍ଟିକୋଣର ପ୍ରତୀକ ଅଟେ।

ଉଭୟ ନେତା ସମସ୍ତ କ୍ଷେତ୍ରରେ ଦ୍ୱିପାକ୍ଷିକ ସହଯୋଗରେ ହୋଇଥିବା ପ୍ରଗତିରେ ସନ୍ତୋଷ ପ୍ରକାଶ କରିଥିଲେ। ଏଥିସହିତ ଦୁଇ ନେତା ବାଣିଜ୍ୟ ଓ ନିବେଶ, ପ୍ରତିରକ୍ଷା ଓ ସୁରକ୍ଷା, ମହାକାଶ, ଶକ୍ତି, ଗୁରୁତ୍ୱପୂର୍ଣ୍ଣ ପ୍ରଯୁକ୍ତିବିଦ୍ୟା, ସାଇବର ସୁରକ୍ଷା, ଶିକ୍ଷା, ବୈଜ୍ଞାନିକ ଗବେଷଣା ଏବଂ ନବସୃଜନ କ୍ଷେତ୍ରରେ ସହଯୋଗକୁ ଆହୁରି ବିସ୍ତାର କରିବାକୁ ସହମତ ହୋଇଥିଲେ। ସେମାନେ କୃଷି, ଜଳ ପରିଚାଳନା, ଷ୍ଟାର୍ଟ-ଅପ୍, ଫିନଟେକ୍, ଡିଜିଟାଲ ସ୍ୱାସ୍ଥ୍ୟସେବା, ଜୈବ ପ୍ରଯୁକ୍ତିବିଦ୍ୟା ଏବଂ ଉନ୍ନତ ଔଷଧ ଶିଳ୍ପ କ୍ଷେତ୍ରରେ ଭାରତ-ଇସ୍ରାଏଲ ସହଭାଗୀତାର ପରିବର୍ତ୍ତନମୂଳକ ସମ୍ଭାବନା ଉପରେ ମଧ୍ୟ ଗୁରୁତ୍ୱାରୋପ କରିଥିଲେ। ଦୁଇ ନେତା ଲୋକମାନଙ୍କ ମଧ୍ୟରେ ପାରସ୍ପରିକ ସମ୍ପର୍କକୁ ଆହୁରି ସୁଦୃଢ଼ କରିବା ପାଇଁ ଗତିଶୀଳତା ସହଭାଗୀତା ବିସ୍ତାର ଦିଗରେ ନୂତନ ପଦକ୍ଷେପକୁ ସ୍ୱାଗତ କରିଥିଲେ। ପ୍ରସ୍ତାବିତ ମୁକ୍ତ ବାଣିଜ୍ୟ ଚୁକ୍ତିନାମାକୁ ଶୀଘ୍ର ସମାପ୍ତ କରିବାକୁ ଆହ୍ୱାନ କରି, ସେମାନେ ଉଲ୍ଲେଖ କରିଥିଲେ ଯେ, ଦ୍ୱିପାକ୍ଷିକ ନିବେଶ ଚୁକ୍ତିନାମା, ଭାରତ-ଇସ୍ରାଏଲ ନବସୃଜନ ସେତୁ, ଭାରତ-ଇସ୍ରାଏଲ କୃଷି ପାଇଁ ନବସୃଜନ କେନ୍ଦ୍ର ଏବଂ ଭାରତ-ଇସ୍ରାଏଲ ଶିଳ୍ପ ଗବେଷଣା ଓ ବିକାଶ ତଥା ନବସୃଜନ ପାଣ୍ଠି ଉଭୟ ଦେଶ ମଧ୍ୟରେ ଆର୍ଥିକ, ଉଦ୍ୟୋଗୀ ଏବଂ ବୈଜ୍ଞାନିକ ସହଯୋଗକୁ ଉଲ୍ଲେଖନୀୟ ଭାବରେ ବୃଦ୍ଧି କରିବ। ସେମାନେ ଏଆଇ, ସେମିକଣ୍ଡକ୍ଟର, କ୍ୱାଣ୍ଟମ୍ ଓ ଅନ୍ୟାନ୍ୟ ଅତ୍ୟାଧୁନିକ ପ୍ରଯୁକ୍ତିବିଦ୍ୟା କ୍ଷେତ୍ରରେ ଅଧିକ ସହଯୋଗ ପାଇଁ ମଧ୍ୟ ଆହ୍ୱାନ କରିଥିଲେ, ଯାହା ଭାରତର ପ୍ରତିଭାଶାଳୀ କାର୍ଯ୍ୟଶକ୍ତି ଏବଂ ଇସ୍ରାଏଲର ନବସୃଜନକୁ ସମନ୍ୱିତ କରିବ।

ଦୁଇ ନେତା ପାରସ୍ପରିକ ସ୍ୱାର୍ଥର ଆଞ୍ଚଳିକ ଏବଂ ବିଶ୍ୱସ୍ତରୀୟ ପ୍ରସଙ୍ଗ ଉପରେ ମଧ୍ୟ ଆଲୋଚନା କରିଥିଲେ। ପ୍ରଧାନମନ୍ତ୍ରୀ ଗାଜା ଶାନ୍ତି ପରିକଳ୍ପନା ପ୍ରତି ତାଙ୍କ ସମର୍ଥନ ବ୍ୟକ୍ତ କରିଥିଲେ ଏବଂ ଏହି ପ୍ରୟାସ ଅଞ୍ଚଳରେ ଶାନ୍ତି ଓ ସ୍ଥିରତା ଆଣିବ ବୋଲି ଆଶା ବ୍ୟକ୍ତ କରିଥିଲେ। ଦୁଇ ନେତା ଆଇଏମ୍‌ଇସି ଏବଂ I2U2 ପଦକ୍ଷେପରେ ଦୁଇ ଦେଶ ମଧ୍ୟରେ ଘନିଷ୍ଠ ସହଯୋଗ ପାଇଁ ମଧ୍ୟ ଆହ୍ୱାନ କରିଥିଲେ। ସେମାନେ ଆତଙ୍କବାଦ ବିରୁଦ୍ଧରେ ବିଶ୍ୱସ୍ତରୀୟ ଲଢ଼େଇକୁ ସୁଦୃଢ କରିବା ପାଇଁ ସେମାନଙ୍କର ସଂକଳ୍ପ ମଧ୍ୟ ପ୍ରକାଶ କରିଥିଲେ। ଆତଙ୍କବାଦ ବିରୁଦ୍ଧରେ ଭାରତର ଲଢ଼େଇରେ ଇସ୍ରାଏଲ ଦ୍ୱାରା ପ୍ରଦାନ କରାଯାଇଥିବା ସମର୍ଥନ ପାଇଁ ପ୍ରଧାନମନ୍ତ୍ରୀ ନେତାନ୍ୟାହୁଙ୍କୁ ଧନ୍ୟବାଦ ଜଣାଇଥିଲେ।

ଆଲୋଚନା ପରେ, ଅନେକ ଚୁକ୍ତିନାମା ଏବଂ ବୁଝାମଣାପତ୍ର ଆଦାନପ୍ରଦାନ ହୋଇଥିଲା [ଲିଙ୍କ]। ରାଜ୍ୟ ଗସ୍ତ ଅବସରରେ ଦ୍ୱିପାକ୍ଷିକ ସହଭାଗୀତା ପାଇଁ ଭବିଷ୍ୟତ କାର୍ଯ୍ୟପନ୍ଥା ସମ୍ପର୍କରେ ଏକ ମିଳିତ ବିବୃତ୍ତି ଗ୍ରହଣ କରାଯାଇଥିଲା। [ଲିଙ୍କ]

ପ୍ରଧାନମନ୍ତ୍ରୀ ନେତାନ୍ୟାହୁଙ୍କର ସ୍ନେହପୂର୍ଣ୍ଣ ଆତିଥ୍ୟ ପାଇଁ ପ୍ରଧାନମନ୍ତ୍ରୀ ତାଙ୍କୁ ଧନ୍ୟବାଦ ଜଣାଇଥିଲେ।

*****

MT