جمہوریہ فن لینڈ کے صدر  عزت مآب ڈاکٹر الیگزینڈر اسٹب نے آج (5 مارچ، 2026 کو) راشٹرپتی بھون میں صدر جمہوریہ ہند محترمہ دروپدی مرمو سے ملاقات کی۔

راشٹرپتی بھون میں صدر اسٹب کا خیرمقدم کرتے ہوئے صدر جمہوریہ ہند نے کہا کہ اس سال کے رائے سینا ڈائیلاگ میں مہمان خصوصی  کے طور پر ان کی موجودگی بھارت کے لیے باعث فخر ہے۔ انہوں نے یقین ظاہر کیا کہ عصری عالمی صورتحال پر ان کے خیالات یقیناً تمام شرکاء کے لیے بہت قیمتی ثابت ہوں گے۔

صدر جمہوریہ نے کہا کہ بھارت فن لینڈ کو ایک قابل قدر اور بھروسہ مند شراکت دار کے طور پر دیکھتا ہے جس کا رشتہ باہمی اعتماد اور مشترکہ جمہوری روایات پر مبنی ہے۔

دونوں رہنماؤں نے اس بات پر اتفاق کیا کہ حالیہ برسوں میں، بھارت -فن لینڈ کے تعلقات ایک متحرک شراکت داری میں تبدیل ہوئے ہیں جو جدت، صاف ستھری تکنالوجی، تعلیم، اور اقتصادی تعاون کے اہم ستونوں کے طور پر چل رہے ہیں۔ صدر مرمو نے اس اعتماد کا اظہار بھی کیا کہ حال ہی میں اعلان کردہ بھارت -یورپی یونین آزاد تجارتی معاہدہ ہمارے تجارتی اور سرمایہ کاری کے تعلقات کو نئی رفتار فراہم کرے گا۔

صدر جمہوریہ نے کہا کہ فن لینڈ کوانٹم تکنالوجی سے لے کر 6جی تک جدید ڈیجیٹل تکنالوجیوں میں ایک عالمی رہنما ہے، اور انہوں نے بھارت کے وکست بھارت کے سفر میں فن لینڈ کی کمپنیوں کے کردار کی تعریف کی۔ انہوں نے اس بات پر زور دیا کہ کئی بھارتی کمپنیاں فن لینڈ میں سرگرم ہیں اور ہزاروں ہندوستانی، خاص طور پر آئی ٹی پیشہ ور افراد، فن لینڈ کی معیشت میں اہم تعاون دے رہے ہیں۔ انہوں نے کہا کہ یہ منظرنامہ ان شعبوں میں ہمارے ممالک کے درمیان گہرے تعاون کے بے پناہ امکانات فراہم کرتا ہے۔

صدر نے پائیدار ترقی اور صاف ستھری تکنالوجیوں میں فن لینڈ کی قیادت کی بھی ستائش کی۔ انہوں نے مزید کہا کہ بھارت نے بھی اپنی شمسی اور ہوا کی توانائی کی صلاحیتوں کو بڑھا کر، گرین ہائیڈروجن کو فروغ دے کر، پائیدار توانائی کی کارکردگی کو بہتر بنا کر، اور بین الاقوامی شمسی اتحاد اور عالمی حیاتیاتی ایندھن اتحاد جیسے پلیٹ فارم کی شروعات کرکے، آب و ہوا کی کارروائی میں قابل ذکر پیش رفت کی ہے۔ انہوں نے صدر اسٹب کو لائف مشن سے بھی آگاہ کیا، جو لوگوں کو پائیدار طرز حیات اپنانے کی ترغیب دیتا ہے۔ انہوں نے کہا کہ پائیدار تکنالوجیوں میں فن لینڈ کی مہارت کو ہندوستان کی سبز توانائی کی اختراع کے ساتھ جوڑ کر، ہم یہ ظاہر کر سکتے ہیں کہ خوشحالی اور پائیداری ساتھ ساتھ چل سکتی ہیں۔

**********

 (ش ح –ا ب ن)

U.No:3415