ప్రభుత్వం తరపున గోధుమలు, వరి ధాన్యం సేకరించే ఆర్తీలు, సహకార సంఘాలకు చెల్లించే కమీషన్ ధరల సవరణకు భారత ప్రభుత్వం ఆమోదం తెలిపింది. సవరించిన ఈ ధరలు 2026-27 రబీ మార్కెటింగ్ సీజన్ (ఆర్ఎంఎస్) నుంచి అమల్లోకి వస్తాయి.

ప్రభుత్వం తరపున గోధుమలు, వరి సేకరణ చేపట్టే మధ్యవర్తులుగా, సేకరణకర్తలుగా సేవలందించే సహకార సంఘాలు, కో-ఆపరేటివ్, సబ్-ఏజెంట్లు, ఆర్తీలకు ప్రస్తుత సేకరణ మార్గదర్శకాల ప్రకారం కమీషన్ చెల్లిస్తారు.

కమీషన్ల సవరణకు వివిధ రాష్ట్ర ప్రభుత్వాల నుంచి అందిన వినతుల ఆధారంగా.. రాష్ట్ర ప్రభుత్వాలు, ఆహార, ప్రజా పంపిణీ శాఖ ప్రతినిధులతో ఎఫ్‌సీఐ ఒక ఉపకమిటీని ఏర్పాటు చేసింది. ప్రస్తుత రేట్లను పరిశీలించిన ఈ కమిటీ.. కమీషన్ విధానంలో మార్పులు చేయాలని సిఫార్సు చేసింది.

కమిటీ సిఫార్సుల మేరకు.. గోధుమలు, వరి సేకరణకు ఆర్తీలు, సొసైటీలకు చెల్లించే కమీషన్ రేట్ల పెంపునకు ప్రభుత్వం ఆమోదం తెలిపింది. ఈ సవరణ తర్వాత పంజాబ్, హర్యానా రాష్ట్రాల్లో ఆర్తీలకు గోధుమలపై చెల్లించే కమీషన్ క్వింటాలుకు రూ.46 నుంచి రూ.50.75కు పెరగనుంది. రాజస్థాన్‌లో క్వింటాలుకు రూ.41.40 నుంచి రూ.45.67కి పెరుగుతుంది. వరికి కమీషన్ ధర క్వింటాలుకు రూ.45.88 నుంచి రూ.50.61కి పెరగనుంది.

సహకార సంఘాలకు చెల్లించే కమీషన్ రేట్లను కూడా సవరించారు. గోధుమల సేకరణకు ఇచ్చే కమీషన్ క్వింటాలుకు రూ.27 నుంచి రూ.29.79కి పెరగనుంది. ధాన్యం కమీషన్ క్వింటాలుకు రూ.32 నుంచి రూ.35.30కి పెరుగుతుంది.

ప్రసుత వ్యవస్థకు అనుగుణంగా ఆధునిక ధాన్యం గిడ్డంగుల వద్ద సేకరణకు చెల్లించాల్సిన కమీషన్.. మండీల్లో వర్తించే రేటులో 50 శాతం ఉంటుంది.

ధాన్యం సేకరణ వ్యవస్థలో సమర్థత తగ్గకుండా చూడటం, ప్రభుత్వం తరపున సేకరణ కార్యకలాపాలను సులభతరం చేసే ఏజెన్సీలకు మద్దతివ్వటం ఈ కమీషన్ రేట్ల సవరణ ఉద్దేశం.

***