భారత విశిష్ట గుర్తింపు ప్రాధికార సంస్థ (యూఐడీఏఐ), గూగుల్ పరస్పరం చేతులు కలిపాయి. దీంతో అధీకృత ఆధార్ కేంద్రాలను గూగుల్ మ్యాప్స్‌లో ప్రదర్శించడానికి అవకాశం ఏర్పడనుంది. ఇది ప్రజలకు దేశం నలుమూలలా సేవల లభ్యతను సరళతరం చేయడంతో పాటు, వారికి ఎంతో సౌకర్యవంతంగా కూడా ఉంటుంది.

ఆధార్ కేంద్రాలనూ, అక్కడి సేవల్ని గుర్తించడానికి పౌరులకు వీలవుతుంది. ఉదాహరణకు.. ఆధార్ వ్యవస్థలో వయోజనులను చేర్పించడం, పిల్లలను చేర్పించడం లేదా చిరునామా, మొబైల్ సంఖ్యను సరి చేయడం వంటి సేవల్ని అందిస్తున్న కేంద్రాల సమాచారాన్ని ప్రజలు తెలుసుకోవచ్చు. దీనికి తోడు, కేంద్ర లభ్యతకు సంబంధించిన సమాచారాన్ని కూడా తెలియజేయనున్నారు. దివ్యాంగజనులకు ఏయే సదుపాయాలు కల్పించారు, వాహనాలను నిలిపి ఉంచడానికి ఏర్పాట్లు, ఆయా కేంద్రాల పని వేళల వంటి వివరాలను ఆయా సేవలు లభ్యతను బట్టి ఉంటుంది. ఫలితంగా స్థానికులకు ఇదివరకటితో పోలిస్తే ఎక్కువ సౌకర్యవంతంగా ఉంటుంది.

రాబోయే కొన్ని నెలల్లో ఈ సౌకర్యం అందుబాటులోకి వస్తుందని భావిస్తున్నారు.

దేశమంతటా అత్యాధునిక ఆధార్ సేవా కేంద్రాలు (ఏఎస్‌కేస్) సహా 60,000 కన్నా ఎక్కువ ఆధార్ కేంద్రాలకు ఎలాంటి ఇబ్బందులనూ ఎదుర్కోకుండా ప్రజలు చేరుకొనేటట్లుగా చూసే, ఇప్పటితో పోలిస్తే ప్రజలకు అధిక సౌకర్యవంతంగా ఉండే, దుష్ప్రచారాన్ని తిప్పికొట్టే ఉద్దేశాలతో ఈ సహకారాన్ని తీర్చిదిద్దనున్నారు. దీంతో యూజర్లు గూగుల్ మ్యాప్స్‌ సాయంతో వెదకితే వారికి ధ్రువీకరించిన ఆధార్ కేంద్రాలు ఎక్కడ ఉన్నదీ తెలియజేయడం సాధ్యపడుతుంది.

యూఐడీఏఐ ముఖ్య కార్యనిర్వహణ అధికారి (సీఈఓ) శ్రీ భువనేశ్ కుమార్ మాట్లాడుతూ, ‘‘ఆధార్ సంఖ్యను కలిగి ఉన్న వారికి జీవన సౌలభ్యాన్ని మెరుగుపరచడంపై యూఐడీఏఐ సదా శ్రద్ధ తీసుకుంటోంది. ఈ సమన్వయాన్ని ఏర్పరుచుకోవడంతో అధీకృత ఆధార్ కేంద్రాలు ఎక్కడున్నదీ తెలుసుకోవడం ఇక సులభతరం, వేగవంతం కావడంతో పాటు మరింత పారదర్శకంగా కూడా మారుతుంది’’ అన్నారు.
ఈ సమన్వయం తదుపరి దశలో, కేంద్రం వారీగా సమాచారాన్ని నిర్వహించడానికీ, ప్రజల స్పందన విషయంలో నేరుగా సమాధానమివ్వడానికీ గూగుల్ బిజినెస్ ప్రొఫైల్‌ను యూఐడీఏఐ ఉపయోగించుకోనుంది. ఫలితంగా పారదర్శకత్వం, ప్రతిస్పందన ప్రధాన సేవల తాలూకు అనుబంధ విస్తారిత వ్యవస్థ ఏర్పాటుకు మార్గం సుగమం అవుతుంది.
ఈ భాగస్వామ్యాన్ని ఉపయోగించుకొని రాబోయే కాలంలో గూగుల్ మ్యాప్స్ సాయంతో నేరుగా అపాయింట్‌మెంట్ బుకింగుకు అవకాశం ఉంటుందేమో పరిశీలిస్తారు. అదే జరిగితే పౌరులకు ఆధార్ కేంద్ర సందర్శనలో మరింత వెసులుబాటు దొరుకుతుంది.
‘‘ధ్రువీకృత ఆధార్ కేంద్రాలను ఏకీకరించడానికి యూఐడీఏఐతో చేతులు కలపడం ద్వారా, లక్షలాది నివాసులు నమ్మకమైన సేవలను అందుకోవడాన్ని మేం సులభతరం చేస్తున్నాం. ముఖ్యమైన ప్రభుత్వ సేవలకీ, అవి అందాల్సిన ప్రజలకీ మధ్య నెలకొన్న అంతరాన్ని భర్తీ చేస్తున్నాం’’ అని గూగుల్ ఇండియా వ్యూహాత్మక భాగస్వామ్యాల విభాగం కంట్రీ హెడ్ రోలీ అగర్వాల్ అన్నారు.

***