വ്യവസായ വളർച്ച ത്വരിതപ്പെടുത്തുന്നതിനുള്ള ഒരു സുപ്രധാന ചുവടുവെപ്പായി രാജ്യത്തുടനീളം 100 പ്ലഗ്-ആൻഡ്-പ്ലേ വ്യവസായ പാർക്കുകൾ വികസിപ്പിക്കുന്നതിനായി 33,660 കോടി രൂപ അനുവദിച്ചുകൊണ്ട് ഭാരത് ഔദ്യോഗിക വികാസ് യോജനയ്ക്ക് (BHAVYA) പ്രധാനമന്ത്രി ശ്രീ നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭ അംഗീകാരം നൽകി.

ലോകോത്തര വ്യവസായ അടിസ്ഥാന സൗകര്യങ്ങൾ വികസിപ്പിക്കുക, ഉൽപ്പാദന ശേഷി വർദ്ധിപ്പിക്കുക, ഇന്ത്യയുടെ വളർച്ചാ ​ഗാഥയ്ക്ക് കരുത്തുപകരുക എന്നിവയാണ് ഈ പദ്ധതി ലക്ഷ്യമിടുന്നത്.

വികസിത ഭാരതത്തിനായുള്ള വ്യാവസായിക അടിത്തറ പാകുന്നു:

നാഷണൽ ഇൻഡസ്ട്രിയൽ കോറിഡോർ ഡെവലപ്‌മെന്റ് പ്രോഗ്രാം (NICDP) ചട്ടക്കൂടിന് കീഴിൽ വികസിപ്പിച്ച ഇൻഡസ്ട്രിയൽ സ്മാർട്ട് സിറ്റികളുടെ വിജയം ഉൾക്കൊണ്ട്, സംസ്ഥാനങ്ങളുടെയും സ്വകാര്യ മേഖലയുടെയും പങ്കാളിത്തത്തോടെയായിരിക്കും 'BHAVYA ' നടപ്പിലാക്കുക.

അനുമതികളിൽ നിന്ന് പ്രവർത്തനങ്ങളിലേക്ക്: ബിസിനസ് എളുപ്പമാക്കുന്നതിനുള്ള പുതിയ രീതി

നിയന്ത്രണങ്ങൾ ലഘൂകരിക്കുന്നതിനും ബിസിനസ് എളുപ്പമാക്കുന്നതിനും വേണ്ടിയുള്ള ശക്തമായ നീക്കമാണ് 'BHAVYA'യുടെ കാതൽ. ഇതിനായി കാര്യക്ഷമമായ ഏകജാലക സംവിധാനങ്ങളും സംസ്ഥാനങ്ങളുടെ നേതൃത്വത്തിലുള്ള നിക്ഷേപ സൗഹൃദ പരിഷ്കാരങ്ങളും നടപ്പിലാക്കും.

വ്യവസായങ്ങൾക്ക് തങ്ങളുടെ ലക്ഷ്യത്തിൽ നിന്ന് ഉൽപ്പാദനത്തിലേക്ക് വേഗത്തിലും കൃത്യതയോടും കൂടി നീങ്ങാൻ പ്രാപ്തമാക്കുന്ന 'പ്ലഗ്-ആൻഡ്-പ്ലേ' വ്യവസായ ആവാസവ്യവസ്ഥകൾ ഈ പദ്ധതി നൽകും. മുൻകൂട്ടി അനുമതി ലഭിച്ച ഭൂമി, സജ്ജമായ അടിസ്ഥാന സൗകര്യങ്ങൾ, സംയോജിത സേവനങ്ങൾ എന്നിവയോടെ നിക്ഷേപകർക്കുള്ള തടസ്സങ്ങൾ ഗണ്യമായി കുറയ്ക്കാൻ 'ഭവ്യ' സഹായിക്കും.

ഈ പദ്ധതിക്ക് കീഴിൽ 100 മുതൽ 1000 ഏക്കർ വരെയുള്ള വ്യവസായ പാർക്കുകൾ വികസനത്തിനായി ഏറ്റെടുക്കും. താഴെ പറയുന്നവയ്ക്കായി ഒരു ഏക്കറിന് ഒരു കോടി രൂപ വരെ സാമ്പത്തിക സഹായം നൽകും:

* അടിസ്ഥാന സൗകര്യങ്ങൾ (ആഭ്യന്തര റോഡുകൾ, ഭൂഗർഭ ഉപയോഗ സംവിധാനങ്ങൾ, ഡ്രെയിനേജ്, പൊതു സംസ്കരണ സംവിധാനങ്ങൾ, ഐസിടി, ഭരണനിർവ്വഹണ സംവിധാനങ്ങൾ)

* മൂല്യവർദ്ധിത അടിസ്ഥാന സൗകര്യങ്ങൾ റെഡി-ബിൽറ്റ് ഫാക്ടറി ഷെഡുകൾ, ബിൽറ്റ്-ടു-സ്യൂട്ട് യൂണിറ്റുകൾ, ടെസ്റ്റിംഗ് ലാബുകൾ, വെയർഹൗസിംഗ്)

*  സാമൂഹിക അടിസ്ഥാന സൗകര്യങ്ങൾ (തൊഴിലാളികൾക്കുള്ള പാർപ്പിടവും സഹായ സൗകര്യങ്ങളും)

നിലവിലുള്ള ശൃംഖലകളുമായുള്ള തടസ്സമില്ലാത്ത കണക്റ്റിവിറ്റിയും സംയോജനവും ഉറപ്പാക്കിക്കൊണ്ട് പദ്ധതി ചെലവിന്റെ 25% വരെ ബാഹ്യ അടിസ്ഥാന സൗകര്യങ്ങൾക്കും പിന്തുണ നൽകും.

ഉയർന്ന നിലവാരമുള്ളതും പരിഷ്കരണാധിഷ്ഠിതവും നിക്ഷേപത്തിന് സജ്ജവുമായ നിർദ്ദേശങ്ങൾ മാത്രം മുന്നോട്ട് കൊണ്ടുപോകുന്നുവെന്ന് ഉറപ്പാക്കാൻ 'ചലഞ്ച് മോഡ്' വഴിയായിരിക്കും പദ്ധതി തിരഞ്ഞെടുപ്പ് നടത്തുക.

ഭാവിസജ്ജവും സുസ്ഥിരവും കാര്യക്ഷമവുമായ വ്യവസായ പാർക്കുകൾ:

ഭാവിയെ മുൻനിർത്തിയും സുസ്ഥിരവുമായ ആവാസവ്യവസ്ഥകളായിട്ടാണ് വ്യവസായ പാർക്കുകൾ രൂപകൽപ്പന ചെയ്യുക:

*  തടസ്സമില്ലാത്ത മൾട്ടിമോഡൽ കണക്റ്റിവിറ്റിയും കാര്യക്ഷമമായ ലാസ്റ്റ്-മൈൽ ആക്സസും സാധ്യമാക്കുന്നതിന് പിഎം ഗതിശക്തി തത്വങ്ങളുമായി ഇതിനെ യോജിപ്പിച്ചിരിക്കുന്നു.

*  കാര്യക്ഷമമായ അറ്റകുറ്റപ്പണികൾക്കും തടസ്സമില്ലാത്ത വ്യവസായ പ്രവർത്തനങ്ങൾക്കും ഖനനം ചെയ്യാത്ത സാഹചര്യം സൃഷ്ടിക്കുന്ന സംയോജിത ഭൂഗർഭ കോറിഡോറുകൾക്കൊപ്പം ഹരിത ഊർജ്ജവും വിഭവങ്ങളുടെ സുസ്ഥിരമായ ഉപയോഗവും ഉറപ്പാക്കുന്നു.

വ്യാവസായിക അടിസ്ഥാന സൗകര്യങ്ങളിൽ പുതിയ മാനദണ്ഡങ്ങൾ സ്ഥാപിക്കുന്നതിനും വിശ്വാസ്യത ഉറപ്പാക്കുന്നതിനും കാര്യക്ഷമതയില്ലായ്മ കുറയ്ക്കുന്നതിനും വിവിധ മേഖലകളിലെ ഉൽപ്പാദനക്ഷമത വർദ്ധിപ്പിക്കുന്നതിനും ഈ പാർക്കുകൾ സഹായിക്കും

വിവിധ മേഖലകളിൽ തൊഴിൽ, നിക്ഷേപം, സാമ്പത്തിക വളർച്ച എന്നിവ വർദ്ധിപ്പിക്കുന്നു:

BHAVYA വൻതോതിലുള്ള തൊഴിലവസരങ്ങൾ സൃഷ്ടിക്കുമെന്നും നിർമ്മാണം, ലോജിസ്റ്റിക്സ്, സേവന മേഖലകളിൽ ഗണ്യമായ നേരിട്ടുള്ളതും അല്ലാത്തതുമായ തൊഴിലുകൾ ഉറപ്പാക്കിക്കൊണ്ട് വലിയ നിക്ഷേപങ്ങളെ ഉത്തേജിപ്പിക്കുമെന്നും പ്രതീക്ഷിക്കുന്നു.

ഈ പദ്ധതി എല്ലാ സംസ്ഥാനങ്ങളിലേക്കും കേന്ദ്രഭരണ പ്രദേശങ്ങളിലേക്കും വ്യാപിപ്പിക്കും; ഇത് രാജ്യത്തുടനീളം ലക്ഷക്കണക്കിന് തൊഴിലവസരങ്ങൾ സൃഷ്ടിക്കുകയും രാജ്യവ്യാപകമായി വ്യവസായ വളർച്ച ത്വരിതപ്പെടുത്തുകയും ചെയ്യും.

ക്ലസ്റ്റർ അധിഷ്ഠിത വികസനം പ്രോത്സാഹിപ്പിക്കുന്നതിലൂടെയും വ്യവസായങ്ങൾ, വിതരണക്കാർ, സേവന ദാതാക്കൾ എന്നിവർക്ക് ഒരേ സ്ഥലത്ത് പ്രവർത്തിക്കാൻ സൗകര്യമൊരുക്കുന്നതിലൂടെയും ഭാവ്യ ആഭ്യന്തര വിതരണ ശൃംഖലകളെ ശക്തിപ്പെടുത്തുകയും പ്രാദേശിക വ്യവസായവൽക്കരണം പ്രോത്സാഹിപ്പിക്കുകയും ദശലക്ഷക്കണക്കിന് ആളുകൾക്ക് പുതിയ അവസരങ്ങൾ സൃഷ്ടിക്കുകയും ചെയ്യും.

ഈ പദ്ധതിയുടെ ഗുണഭോക്താക്കൾ:

*  പ്രാഥമിക ഗുണഭോക്താക്കൾ: നിർമ്മാണ യൂണിറ്റുകൾ, എംഎസ്എംഇകൾ, സ്റ്റാർട്ടപ്പുകൾ, ഉപയോഗസജ്ജമായ വ്യാവസായിക അടിസ്ഥാന സൗകര്യങ്ങൾ തേടുന്ന ആഗോള നിക്ഷേപകർ.

*  ദ്വിതീയ ഗുണഭോക്താക്കൾ: തൊഴിലാളികൾ, ലോജിസ്റ്റിക്സ് സേവന ദാതാക്കൾ, സേവന മേഖലയിലെ സംരംഭങ്ങൾ, പ്രാദേശിക സമൂഹങ്ങൾ.

ആത്മനിർഭർ ഭാരതത്തിലേക്കുള്ള ഇന്ത്യയുടെ പ്രയാണത്തിൽ BHAVYAയുടെ അംഗീകാരം ഒരു വലിയ മാറ്റത്തിന് വഴിയൊരുക്കും; ഇത് രാജ്യത്തിന്റെ ഉൽപ്പാദന ശേഷി ശക്തിപ്പെടുത്തുകയും കയറ്റുമതി വർദ്ധിപ്പിക്കുകയും സുസ്ഥിരവും ഉൾക്കൊള്ളുന്നതും ആഗോളതലത്തിൽ മത്സരശേഷിയുള്ളതുമായ ഒരു സമ്പദ്‌വ്യവസ്ഥയ്ക്ക് അടിത്തറയിടുകയും ചെയ്യും.

എൻഐസിഡിസി (NICDC) യെക്കുറിച്ച്:

കേന്ദ്ര വാണിജ്യ വ്യവസായ മന്ത്രാലയത്തിന് കീഴിലുള്ള ഡിപ്പാർട്ട്മെന്റ് ഫോർ പ്രൊമോഷൻ ഓഫ് ഇൻഡസ്ട്രി ആൻഡ് ഇന്റേണൽ ട്രേഡിന്റെ (DPIIT) നിയന്ത്രണത്തിലുള്ള നാഷണൽ ഇൻഡസ്ട്രിയൽ കോറിഡോർ ഡെവലപ്‌മെന്റ് കോർപ്പറേഷൻ ലിമിറ്റഡ് (NICDC), നിർമ്മാണ മത്സരശേഷി വർദ്ധിപ്പിക്കുന്നതിനും നിക്ഷേപങ്ങൾ ആകർഷിക്കുന്നതിനും തൊഴിലവസരങ്ങൾ സൃഷ്ടിക്കുന്നതിനുമായി ലോകോത്തര ഗ്രീൻഫീൽഡ് ഇൻഡസ്ട്രിയൽ സ്മാർട്ട് സിറ്റികളുടെ വികസനത്തിന് നേതൃത്വം നൽകുന്നു. എൻഐസിഡിസി നിലവിൽ 13 സംസ്ഥാനങ്ങളിലായി 20 പദ്ധതികൾ നടപ്പിലാക്കി വരുന്നു.

എൻഐസിഡിസിയുടെ നേതൃത്വത്തിലുള്ള സംരംഭങ്ങൾ പ്ലഗ്-ആൻഡ്-പ്ലേ ഇൻഡസ്ട്രിയൽ പാർക്കുകൾ എന്ന ആശയത്തിലാണ് നിർമ്മിച്ചിരിക്കുന്നത്—ഭൂമി, സേവനങ്ങൾ, അംഗീകാരങ്ങൾ, അടിസ്ഥാന സൗകര്യങ്ങൾ എന്നിവ മുൻകൂട്ടി വികസിപ്പിച്ചെടുത്ത ഉപയോഗസജ്ജമായ ആവാസവ്യവസ്ഥകളാണിവ. ഇത് ഭൂമി ഏറ്റെടുക്കലോ അടിസ്ഥാന സൗകര്യമൊരുക്കലോ മൂലമുണ്ടാകുന്ന കാലതാമസമില്ലാതെ വ്യവസായങ്ങൾ വേഗത്തിൽ ആരംഭിക്കാൻ സഹായിക്കുന്നു.

-SK-