പ്രധാനമന്ത്രി ശ്രീ നരേന്ദ്ര മോദി 2026 മാർച്ച് 28-ന് ഉത്തർപ്രദേശ് സന്ദർശിക്കും; അന്നേദിവസം രാവിലെ ഏകദേശം 11:30-ന് ഗൗതം ബുദ്ധ നഗറിലെ ജെവാറിലുള്ള നോയിഡ ഇന്റർനാഷണൽ എയർപോർട്ടിന്റെ ടെർമിനൽ കെട്ടിടം അദ്ദേഹം സന്ദർശിച്ച് വിലയിരുത്തും. തുടർന്ന് ഉച്ചയ്ക്ക് 12 മണിയോടെ വിമാനത്താവളത്തിന്റെ ഒന്നാം ഘട്ടത്തിൻ്റെ ഉദ്ഘാടനം നിർവ്വഹിക്കുന്ന പ്രധാനമന്ത്രി, അവിടെ സംഘടിപ്പിക്കുന്ന പൊതുസമ്മേളനത്തെ അഭിസംബോധന ചെയ്യുകയും ചെയ്യും.

നോയിഡ ഇന്റർനാഷണൽ എയർപോർട്ടിന്റെ ഉദ്ഘാടനം ഇന്ത്യയെ ഒരു ആഗോള വ്യോമയാന ഹബ്ബാക്കി മാറ്റുന്നതിനുള്ള യാത്രയിലെ സുപ്രധാന നാഴികക്കല്ലാണ്. നാഷണൽ ക്യാപിറ്റൽ റീജിയണിന്റെ (NCR) പ്രധാന അന്താരാഷ്ട്ര കവാടമായി വിഭാവനം ചെയ്തിട്ടുള്ള ഈ വിമാനത്താവളം, രാജ്യത്തിന്റെ വിമാനത്താവള അടിസ്ഥാന സൗകര്യങ്ങൾ ശക്തിപ്പെടുത്തുന്നതിനും പ്രാദേശികവും അന്തർദ്ദേശീയവുമായ കണക്റ്റിവിറ്റി വർദ്ധിപ്പിക്കുന്നതിനുമുള്ള വലിയൊരു ചുവടുവെപ്പാണ്. ഇന്ദിരാഗാന്ധി അന്താരാഷ്ട്ര വിമാനത്താവളത്തിന് പൂരകമായി ഡൽഹി എൻസിആർ മേഖലയിലെ രണ്ടാമത്തെ അന്താരാഷ്ട്ര വിമാനത്താവളമായാണ് നോയിഡ ഇന്റർനാഷണൽ എയർപോർട്ട് വികസിപ്പിച്ചിരിക്കുന്നത്. ഈ രണ്ട് വിമാനത്താവളങ്ങളും ഒരു സംയോജിത വ്യോമയാന സംവിധാനമായി പ്രവർത്തിക്കുന്നതിലൂടെ തിരക്ക് കുറയ്ക്കാനും യാത്രാശേഷി വർദ്ധിപ്പിക്കാനും ഡൽഹി എൻസിആറിനെ ലോകത്തിലെ മുൻനിര വ്യോമയാന ഹബ്ബുകൾക്കിടയിൽ പ്രതിഷ്ഠിക്കാനും സാധിക്കും.

ഇന്ത്യയിലെ ഏറ്റവും വലിയ ഗ്രീൻഫീൽഡ് എയർപോർട്ട് പ്രോജക്റ്റുകളിൽ ഒന്നാണ് നോയിഡ ഇന്റർനാഷണൽ എയർപോർട്ട്. പൊതു-സ്വകാര്യ പങ്കാളിത്ത (PPP) മാതൃകയിൽ ഏകദേശം ₹11,200 കോടി രൂപയുടെ മൊത്തം നിക്ഷേപത്തിലാണ് ഈ വിമാനത്താവളത്തിന്റെ ഒന്നാം ഘട്ടം വികസിപ്പിച്ചിരിക്കുന്നത്. തുടക്കത്തിൽ പ്രതിവർഷം 1.2 കോടി (12 MPPA) യാത്രക്കാരെ കൈകാര്യം ചെയ്യാൻ ശേഷിയുള്ള ഈ വിമാനത്താവളം, പൂർണ്ണമായി വികസിപ്പിക്കുന്നതോടെ 7 കോടി (70 MPPA) യാത്രക്കാരെ വരെ ഉൾക്കൊള്ളാൻ സാധിക്കുന്ന രീതിയിലാണ് വിഭാവനം ചെയ്തിരിക്കുന്നത്. വലിയ വിമാനങ്ങൾ  കൈകാര്യം ചെയ്യാൻ ശേഷിയുള്ള 3,900 മീറ്റർ നീളമുള്ള റൺവേയും, എല്ലാ കാലാവസ്ഥയിലും 24 മണിക്കൂറും കാര്യക്ഷമമായ പ്രവർത്തനം ഉറപ്പാക്കുന്ന ഇൻസ്ട്രുമെന്റ് ലാൻഡിംഗ് സിസ്റ്റം (ILS), അത്യാധുനിക എയർഫീൽഡ് ലൈറ്റിംഗ് തുടങ്ങിയ ആധുനിക നാവിഗേഷൻ സംവിധാനങ്ങളും ഇവിടെ ഒരുക്കിയിട്ടുണ്ട്.

സംയോജിത കാർഗോ ടെർമിനലും ലോജിസ്റ്റിക് സോണുകളും ഉൾപ്പെടുന്ന ശക്തമായ ഒരു ചരക്ക് നീക്ക സംവിധാനവും ഈ വിമാനത്താവളത്തിലുണ്ട്. പ്രതിവർഷം 2.5 ലക്ഷം മെട്രിക് ടണ്ണിലധികം ചരക്ക് കൈകാര്യം ചെയ്യാൻ ശേഷിയുള്ള ഈ സംവിധാനം ഭാവിയിൽ 18 ലക്ഷം മെട്രിക് ടണ്ണായി ഉയർത്താൻ സാധിക്കും. കൂടാതെ, വിമാനങ്ങളുടെ അറ്റകുറ്റപ്പണികൾക്കായി (MRO) 40 ഏക്കറിൽ പ്രത്യേക സൗകര്യവും ഇവിടെ ഒരുക്കിയിട്ടുണ്ട്.

സുസ്ഥിരവും ഭാവിയിലേക്കായി തയ്യാറെടുക്കുന്നതുമായ ഒരു അടിസ്ഥാന സൗകര്യ പദ്ധതിയായാണ് നോയിഡ ഇന്റർനാഷണൽ എയർപോർട്ട് വിഭാവനം ചെയ്തിരിക്കുന്നത്. ഊർജ്ജക്ഷമതയുള്ള സംവിധാനങ്ങളും പരിസ്ഥിതി സൗഹൃദ രീതികളും സംയോജിപ്പിച്ചുകൊണ്ട് 'നെറ്റ്-സീറോ എമിഷൻ' (Net-zero emissions) പദവി കൈവരിക്കാനാണ് ഇത് ലക്ഷ്യമിടുന്നത്. ഇന്ത്യൻ പൈതൃകത്തിൽ നിന്ന് പ്രചോദനം ഉൾക്കൊണ്ടാണ് വിമാനത്താവളത്തിന്റെ വാസ്തുവിദ്യ രൂപകൽപ്പന ചെയ്തിരിക്കുന്നത്. പരമ്പരാഗത ഘാട്ടുകളെയും ഹവേലികളെയും അനുസ്മരിപ്പിക്കുന്ന ഘടകങ്ങൾ ഉൾപ്പെടുത്തിക്കൊണ്ട് സാംസ്കാരിക സൗന്ദര്യവും ആധുനിക സൗകര്യങ്ങളും ഇവിടെ സമന്വയിപ്പിച്ചിരിക്കുന്നു.

യമുന എക്സ്പ്രസ് വേയ്ക്ക് സമീപം തന്ത്രപ്രധാനമായ സ്ഥാനത്താണ് ഈ വിമാനത്താവളം സ്ഥിതി ചെയ്യുന്നത്. റോഡ്, റെയിൽ, മെട്രോ, പ്രാദേശിക ഗതാഗത സംവിധാനങ്ങൾ എന്നിവയുമായി തടസ്സമില്ലാതെ ബന്ധിപ്പിക്കുന്ന ഒരു 'മൾട്ടി-മോഡൽ ട്രാൻസ്പോർട്ട് ഹബ്ബ്' ആയാണ് ഇത് ആസൂത്രണം ചെയ്തിരിക്കുന്നത്. ഇത് യാത്രക്കാർക്കും ചരക്ക് നീക്കത്തിനും മികച്ച കണക്റ്റിവിറ്റി ഉറപ്പാക്കുന്നു.

***

SK