سکریٹری (پٹرولیم) نے ملک بھر میں ایندھن کی فراہمی کی صورتحال کا جائزہ لینے کے لیے تمام ریاستوں اور مرکز کے زیرِ انتظام علاقوں کے ایڈیشنل چیف سیکریٹریز اور پرنسپل سیکریٹریز (خوراک و شہری رسدات) کے ساتھ ایک اجلاس کی صدارت کی۔

انہوں نے ریاستوں اور مرکز کے زیرِ انتظام علاقوں کو ضروری پٹرولیم ایندھن کی فراہمی کو بہتر بنانے کے لیے حکومت کی جانب سے کیے گئے اقدامات سے آگاہ کیا اور موجودہ صورتحال سے نمٹنے کے لیے مرکزی حکومت کے ساتھ تعاون پر ان کی ستائش کی۔

سکریٹری (پٹرولیم) نے زور دیا کہ ریاستیں اور مرکز کے زیرِ انتظام علاقے گھریلو صارفین اور ضروری شعبوں کو بلا تعطل فراہمی یقینی بنانے کے لیے ایل پی جی کی تقسیم کو مؤثر طور پر منظم کریں اور ترجیح دیں۔ انہوں نے ساتھ ہی ذخیرہ اندوزی، غیر قانونی منتقلی اور افواہوں کے پھیلاؤ کے خلاف سخت نگرانی برقرار رکھنے کی بھی ہدایت دی، کیونکہ یہ غیر ضروری گھبراہٹ کا باعث بن سکتے ہیں۔

اتر پردیش، گجرات، ہریانہ، دہلی، مہاراشٹر اور آندھرا پردیش جیسی ریاستوں کو فعال نفاذی اقدامات، بشمول بے ضابطگیوں کے خلاف چھاپوں، پر سراہا گیا۔ دیگر ریاستوں کو ہدایت دی گئی کہ وہ نگرانی اور نفاذ کو مزید مضبوط کریں اور حکم عدولی کرنے والوں کے خلاف مثالی کارروائی کریں۔ ریاستوں سے یہ بھی کہا گیا کہ وہ ایندھن کی فراہمی کے حوالے سے غلط معلومات اور افواہوں کے پھیلاؤ کو روکنے کے لیے سرگرم کردار ادا کریں۔

مہاجر مزدوروں کے لیے ایف ٹی ایل ایل پی جی سپلائی سے متعلق خبروں پر ریاستوں نے وضاحت کی کہ ایل پی جی کی فراہمی میں کوئی رکاوٹ نہیں ہے اور سپلائی مستحکم ہے۔ سکریٹری نے بتایا کہ ریاستیں مقامی ضروریات کے مطابق آئل مارکیٹنگ کمپنیوں  (او ایم سیز) کے ساتھ مل کر 5 کلوگرام ایف ٹی ایل ایل پی جی سلنڈروں کی ہدفی تقسیم پر غور کر سکتی ہیں۔ آٹو رکشوں کے لیے ایل پی جی کے حوالے سے واضح کیا گیا کہ اس طلب کو پورا کرنے کی کوششیں جاری ہیں اور ایسے آٹو جو ایل پی جی اور پٹرول دونوں پر چل سکتے ہیں، انہیں پٹرول کے استعمال کی ترغیب دی جانی چاہیے۔

سکریٹری (پٹرولیم) نے تمام ریاستوں اور مرکز کے زیرِ انتظام علاقوں کے تعاون کو سراہا اور فراہمی کے استحکام کو یقینی بنانے اور عوامی اعتماد برقرار رکھنے کے لیے مسلسل قریبی نگرانی جاری رکھنے پر زور دیا۔

******

ش ح۔ ش ا ر۔ ول

Uno-5368