কেন্দ্ৰীয় ইলেক্ট্ৰনিক্স আৰু তথ্য প্ৰযুক্তি মন্ত্ৰী শ্ৰী অশ্বিনী বৈষ্ণৱে ইণ্ডিয়া এআই ইমপেক্ট সন্মিলন ২০২৬ ৰ উদ্বোধনী অনুষ্ঠানত নতুন দিল্লী ফ্ৰণ্টিয়াৰ এআই প্ৰতিশ্ৰুতি ঘোষণা কৰে, যি এই সন্মিলনৰ এক ঐতিহাসিক ফলাফল। এই পদক্ষেপে অগ্ৰণী এআই কোম্পানীসমূহ আৰু ভাৰতৰ ঘৰুৱা উদ্ভাৱকসকলক একত্ৰিত কৰি অন্তৰ্ভুক্ত আৰু দায়িত্বশীল এআইৰ অগ্ৰগতিৰ বাবে কাম কৰি আছে।

শ্ৰী অশ্বিনী বৈষ্ণৱে সন্মিলনত ভাষণ প্ৰদান কৰি ভাৰতৰ এআই ৰণকৌশলক গণতান্ত্ৰিকীকৰণ, অন্তৰ্ভুক্তি আৰু সাৰ্বভৌমত্বৰ ওপৰত আধাৰিত ৰণকৌশল হিচাপে উপস্থাপন কৰে। তেওঁ স্বাস্থ্যসেৱা, কৃষি, শিক্ষা আৰু ৰাজহুৱা সেৱাসমূহত প্ৰকৃত প্ৰয়োগৰ ওপৰত গুৰুত্ব আৰোপ কৰি এআই ষ্টেকৰ পাঁচটা স্তৰত ভাৰতৰ বিস্তৃত দৃষ্টিভংগীৰ ৰূপৰেখা দাঙি ধৰে- প্ৰয়োগ, মডেল, কম্পিউটিং, প্ৰতিভা আৰু শক্তি।

শ্ৰী অশ্বিনী বৈষ্ণৱে ভাষণ প্ৰসংগত কয় যে কৃত্ৰিম বুদ্ধিমত্তা হৈছে এক মৌলিক প্ৰযুক্তি। ইয়ে ইতিমধ্যে আমাৰ কাম কৰা, শিকাৰ আৰু সিদ্ধান্ত গ্ৰহণৰ ধৰণ সলনি কৰিবলৈ আৰম্ভ কৰিছে। আমাৰ প্ৰধানমন্ত্ৰীয়ে বিশ্বাস কৰে যে প্ৰযুক্তিৰ প্ৰকৃত মূল্য হ'ল ইয়াৰ লাভ জনসাধাৰণৰ মাজলৈ লৈ যোৱা। আমাৰ প্ৰধানমন্ত্ৰীৰ দৃষ্টিভংগী হ'ল প্ৰযুক্তিৰ গণতান্ত্ৰিকীকৰণ, ইয়াৰ ব্যাপক প্ৰয়োগ আৰু ইয়াক সকলোৰে বাবে সহজলভ্য কৰি তোলা। সেইবাবেই ভাৰতত আমি এআইৰ পাঁচটা স্তৰত কাম কৰি আছো। আমি যেতিয়া কৃত্ৰিম বুদ্ধিমত্তাৰ সুবিধাসমূহৰ প্ৰতি সজাগ হ'ম, তেতিয়া বিপদসমূহ হ্ৰাস কৰিবলৈ আমি সমূহীয়া সমাধানো বিচাৰি উলিয়াব লাগিব। মানৱীয় সুৰক্ষা আৰু সন্মানক কৃত্ৰিম বুদ্ধিমত্তাৰ কেন্দ্ৰত ৰাখি আমি দৃঢ়তাৰে আগুৱাই যাব পাৰো। আহক, আমি মানুহৰ বাবে, মানুহৰ দ্বাৰা আৰু মানুহৰ ভৱিষ্যতৰ বাবে কৃত্ৰিম বুদ্ধিমত্তা নিৰ্মাণ কৰো। ”

এই স্বেচ্ছামূলক প্ৰতিশ্ৰুতিসমূহে এআই প্ৰণালীৰ বিকাশ আৰু স্থাপনৰ ক্ষেত্ৰত সমতা, সাংস্কৃতিক বৈচিত্ৰতা আৰু বাস্তৱ জগতৰ প্ৰয়োজনীয়তা, বিশেষকৈ উন্নয়নশীল দেশসমূহৰ প্ৰয়োজনীয়তা সুনিশ্চিত কৰাৰ বাবে এক অংশীদাৰ দৃষ্টিভংগীৰ প্ৰতিফলন ঘটায়। অংশগ্ৰহণকাৰী সংগঠনসমূহত আছে ভাৰতৰ উদ্ভাৱকসকল যেনে - সৰ্বম, ভাৰতজেন, জ্ঞানী.এআই আৰু ছ'কেটৰ লগতে বিশ্বব্যাপী অগ্ৰণী এআই কোম্পানীসমূহ ইয়াত অন্তৰ্ভুক্ত হৈ আছে।

প্ৰথমটো প্ৰতিশ্ৰুতি, "বাস্তৱ জগতত এআইৰ ব্যৱহাৰৰ বুজাবুজি আগুৱাই নিয়া", বেনামী আৰু সংগ্ৰহিত তথ্যৰ যোগেদি বাস্তৱ পৃথিৱীত এআইৰ ব্যৱহাৰৰ ওপৰত গুৰুত্ব আৰোপ কৰে। অংশগ্ৰহণকাৰী সংস্থাসমূহে নিয়োগ, দক্ষতা, উৎপাদনশীলতা আৰু অৰ্থনৈতিক পৰিৱৰ্তনৰ ওপৰত এআইৰ প্ৰভাৱ সম্পৰ্কীয় নীতি নিৰ্ধাৰণত সহায়ক প্ৰমাণ সংগ্ৰহ কৰিব। বিভিন্ন ক্ষেত্ৰত এআইৰ ব্যৱহাৰৰ তথ্য-ভিত্তিক বিশ্লেষণৰ জৰিয়তে, এই পদক্ষেপৰ উদ্দেশ্য হৈছে চৰকাৰ আৰু প্ৰতিষ্ঠানসমূহক প্ৰযুক্তিগত পৰিৱৰ্তনৰ সৈতে জড়িত বিপদ হ্ৰাস কৰি সুবিধাসমূহ সৰ্বাধিক কৰাৰ বাবে জ্ঞাত কৌশল প্ৰস্তুত কৰাত সহায় কৰা।

দ্বিতীয়টো প্ৰতিশ্ৰুতি, "বহুভাষিক আৰু প্ৰাসংগিক মূল্যায়ন শক্তিশালী কৰা", বিভিন্ন ভাষা, সংস্কৃতি আৰু বাস্তৱ ব্যৱহাৰৰ ক্ষেত্ৰত এআই প্ৰণালীৰ প্ৰভাৱ নিশ্চিত কৰাৰ প্ৰচেষ্টাত মনোনিৱেশ কৰিছে। এই সংস্থাসমূহে চৰকাৰ আৰু স্থানীয় পৰিবেশতন্ত্ৰৰ সৈতে মিলি এনে ডাটাচেট, বেনচমাৰ্ক আৰু দক্ষতা বিকাশ কৰিব যিয়ে কম প্ৰচলিত ভাষা আৰু সাংস্কৃতিক প্ৰেক্ষাপটত মূল্যায়নত সহায় কৰিব। এই প্ৰচেষ্টাই বৈচিত্ৰ্যপূৰ্ণ জনসংখ্যাৰ বাবে এআইৰ প্ৰদৰ্শন উন্নত কৰিব আৰু বিশ্বব্যাপী উচ্চ-মানৰ এআই অভিজ্ঞতালৈ প্ৰৱেশাধিকাৰ গণতান্ত্ৰিক কৰাত সহায় কৰিব, লগতে সঁজুলি আৰু মূল্যায়ন পদ্ধতিৰ নিৰ্বাচনত নমনীয়তা বজাই ৰাখিব।

শ্ৰী বৈষ্ণৱে কয় যে মানৱ জাতিৰ কল্যাণৰ বাবে চৰকাৰ, উদ্যোগ আৰু গৱেষণা সম্প্ৰদায়ৰ মাজত সহযোগিতামূলক পদক্ষেপ গ্ৰহণ কৰাটো আৱশ্যক। তেওঁ অংশগ্ৰহণকাৰী সংস্থাৰ নেতৃবৰ্গক বিশ্বব্যাপী দায়িত্বশীল এআই বিকাশৰ ভেটি হিচাপে এই প্ৰতিশ্ৰুতিসমূহ আগবঢ়াই নিবলৈ আমন্ত্ৰণ জনায়।

Pallavi Chinya/ Mahesh Kumar / Pawan Singh Faujdar/ Mahesh J/Dipankar