ಕೇಂದ್ರ ಬಂದರುಗಳು, ಹಡಗು ಸಾಗಣೆ ಮತ್ತು ಜಲಮಾರ್ಗಗಳ ಸಚಿವರಾದ (ಎಂ.ಒ.ಪಿ.ಎಸ್.ಡಬ್ಯು-MoPSW) ಸರ್ಬಾನಂದ ಸೋನೋವಾಲ್, ಸಚಿವಾಲಯದ ಹಿರಿಯ ಅಧಿಕಾರಿಗಳೊಂದಿಗೆ, ಭಾರತೀಯ ಧ್ವಜ ಹೊಂದಿದ್ದ ಅಡುಗೆ ಅನಿಲ ಸಾಗಾಟ ಹಡಗುಗಳಾದ  ಶಿವಾಲಿಕ್ ಮತ್ತು ನಂದಾ ದೇವಿಯ ಧೈರ್ಯಶಾಲಿ ಸಿಬ್ಬಂದಿಯೊಂದಿಗೆ ಇಂದು ಇಲ್ಲಿ ಸಂವಾದ ನಡೆಸಿದರು, ನಿರ್ಣಾಯಕ ಎಲ್.ಪಿ.ಜಿ. (ಅಡುಗೆ ಅನಿಲ) ಸರಕುಗಳ ಸುರಕ್ಷಿತ ಸಾಗಣೆಯನ್ನು ಖಚಿತಪಡಿಸಿಕೊಳ್ಳುವಲ್ಲಿ ಅವರ ಧೈರ್ಯ ಮತ್ತು ಅಚಲ ಕರ್ತವ್ಯ ಪ್ರಜ್ಞೆಗೆ ರಾಷ್ಟ್ರದ ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು.

ವಿಡಿಯೋ ಸಮ್ಮೇಳನದ ಮೂಲಕ ನಡೆದ ಸಂವಾದದಲ್ಲಿ ಬಂದರುಗಳು, ಹಡಗು ಮೂಲಕ ಸಾಗಣೆ ಮತ್ತು ಜಲಮಾರ್ಗಗಳ ಸಚಿವಾಲಯದ ಕಾರ್ಯದರ್ಶಿ ವಿಜಯ್ ಕುಮಾರ್; ಹಡಗು ಸಾಗಣೆ ಮಹಾನಿರ್ದೇಶಕ ಶ್ಯಾಮ್ ಜಗನ್ನಾಥನ್; ಭಾರತೀಯ ಹಡಗು ನಿಗಮದ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಕ್ಯಾಪ್ಟನ್ ಬಿ.ಕೆ. ತ್ಯಾಗಿ; ಶಿವಾಲಿಕ್ ನ ಕ್ಯಾಪ್ಟನ್ ಸುಖ್ಮೀತ್ ಸಿಂಗ್ ಮತ್ತು ಸಿಬ್ಬಂದಿ; ಮತ್ತು ನಂದಾ ದೇವಿ ಸಿಬ್ಬಂದಿಯೊಂದಿಗೆ ಕ್ಯಾಪ್ಟನ್ ಧೀರಜ್ ಕುಮಾರ್ ಅಗರ್ವಾಲ್ ಭಾಗವಹಿಸಿದ್ದರು.

ನಾವಿಕರನ್ನು ಉದ್ದೇಶಿಸಿ ಮಾತನಾಡಿದ ಸರ್ಬಾನಂದ ಸೋನೋವಾಲ್, ಈ ಸಂವಾದವು ಹೆಚ್ಚಿನ ಅಪಾಯದ ಸಮುದ್ರ ಪರಿಸರದಲ್ಲಿ ಕಾರ್ಯನಿರ್ವಹಿಸುತ್ತಿದ್ದರೂ ಪ್ರಮುಖ ಎಲ್‌ಪಿಜಿ ಸರಬರಾಜುಗಳ ಸುರಕ್ಷಿತ ವಿತರಣೆಯನ್ನು ಖಚಿತಪಡಿಸಿಕೊಂಡ ಸಿಬ್ಬಂದಿಗೆ "ರಾಷ್ಟ್ರದ ಕೃತಜ್ಞತೆಯ ಹೃತ್ಪೂರ್ವಕ ಅಭಿವ್ಯಕ್ತಿ" ಎಂದು ಹೇಳಿದರು.

"ಶಿವಾಲಿಕ್ ಮತ್ತು ನಂದಾ ದೇವಿ ಸಿಬ್ಬಂದಿಯ ಧೈರ್ಯ, ಸಮರ್ಪಣೆ ಮತ್ತು ವೃತ್ತಿಪರತೆಯನ್ನು ಗುರುತಿಸುವುದು ಅಪಾರ ಹೆಮ್ಮೆಯ ವಿಷಯವಾಗಿದೆ. ನಿಮ್ಮ ಪ್ರಯತ್ನಗಳು ನಿರ್ಣಾಯಕ ಎಲ್‌ಪಿಜಿ ಸರಕುಗಳ ಸುರಕ್ಷಿತ ಸಾಗಣೆಯನ್ನು ಖಚಿತಪಡಿಸಿದವು, ಭಾರತದ ಇಂಧನ ಭದ್ರತೆಯನ್ನು ಬಲಪಡಿಸಿದವು" ಎಂದು ಸರ್ಬಾನಂದ ಸೋನೋವಾಲ್ ಹೇಳಿದರು.

ಭಾರತಕ್ಕೆ ಪ್ರಯಾಣ ಬೆಳೆಸುವ ಮೊದಲು ಎರಡೂ ಹಡಗುಗಳು ಹೆಚ್ಚಿನ ಭದ್ರತಾ ಕಳವಳಗಳ  ನಡುವೆಯೂ ಸುಮಾರು ಎರಡು ವಾರಗಳ ಕಾಲ ಹೆಚ್ಚಿನ ಅಪಾಯದ ವಲಯದಲ್ಲಿಯೇ ಉಳಿದಿದ್ದವು ಎಂಬುದರತ್ತ ಸಚಿವರು ಗಮನ ಸೆಳೆದರು. ಸವಾಲಿನ ಪರಿಸ್ಥಿತಿಗಳಲ್ಲಿ ಸಿಬ್ಬಂದಿ ಅಸಾಧಾರಣ ಶಾಂತಚಿತ್ತ, ಜಾಗರೂಕತೆ ಮತ್ತು ವೃತ್ತಿಪರತೆಯನ್ನು ಪ್ರದರ್ಶಿಸಿದರು ಎಂದು ಸೋನೋವಾಲ್ ಹೇಳಿದರು.

ಪಶ್ಚಿಮ ಏಷ್ಯಾದಲ್ಲಿ ರೂಪುಗೊಳ್ಳುತ್ತಿರುವ ಭೌಗೋಳಿಕ ರಾಜಕೀಯ ಪರಿಸ್ಥಿತಿಯ ಮಧ್ಯೆ ಸರ್ಕಾರವು ಪರ್ಷಿಯನ್ ಕೊಲ್ಲಿ ಪ್ರದೇಶದಲ್ಲಿ ಸಮುದ್ರ ಕಾರ್ಯಾಚರಣೆಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿರುವುದರಿಂದ, ಭಾರತೀಯ ಧ್ವಜ ಹೊತ್ತ ಎರಡು ಎಲ್.ಪಿ.ಜಿ.ವಾಹಕಗಳು ಮಾರ್ಚ್ 16 ಮತ್ತು 17 ರಂದು ಭಾರತಕ್ಕೆ ಆಗಮಿಸುವ ಮೊದಲು ಹಾರ್ಮುಜ್ ಜಲಸಂಧಿಯನ್ನು ಸುರಕ್ಷಿತವಾಗಿ ದಾಟಿದವು. ಸರಿಸುಮಾರು 92,712 ಮೆಟ್ರಿಕ್ ಟನ್ ಎಲ್.ಪಿ.ಜಿ.ಯನ್ನು ಹೊತ್ತ ಎಂ.ಟಿ. ಶಿವಾಲಿಕ್ ಮತ್ತು ಎಂ.ಟಿ. ನಂದಾ ದೇವಿ ಶುಕ್ರವಾರ (13 ಮಾರ್ಚ್, 2026) ಮುಂಜಾನೆ ಹಾರ್ಮುಜ್ ಜಲಸಂಧಿಯನ್ನು ದಾಟಿದವು.

“ನಾವಿಕರು ಜಾಗತಿಕ ವ್ಯಾಪಾರದ ಬೆಳಕಿಗೆ ಬಾರದ ನಾಯಕರು. ನಿಮ್ಮ ಮನೆಗಳು ಮತ್ತು ಕುಟುಂಬಗಳಿಂದ ದೂರದಲ್ಲಿದ್ದು, ಅಗತ್ಯ ಸರಕುಗಳು ಸುರಕ್ಷಿತವಾಗಿ ತಮ್ಮ ಗಮ್ಯಸ್ಥಾನವನ್ನು ತಲುಪುವುದನ್ನು ನೀವು ಖಚಿತಪಡಿಸಿಕೊಳ್ಳುತ್ತಿರುವಿರಿ" ಎಂದು ಸೋನೋವಾಲ್ ಹೇಳಿದರು, ಜಾಗತಿಕ ಪೂರೈಕೆ ಸರಪಳಿಗಳನ್ನು ನಿಭಾಯಿಸುವಲ್ಲಿ  ಸಮುದ್ರ ಸಿಬ್ಬಂದಿ ವಹಿಸಿದ ನಿರ್ಣಾಯಕ ಪಾತ್ರವನ್ನು ಎತ್ತಿ ತೋರಿಸಿದರು.

ಭಾರತೀಯ ನೌಕಾಪಡೆಯವರು ಸಂಪೂರ್ಣವಾಗಿ ನಿರ್ವಹಿಸುವ ಎರಡು ಭಾರತೀಯ ಧ್ವಜದ ಹಡಗುಗಳ ಯಶಸ್ವಿ ಪ್ರಯಾಣವು ಭಾರತದ ಕಡಲ ಕಾರ್ಯಪಡೆಯ ಶಕ್ತಿ ಮತ್ತು ಸ್ಥಿತಿಸ್ಥಾಪಕತ್ವವನ್ನು ಪ್ರತಿಬಿಂಬಿಸುತ್ತದೆ ಎಂದು ಕೇಂದ್ರ ಸಚಿವರು ಒತ್ತಿ ಹೇಳಿದರು.

"ಪ್ರಧಾನಿ ನರೇಂದ್ರ ಮೋದಿಯವರ ನೇತೃತ್ವದಲ್ಲಿ, ನಾವು ಕಡಲ ವಲಯವನ್ನು ಬಲಪಡಿಸಲು ಮತ್ತು ನಮ್ಮ ನಾವಿಕರ ಸುರಕ್ಷತೆ, ಘನತೆ ಮತ್ತು ಜಾಗತಿಕ ಮನ್ನಣೆಯನ್ನು ಖಚಿತಪಡಿಸಿಕೊಳ್ಳಲು ಬದ್ಧ ಎಂದೂ ಅವರು ಹೇಳಿದರು.

ಸೋನೋವಾಲ್ ಅವರು ನಾವಿಕರ ಕುಟುಂಬಗಳ ಬೆಂಬಲವನ್ನು ಶ್ಲಾಘಿಸಿದರು, ಕುಟುಂಬಗಳು ಅವರ ಸಮರ್ಪಣೆ ಮತ್ತು ಸೇವೆಯ ಹಿಂದಿನ ಪ್ರಮುಖ ಆಧಾರಸ್ತಂಭ ಎಂದು ಹೇಳಿದರು. ಎರಡೂ ಹಡಗುಗಳ ಮಾಸ್ಟರ್ಸ್, ಅಧಿಕಾರಿಗಳು ಮತ್ತು ಸಿಬ್ಬಂದಿಯನ್ನು ಅಭಿನಂದಿಸಿದ ಸಚಿವರು, ಅವರ ಸಾಧನೆಯು ವೃತ್ತಿಪರತೆ ಮತ್ತು ಬದ್ಧತೆಗೆ ಉದಾಹರಣೆಯಾಗಿದೆ ಮತ್ತು ಅವರ ಮುಂದಿನ ಪ್ರಯಾಣವು ಸುರಕ್ಷಿತವಾಗಿರಲಿ ಎಂದು ಹಾರೈಸಿದರು.

ಹಡಗು ಮಾಲೀಕರು, ನೇಮಕಾತಿ ಮತ್ತು ಉದ್ಯೋಗ ಸೇವಾ ಪರವಾನಗಿ (ಆರ್.ಪಿ.ಎಸ್.ಎಲ್.-RPSL) ಸಂಸ್ಥೆಗಳು ಮತ್ತು ಈ ಪ್ರದೇಶದ ಭಾರತೀಯ ರಾಜತಾಂತ್ರಿಕ ಕಾರ್ಯಾಚರಣೆಗಳೊಂದಿಗೆ ಸಮನ್ವಯದೊಂದಿಗೆ ಹಡಗು ನಿರ್ದೇಶನಾಲಯ (ಡಿ.ಜಿ. ಶಿಪ್ಪಿಂಗ್) ಪರಿಸ್ಥಿತಿಯನ್ನು ನಿಕಟವಾಗಿ ಮೇಲ್ವಿಚಾರಣೆ ಮಾಡುತ್ತಿದೆ. ಕೇಂದ್ರ ಸಚಿವ ಸರ್ಬಾನಂದ ಸೋನೋವಾಲ್ ಪರಿಸ್ಥಿತಿಯನ್ನು ಸಕ್ರಿಯವಾಗಿ ಮತ್ತು ನೇರವಾಗಿ ಮೇಲ್ವಿಚಾರಣೆ ಮಾಡುತ್ತಿದ್ದಾರೆ.

ಸುಗಮ ಕಡಲ ಕಾರ್ಯಾಚರಣೆಗಳನ್ನು ಖಚಿತಪಡಿಸಿಕೊಳ್ಳಲು, ಸಮುದ್ರ ವ್ಯಾಪಾರ ಕಾರ್ಯಾಚರಣೆಯಲ್ಲಿ ಅಸ್ತವ್ಯಸ್ತವಾಗುವುದನ್ನು ನಿಭಾಯಿಸಲು/ ಕಡಿಮೆ ಮಾಡಲು ಸರ್ಕಾರವು ಬಂದರುಗಳು, ಹಡಗು ಮಾರ್ಗಗಳು ಮತ್ತು ಲಾಜಿಸ್ಟಿಕ್ಸ್ ಪಾಲುದಾರರೊಂದಿಗೆ ನಿಕಟವಾಗಿ ಕಾರ್ಯನಿರ್ವಹಿಸುತ್ತಿದೆ. ಲಂಗರು ಹಾಕುವಿಕೆ, ಬರ್ತ್ ಬಾಡಿಗೆ ಮತ್ತು ಶೇಖರಣಾ ಶುಲ್ಕಗಳಲ್ಲಿ ರಿಯಾಯಿತಿಗಳನ್ನು ಒಳಗೊಂಡಂತೆ ಅಗತ್ಯವಿರುವಲ್ಲಿ ಪರಿಹಾರ ಕ್ರಮಗಳನ್ನು ವಿಸ್ತರಿಸಲು ಬಂದರುಗಳಿಗೆ ಸೂಚಿಸಲಾಗಿದೆ.

ಪ್ರಮುಖ ಬಂದರುಗಳು ಎಲ್‌ಪಿಜಿ ಹಡಗುಗಳಿಗೆ ಸಕಾಲಿಕವಾಗಿ ಸರಕು ಸಾಗಣೆ ಮತ್ತು ಇಂಧನ ಪೂರೈಕೆಯಲ್ಲಿ ನಿರಂತರತೆಯನ್ನು ಖಚಿತಪಡಿಸಿಕೊಳ್ಳಲು ಬರ್ತಿಂಗ್‌ಗೆ ಆದ್ಯತೆ ನೀಡುತ್ತಿವೆ. ಕಳೆದ ಕೆಲವು ದಿನಗಳಿಂದ, ಆರು ಎಲ್‌ಪಿಜಿ ಹಡಗುಗಳನ್ನು ಭಾರತದ ಪ್ರಮುಖ ಬಂದರುಗಳಲ್ಲಿ ಸ್ವೀಕರಿಸಲಾಗಿದೆ. ಇದಲ್ಲದೆ, ಗಲ್ಫ್ ಪ್ರದೇಶಕ್ಕೆ ಸಾಗಲು ಸರಕು ತುಂಬಿದ ಹಡಗುಗಳಿಗೆ ಬಂದರುಗಳು ಸುರಕ್ಷಿತ ಲಂಗರು ಪ್ರದೇಶಗಳನ್ನು ಒದಗಿಸುತ್ತಿವೆ, ಅವುಗಳು ಪ್ರಸ್ತುತ ಚಾಲ್ತಿಯಲ್ಲಿರುವ ಪರಿಸ್ಥಿತಿಗಳಿಂದಾಗಿ ಸರಕುಗಳನ್ನು ಸಾಗಿಸಲು ಸಾಧ್ಯವಾಗುತ್ತಿಲ್ಲ.

ಭಾರತೀಯ ನಾವಿಕರ ಕಲ್ಯಾಣವನ್ನು ಕಾಪಾಡುವ ಮತ್ತು ಭಾರತದ ಕಡಲ ಲಾಜಿಸ್ಟಿಕ್ಸ್ ಜಾಲದ ಸ್ಥಿತಿಸ್ಥಾಪಕತ್ವವನ್ನು ಖಚಿತಪಡಿಸಿಕೊಳ್ಳುವತ್ತ ಗಮನಹರಿಸಿರುವ ಸಚಿವಾಲಯವು, ವಿದೇಶಾಂಗ ಸಚಿವಾಲಯ, ವಿದೇಶದಲ್ಲಿರುವ ಭಾರತೀಯ ರಾಯಭಾರ ಕಚೇರಿಗಳು, ಹಡಗು ಕಂಪನಿಗಳು ಮತ್ತು ಇತರ ಕಡಲ ಪಾಲುದಾರರೊಂದಿಗೆ ನಿಕಟ ಸಮನ್ವಯದೊಂದಿಗೆ ಕಡಲ ಪರಿಸ್ಥಿತಿಯನ್ನು ಮೇಲ್ವಿಚಾರಣೆ ಮಾಡುವುದನ್ನು  ಮುಂದುವರಿಸಿದೆ  ಎಂದು ಸಚಿವಾಲಯ ಮಾಹಿತಿ ನೀಡಿದೆ.

*****