దేశవ్యాప్తంగా ఉచిత హెచ్‌పీవీ వాక్సినేషన్ కార్యక్రమం 28 ఫిబ్రవరి 2026న ప్రారంభమైంది. 36 రాష్ట్రాలు, కేంద్రపాలిత ప్రాంతాల్లో 14 ఏళ్ల వయసున్న సుమారు 1.2 కోట్ల మంది బాలికలే ఈ కార్యక్రమ లక్ష్యం. దీని ద్వారా ప్రభుత్వ ఆరోగ్య కేంద్రాలన్నింటిలోనూ గార్డసిల్-4 వాక్సిన్ ఒక డోసును ఉచితంగా అందిస్తారు. ఆయుష్మాన్ ఆరోగ్య మందిరాలు- ప్రాథమిక ఆరోగ్య కేంద్రాలు (పీహెచ్‌సీలు), సామాజిక ఆరోగ్య కేంద్రాలు (సీహెచ్‌సీలు), సబ్-డివిజినల్ ఆస్పత్రులు (ఎస్‌డీహెచ్‌లు), జిల్లా ఆస్పత్రులు (డీహెచ్‌లు), ప్రభుత్వ వైద్య కళాశాలలు (జీఎంసీలు) సహా గ్రామీణ, వెనుకబడిన ప్రాంతాల్లోనూ ఈ టీకా అందుబాటులో ఉంటుంది. మూడు నెలల ఈ ప్రత్యేక ప్రచార కార్యక్రమం తర్వాత కూడా సాధారణ టీకాల పంపిణీ సమయంలో ఈ వ్యాక్సిన్ అందుబాటులో ఉంటుంది.

ఈ వ్యాక్సినేషన్ ప్రక్రియ వైద్యాధికారుల సమక్షంలో జరుగుతుంది. దుష్ప్రభావాలు తలెత్తితే, వాటిని నివారించేందుకు 24x7 అందుబాటులో ఉండే ఏఈఎఫ్ఐ మేనేజ్‌మెంట్ సెంటర్లతో టీకా కేంద్రాలను అనుసంధానించారు. హెచ్‌పీవీ వాక్సిన్ వేయించుకోవటం పూర్తిగా స్వచ్ఛంద నిర్ణయం. టీకా వేయటానికి ముందు తల్లిదండ్రుల అనుమతి తప్పనిసరి. హెచ్‌పీవీ వాక్సిన్ అమలు కార్యాచరణ మార్గదర్శకాలను ఇప్పటికే అన్ని రాష్ట్రాలు, యూటీలకు తెలియజేశారు.

గర్భాశయ క్యాన్సర్‌కు వ్యూహాత్మక నివారణ చర్యలను భారత ప్రభుత్వం అమలు చేస్తోంది. మహిళల్లో ఈ వ్యాధి ప్రభావాన్ని తగ్గించటమే లక్ష్యంగా వ్యాధి నిర్ధారణ పరీక్షలు, ముందుస్తుగా వ్యాధిని గుర్తించటం, సరైన సమయంలో చికిత్స వంటి అంశాలతో బహుముఖ విధానాన్ని ప్రభుత్వం అనుసరిస్తోంది. ఈ కార్యక్రమాలతో పాటు అంతర్జాతీయ శాస్త్రీయ ఆధారాల ప్రకారం.. భారతదేశంలో గర్భాశయ క్యాన్సర్ కేసులను తగ్గించటంలో హెచ్‌పీవీ వ్యాక్సినేషన్ కీలక పాత్ర పోషిస్తుంది.

అనుమతి పొందిన హెచ్‌పీవీ వ్యాక్సిన్ల సమర్థతకు సంబంధించిన పూర్తి వివరాలు ఉత్పత్తి లక్షణాల సారాంశం (ఎస్ఎంపీసీ)లో ప్రచురితమయ్యాయి. ఇవి సీడీఎస్‌సీఓ వెబ్‌సైట్‌లో ప్రజలకు అందుబాటులో ఉన్నాయి.

ఈ సమాచారాన్ని కేంద్ర ఆరోగ్య, కుటుంబ సంక్షేమ శాఖ సహాయమంత్రి శ్రీమతి అనుప్రియ పటేల్ ఇవాళ రాజ్యసభలో లిఖితపూర్వకంగా అందించారు.

***