ಕೇಂದ್ರ ಕೃಷಿ ಮತ್ತು ರೈತ ಕಲ್ಯಾಣ ಹಾಗೂ ಗ್ರಾಮೀಣಾಭಿವೃದ್ಧಿ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು ಶುಕ್ರವಾರ ನವದೆಹಲಿಯ ಕೃಷಿ ಭವನದಲ್ಲಿ ಕೃಷಿ ವಲಯದ ಒಟ್ಟಾರೆ ಸ್ಥಿತಿಗತಿಗಳ ಕುರಿತು ಉನ್ನತ ಮಟ್ಟದ ಸಮಗ್ರ ಪರಿಶೀಲನಾ ಸಭೆ ನಡೆಸಿದರು. ಇತ್ತೀಚಿನ ಅತಿಯಾದ ಮಳೆ, ಭಾರೀ ಮಳೆ, ಆಲಿಕಲ್ಲು ಮಳೆ ಮತ್ತು ಇತರ ಪ್ರತಿಕೂಲ ಹವಾಮಾನ ಪರಿಸ್ಥಿತಿಗಳಿಂದಾಗಿ ಹಲವಾರು ರಾಜ್ಯಗಳಲ್ಲಿ ರೈತರು ಅನುಭವಿಸಿರುವ ನಷ್ಟಗಳ ಬಗ್ಗೆ ಸಭೆಯಲ್ಲಿ ಸುದೀರ್ಘವಾಗಿ ಚರ್ಚಿಸಲಾಯಿತು. ರೈತರ ತುರ್ತು ಅಗತ್ಯಗಳು, ವಿಮಾ ಕ್ಲೈಮುಗಳ ಪ್ರಕ್ರಿಯೆ ಮತ್ತು ಪರಿಹಾರ ಕಾರ್ಯವಿಧಾನಗಳ ಕಾರ್ಯವೈಖರಿಯ ಬಗ್ಗೆಯೂ ವಿವರವಾದ ಚರ್ಚೆಗಳು ನಡೆದವು. ಪರಿಶೀಲನೆಯ ನಂತರ ಮಾಧ್ಯಮಗಳೊಂದಿಗೆ ಮಾತನಾಡಿದ ಶ್ರೀ ಚೌಹಾಣ್ ಅವರು, ಸರ್ಕಾರದ ಗಮನವು ಕೇವಲ ಉತ್ಪಾದನೆಗೆ ಮಾತ್ರ ಸೀಮಿತವಾಗಿಲ್ಲ, ಬದಲಿಗೆ ಬೆಳೆ ಹಾನಿಯ ವೈಜ್ಞಾನಿಕ ಮೌಲ್ಯಮಾಪನ, ವಿಮಾ ಕ್ಲೈಮುಗಳ ಸರಿಯಾದ ಇತ್ಯರ್ಥ ಮತ್ತು ರೈತರಿಗೆ ಸಕಾಲಿಕ ನೆರವು ನೀಡುವುದಕ್ಕೂ ವಿಸ್ತರಿಸಿದೆ ಎಂದು ಸ್ಪಷ್ಟಪಡಿಸಿದರು.

ಹವಾಮಾನ ಅನಿಶ್ಚಿತತೆ, ಬೆಳೆ ಹಾನಿಯ ಅಪಾಯ ಮತ್ತು ರೈತರಿಗೆ ಬೆಂಬಲದ ತುರ್ತು ಅಗತ್ಯವು ಹಲವಾರು ರಾಜ್ಯಗಳಲ್ಲಿ ಪ್ರಮುಖ ಕಾಳಜಿಯಾಗಿ ಹೊರಹೊಮ್ಮಿರುವ ಸಮಯದಲ್ಲಿ ಕೇಂದ್ರ ಕೃಷಿ ಸಚಿವರ ನಿರ್ದೇಶನದ ಮೇರೆಗೆ ಈ ಪರಿಶೀಲನಾ ಸಭೆಯನ್ನು ಕರೆಯಲಾಗಿತ್ತು. ರೈತರು ಸಕಾಲಿಕ ಮತ್ತು ಸಮರ್ಪಕ ಬೆಂಬಲವನ್ನು ಪಡೆಯುವಂತೆ ಮಾಡಲು ನೀತಿ ಕ್ರಮಗಳು, ಪರಿಹಾರ ಕಾರ್ಯವಿಧಾನಗಳು ಮತ್ತು ಕೇಂದ್ರ ಸರ್ಕಾರದ ವಿವಿಧ ಯೋಜನೆಗಳ ತಲುಪುವಿಕೆಯನ್ನು ಎಲ್ಲಾ ಹಂತಗಳಲ್ಲಿ ಪರಿಣಾಮಕಾರಿಯಾಗಿ ಸಮನ್ವಯಗೊಳಿಸುವುದು ಇದರ ಉದ್ದೇಶವಾಗಿತ್ತು.

ಬೆಳೆ ಹಾನಿ ಮತ್ತು ವಿಮಾ ಕ್ಲೈಮುಗಳ ವೈಜ್ಞಾನಿಕ ಮೌಲ್ಯಮಾಪನಕ್ಕೆ ವಿಶೇಷ ಒತ್ತು

ಸಭೆಯಲ್ಲಿ, ಶ್ರೀ ಚೌಹಾಣ್ ಅವರು ಕೃಷಿ ಕಾರ್ಯದರ್ಶಿ, ಕೃಷಿ ಆಯುಕ್ತರು ಮತ್ತು ಉಪಸ್ಥಿತರಿದ್ದ ಎಲ್ಲಾ ಹಿರಿಯ ಅಧಿಕಾರಿಗಳಿಗೆ ರೈತರಿಗೆ ನೆರವು ಬೇಕಾದಲ್ಲೆಲ್ಲಾ ರಾಜ್ಯ ಸರ್ಕಾರಗಳೊಂದಿಗೆ ಸಮನ್ವಯವನ್ನು ಬಲಪಡಿಸಲು ನಿರ್ದೇಶಿಸಿದರು. ಬೆಳೆ ಕಟಾವು ಪ್ರಯೋಗಗಳನ್ನು ತಕ್ಷಣವೇ ನಡೆಸಬೇಕು, ನಷ್ಟವನ್ನು ವೈಜ್ಞಾನಿಕವಾಗಿ ಅಂದಾಜು ಮಾಡಬೇಕು ಮತ್ತು ವಿಳಂಬವಿಲ್ಲದೆ ತಕ್ಷಣದ ಪರಿಹಾರವನ್ನು ಒದಗಿಸಬೇಕು ಎಂದು ಅವರು ಒತ್ತಿ ಹೇಳಿದರು. ಅತಿಯಾದ ಮಳೆ, ಆಲಿಕಲ್ಲು ಮಳೆ ಅಥವಾ ಇತರ ಪ್ರತಿಕೂಲ ಹವಾಮಾನ ಪರಿಸ್ಥಿತಿಗಳಿಂದ ಬಾಧಿತವಾದ ಪ್ರದೇಶಗಳಲ್ಲಿ ಕ್ಷೇತ್ರ ಮಟ್ಟದಲ್ಲಿ ಕಾಲಮಿತಿಯ ಕ್ರಮ ಅತ್ಯಗತ್ಯ, ಇದರಿಂದ ಯಾವುದೇ ರೈತ ಪರಿಹಾರಕ್ಕಾಗಿ ಕಾಯುವಂತಾಗಬಾರದು ಎಂದು ಅವರು ಹೇಳಿದರು.

ಬೆಳೆ ಕಟಾವು ಪ್ರಯೋಗಗಳನ್ನು ಸರಿಯಾಗಿ ನಡೆಸಲು, ನಷ್ಟವನ್ನು ನಿಖರವಾಗಿ ಅಂದಾಜು ಮಾಡಲು ಮತ್ತು ವಿಮಾ ಕ್ಲೈಮುಗಳನ್ನು ಸರಿಯಾದ ಮತ್ತು ವೈಜ್ಞಾನಿಕ ರೀತಿಯಲ್ಲಿ ತಯಾರಿಸಲು ರಾಜ್ಯ ಸರ್ಕಾರಗಳೊಂದಿಗೆ ತಕ್ಷಣವೇ ಸಂವಹನ ಮತ್ತು ಸಮನ್ವಯವನ್ನು ಸ್ಥಾಪಿಸಲು ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು ಎಲ್ಲಾ ಅಧಿಕಾರಿಗಳಿಗೆ ಸೂಚನೆ ನೀಡಿದರು. “ರೈತರು ನಷ್ಟ ಅನುಭವಿಸಿದ್ದರೆ, ಅವರ ವಿಮಾ ಕ್ಲೈಮುಗಳನ್ನು ಸರಿಯಾಗಿ ಮತ್ತು ವೈಜ್ಞಾನಿಕವಾಗಿ ಸಿದ್ಧಪಡಿಸಬೇಕು ಇದರಿಂದ ನಾವು ನಮ್ಮ ರೈತ ಸಹೋದರ ಸಹೋದರಿಯರಿಗೆ ಬೆಂಬಲ ನೀಡಬಹುದು” ಎಂದು ಅವರು ಹೇಳಿದರು. ಭಾರತೀಯ ಹವಾಮಾನ ಇಲಾಖೆಯು ಮುಂಬರುವ ದಿನಗಳಲ್ಲಿ ಇನ್ನೂ ಎರಡು ಪಶ್ಚಿಮದ ಅಡಚಣೆಗಳ ಸಾಧ್ಯತೆಯನ್ನು ಸೂಚಿಸಿದೆ ಎಂದು ಅವರು ತಿಳಿಸಿದರು. ಈ ಹಿನ್ನೆಲೆಯಲ್ಲಿ, ರೈತರಿಗೆ ಯಾವ ಸಲಹೆಗಳನ್ನು ನೀಡಬೇಕು ಎಂಬುದರ ಕುರಿತು ವಿವರವಾದ ಚರ್ಚೆಗಳು ನಡೆದವು ಮತ್ತು ವಿಶಾಲ ಮಟ್ಟದಲ್ಲಿ ಅಗತ್ಯ ಸೂಚನೆಗಳನ್ನು ನೀಡಲಾಯಿತು.

ಪ್ರತಿಕೂಲ ಹವಾಮಾನ, ಹವಾಮಾನ ಮುನ್ಸೂಚನೆ ಮತ್ತು ಅಪಾಯ ನಿರ್ವಹಣೆ

ಮುಂಬರುವ ದಿನಗಳಲ್ಲಿ ಸಂಭವನೀಯ ಹವಾಮಾನ ಸಂಬಂಧಿತ ಅಪಾಯಗಳಿಗೆ ಅನುಗುಣವಾಗಿ ಸಿದ್ಧತೆಗಳನ್ನು ಮಾಡಿಕೊಳ್ಳಲು ಹವಾಮಾನ ಮುನ್ಸೂಚನೆಗಳು ಮತ್ತು ಬೆಳೆಗಳ ಪ್ರಸ್ತುತ ಸ್ಥಿತಿಯ ಬಗ್ಗೆ ವಿವರವಾದ ಪರಿಶೀಲನೆಯನ್ನು ಸಭೆಯು ನಡೆಸಿತು. ರೈತರಿಗೆ ಸಮಯೋಚಿತ ಸಲಹೆ, ನೆರವು ಮತ್ತು ರಕ್ಷಣೆ ಸಿಗುವುದನ್ನು ಖಚಿತಪಡಿಸುವ ಸಮಗ್ರ ಕ್ರಿಯಾ ಯೋಜನೆಯನ್ನು ರೂಪಿಸಲು ಕೃಷಿ ಇಲಾಖೆ, ರಾಜ್ಯ ಸರ್ಕಾರಗಳು ಮತ್ತು ಎಲ್ಲಾ ಸಂಬಂಧಿತ ಸಂಸ್ಥೆಗಳು ಒಟ್ಟಾಗಿ ಕೆಲಸ ಮಾಡಬೇಕು ಎಂದು ಶ್ರೀ ಚೌಹಾಣ್ ತಿಳಿಸಿದರು.

ಕೃಷಿ ವಲಯದ ಗುರಿಯು ಕೇವಲ ಉತ್ಪಾದನೆಗೆ ಮಾತ್ರ ಸೀಮಿತವಾಗಬಾರದು, ರೈತರ ಭದ್ರತೆ, ಆದಾಯದ ಸ್ಥಿರತೆ ಮತ್ತು ಸಕಾಲಿಕ ಬೆಂಬಲವನ್ನು ಒಳಗೊಂಡಿರಬೇಕು ಎಂದು ಕೇಂದ್ರ ಸಚಿವರು ಸ್ಪಷ್ಟಪಡಿಸಿದರು. ರೈತರಿಗೆ ಸಮರ್ಪಕ ರಕ್ಷಣೆ ಸಿಗುವುದನ್ನು ಖಚಿತಪಡಿಸಿಕೊಳ್ಳಲು ಬೆಳೆ ಪರಿಸ್ಥಿತಿಗಳು, ಹವಾಮಾನ ಅಪಾಯಗಳು, ಖರೀದಿ ಸಿದ್ಧತೆ ಮತ್ತು ಪರಿಹಾರ ಕಾರ್ಯವಿಧಾನಗಳ ನಡುವೆ ಉತ್ತಮ ಸಮನ್ವಯವನ್ನು ಸ್ಥಾಪಿಸುವ ಅಗತ್ಯವನ್ನು ಅವರು ಒತ್ತಿ ಹೇಳಿದರು.

ದ್ವಿದಳ ಧಾನ್ಯಗಳ ಸ್ವಾವಲಂಬನೆ ಮಿಷನ್‌, ಎಂ ಎಸ್‌ ಪಿ ಮತ್ತು ಬಂಪರ್ ಉತ್ಪಾದನೆಯ ಖರೀದಿ

ಸರ್ಕಾರದಿಂದ ಗೋಧಿ ಮತ್ತು ಭತ್ತದ ಖರೀದಿಯು ಮುಂಬರುವ ದಿನಗಳಲ್ಲಿ ಪ್ರಾರಂಭವಾಗಲಿದೆ ಮತ್ತು ಈ ಹಂಗಾಮಿನಲ್ಲಿ ರಬಿ ಬೆಳೆಗಳು ಬಂಪರ್ ಉತ್ಪಾದನೆಯನ್ನು ಕಂಡಿವೆ ಎಂದು ಶ್ರೀ ಚೌಹಾಣ್ ತಿಳಿಸಿದರು. ಇದರ ಪರಿಣಾಮವಾಗಿ, ದೇಶವು ಗೋಧಿ, ಭತ್ತ ಮತ್ತು ಅಕ್ಕಿಯ ಸಾಕಷ್ಟು ದಾಸ್ತಾನುಗಳನ್ನು ಹೊಂದಿದೆ ಮತ್ತು ಯಾವುದೇ ಕೊರತೆಯಿಲ್ಲ ಎಂದು ಅವರು ಹೇಳಿದರು. ಗೋಧಿ ಮತ್ತು ಭತ್ತದ ಖರೀದಿ ಮುಂದುವರಿಯುತ್ತಿರುವಾಗ, ದ್ವಿದಳ ಧಾನ್ಯಗಳ ಮೇಲೆ ಬಲವಾದ ಗಮನವಿರುತ್ತದೆ ಎಂದು ಅವರು ಹೇಳಿದರು. “ರೈತರು ತಮಗೆ ಬೇಕಾದಷ್ಟು ತೊಗರಿ, ಮಸೂರ್ ಮತ್ತು ಉದ್ದನ್ನು ಮಾರಾಟ ಮಾಡಬಹುದು ಮತ್ತು ನಾವು ಅದನ್ನು ಖರೀದಿಸುತ್ತೇವೆ” ಎಂದು ಅವರು ಹೇಳಿದರು.

ದ್ವಿದಳ ಧಾನ್ಯಗಳ ಖರೀದಿಯನ್ನು ರಾಜ್ಯ ಸರ್ಕಾರಗಳು ಮಾತ್ರವಲ್ಲದೆ ಭಾರತೀಯ ರಾಷ್ಟ್ರೀಯ ಕೃಷಿ ಸಹಕಾರಿ ಮಾರುಕಟ್ಟೆ ಒಕ್ಕೂಟ (ನ್ಯಾಫೆಡ್) ಮತ್ತು ರಾಷ್ಟ್ರೀಯ ಸಹಕಾರಿ ಗ್ರಾಹಕರ ಒಕ್ಕೂಟ (ಎನ್‌ ಸಿ ಸಿ ಎಫ್) ನಂತಹ ಏಜೆನ್ಸಿಗಳ ಮೂಲಕವೂ ನಡೆಸಲಾಗುವುದು ಎಂದು ಕೇಂದ್ರ ಕೃಷಿ ಸಚಿವರು ಸ್ಪಷ್ಟಪಡಿಸಿದರು. ಇದರಿಂದ ರೈತರು ಕನಿಷ್ಠ ಬೆಂಬಲ ಬೆಲೆಗಿಂತ ಕಡಿಮೆ ಬೆಲೆಗೆ ಮಾರಾಟ ಮಾಡಲು ಒತ್ತಾಯಿಸಲ್ಪಡದೆ, ತಮ್ಮ ಉತ್ಪನ್ನಗಳಿಗೆ ನ್ಯಾಯಯುತ ಬೆಲೆಯನ್ನು ಪಡೆಯಲು ಸಾಧ್ಯವಾಗುತ್ತದೆ ಎಂದು ಅವರು ಹೇಳಿದರು.

ದ್ವಿದಳ ಧಾನ್ಯಗಳ  ಸ್ವಾವಲಂಬನೆ ಮಿಷನ್‌ ನ ಪ್ರಗತಿಯನ್ನು ಪರಿಶೀಲಿಸಿದ ಶ್ರೀ ಚೌಹಾಣ್ ಅವರು, ಉತ್ಪಾದನೆಯನ್ನು ವಿಸ್ತರಿಸುವ, ಕೃಷಿ ಪ್ರದೇಶವನ್ನು ಹೆಚ್ಚಿಸುವ ಮತ್ತು ತೊಗರಿ, ಉದ್ದು ಮತ್ತು ಮಸೂರ್‌ ನಂತಹ ಪ್ರಮುಖ ಬೇಳೆಕಾಳುಗಳಿಗೆ ಎಂ ಎಸ್‌ ಪಿ ಆಧಾರಿತ ಖರೀದಿ ಕಾರ್ಯವಿಧಾನಗಳನ್ನು ಬಲಪಡಿಸುವ ಅಗತ್ಯವನ್ನು ಒತ್ತಿ ಹೇಳಿದರು. ಈ ಮಿಷನ್‌ ನ ಉದ್ದೇಶವು ದೇಶವನ್ನು ದ್ವಿದಳ ಧಾನ್ಯಗಳ ಉತ್ಪಾದನೆಯಲ್ಲಿ ಸ್ವಾವಲಂಬಿಯನ್ನಾಗಿ ಮಾಡುವುದು, ಆಮದುಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವುದು ಮತ್ತು ರೈತರ ಆದಾಯವನ್ನು ಹೆಚ್ಚಿಸುವುದು ಎಂದು ಅವರು ಹೇಳಿದರು. ಈ ಗುರಿಗಳನ್ನು ಸಾಧಿಸಲು ತಳಮಟ್ಟದಲ್ಲಿ ದೃಢವಾದ ಕ್ರಿಯಾ ಯೋಜನೆಗಳನ್ನು ಸಿದ್ಧಪಡಿಸಲಾಗುತ್ತಿದೆ ಎಂದು ಅವರು ತಿಳಿಸಿದರು.

ಪ್ರಮಾಣದೊಂದಿಗೆ ಗುಣಮಟ್ಟದ ಮೇಲೆ ಗಮನ, ಪ್ರೀಮಿಯಂ ಮೌಲ್ಯಕ್ಕಾಗಿ ಅಭಿಯಾನ

ಕೃಷಿ ನೀತಿಯು ಇನ್ನು ಮುಂದೆ ಕೇವಲ ಪ್ರಮಾಣವನ್ನು ಹೆಚ್ಚಿಸುವುದರ ಮೇಲೆ ಮಾತ್ರ ಗಮನ ಹರಿಸುವುದಿಲ್ಲ, ಬದಲಿಗೆ ಗುಣಮಟ್ಟವನ್ನು ಸುಧಾರಿಸುವುದಕ್ಕೂ ಸಮಾನ ಪ್ರಾಮುಖ್ಯತೆಯನ್ನು ನೀಡುತ್ತದೆ ಎಂದು ಕೇಂದ್ರ ಕೃಷಿ ಸಚಿವರು ಸ್ಪಷ್ಟಪಡಿಸಿದರು. ಮಧ್ಯಪ್ರದೇಶದ ‘ಶರ್ಬತಿ’ ಗೋಧಿಯ ಉದಾಹರಣೆಯನ್ನು ಅವರು ನೀಡಿದರು, ಇದು ಅದರ ಉತ್ತಮ ಗುಣಮಟ್ಟದ ಕಾರಣದಿಂದಾಗಿ ಮಾರುಕಟ್ಟೆಯಲ್ಲಿ ₹₹400 ಕ್ಕಿಂತ ಹೆಚ್ಚು ಪ್ರೀಮಿಯಂ ಬೆಲೆಯನ್ನು ಪಡೆಯುತ್ತಿದೆ ಎಂದು ಅವರು ಹೇಳಿದರು.

ರೈತರು ಎಂ ಎಸ್‌ ಪಿ ಗಿಂತ ಹೆಚ್ಚಿನ ಬೆಲೆಯನ್ನು ಪಡೆಯಲು ಉತ್ತಮ ಬೆಳೆ ತಳಿಗಳು, ಬಯೋ-ಫೋರ್ಟಿಫೈಡ್ (ಜೈವಿಕವಾಗಿ ಸಾರವರ್ಧಿಸಿದ) ಬೆಳೆಗಳು ಮತ್ತು ಉತ್ತಮ ಗುಣಮಟ್ಟದ ಧಾನ್ಯಗಳನ್ನು ಉತ್ತೇಜಿಸುವ ಅಗತ್ಯವನ್ನು ಅವರು ಒತ್ತಿ ಹೇಳಿದರು. “ನಾವು ಖಂಡಿತವಾಗಿಯೂ ಉತ್ಪಾದನೆಯನ್ನು ಹೆಚ್ಚಿಸುತ್ತೇವೆ, ಆದರೆ ಪ್ರಮಾಣದೊಂದಿಗೆ ಗುಣಮಟ್ಟವನ್ನು ಹೇಗೆ ಸುಧಾರಿಸುವುದು ಎಂಬುದರ ಕುರಿತು ಅಭಿಯಾನಗಳನ್ನು ನಡೆಸುತ್ತೇವೆ. ಉತ್ತಮ ತಳಿಗಳು ಮತ್ತು ಸಾರವರ್ಧಿತ ಬೆಳೆಗಳು ರೈತರಿಗೆ ಹೆಚ್ಚಿನ ಬೆಲೆಯನ್ನು ತಂದುಕೊಡಬಲ್ಲವು, ಆದ್ದರಿಂದ ನಾವು ತಳಿ ಆಯ್ಕೆ ಮತ್ತು ಗುಣಮಟ್ಟದ ವರ್ಧನೆಯ ಮೇಲೆ ಗಮನ ಹರಿಸಬೇಕು” ಎಂದು ಶ್ರೀ ಚೌಹಾಣ್ ಹೇಳಿದರು.

ವಿಕಸಿತ ಕೃಷಿ ಸಂಕಲ್ಪ ಅಭಿಯಾನ, ಪ್ರಾದೇಶಿಕ ಸಮ್ಮೇಳನಗಳು ಮತ್ತು ಬೆಳೆವಾರು ಮಾರ್ಗಸೂಚಿಗಳು

ರೈತರಿಗೆ ವೈಜ್ಞಾನಿಕ ಸಲಹೆಗಳು, ಸುಧಾರಿತ ತಂತ್ರಜ್ಞಾನಗಳು ಮತ್ತು ಪ್ರದೇಶ-ನಿರ್ದಿಷ್ಟ ಕೃಷಿ ಮಾರ್ಗದರ್ಶನವನ್ನು ನೀಡಲು ರಾಷ್ಟ್ರೀಯ ಮಟ್ಟದಲ್ಲಿ ಜಾರಿಗೆ ಬರಲಿರುವ ಮುಂಬರುವ 'ವಿಕಸಿತ ಕೃಷಿ ಸಂಕಲ್ಪ ಅಭಿಯಾನ'ದ ಸಿದ್ಧತೆಗಳನ್ನು ಶ್ರೀ ಶಿವರಾಜ್ ಚೌಹಾಣ್ ಪರಿಶೀಲಿಸಿದರು. ಈ ಅಭಿಯಾನವು ಕೇವಲ ಔಪಚಾರಿಕ ಅಭ್ಯಾಸವಾಗಿ ಉಳಿಯಬಾರದು, ಬದಲಿಗೆ ಕ್ಷೇತ್ರ ಮಟ್ಟದಲ್ಲಿ ಪ್ರಾಯೋಗಿಕ ಮತ್ತು ಉಪಯುಕ್ತ ಫಲಿತಾಂಶಗಳನ್ನು ನೀಡಬೇಕು ಎಂದು ಅವರು ಒತ್ತಿ ಹೇಳಿದರು. ಇದು ರೈತರು ಬಿತ್ತನೆ ಮಾಡುವ ಮೊದಲೇ ಸರಿಯಾದ ಬೆಳೆಗಳು, ಸೂಕ್ತ ತಳಿಗಳು ಮತ್ತು ಸೂಕ್ತ ಕೃಷಿ ಪದ್ಧತಿಗಳನ್ನು ಆಯ್ಕೆ ಮಾಡಲು ಅನುವು ಮಾಡಿಕೊಡುತ್ತದೆ ಎಂದು ಅವರು ಹೇಳಿದರು.

ಈ ಹಿಂದೆ ನವದೆಹಲಿಯಲ್ಲಿ ನಡೆದ ಒಂದೇ ಸಭೆಯಲ್ಲಿ ಖಾರಿಫ್ ಬೆಳೆಗಳ ಸಿದ್ಧತೆಗಳ ಬಗ್ಗೆ ಚರ್ಚಿಸಲಾಗಿತ್ತು ಎಂದು ಅವರು ಹೇಳಿದರು. ಆದರೆ, ಈ ವಿಧಾನವನ್ನು ಈಗ ಉತ್ತರ, ದಕ್ಷಿಣ, ಪಶ್ಚಿಮ, ಪೂರ್ವ ಮತ್ತು ಗುಡ್ಡಗಾಡು ರಾಜ್ಯಗಳು (ಈಶಾನ್ಯ ರಾಜ್ಯಗಳು ಸೇರಿದಂತೆ) ಹೀಗೆ ಐದು ವಲಯಗಳಾದ್ಯಂತ ಪ್ರಾದೇಶಿಕ ಸಮ್ಮೇಳನಗಳ ಮೂಲಕ ಬದಲಾಯಿಸಲಾಗಿದೆ. ಏಪ್ರಿಲ್ 7 ರಂದು ಜೈಪುರದಲ್ಲಿ, ಏಪ್ರಿಲ್ 17 ರಂದು ಲಕ್ನೋದಲ್ಲಿ ಮತ್ತು ಏಪ್ರಿಲ್ 24 ರಂದು ಒಡಿಶಾದಲ್ಲಿ ಮೂರು ಪ್ರಾದೇಶಿಕ ಸಮ್ಮೇಳನಗಳನ್ನು ನಿಗದಿಪಡಿಸಲಾಗಿದೆ, ಉಳಿದ ಎರಡು ಸಮ್ಮೇಳನಗಳ ದಿನಾಂಕಗಳನ್ನು ಶೀಘ್ರದಲ್ಲೇ ಅಂತಿಮಗೊಳಿಸಲಾಗುವುದು ಎಂದು ಅವರು ಘೋಷಿಸಿದರು.

ಈ ಸಮ್ಮೇಳನಗಳಲ್ಲಿ ಕೇವಲ ಸರ್ಕಾರಿ ಅಧಿಕಾರಿಗಳು ಮಾತ್ರವಲ್ಲದೆ ಭಾರತೀಯ ಕೃಷಿ ಸಂಶೋಧನಾ ಮಂಡಳಿಯ (ಐಸಿಎಆರ್) ವಿಜ್ಞಾನಿಗಳು, ಕೃಷಿ ತಜ್ಞರು, ಯಶಸ್ವಿ ರೈತರು, ರೈತ ಉತ್ಪಾದಕ ಸಂಸ್ಥೆಗಳು ಮತ್ತು ಸಂಶೋಧನೆ, ಮೌಲ್ಯವರ್ಧನೆ, ಸಂಸ್ಕರಣೆ ಮತ್ತು ಮಾರುಕಟ್ಟೆಯಲ್ಲಿ ಗಣನೀಯ ಕೊಡುಗೆ ನೀಡಿದ ಖಾಸಗಿ ವಲಯದ ಪ್ರತಿನಿಧಿಗಳು ಪಾಲ್ಗೊಳ್ಳಲಿದ್ದಾರೆ.

ಬೀಜದಿಂದ ಮಾರುಕಟ್ಟೆಯವರೆಗೆ ಇಡೀ ಕೃಷಿ ಮೌಲ್ಯ ಸರಪಳಿಯಾದ್ಯಂತ ಸರ್ಕಾರವು ಕಾರ್ಯತಂತ್ರಗಳನ್ನು ರೂಪಿಸುತ್ತಿದೆ ಎಂದು ಶ್ರೀ ಚೌಹಾಣ್ ಹೇಳಿದರು. ರೈತರಿಗೆ ಪ್ರತಿ ಹಂತದಲ್ಲೂ ಬೆಂಬಲ ಸಿಗುವುದನ್ನು ಖಚಿತಪಡಿಸಿಕೊಳ್ಳಲು ಪ್ರತಿಯೊಂದು ಪ್ರಮುಖ ಬೆಳೆಗೆ ‘ಬೆಳೆ ಆಧಾರಿತ ಮಾರ್ಗಸೂಚಿ’ ಮತ್ತು ಪ್ರತಿ ರಾಜ್ಯಕ್ಕೂ ‘ರಾಜ್ಯ ಆಧಾರಿತ ಕೃಷಿ ಮಾರ್ಗಸೂಚಿ’ಯನ್ನು ಸಿದ್ಧಪಡಿಸಲಾಗುವುದು ಎಂದು ಅವರು ತಿಳಿಸಿದರು. ಸೋಯಾಬೀನ್, ಜೋಳ ಮತ್ತು ತೆಂಗಿನಂತಹ ಬೆಳೆಗಳ ಉತ್ಪಾದನೆ ಹೆಚ್ಚಿಸುವುದು, ಗುಣಮಟ್ಟ ಸುಧಾರಿಸುವುದು, ರೋಗಗಳನ್ನು ಎದುರಿಸುವುದು ಮತ್ತು ಶುದ್ಧ ನಾಟಿ ಸಾಮಗ್ರಿಗಳ ಲಭ್ಯತೆಯನ್ನು ಖಚಿತಪಡಿಸಿಕೊಳ್ಳುವ ಕುರಿತು ಈಗಾಗಲೇ ವಿವರವಾದ ಚರ್ಚೆಗಳು ಪ್ರಾರಂಭವಾಗಿವೆ ಎಂದು ಅವರು ಹೇಳಿದರು.

ಕೇಂದ್ರ ಸರ್ಕಾರವು ರೈತರೊಂದಿಗೆ ಹೆಗಲಿಗೆ ಹೆಗಲು ಕೊಟ್ಟು ನಿಂತಿದೆ ಮತ್ತು ಅವರಿಗಾಗಿ ಸೇವೆಗಳನ್ನು ಸುಧಾರಿಸಲು ನಿರಂತರವಾಗಿ ಶ್ರಮಿಸುತ್ತಿದೆ ಎಂದು ಸರ್ಕಾರದ ಬದ್ಧತೆಯನ್ನು ಶ್ರೀ ಚೌಹಾಣ್ ಪುನರುಚ್ಚರಿಸಿದರು. ಕೃಷಿ ಉತ್ಪಾದನೆಯನ್ನು ಹೆಚ್ಚಿಸುವುದು ಮತ್ತು ರೈತರ ಪ್ರಯತ್ನಗಳ ಮೂಲಕ ದೇಶದ ಸಮೃದ್ಧಿಯನ್ನು ಹೊಸ ಎತ್ತರಕ್ಕೆ ಕೊಂಡೊಯ್ಯುವುದು ಸರ್ಕಾರದ ಗುರಿಯಾಗಿದೆ ಎಂದು ಅವರು ಹೇಳಿದರು.

*****