وزیرِ اعظم نریندر مودی نے آج مغربی بنگال کے شہر کولکاتہ میں 18 ہزار کروڑ روپے سے زائد مالیت کے مختلف ترقیاتی منصوبوں کا سنگِ بنیاد رکھا اور متعدد منصوبوں کا افتتاح کیا۔ اجتماع سے خطاب کرتے ہوئے وزیرِ اعظم نے کہا: ’’آج کولکاتہ کی سرزمین سے مغربی بنگال اور مشرقی ہندوستان کی ترقی کا ایک نیا باب رقم ہو رہا ہے۔‘‘

وزیرِ اعظم نے بتایا کہ اس تقریب میں سڑکوں، ریلوے اور بندرگاہی بنیادی ڈھانچے سے متعلق 18 ہزار کروڑ روپے سے زائد مالیت کے منصوبوں کا سنگِ بنیاد رکھا گیا اور کئی منصوبے قوم کے نام وقف کیے گئے ہیں۔ انہوں نے کہا کہ یہ منصوبے مغربی بنگال اور مشرقی ہندوستان کو ترقی کی نئی رفتار عطا کریں گے، تجارت اور صنعت کو فروغ دیں گے اور لاکھوں افراد کو نئے مواقع فراہم کر کے ان کی زندگیوں کو آسان بنائیں گے۔ اہم منصوبوں کا ذکر کرتے ہوئے وزیرِ اعظم نے کہا کہ کھڑگ پور–مورگرام تیز رفتار شاہراہ  کی تکمیل سے مغربی بنگال کے کئی علاقوں میں معاشی سرگرمیوں کو تیزی ملے گی۔ انہوں نے دوبراج پور بائی پاس اور کانگسابتی اور شلابتی دریاؤں پر تعمیر ہونے والے بڑے پلوں کا بھی ذکر کیا، جو علاقے میں آمد و رفت اور رابطے کو مزید بہتر بنائیں گے۔ وزیرِ اعظم نے کہا: ’’میں مغربی بنگال اور پورے مشرقی ہندوستان کے عوام کو ان انقلابی نوعیت کے منصوبوں پر مبارکباد پیش کرتا ہوں۔‘‘

وزیرِ اعظم نے مزید کہا کہ ملک بھر میں ہندوستانی ریلوے کو جدید بنانے کے لیے بھرپور مہم جاری ہے اور حکومت کا پختہ عزم ہے کہ اس مشن میں مغربی بنگال پیچھے نہ رہ جائے۔ انہوں نے بتایا کہ مرکزی حکومت مغربی بنگال میں ریلوے کے بنیادی ڈھانچے کو تیزی سے وسعت دے رہی ہے۔ اس موقع پر کلائیکنڈا–کانی ماہولی ریلوے سیکشن پر خودکار بلاک سگنلنگ نظام بھی قوم کے نام وقف کیا گیا۔ وزیرِ اعظم نے زور دے کر کہا: ’’یہ اقدامات مصروف ریلوے راستوں کی گنجائش میں اضافہ کریں گے، سفر کو مزید محفوظ بنائیں گے اور مسافروں کے لیے رفتار اور سہولت دونوں میں اضافہ کریں گے۔‘‘

وزیرِ اعظم نریندر مودی نے اعلان کیا کہ کاماکھیاگوری، انارا، تملوک، ہلدیا، برابھوم اور سیوری کے 6 ریلوے اسٹیشنوں کو امرت بھارت اسٹیشن کے طور پر قوم کے نام وقف کیا گیا ہے۔ انہوں نے کہا کہ ان اسٹیشنوں پر بنگال کی عظیم تہذیب و ثقافت اب پہلے سے زیادہ نمایاں انداز میں جھلک رہی ہے اور کئی دیگر اسٹیشنوں کی بھی ازسرِ نو تعمیر و ترقی کا کام جاری ہے۔ اس کے ساتھ ہی پورولیا اور آنند وہار ٹرمینل کے درمیان ایک نئی ایکسپریس ٹرین سروس کا بھی آغاز کیا گیا ہے۔ وزیرِ اعظم نے کہا: ’’اس ٹرین سروس سے نہ صرف مغربی بنگال بلکہ جھارکھنڈ، بہار، اتر پردیش اور دہلی کے عوام کو بھی فائدہ ہوگا۔‘‘

وزیرِ اعظم نے اس بات پر زور دیا کہ معاشی ترقی کو آگے بڑھانے میں سڑک اور ریلوے رابطوں کے ساتھ ساتھ بندرگاہیں اور آبی نقل و حمل بھی نہایت اہم کردار ادا کرتی ہیں۔ انہوں نے کہا کہ کئی دہائیوں تک مشرقی ہندوستان کی اس بے پناہ صلاحیت کو نظر انداز کیا گیا، مگر آج آبی راستے تجارت اور صنعتی ترقی کے لیے نئے مواقع فراہم کر رہے ہیں۔ اسی سمت میں بندرگاہی بنیادی ڈھانچے سے متعلق اہم منصوبوں کا سنگِ بنیاد رکھا گیا اور بعض منصوبے قوم کے نام وقف کیے گئے۔

وزیرِ اعظم نے کہا کہ کولکاتہ اور ہلدیہ کی بندرگاہیں طویل عرصے سے مشرقی ہندوستان میں تجارت کے بڑے مراکز رہی ہیں۔ ہلدیہ ڈاک کمپلیکس کی مشین کاری سے سامان کی ترسیل کے عمل میں تیزی آئے گی، بندرگاہ کی گنجائش میں اضافہ ہوگا اور تجارت کے لیے نئی سہولتیں فراہم ہوں گی۔ اس کے علاوہ کولکاتہ ڈاک نظام میں واقع باسکیول پل کی تجدید و مرمت اور کِڈرپور ڈاک میں سامان کی ترسیل کی صلاحیت بڑھانے کا کام بھی کیا جا رہا ہے۔ وزیرِ اعظم نے کہا: ’’یہ تمام منصوبے مشرقی ہندوستان کے لاجسٹکس نظام کو مزید مضبوط بنائیں گے۔‘‘

اپنے اختتامی کلمات میں وزیرِ اعظم نے کہا کہ سڑکوں، ریلوے اور بندرگاہوں سے متعلق یہ نئے منصوبے مغربی بنگال کے لیے ایک جدید مستقبل کی راہ ہموار کر رہے ہیں۔ انہوں نے کہا کہ ان منصوبوں کے فوائد کسانوں، تاجروں، صنعت کاروں، طلبہ اور معاشرے کے ہر طبقے تک پہنچیں گے۔ سیاحت جیسے شعبوں میں نئے مواقع پیدا ہوں گے اور مقامی صنعتوں اور خدمات کو نئی رفتار ملے گی۔

وزیرِ اعظم نے یاد دلایا کہ بنگال نے تاریخ میں ہمیشہ ہندوستان کو راستہ دکھایا ہے اور انہوں نے یقین ظاہر کیا کہ مضبوط رابطہ نظام اور جدید بنیادی ڈھانچہ ایک ترقی یافتہ بنگال کی بنیاد بنے گا۔ وزیرِ اعظم نے زور دے کر کہا: ’’ہمارا عزم ہے کہ بنگال، جس نے ہمیشہ ہندوستان کی رہنمائی کی ہے، ایک مرتبہ پھر ترقی یافتہ بنگال بن کر اسی عظمت کو حاصل کرے گا۔‘‘

******

ش ح۔ ش ا ر۔ ول

Uno-4075