প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা দিল্লিদা লুপা করোর ৩৩,৫০০ রোমগী তোঙান তোঙানবা চাউখৎ-থৌরাংগী প্রোজেকশিং শঙ্গাখ্রে, উরেপ-উয়ুং তমখ্রে
অনৌবা অমসুং বিকসিত দিল্লি অমা শেমগৎনবা ঐখোয়না থবক পায়খৎলে; ঙসি হৌদোক্লিবা প্রোজেকশিং অসিনা ইনফ্রাষ্ট্রকচর ফগৎহনগনি, লম্বী-থোঙ ফগৎহনগনি অমসুং সহর অসিগী মীয়াম হিংবদা লাইবা হেনগৎহনগনি: প্রধান মন্ত্রী
ভারতকী ‘নারী শক্তি’ হিরম খুদিংমক্ত অনৌবা থৌনাগা লোয়ননা মাঙলোমদা চঙশিল্লি: প্রধান মন্ত্রী
দিল্লি চাউখৎপা হায়বসি সহর অমা খক চাউখৎপা নত্তে; মসি লৈবাক পুম্নমক্কী মিংচৎকা মরী লৈনৈ: প্রধান মন্ত্রী
ঙসিদগী থবক হৌরবা অনৌবা মেত্রো সেক্সন অসিনা নোংপোক অমসুং অৱাং-নোংপোক দিল্লিগী মীয়াম য়াওনা সহর অসিগী মীওই লাখ কয়াদা অচৌবা খুদোংচাবা পীরগনি: প্রধান মন্ত্রী
ঐখোয়গী লম্বী নাকলদা পোৎ-চৈ য়োল্লিবা মরুপশিংদা পি.এম শ্বানিধি ক্রেদিদ কার্দ পীনবা সরকারনা খোঙজং অমা হৌদোক্লে; হৌজিক মখোয় মশাগী ফুরিৎখাউদা ক্রেদিদ কার্দ অমা হাপ্লগনি, মখোয়গী দরকার ওইরকপা মতমদা শীজিন্নবা ঙম্লগনি: প্রধান মন্ত্রী
থাগৎখিবা:
08 MAR 2026 3:18PM by PIB Imphal
প্রধান মন্ত্রী শ্রী নরেন্দ্র মোদীনা দিল্লিদা লুপা করোর ৩৩,৫০০ রোমগী তোঙান তোঙানবা চাউখৎ-থৌরাংগী প্রোজেকশিং শঙ্গাখ্রে, উরেপ-উয়ুং তমখ্রে। থৌরম অদুদা মীয়ামদা ৱা ঙাংবদা, প্রধান মন্ত্রীনা হায়খি মদুদি দিল্লিগী চাউখৎপদা অনৌবা ইনোৎ অমা হাপ্নবা ঙসি মফম অসিদা ঐখোয় ময়াম পুল্লে।
প্রধান মন্ত্রীনা হায়খি মদুদি মেত্রো নেতৱার্ক শেমগৎপদগী হৌরগা সরকারগী থবক তৌবা মীওই লিশিং কয়াদা অনৌবা লৈনবা য়ুমশিং ফংহনবা য়াওনা প্রোজেকশিং অসিনা কোনশিনবা থবকশিং পাক-চাউই। দিল্লিগী মীয়াম্না অনৌবা থাজবা অমসুং অনৌবা ৱারেপকা লোয়ননা, হৌখিবা চহিদা মফম অসিদা দবল-ইঞ্জিন সরকার শেমখ্রে অমসুং মদুগী ফল ঙসি চাউখৎ-থৌরাংগী থবকশিং ওইনা উবা ফংলে।
থৌরম অসিদা মালেমগী নুপীশিংগী নুমিৎ শরুক য়ারদুনা, প্রধান মন্ত্রীনা হায়খি থৌরম অসিদা মশিং য়াম্লবা নুপীশিং শরুক য়াবগীদমক থাগৎপা ফোঙদোকচরি অমসুং রাজ্য সরকারগী লমজিং মখাদা রাজনিতি, সাইন্স অমসুং শান্নবা য়াওনা হিরম কয়াদা মখোয়গী থৌনা অমসুং মশানা মশাবু থাজবনা ভারতকী ফিবম ফগৎহনবনি। রাজনিতি, লৈবাক ঙাকপা, সাইন্স, শান্নবা নত্ত্রগা খুন্নাইগী থবক তৌবা ওইগেরা, হিরম খুদিংমক্ত অনৌবা থৌনাগা লোয়ননা ভারতকী নারী শক্তি মাঙলোমদা চঙশিল্লি।
প্রধান মন্ত্রীনা হায়খি মদুদি দিল্লি অসি মালেমগী শক্তমনি অমসুং ভারতকী গনতন্ত্রগী মপাঙ্গল কনবা খুদমনি। নমো ভারত ত্রেন অমসুং পুৱারি ওইনা মেত্রো নেতৱার্ক কিমি ৩৭৫ শাংদোকপগুম্বা লৈবাক্কী কোনুংগী ইনফ্রাষ্ট্রকচর অমসুং লম্বী-থোঙ মতমগা চুনবা মওংদা শেমগৎপা অসি ভারতকী থাজবা মালেমদা উৎনবা তঙাইফদে। হেন্না অনৌবা, খুদোংচাবা অমসুং লম্বী-থোং হেন্না খুদোংচাবা দিল্লি অমা ওইরকপা অসিনা ভারতকী মশানা মশাবু থাজবা অদু মালেম্না উৎবা ঙমগনি।
প্রধান মন্ত্রীনা হায়খি মদুদি দবল-ইঞ্জিন লৈঙাক নমুনাগী মখাদা, নুমিৎ খুদিংগী বস তোংলিবা মীওই লাখ কয়া মৈখু থাংদবা, নুংঙাইবা অমসুং অনৌবা চৎথোক-চৎশিনগী খুদোংচাবা ফংনবা লৈবাক্কী কোনুংগী চৎথোক-চৎশিনগী থবক খুদিংমক ফগৎহল্লে। কেন্দ্রনা পীখিবা ইলেক্ত্রিক বস লিশিং ৪ হেন্না চেনবা হৌখ্রে, হৌখিবা চহি খক্তদা অহেনবা অনৌবা বস ১,৮০০ রোম পীখ্রে, মসিগী মনুংদা দিল্লিগী কোলোনিশিং অমসুং লৈকায়শিং ফাওবা য়ৌগদবা ‘দেবী বসশিং’ য়াওরি।
প্রধান মন্ত্রীনা হায়খি মদুদি লৈবাক্কী কোনুং অসিনা মায়োক্নরিবা মখল কয়াগী খুদোংচাদবশিং কোকহন্নবা সরকারনা হৌজিক মিসনগী মওংদা থবক পায়খৎলি। মমাঙদা সহর অসি ফাউদুনা চৎলম্বা গারি লাখ কয়া পেরিফেরেল এক্সপ্রেসৱেনা মাইপাক্না থৈদোক্লে। যমুনা তুরেল হিঙ্গৎহন্নবা অচৌবা থবক অমা পায়খৎপা হৌরে, তুরেল অসি লু-নান্না থম্নবা লুপা করোর কয়াগী প্রোজেকশিং পায়খৎপা হৌখ্রে।
প্রধান মন্ত্রীনা হায়খি মদুদি হৌখিবা চহিদা অয়ুস্মান অরোগ্যা মন্দিরশিং লিংখৎতুনা কোনুং অসিদা মখা তানা মীয়ামগী পুন্সিগী থাক ৱাংখৎনবা সরকারনা কৎথোক্লে। দিল্লিদা অয়ুস্মান স্কিম পায়খৎপগা লোয়ননা, লায়রবা অমসুং মিদল ক্লাস অনিমক হৌজিক লেম্না লাইয়েংবগী খুদোংচাবা ফংলে অমসুং অনা-লাইয়েংগী থবক শিংথাবা য়ানা ফগৎলে। হৌজিক চৎনরিবা চাউখৎপগী নমুনা অসি খুদক্ত থবক পায়খৎপা অমসুং অথুবদা ফলশিং ফংহনবনি, প্রোজেকশিং অথুবা মতমদা য়াংনা থৌরাং তৌবদগী থবক ওইনা পায়খৎপনি।
থৌরম অসিগী মমাঙদা মহাক্না সরোজিনি নাগরদা চৎখিবা অদু ফোঙদোক্লদুনা, প্রধান মন্ত্রীনা হায়খি সরকারগী থবক তৌবা মীওইশিংগীদমক খন্ননা দিজাইন তৌরবা অনৌবা য়ুমশিং শঙ্গারে। লৈবাক অসিগী পান্দমশিং ফংনবা চোকথবা লৈতনা থবক শুরিবা মীওইশিং অশোই-অঙাম লৈতবা, অনানবা অমসুং নুংঙাইবা য়ুমশিং ফংফম থোকই, মরম অসিদগী অনৌবা ইনফ্রাষ্ট্রকচর প্রোজেকশিং পায়খৎপনি। ঙসি বেনিফিসরিশিংদা ফ্লেত লিশিং কয়া খুৎশীন্নরে। অনৌবা য়ুমশিং অসিনা সরকারগী কর্মায়োগীশিংদা অনৌবা হরাওবা অমসুং অনিংবগী যুগ অমা ফংহল্লগনি।
প্রধান মন্ত্রীনা হায়খি মদুদি খুঙ্গংশিং অমসুং সহরগী য়ুমথোঙশিংদা য়াইফ-থৌরাংগী স্কিমশিং য়ৌরে, লায়রবা ইমুংশিং, লৌমীশিং অমসুং শিন্মীশিং কান্নবা ফংলে। দিল্লিদা লম্বী নাকলদা পোৎ-চৈ য়োল্লিবা মীওই লাখ ২ রোম পি.এম শ্বানিধি য়োজনাগী মখাদা লুপা করোর ৩৫০ হেনবগী শেন্থং ফংলে, মখোয় শেন্দোয় য়াম্না ৱাংনা শেন পুবদগী বেঙ্কগী থবক্ত ওনশিল্লক্লে। মতম অমদা ইনাকখুনবা মীওইশিং খক্তগী ওইরম্বা ক্রেদিদ কার্দকী খুদোংচাবা, হৌজিক মখোয়গী অপীকপা ললোন-ইতিকশিং চাউখৎনবা লম্বী নাকলগী পোৎ-চৈ য়োনবশিংদা পীরে। মতম অমদা ফিবম চাদনা লৈরম্বা মীওইশিং হৌজিক অনৌবা শেন-থুমগী খুৎলায়শিংনা ফিবম ফগৎহল্লে। হৌজিক মখোয় মশাগী ফুরিৎখাউদা ক্রেদিদ কার্দ অমা হাপ্লগনি, মখোয়গী দরকার ওইরকপা মতমদা শীজিন্নবা ঙম্লগনি।
মালেমগী নুপীশিংগী নুমিৎ শরুক য়ারদুনা, প্রধান মন্ত্রীনা হায়খি মদুদি “লাখপতি দিদি” করোর ৩ শেমগৎনবা লৈবাক অসিগী ৱাশক ঙাকপা ঙম্লে। হৌজিক নুপী করোর ১০ হেন্না সেল্ফ হেল্প গ্রুপশিংগী খুৎথাংদা ফিবম ফগৎলে। নুপীশিং অসিদা শেল্লেপ অমসুং বেঙ্কগী খুদোংচাবশিং অমসুং অখন্নবা ত্রেনিংশিং ফংহন্দুনা, মখোয় শেন-থুমগী মনিংতম্বা ফংহল্লে অমসুং খুঙ্গংগী শেন্মিৎলোন চাউখৎহল্লে। ঐখোয়গী ইচলশিংগী মাইপাকপা অসিনা অনৌবা লাখপতি দিদি করোর ৩ শেমগৎনবা অনৌবা ৱাশক অমগী ইথিল পীরে অমসুং ঐখোয়গী নারী শক্তিগী থৌজালশিংগা লোয়ননা পান্দম অসি ফংগনি হায়না ঐনা থাজৈ।
হন্দক নোংচুপ বেঙ্গলদা থোকখিবা থৌদোকশিংদা নুংনাংবা ফোঙদোক্লদুনা, প্রধান মন্ত্রীনা হায়খি মদুদি সন্থাল ত্রাইবেল ফেষ্টিবেল অমা শরুক য়ানবা ভারতকী রাষ্ট্রপতি শ্রীমতি দ্রৌপতি মুর্মুগী খোঙচৎ মনুংদা রাজ্য সরকারনা ইকায়খুম্নবা উৎখিদে। অসিগুম্বা নাপল কাবা রাজনিতি অসি রাজ্য অসিগী মীয়াম্না য়ারোই। রাষ্ট্রপতি থৌরম শরুক য়াদবা অমসুং ফজনা অশীন-অরাং তৌদবা হায়বসি সংবিধান ইকায়বা পীবনি অমসুং লৈবাক অসিগী নুপী খুদিংমক অমসুং মীয়াম্না মসিগী শক্তিগী নাপল অসি কৈদৌঙৈদা ঙাকপীরোইদবনি।
মহাক্কী ৱারোল লোইশিল্লকপদা, প্রধান মন্ত্রীনা হায়খি অনৌবা ভারত অমগী মশানা মশাবু থাজবগা লোয়ননা হৌজিক অওনবা যুগ অমা উরিবা পুৱারি ওইরবা সহর অমনি দিল্লি, সহর অসিগী চাউখৎলবা তুংলমচৎ অমগী য়ুম্ফম ওইনা থবক তৌগনি। লৈবাক্কী পান্দমশিং ফংনবা মাইকৈদা মীওই খুদিংমক অপুনবা ওইনা থবক পায়খৎকদবনি। নৌনা হৌদোক্লিবা প্রোজেকশিং অসিগীদমক মীয়ামদা হরাওবা ফোঙদোকচরি। অনৌবা ভারত অমগী মশানা মশাবু থাজবনা ঐখোয় চাউখৎলবা তুংলমচৎ অমদা লমজিংগনি, অমসুং দিল্লিগী ইমুং খুদিংমক হেন্না ফবা অমসুং হেন্না নুংঙাই য়াইফবা পুন্সি অমা উবা ফংলগনি হায়না ঐনা থাজৈ।
***
(রিলিজ আই.দি.: 2236709)
ভিজিতর কাউন্তর : 13
রিলিজ অসি মসিদা পাবীয়ু:
English
,
Urdu
,
Marathi
,
हिन्दी
,
Bengali
,
Bengali-TR
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam