નાણાકીય વર્ષ (FY) 2025-26માં સંરક્ષણ નિકાસ રૂ. 38,424 કરોડની સર્વકાલીન ઉચ્ચ સપાટીએ પહોંચી છે, જે અગાઉના નાણાકીય વર્ષના રૂ. 23,622 કરોડના આંકડા કરતા રૂ. 14,802 કરોડ (62.66%) નો જંગી વધારો દર્શાવે છે. આ સીમાચિહ્નરૂપ સિદ્ધિમાં, સંરક્ષણ જાહેર ક્ષેત્રના ઉપક્રમો (DPSUs) અને ખાનગી ક્ષેત્રે અનુક્રમે 54.84% અને 45.16% યોગદાન આપ્યું છે. ભારતીય સંરક્ષણ ઉદ્યોગની આ સિદ્ધિ પ્રધાનમંત્રી શ્રી નરેન્દ્ર મોદીના ભારતને વિશ્વના ટોચના સંરક્ષણ નિકાસકારોમાં સ્થાન અપાવવાના વિઝનને અનુરૂપ છે.

રક્ષા મંત્રી શ્રી રાજનાથ સિંહે સંરક્ષણ ઉત્પાદન વિભાગ, ભારતીય સંરક્ષણ નિકાસકારો અને અન્ય તમામ હિતધારકોના આ અનુકરણીય પ્રદર્શનની પ્રશંસા કરી છે અને ભારપૂર્વક જણાવ્યું છે કે ભારત સંરક્ષણ સાધનો માટે વૈશ્વિક ઉત્પાદન હબ બનવા તરફ આગળ વધી રહ્યું છે. X પર એક પોસ્ટમાં, રક્ષા મંત્રીએ જણાવ્યું હતું કે પીએમ મોદીના પ્રેરણાદાયી નેતૃત્વ હેઠળ, ભારત સંરક્ષણ નિકાસની પ્રભાવશાળી સફળતાની વાર્તા લખી રહ્યું છે.

DPSUs ની નિકાસમાં પાછલા વર્ષની સરખામણીમાં 151% નો ઉછાળો આવ્યો છે, જ્યારે ખાનગી કંપનીઓએ 14% નો વધારો નોંધીને તેમની મજબૂત હાજરી દર્શાવી છે. યોગદાનના મૂલ્યના સંદર્ભમાં, ખાનગી ક્ષેત્રનો સંરક્ષણ નિકાસમાં હિસ્સો રૂ. 17,353 કરોડ રહ્યો હતો, જ્યારે DPSUs એ રૂ. 21,071 કરોડનું યોગદાન આપ્યું હતું. અગાઉના નાણાકીય વર્ષમાં તેમના સંબંધિત આંકડા રૂ. 15,233 કરોડ અને રૂ. 8,389 કરોડ હતા.

આ રેકોર્ડનો ઉચ્ચ આંકડો છેલ્લા પાંચ વર્ષમાં લગભગ ત્રણ ગણો વધારો સૂચવે છે.

આ તીવ્ર ઉછાળો ભારતીય બનાવટના સંરક્ષણ ઉત્પાદનોની વધતી વૈશ્વિક સ્વીકૃતિ અને આંતરરાષ્ટ્રીય સપ્લાય ચેઈનમાં આ ક્ષેત્રના વધતા સંકલનને હાઇલાઇટ કરે છે. સિસ્ટમ્સ/સબ-સિસ્ટમ્સ માટે સફળ વૈશ્વિક ભાગીદાર હોવા ઉપરાંત, ભારત નાણાકીય વર્ષ 2025-26 સુધીમાં 80 થી વધુ દેશોમાં સંરક્ષણ સાધનોની નિકાસ કરી રહ્યું છે. નિકાસકારોની સંખ્યા 128 થી વધીને 145 થઈ ગઈ છે, જે અગાઉના નાણાકીય વર્ષ કરતા 13.3% નો વધારો છે.

ઇઝ ઓફ ડૂઇંગ બિઝનેસ અને સંરક્ષણ નિકાસકારોની સુવિધા માટે સરકારના સતત પ્રયાસોએ કાર્યક્ષમતાલક્ષી અને વૈશ્વિક સ્તરે સ્પર્ધાત્મક સંરક્ષણ ઉદ્યોગ માટે માર્ગ મોકળો કર્યો છે. આ વૃદ્ધિના માર્ગમાં સંરક્ષણ નિકાસકારોને ટેકો આપવા માટે, સંરક્ષણ ઉત્પાદન વિભાગે સુધારેલા ઓનલાઈન પોર્ટલ અને અધિકૃતતા માટે સરળ સ્ટાન્ડર્ડ ઓપરેશન પ્રોસિજર (SOP) સાથે સંરક્ષણ નિકાસ નિયમનકારી પ્રક્રિયાઓને સુવ્યવસ્થિત કરી છે.

SM/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com