ಆದಾಯ ತೆರಿಗೆ ಇಲಾಖೆಯು ನವೆಂಬರ್ 2025 ರಲ್ಲಿ ಆಹಾರ ಮತ್ತು ಪಾನೀಯ (F&B) ವಲಯದಲ್ಲಿನ ತೆರಿಗೆ ವಂಚನೆಯ ಮಾದರಿಗೆ ಸಂಬಂಧಿಸಿದ ತನಿಖೆಯನ್ನು ನಡೆಸಿತ್ತು. ಈ ಪ್ರಕ್ರಿಯೆಯ ಸಮಯದಲ್ಲಿ, ಹಲವಾರು ರೆಸ್ಟೋರೆಂಟ್‌ ಗಳು ಅಸಲಿ ಮಾರಾಟವನ್ನು ಮರೆಮಾಚಲು ಬೃಹತ್ ಬಿಲ್‌ಗಳನ್ನು ಅಳಿಸಿಹಾಕುವುದು ಮತ್ತು ಇತರ ಮಾರ್ಪಾಡುಗಳನ್ನು ಮಾಡುವುದರಲ್ಲಿ ತೊಡಗಿರುವುದು ಕಂಡುಬಂದಿದೆ.

ಎಐ ಸಕ್ರಿಯಗೊಳಿಸಿದ ವಿಶ್ಲೇಷಣಾತ್ಮಕ ಸಾಧನಗಳನ್ನು ಬಳಸಿ F&B ವಲಯದ ಸುಮಾರು 1.77 ಲಕ್ಷ ರೆಸ್ಟೋರೆಂಟ್‌ ಗಳ ವಹಿವಾಟಿನ ಡೇಟಾವನ್ನು ಸುಧಾರಿತ ವಿಶ್ಲೇಷಣೆಗೆ ಒಳಪಡಿಸಲಾಯಿತು. ಈ ಡೇಟಾವನ್ನು ಅವರು ತಮ್ಮ ಆದಾಯ ತೆರಿಗೆ ರಿಟರ್ನ್ಸ್‌ ನಲ್ಲಿ ಘೋಷಿಸಿದ ವಹಿವಾಟಿನೊಂದಿಗೆ ಹೋಲಿಸಲಾಯಿತು. ಈ ವಿಶ್ಲೇಷಣೆಯು ಆದಾಯವನ್ನು ದೊಡ್ಡ ಪ್ರಮಾಣದಲ್ಲಿ ಕಡಿಮೆ ವರದಿ ಮಾಡಿರುವುದನ್ನು ಬಹಿರಂಗಪಡಿಸಿದೆ. ಕೆಲವು ಸಂದರ್ಭಗಳಲ್ಲಿ, ದಾಖಲಾದ ಮಾರಾಟವು ಹಣಕಾಸಿನ ಖಾತೆಗಳಲ್ಲಿ ಅಥವಾ ತೆರಿಗೆ ಸಲ್ಲಿಕೆಗಳಲ್ಲಿ ಸಂಪೂರ್ಣವಾಗಿ ಪ್ರತಿಫಲಿಸಿಲ್ಲ ಮತ್ತು ಕೆಲವು ವಹಿವಾಟುಗಳನ್ನು ವರದಿ ಮಾಡಿದ ಮಾರಾಟದಿಂದ ಹೊರಗಿಡಲಾಗಿತ್ತು.

ಇದರ ಪರಿಣಾಮವಾಗಿ, 8 ಮಾರ್ಚ್ 2026 ರಂದು 22 ರಾಜ್ಯಗಳ 46 ನಗರಗಳಾದ್ಯಂತ 62 ರೆಸ್ಟೋರೆಂಟ್‌ ಗಳಲ್ಲಿ ರಾಷ್ಟ್ರವ್ಯಾಪಿ ಸಮೀಕ್ಷೆಯನ್ನು ನಡೆಸಲಾಯಿತು. ಪ್ರಾಥಮಿಕವಾಗಿ, ಈ ಪ್ರಕ್ರಿಯೆಯು ಸುಮಾರು 408 ಕೋಟಿ ರೂಪಾಯಿಗಳಷ್ಟು ಮಾರಾಟದ ಮರೆಮಾಚುವಿಕೆಯನ್ನು ಬಹಿರಂಗಪಡಿಸಿದೆ. ಈ ಬಗ್ಗೆ ತನಿಖೆ ನಡೆಯುತ್ತಿದೆ.

ಇಲಾಖೆಯು ಸ್ವಯಂಪ್ರೇರಿತ ಅನುಸರಣೆ ಮತ್ತು ವಿಶ್ವಾಸ ಆಧಾರಿತ ವಿಧಾನಕ್ಕೆ ಒತ್ತು ನೀಡುವುದನ್ನು ಮುಂದುವರಿಸಿದೆ. ತೆರಿಗೆದಾರರು ತಮ್ಮ ತಪ್ಪುಗಳನ್ನು ಸರಿಪಡಿಸಿಕೊಳ್ಳಲು ಮಾರ್ಗದರ್ಶನ ಮತ್ತು ಸಲಹೆ ನೀಡಲು ಇದು SAKSHAM NUDGE ಅಭಿಯಾನವನ್ನು ಪ್ರಾರಂಭಿಸಿದೆ. ಆದಾಯ ತೆರಿಗೆ ಕಾಯಿದೆಯ ಸೆಕ್ಷನ್ 139(8A) ಅಡಿಯಲ್ಲಿ ನವೀಕರಿಸಿದ ರಿಟರ್ನ್ಸ್‌ ಗಳನ್ನು ಸಲ್ಲಿಸಲು ತೆರಿಗೆದಾರರನ್ನು ಪ್ರೋತ್ಸಾಹಿಸಲಾಗುತ್ತದೆ. ಮೊದಲ ಹಂತದಲ್ಲಿ, ಗುರುತಿಸಲಾದ 63,000 ರೆಸ್ಟೋರೆಂಟ್‌ ಗಳಿಗೆ ಇಮೇಲ್‌ ಗಳು ಮತ್ತು ಸಂದೇಶಗಳನ್ನು ಕಳುಹಿಸಲಾಗುವುದು, 31 ಮಾರ್ಚ್ 2026 ರ ಮೊದಲು ತಮ್ಮ ರಿಟರ್ನ್ಸ್‌ ಗಳನ್ನು ನವೀಕರಿಸುವಂತೆ ಅವರನ್ನು ವಿನಂತಿಸಲಾಗುವುದು.

 

*****

(ಪ್ರಕಟಣೆ ಐ.ಡಿ.: 2237278) ವಿಸಿಟರ್ ಕೌಂಟರ್ : 12