জো বোলে সো নিহাল, সত্ শ্ৰী অকাল! আজি আমি সকলোৱে 'হিন্দ দি চাদৰ' শ্ৰী গুৰু টেগ বাহাদুৰ চাহিব জীৰ ৩৫০ সংখ্যক শ্বহীদ বাৰ্ষিকী উপলক্ষে তেওঁক আন্তৰিকতাৰে স্মৰণ কৰিছো। এই শ্বহীদ দিৱসত সমবেত হোৱা সকলোকে মোৰ অভিবাদন। এই ঐতিহাসিক আৰু পবিত্ৰ অনুষ্ঠানৰ অংশ হ’বলৈ সক্ষম হোৱাটো মোৰ বাবে সৌভাগ্যৰ বিষয়।

​বন্ধুসকল,

ভাৰতৰ ইতিহাস হৈছে সাহসিকতা, সমন্বয় আৰু সহযোগিতাৰ ইতিহাস। মহাৰাষ্ট্ৰৰ ভূমিত আয়োজিত এই অনুষ্ঠানৰ জৰিয়তে আমি সেই একেই মহান ঐতিহ্যৰ সাক্ষী হৈছো। যেতিয়া আমাৰ গুৰুসকলে ত্যাগৰ চূড়ান্ত সীমাৰ অনুশীলন কৰিছিল, সেই সময়ত আমাৰ সামাজিক ঐক্যই এক অতি ডাঙৰ ভূমিকা পালন কৰিছিল। প্ৰতিটো শ্ৰেণীৰ, প্ৰতিখন সমাজৰ মানুহে আমাৰ গুৰুসকলৰ পৰা অনুপ্ৰেৰণা লাভ কৰিছিল। সমাজে সকলো পৰিস্থিতিতে সত্য আৰু সংস্কৃতিৰ বাবে দৃঢ় হৈ থাকিবলৈ শিকিছে। সামাজিক একতাৰ সেই মহান ত্যাগত, শ্ৰী গুৰু গোবিন্দ সিং জীৰ গুৰু নানক নামলেৱা সংগতৰ দৰে ৰীতি-নীতিয়ে এক ডাঙৰ ভূমিকা পালন কৰিছিল। আজি যেতিয়া দেশক পুনৰ সামাজিক একতাৰ আটাইতকৈ বেছি প্ৰয়োজন, সংগতৰ এই বিস্ময়কৰ সংগঠনে আমাক বিশ্বাস প্ৰদান কৰিছে যে আমাৰ গুৰু আৰু সাধুসকলৰ আশীৰ্বাদ আমাৰ সৈতে আছে।

​

বন্ধুসকল,

এই সমাগম হৈছে নিৰন্তৰ চলি থকা যজ্ঞ। এই যাত্ৰাৰ আৰম্ভণি যোৱা বছৰ নাগপুৰৰ পবিত্ৰ ভূমিৰ পৰা হৈছিল। তাৰ পাছত নান্দেদত ঐতিহাসিক টখ্ট শ্ৰী হজুৰ চাহিবৰ মাটিত আমি সকলোৱে সেই আৱেগ অধিক গভীৰ হোৱা দেখিছিলোঁ। আৰু আজি নৱী মুম্বাইত এই যাত্ৰা এক গুৰুত্বপূৰ্ণ মাইলৰ খুঁটিত উপনীত হৈছে। এই যাত্ৰাৰ বাৰ্তা এই তিনিখন চহৰতে সীমাবদ্ধ হৈ থকা নাই। মহাৰাষ্ট্ৰৰ প্ৰতিটো কোণলৈ, হাজাৰ গাঁও আৰু সৰু বসতিলৈ, শ্ৰী গুৰু টেগ বাহাদুৰ চাহিব জীৰ সেই বীৰত্বপূৰ্ণ ইতিহাস প্ৰেৰণ কৰা হৈছে। এই কাৰ্যসূচীৰ আয়োজন কৰাৰ বাবে মই মহাৰাষ্ট্ৰ চৰকাৰক বিশেষভাৱে অভিনন্দন জনাইছো।

​বন্ধুসকল,

শ্ৰী গুৰু টেগ বাহাদুৰ চাহিব জীৰ এই মহান ত্যাগৰ স্মৃতিত দেশৰ বিভিন্ন প্ৰান্তত বিশাল মাত্ৰাত কাৰ্যসূচীৰ আয়োজন কৰা হৈছে। মাত্ৰ কিছু সময়ৰ পূৰ্বে হাৰিয়ানাৰ কুৰুক্ষেত্ৰত আয়োজিত বিশাল অনুষ্ঠানত উপস্থিত থকাৰ সৌভাগ্য মোৰ হৈছিল। কেন্দ্ৰীয় চৰকাৰে ৰাষ্ট্ৰীয় পৰ্যায়ত আমাৰ গুৰু চাহিবসকলৰ সৈতে জড়িত প্ৰতিটো ঐতিহাসিক অনুষ্ঠান উদযাপন কৰি আহিছে। আপোনালোক সকলোৱে জানে যে শ্ৰী গুৰু টেগ বাহাদুৰ চাহিব জীৰ ৪০০ সংখ্যক প্ৰকাশ পৰব, শ্ৰী গুৰু টেগ বাহাদুৰ জীৰ প্ৰতি উৎসৰ্গিত স্মাৰক ডাক টিকট আৰু বিশেষ মুদ্ৰাৰ উন্মোচন, গুৰু নানক দেৱ জীৰ ৫৫০ সংখ্যক প্ৰকাশ পৰব-আমি আমাৰ গুৰুসকলৰ সৈতে জড়িত প্ৰতিটো উৎসৱ আৰু অনুষ্ঠান সম্পূৰ্ণ নিষ্ঠাৰে উদযাপন কৰিছো। আমি চাহিবজাদাসকলৰ সন্মানত প্ৰতি বছৰে বীৰ দিৱস উদযাপনৰ ৰাষ্ট্ৰীয় পৰম্পৰাও আৰম্ভ কৰিছো।

​

বন্ধুসকল,

কৰ্টাৰপুৰ চাহিব কৰিডৰৰ নিৰ্মাণ অভিলেখ সময়ত সম্পূৰ্ণ কৰা, শ্ৰী হেমকুণ্ড চাহিব যাত্ৰাৰ বাবে নতুন সুবিধাৰ নিৰ্মাণ, শিখ সংগঠন আৰু গুৰুদ্বাৰাৰ সৈতে জড়িত বহুতো প্ৰতিষ্ঠানক এফ চি আৰ এ-ত ৰেহাই, পাঠ্যক্ৰম আৰু সাংস্কৃতিক ভাব বিনিময়ত শিখ ইতিহাসক স্থান দিয়া-এনে বহুতো কাম, যাৰ বাবে আমাৰ শিখ ভাতৃ-ভগ্নীসকলে দশক ধৰি অপেক্ষা কৰি আছিল, আমি সেইবোৰ সম্পূৰ্ণ কৰাৰ সৌভাগ্য লাভ কৰিছো।

ভাতৃ-ভগ্নীসকল,

আমাৰ চৰকাৰে শিখসকলৰ প্ৰতি সন্মান আৰু ন্যায়ৰ প্ৰতিশ্ৰুতিৰে কাম কৰি আছে। এই প্ৰতিশ্ৰুতিৰ বাবেই আমি ১৯৮৪ চনৰ সংঘৰ্ষৰ তদন্ত কৰিবলৈ এছ আই টি গঠন কৰিছিলো। ১৯৮৪ চনৰ বন্ধ হোৱা সংঘাতৰ গোচৰসমূহ পুনৰ খোলা হয়। বহু ক্ষেত্ৰত দোষীসকলক শাস্তি দিয়া হৈছে। ১৯৮৪ চনৰ ভুক্তভোগী পৰিয়ালসমূহৰ বাবে অতিৰিক্ত ক্ষতিপূৰণ ঘোষণা কৰা হৈছে। ৰাষ্ট্ৰীয় সংখ্যালঘু আয়োগক অধিক সক্ৰিয় ভূমিকা প্ৰদান কৰা হৈছিল। একেদৰে, যেতিয়া আফগানিস্তানত শিখ ভাতৃসকলৰ সুৰক্ষা আৰু গুৰু গ্ৰন্থ চাহিবৰ সন্মানৰ প্ৰশ্ন উত্থাপন হৈছিল, তেতিয়া আমাৰ চৰকাৰে মিছন মোডত কাম কৰিছিল। আমি সুৰক্ষিতভাৱে আৰু সন্মানেৰে গুৰু গ্ৰন্থ চাহিবৰ স্বৰূপবোৰ ঘূৰাই আনিছো। আমি আফগান শিখ আৰু হিন্দুসকলক নাগৰিকত্ব দিয়াৰ পথ মুকলি কৰি দিছো। আমি চি এ এ-ৰ জৰিয়তে নিপীড়িত শিখ শৰণাৰ্থীসকলক আশ্ৰয় প্ৰদান কৰিছিলো। জম্মু-কাশ্মীৰৰ শিখ পৰিয়ালসমূহৰ বাবেও পুনৰ্বাসন পেকেজসমূহ ৰূপায়ণ কৰা হৈছে। একেদৰে, অ’ চি আই আৰু ভিছাৰ নিয়মসমূহ সৰল কৰা হৈছে। নিষিদ্ধ কৰা হাজাৰ শিখৰ নাম এনে তালিকাৰ পৰা আঁতৰাই দিয়া হৈছে। বিদেশী শিখসকলৰ ভাৰতলৈ অহা-যোৱা কৰা প্ৰক্ৰিয়া অতি সৰল কৰা হৈছে।

​

বন্ধুসকল,

শিখ সম্প্ৰদায়ৰ বিশ্বাসৰ প্ৰতি সন্মান, তেওঁলোকৰ প্ৰগতিৰ বাবে নতুন সুযোগৰ সৃষ্টি-আমি ইয়াক আমাৰ দায়িত্ব বুলি বিবেচনা কৰো আৰু আমি এই সেৱাক আমাৰ সৌভাগ্য বুলিও বিবেচনা কৰো।

​

বন্ধুসকল,

সাহস আৰু সত্যৰ সৈতে থিয় হোৱাৰ মনোভাৱ আজি শ্ৰী গুৰু টেগ বাহাদুৰ চাহিব জীৰ সময়ত থকাৰ দৰেই প্ৰাসংগিক। যেতিয়া নতুন প্ৰজন্মই এই মূল্যবোধসমূহৰ সৈতে সংযোগ স্থাপন কৰে তেতিয়া পৰম্পৰা স্মৃতি হৈ নাথাকে, ই ভৱিষ্যতৰ পথ হৈ পৰে। এই সমাগমৰ উদ্দেশ্য হ’ল আমি কেৱল ইতিহাস মনত ৰাখিব নোৱাৰো, বৰঞ্চ ইয়াক জীৱন পৰিচালনাৰ ক্ষেত্ৰত গ্ৰহণ কৰিব লাগে। এই ভাৱনাৰে মই আকৌ এবাৰ এই পবিত্ৰ সমাগমৰ সৈতে জড়িত সকলো আয়োজক আৰু সংগতক শ্ৰদ্ধাৰে অভিবাদন জনাইছো। এই ঐতিহাসিক প্ৰচেষ্টাৰ বাবে মই আপোনালোক সকলোকে আন্তৰিক কৃতজ্ঞতা জ্ঞাপন কৰিছো। ৱাহেগুৰু জী কা খালছা, ৱাহেগুৰু জী কী ফতেহ।

****

MJPS/Dr. Vandana Jatav/HS