దేశంలో సులభతర వాణిజ్యాన్నీ, జీవన సౌలభ్యాన్నీ మరింత మెరుగుపరిచే దిశగా కీలక ముందడుగు పడింది. జనవిశ్వాస్ (నిబంధనల సవరణ) బిల్లు - 2026కు లోక్‌సభ, రాజ్యసభలు ఆమోదం తెలిపాయి.

విశ్వాసమే ప్రాతిపదికగా పాలన యంత్రాంగాన్ని మరింత మెరుగుపరిచేందుకూ, తగిన నియంత్రణలను అమలు చేసేందుకూ ప్రభుత్వం కట్టుబడి ఉందని ఈ బిల్లు స్పష్టం చేస్తోంది. చిన్నపాటి తప్పిదాలను నేరాలుగా పరిగణించకపోవడం, ప్రస్తుతమున్న చట్టపరమైన నిబంధనలను హేతుబద్ధీకరించడం ద్వారా.. వ్యక్తులు, వ్యాపార సంస్థలపై పాటించాల్సిన నిబంధనల భారాన్ని తగ్గించడం ఈ బిల్లు ముఖ్యోద్దేశం.

ఈ బిల్లులోని నిబంధనల ప్రకారం.. 23 మంత్రిత్వ శాఖల పరిధిలోని 79 కేంద్ర చట్టాలకు సంబంధించి మొత్తం 784 నిబంధనలను సవరించారు. వీటిలో వాణిజ్య సౌలభ్యాన్ని పెంపొందించడం లక్ష్యంగా.. గతంలో చిన్న తప్పిదాలనే నేరాలుగా భావించే 717 నిబంధనల స్వభావాన్ని మార్చారు. ఇకపై వాటిని నేరాలుగా పరిగణించబోరు. అలాగే మరో 67 నిబంధనలను సవరించి జీవన సౌలభ్యాన్ని మెరుగుపరిచారు.

మొత్తంగా చూస్తే, చిన్న తప్పిదాలనే నేరాలుగా పరిగణిస్తున్న వెయ్యికి పైగా నిబంధనలను హేతుబద్ధీకరించాలని ఈ బిల్లు లక్ష్యంగా పెట్టుకుంది. చిన్నపాటి ఉల్లంఘనలను నేరాల జాబితా నుంచి తొలగించడం, తద్వారా దేశంలోని నియంత్రణ వాతావరణాన్ని మెరుగుపరచడమే కాకుండా.. వ్యాపార సంస్థలకూ, పౌరులకూ మరింత అనుకూలమైన వ్యవస్థను అందుబాటులోకి తేవడానికి ఇది దోహదపడుతుంది.

మొదట 2025 ఆగస్టు 18న ‘జనవిశ్వాస్ (నిబంధనల సవరణ) బిల్లు- 2025’ పేరిట లోక్‌సభలో ఈ బిల్లును ప్రవేశపెట్టారు. ఈ బిల్లు 10 మంత్రిత్వ శాఖలు/విభాగాల పరిధిలోని 16 కేంద్ర చట్టాలలోని 355 నిబంధనలకు సవరణలను ప్రతిపాదించింది. అనంతరం లోక్‌సభ.. ఎంపిక కమిటీకి ఈ బిల్లును సిఫార్సు చేసింది. శ్రీ తేజస్వి సూర్య అధ్యక్షతన ఈ కమిటీ 49 సమావేశాలు నిర్వహించి, 2026 మార్చి 13న తన నివేదికను సమర్పించింది. సంబంధిత భాగస్వామ్య పక్షాలన్నింటితో ఈ కమిటీ విస్తృతంగా సంప్రదింపులు నిర్వహించింది. పరిశీలనలో ఉన్న నిబంధనలతోపాటు.. అవే చట్టాల్లోని మరిన్ని నిబంధనలనూ సమీక్షించింది. మరో 62 కేంద్ర చట్టాల్లో.. చిన్నపాటి ఉల్లంఘనలను కూడా నేరాలుగా పరిగణించేలా ఉన్న నిబంధనలను సవరించాలని సిఫార్సు చేసింది.

***