جن وشواس (ترمیمِ دفعات) بل، 2026 لوک سبھا اور راجیہ سبھا سے منظور ہو چکا ہے، جو ملک میں کاروبار کرنے میں آسانی اور عوامی زندگی کو سہل بنانے کی سمت ایک اہم قدم ہے۔

یہ بل حکومت کے اس عزم کی عکاسی کرتا ہے کہ اعتماد پر مبنی طرزِ حکمرانی کو فروغ دیا جائے اور قوانین کو متناسب اور متوازن بنایا جائے۔ اس کا مقصد معمولی نوعیت کے جرائم کو غیر مجرمانہ بنا کر اور موجودہ قانونی دفعات کو معقول بنا کر افراد اور کاروباری اداروں پر تعمیل کا بوجھ کم کرنا ہے۔

بل کی دفعات کے مطابق، 23 وزارتوں کے زیر انتظام 79 مرکزی قوانین کی مجموعی طور پر 784 دفعات میں ترمیم کی گئی ہے۔ ان میں سے 717 دفعات کو غیر مجرمانہ قرار دیا گیا ہے تاکہ کاروبار میں آسانی کو فروغ دیا جا سکے، جبکہ 67 دفعات میں ترمیم کر کے عوامی زندگی کو مزید سہل بنانے کی کوشش کی گئی ہے۔

مجموعی طور پر، یہ بل ایک ہزار سے زائد جرائم کو معقول بنانے کا ہدف رکھتا ہے، جس کے تحت معمولی نوعیت کے جرائم کو ختم کیا جائے گا۔ اس اقدام سے ضابطہ جاتی نظام بہتر ہوگا اور کاروبار و شہریوں دونوں کے لیے ایک سازگار ماحول فراہم ہوگا۔

یہ بل ابتدا میں 18 اگست 2025 کو لوک سبھا میں جن وشواس (ترمیمِ دفعات) بل، 2025 کے طور پر پیش کیا گیا تھا۔ اس میں 10 وزارتوں/محکموں کے تحت آنے والے 16 مرکزی قوانین کی 355 دفعات میں ترمیم کی تجویز دی گئی تھی، جسے بعد ازاں لوک سبھا کی ایک منتخب کمیٹی کے سپرد کر دیا گیا۔

منتخب کمیٹی، جس کی صدارت جناب تیجسوی سوریہ نے کی، نے 49 اجلاس منعقد کیے اور 13 مارچ 2026 کو اپنی رپورٹ پیش کی۔ کمیٹی نے مختلف متعلقہ فریقین سے وسیع مشاورت کی اور زیرِ غور دفعات کے علاوہ انہی قوانین میں مزید دفعات کا بھی جائزہ لیا، ساتھ ہی 62 اضافی مرکزی قوانین میں بھی غیر مجرمانہ بنانے کی سفارش کی۔

******

ش ح۔ ش ا ر۔ ول

Uno-5359