مرکزی  وزیر برائے زراعت، کسانوں کی فلاح و بہبود اور دیہی ترقی،  جناب شیوراج سنگھ چوہان نے بدھ کے روز دہلی کے پُسّا میں بھارتی زرعی تحقیقاتی کونسل کے کیمپس میں تین روزہ پُسّا کرزی وگیان میلہ کا افتتاح کیا اور بڑے زرعی اصلاحات کے لیے ایک جامع روڈ میپ پیش کیا، جس کا مقصد بھارتی زراعت کو ‘و کست کرشی – آتمنربھَر بھارت’ کے وژن کی طرف لے جانا ہے۔ انہوں نے واضح پیغام دیا کہ کسانوں کے پیسے روکنے کا پرانا طریقہ اب برداشت نہیں کیا جائے گا۔ ایم ایس پی کی خریداری، کسان کریڈٹ کارڈ قرضے، کیڑے مار ادویات کی لائسنسنگ اور کرِشی وگیانکیندر (کے وی کے) کے کردار سمیت ہر سطح پر شفافیت، وقت کی پابندی اور جواب دہی کو یقینی بنایا جائے گا۔

معروف سالانہ پُسّا کرشی وگیان میلہ، جو بھارتی زرعی تحقیقاتی ادارے (آئی سی اے آر-آئی اے آر آئی) کے کیمپس میں منعقد ہوا، کا افتتاح مرکزی  وزیر  جناب شیوراج سنگھ چوہان نے پودا لگانے کی ایک رسمی تقریب کے ساتھ کیا۔ اس موقع پر وفاقی وزیر زراعت کے سیکریٹری جناب  دیویش چترویدی، آئی سی اے آر کے ڈائریکٹر جنرل اور محکمہ زراعتی تحقیق و تعلیم کے سیکریٹری ڈاکٹر ایم ایل جاٹ، اور آئی اے آر آئی کے ڈائریکٹر ڈاکٹر سی ایچ سرینیواس راؤ بھی موجود تھے، ساتھ ہی بڑی تعداد میں سائنسدان، ترقی پسند کسان اور مختلف اداروں کے نمائندے بھی موجود تھے۔

کسانوں کو ڈائس پر فرنٹ رو میں بٹھا کر اور ذاتی طور پر ایک معذور کسان کو ان کی وہیل چیئر میں آگے لا کر ان سے بات چیت کراتے ہوئے، وفاقی وزیر  جناب شیوراج سنگھ چوہان نے پیغام دیا کہ کسان پالیسی سازی کا مرکز ہیں۔ پروگرام کے دوران سات کسانوں کو آئی اے آر آئی کرِشی ادھییتا ایوارڈ سے نوازا گیا، جس سے ‘کسان پہلے’ کے جذبے کو مزید تقویت ملی۔

کسانوں کے پیسے روکنے پر بارہ فیصد سود لگے گا

زرعی اصلاحات پر بات کرتے ہوئے،  جناب شیوراج سنگھ چوہان نے سب سے پہلے کسانوں کی واجبات کی ادائیگی میں تاخیر کے مسئلے کو اجاگر کیا۔ ایک سخت انتباہ میں انہوں نے کہا کہ کوئی بھی ایجنسی یا ریاستی حکومت جو کسانوں کے پیسے روکے گی، اسے روکے گئے رقم پر بارہ فیصد سود ادا کرنا ہوگا۔ انہوں نے کہا کہ ادائیگی میں تاخیر اور فنڈز کو حکومت کے اکاؤنٹس میں “پارک” کرنے کا طریقہ جس سے سود کمایا جاتا ہے، اب برداشت نہیں کیا جائے گا۔ وفاقی وزیر زراعت نے واضح کیا کہ مرکزی حکومت اپنی جانب سے کسی بھی قسم کی تاخیر نہیں کرے گی، اور جہاں ریاستیں اسکیموں کے تحت ادائیگی میں تاخیر کریں، وہاں مرکز کا حصہ براہِ راست کسانوں کے اکاؤنٹس میں منتقل کرنے کا اختیار فعال طور پر زیرِ غور ہے۔ ان کا پیغام بے شک تھا: مرکز سے کسانوں کے لیے منظور شدہ فوائد بروقت اور بغیر کسی رکاوٹ کے پہنچنا چاہیے۔

زرعی مشینری، ڈرپ اور اسپلنکر آبپاشی، پالی ہاؤسز اور گرین ہاؤسز کے لیے فراہم کی جانے والی معاونت کا حوالہ دیتے ہوئے، جناب شیوراج سنگھ چوہان نے کہا کہ مرکزی حکومت 18 سے زائد اسکیموں کے تحت ریاستوں کو وسائل فراہم کر رہی ہے۔ تاہم، صرف فنڈز جاری کرنا کافی نہیں ہے۔ ایک مثال دیتے ہوئے انہوں نے کہا کہ ایک ضلع میں اگرچہ 700 کسانوں کے نام فہرست میں تھے، صرف 158 کسانوں کو ہی مشینری حاصل ہوئی۔ انہوں نے زور دیا کہ جب مرکز رقم جاری کرتا ہے، تو اس کی ذمہ داری بھی ہے کہ فوائد حقیقی کسانوں تک پہنچیں۔ اس کے لیے ایک مضبوط نگرانی کا نظام ایک لازمی اصلاح ہے۔

کے وی کے کو ضلع سطح کے زرعی اصلاحی کمانڈ سینٹر بنایا جائے گا

کرِشی وِگیان کیندر(کے وی کے) کے کردار کو اجاگر کرتے ہوئے، وفاقی وزیر نے کہا کہ کے وی کے کو مضبوط ضلع سطح کی اکائیوں کے طور پر تیار کیا جائے گا جو تحقیق اور توسیع کے درمیان پُل کا کام کریں گی۔ انہیں نئی اقسام، جدید زرعی طریقے اور کامیاب ماڈلز کو دیہات تک بہتر تعاون کے ذریعے پہنچانے کی ذمہ داری سونپی گئی ہے۔ کے وی کے کے ادارہ جاتی ڈھانچے کو مضبوط کرنا ایک اہم اصلاح کے طور پر بیان کیا گیا تاکہ سائنسی ترقیات کسانوں کے لیے حقیقی فوائد میں بدل سکیں۔

کے سی سی قرضوں پر چار فیصد سود، لیکن کوئی تاخیر نہیں – بینک جواب دہ ہوں گے

 جناب شیوراج  سنگھ چوہان نے کہا کہ تقریباً 75 فیصد چھوٹے کسان فی الحال کسان کریڈٹ کارڈ قرضوں سے فائدہ اٹھاتے ہیں، جس پر مؤثر سود کی شرح چار فیصد ہے، جو سستی کریڈٹ تک رسائی کو یقینی بناتی ہے۔ تاہم، ادائیگی میں تاخیر ناقابل قبول ہے۔ انہوں نے بینکوں اور مالی اداروں سے کہا کہ کے سی سی سے منسلک قرضے بروقت اور بغیر غیر ضروری کاغذی کارروائی کے جاری کریں، تاکہ کسانوں کو سود خوروں پر انحصار نہ کرنا پڑے۔

کیڑے مار ادویات کی لائسنسنگ میں تاخیر کا خاتمہ

کیڑے مار ادویات کے معیار اور لائسنسنگ کے مسئلے پر بات کرتے ہوئے،  جناب شیوراج سنگھ چوہان نے اعتراف کیا کہ موجودہ لائسنسنگ نظام طویل اور پیچیدہ ہے، جس کی وجہ سے ایماندار کمپنیاں بھی دفاتر کے چکر لگانے پر مجبور ہوتی ہیں اور معیار یافتہ مصنوعات کا کسانوں تک پہنچنا تاخیر کا شکار ہوتا ہے۔ انہوں نے کہا کہ کیڑے مار ادویات کی لائسنسنگ کے عمل کو آسان بنانے کے لیے اقدامات کیے جائیں گے، جن میں مراحل کم کرنا، واضح ٹائم لائنز مقرر کرنا اور مکمل شفافیت یقینی بنانا شامل ہے۔ وفاقی وزیر نے کہا کہ اس سے معیار یافتہ مصنوعات تیزی سے مارکیٹ میں پہنچیں گی اور ناقص یا جعلی مصنوعات کے خلاف سخت کارروائی ممکن ہوگی۔

ایم ایس پی کی خریداری ایک مہینے میں مکمل ہو

کم از کم حمایت یافتہ قیمت (ایم ایس پی) پر خریداری کے بارے میں  مرکزی وزیر زراعت نے کہا کہ موجودہ تین ماہ کی خریداری کی مدت عملی نہیں ہے، کیونکہ کسان اپنے پیداوار کو اتنے طویل عرصے تک نہیں رکھ سکتے۔ انہوں نے مشورہ دیا کہ ریاستوں کے تعاون سے نظام وضع کیا جائے تاکہ زیادہ سے زیادہ ایک مہینے میں ایم ایس پی کی خریداری مکمل کی جا سکے۔ اس سے کسانوں کو فوری اور منصفانہ قیمتیں ملیں گی اور بعد میں ایم ایس پی کے نام پر ناجائز منافع کمانے والوں سے بچا جا سکے گا۔

دو لاکھ کروڑ روپے کی کھاد سبسڈی براہِ راست کسانوں تک پہنچنی چاہیے

 مرکزی وزیر  نے کہا کہ مرکزی حکومت سالانہ دو لاکھ کروڑ روپے سے زیادہ کھاد سبسڈی پر خرچ کرتی ہے، جس سے کسان یوریا کے تھیلے تقریباً 2,400 روپے کے بجائے صرف 265–270 روپے میں خرید سکتے ہیں۔ انہوں نے کہا کہ یہ دیکھا جانا چاہیے کہ آیا اتنی بڑی سبسڈی براہِ راست کسانوں کے اکاؤنٹس میں ڈائریکٹ بینیفٹ ٹرانسفر (ڈی بی ٹی) کے ذریعے منتقل کی جا سکتی ہے۔ اس سے کسان خود فیصلہ کر سکیں گے کہ کون سی کھاد خریدنی ہے اور کس مقدار میں، اور سبسڈی کا اصل فائدہ وہی کسان حاصل کرے گا جو کھیت میں کھاد استعمال کر رہا ہے۔

 وکست کرشی سنکلپ ابھیان اپریل میں دوبارہ شروع ہوگا

مستقبل کی حکمت عملی بیان کرتے ہوئے،  جناب شیوراج سنگھ چوہان نے ‘ وکست کرشی سنکلپ ابھیان’ کی تفصیل بیان کی۔ اس اقدام کے تحت سائنسدانوں کی ٹیمیں دیہات کا دورہ کریں گی اور براہِ راست کسانوں کے ساتھ بات چیت کریں گی، تازہ ترین تحقیق، کیڑوں اور بیماریوں کے انتظام کے طریقے، مربوط زرعی ماڈلز اور برآمد کے قابل اقسام سے آگاہ کریں گی۔ انہوں نے کہا کہ مہم وقت کی پابندی کے ساتھ اپریل میں شروع کی جائے گی تاکہ کھڑی فصل سے پہلے کسانوں کو سائنسی مشورے، بہتر بیج اور جدید ٹیکنالوجی بروقت مل سکیں۔

پُسّا کرشی وگیان میلہ کو قومی ‘کُمبھ’ قرار دیتے ہوئے،  مرکزی وزیر  جناب شیوراج سنگھ چوہان نے کہا کہ یہ محض ایک نمائش نہیں بلکہ ملک بھر کے کسانوں، سائنسدانوں، صنعت کاروں اور پالیسی سازوں کا ایک بڑا اجتماع ہے۔ یہ ایک ایسا پلیٹ فارم ہے جہاں لیبارٹری کی تحقیق براہِ راست کھیتوں تک پہنچتی ہے اور پورے ملک کے لیے ایک ترقی یافتہ، جدید اور خود کفیل زرعی شعبے کا روڈ میپ تیار کیا جاتا ہے۔ انہوں نے آئی اے آر آئی کو ہدایت دی کہ آئندہ سال سے میلے کا انعقاد اور بھی بڑے پیمانے پر کیا جائے، تاکہ سائنس اور زرعی عمل کے درمیان اس کا کردار مزید مضبوط ہو۔

***

Urdu-3144

(ش ح۔ام۔ش ب ن)