بھارتی بحریہ نے 27 مارچ 2026 کو جنوبی بحری کمان کوچی کے میری ٹائم وارفیئر سینٹر میں آئی او این ایس بحری مشق (آئی میکس) ٹی ٹی ایکس 2026 کی میزبانی کی۔ اس اعلیٰ سطحی اجلاس میں بحرِ ہند بحری سمپوزیم (آئی او این ایس) کے رکن ممالک کی بحری افواج کے ممتاز نمائندوں، آئی او ایس ساگر کے بین الاقوامی افسران اور بھارتی بحریہ کے افسران نے شرکت کی، جہاں بحرِ ہند کے خطے میں ابھرتے ہوئے غیر روایتی بحری سلامتی کے چیلنجز پر غور و خوض کیا گیا۔

اس مشق میں بنگلہ دیش، فرانس، انڈونیشیا، کینیا، مالدیپ، ماریشس، میانمار، سیشلز، سنگاپور، سری لنکا، تنزانیہ اور تیمور-لیستے نے شرکت کی۔ یہ متنوع کثیر قومی شرکت خطے میں باہمی اعتماد کو فروغ دینے اور مشترکہ بحری سلامتی کو مضبوط بنانے کے عزم کی عکاسی کرتی ہے۔ 16 برس کے وقفے کے بعد جب بھارت 2026 تا 2028 کے لیے آئی او این ایس کی سربراہی سنبھال رہا ہے، تو آئی میکس ٹی ٹی ایکس 2026 علاقائی بحری قیادت کو مستحکم کرنے میں ایک اہم سنگِ میل ثابت ہوا ہے۔

جدید نقلی ماحول میں منعقد کی جانے والی اس مشق میں بحرِ ہند کے خطے میں درپیش پیچیدہ بحری سلامتی کے مسائل کا جائزہ لیا گیا، جو عالمی تجارت، توانائی کی ترسیل اور روابط کے لیے نہایت اہم خطہ ہے۔ اس کے بنیادی مقاصد میں شریک بحری افواج کے درمیان عملی طریقۂ کار اور حدود کے بارے میں مشترکہ فہم کو بہتر بنانا، معلومات کے تبادلے اور فیصلہ سازی جیسے باہمی رابطہ نظاموں کا جائزہ لینا اور آئی او این ایس کے ڈھانچے کو مزید بہتر بنانے میں معاونت فراہم کرنا شامل تھا، جس میں عملی اطلاق کے ذریعے بحری سلامتی کے رہنما اصولوں کی توثیق بھی شامل ہے۔

حقیقی تعیناتی کی پابندیوں کے بغیر مختلف منظرناموں کی مشق کے ذریعے شرکاء کو پیشہ ورانہ تبادلے کے نئے مواقع تلاش کرنے اور باہمی اعتماد کو مزید گہرا کرنے کا موقع ملا۔ آئی میکس ٹی ٹی ایکس 2026 نے تعمیری مکالمے، اجتماعی ذمہ داری اور علاقائی سطح پر وضع کردہ حل کے ذریعے تعاون کے ایک مؤثر پلیٹ فارم کے طور پر آئی او این ایس کے کردار کی توثیق کی۔

اس مشق سے حاصل ہونے والی بصیرت سے توقع ہے کہ آئی او این ایس کے ڈھانچے کو مزید مضبوطی حاصل ہوگی، جس کے نتیجے میں بحرِ ہند کے خطے میں ایک مربوط، فعال اور مستحکم بحری نظام کو یقینی بنایا جا سکے گا۔

******

ش ح۔ ش ا ر۔ ول

Uno-5087