مرکزی وزیر داخلہ اور امداد باہمی کے وزیر جناب امت شاہ نے آج بہار کے ارریہ ضلع  میں سشستر سیما بل (ایس ایس بی) کے اہلکاروں کے ساتھ بات چیت کی اور لیٹی اور اندروا میں بارڈر آؤٹ پوسٹوں کا افتتاح کیا ۔ اس موقع پر مرکزی وزیر مملکت برائے امور داخلہ جناب نتیانند رائے ، بہار کے نائب وزیر اعلی جناب سمراٹ چودھری ، مرکزی داخلہ سکریٹری ، انٹیلی جنس بیورو کے ڈائریکٹر ، وزارت داخلہ کے سکریٹری (بارڈر مینجمنٹ) اور ایس ایس بی کے ڈائریکٹر جنرل سمیت کئی دیگر معززین موجود تھے ۔

اپنے خطاب میں مرکزی وزیر داخلہ اور امداد باہمی کے وزیر جناب امت شاہ نے کہا کہ آج سشستر سیما بل (ایس ایس بی) کے اہلکاروں کے لیے سہولیات میں ضافے کے لیے تقریبا 170 کروڑ روپے کے مختلف پروجیکٹوں کا افتتاح اور سنگ بنیاد رکھا گیا ہے انہوں نے کہا کہ 2014 سے ، وزیر اعظم جناب نریندر مودی جی کی قیادت میں حکومت نے تمام مرکزی مسلح پولیس دستوں (سی اے پی ایف) کے اہلکاروں کے لیے سہولیات کو بہتر بنانے کے  مقصد سے ہمدردی پر مبنی  ایک ایکشن پلان تیار کیا ہے اور اس پہل کے تحت آج کی سنگ بنیاد رکھنے اور افتتاحی تقریبات انجام دی گئی ہیں ۔

مرکزی وزیر داخلہ نے کہا کہ آج یہاں ایس ایس بی سے متعلق کئی پروجیکٹوں کا افتتاح اور سنگ بنیاد رکھا گیا ۔ انہوں نے کہا کہ بھارت-نیپال بارڈر روڈ پروجیکٹ کے تحت 554 کلومیٹر سرحدی سڑکوں کی تعمیر کو بھی منظوری دی گئی ہے ، جن میں سے 18 میں سے 14 حصوں پر کام مکمل ہو چکا ہے ۔ انہوں نے مزید کہا کہ منظور شدہ 2468 کروڑ روپے کی رقم میں سے 2336 کروڑ روپے پہلے ہی خرچ کیے جا چکے ہیں ۔ جناب شاہ نے کہا کہ ایک بار یہ سڑک مکمل ہونے کے بعد ایس ایس بی اہلکاروں کی نگرانی کی صلاحیت میں کئی گنا اضافہ ہوجائے گا ۔

جناب امت شاہ نے کہا کہ انتخابات کے دوران ہم نے بہار کے لوگوں سے وعدہ کیا تھا کہ ہم ریاست کو دراندازی سے پاک کریں گے ۔ انہوں نے کہا کہ ہم نہ صرف دراندازوں کے نام ووٹر لسٹ سے ہٹا دیں گے بلکہ ہر درانداز کی شناخت کر کے اسے بھارت سے باہر بھیجا جائے گے ۔ انہوں نے مزید کہا کہ پورے ملک کو دراندازی سے پاک کرنا محض ایک انتخابی وعدہ نہیں ہے بلکہ مودی حکومت کا ایک پختہ عزم ہے ۔ انہوں نے کہا کہ یہ پہل پورے ’سیمانچل‘ خطے کو دراندازی سے پاک بنانے کے ساتھ شروع ہوگی ۔

مرکزی وزیر داخلہ اور امداد باہمی کے وزیر نے کہا کہ دراندازی کرنے والے نہ صرف ہمارے انتخابات پر اثر انداز ہوتے ہیں بلکہ غریبوں کے لیے مختص خوراک کا ایک حصہ بھی چھین لیتے ہیں ، ہمارے نوجوانوں کے لیے روزگار کے موقعے کو کم کرتے ہیں اور قومی سلامتی کے لیے سنگین خطرہ پیدا کرتے ہیں ۔ انہوں نے کہا کہ ملک کو دراندازی سے پاک کرنے کے لیے ہر سطح پر ملک گیر مہم شروع کرنے کا وقت آگیا ہے ۔ جناب شاہ نے مزید کہا کہ اس مہم کے تحت ملک کی سرحدوں کے 10 کلومیٹر کے اندر تمام غیر قانونی تجاوزات کو پہلے ہٹا دیا جائے گا ۔

جناب امت شاہ نے کہا کہ آبادیاتی تبدیلی کسی بھی ملک میں صحت مند معاشرے کی تشکیل میں معاون نہیں ہے ۔ انہوں نے کہا کہ تجاوزات اور دراندازی کی وجہ سے ہونے والی آبادیاتی تبدیلیاں کسی بھی ملک کی ثقافت ، تاریخ اور جغرافیہ کے لیے بہت خطرناک ہیں ۔ مودی حکومت اس مسئلے کا مستقل حل فراہم کرے گی ۔

مرکزی وزیر داخلہ نے کہا کہ آبادیاتی تبدیلی سے سب سے زیادہ متاثر ہونے والی ریاستیں مغربی بنگال ، بہار اور جھارکھنڈ ہیں ۔ انہوں نے کہا کہ جب مغربی بنگال میں ہماری حکومت بنے گی تو ہمارے ایجنڈے کا پہلا مقصد سرحد پر باڑ لگانے کا کام مکمل کرنا اور ہر دراندازی کی شناخت کرکے اسے ملک سے باہر بھیجنا ہوگا ۔

جناب امت شاہ نے کہا کہ ایس ایس بی کو کبھی اسپیشل سروس بیورو کے نام سے جانا جاتا تھا اور اسے ہندوستان کے سرحدی گاؤوں کی ثقافتی شناخت ، تاریخ اور روایات کے تحفظ اور فروغ کی ذمہ داری سونپی گئی تھی ۔ انہوں نے کہا کہ اٹل بہاری واجپئی جی کی حکومت کے دوران ہندوستان-نیپال اور ہندوستان-بھوٹان سرحدوں کی حفاظت کا کام ایس ایس بی کو سونپا گیا تھا ۔ انہوں نے کہا کہ 2001 میں بھارت اور نیپال کے درمیان 1,751 کلومیٹر طویل غیر باڑ والی سرحد کی حفاظت کی ذمہ داری ایس ایس بی کو سونپی گئی تھی ۔ 2004 میں ایس ایس بی کو 699 کلومیٹر طویل بھارت بھوٹان سرحد کی حفاظت کی ذمہ داری بھی دی گئی تھی ۔ جناب شاہ نے مزید کہا کہ ایس ایس بی کے اہلکاروں نے ہمیشہ انتہائی مشکل حالات میں سرحدوں کی حفاظت کی ہے اور سرحدی گاؤوں میں رہنے والے ہندوستانی شہریوں کی فلاح و بہبود کا مسلسل خیال رکھا  گیا ہے ۔

مرکزی وزیر داخلہ اور امداد باہمی کے وزیر نے کہا کہ یہ فرض نہیں کیا جا سکتا کہ ملک کے دشمن یا ہندوستان کو نقصان پہنچانے کا ارادہ رکھنے والے عناصر اس کی سرحدوں کے ذریعے ملک میں داخل ہونے کی کوشش نہیں کریں گے ۔ انہوں نے کہا کہ اس لیے ایس ایس بی کو ہمیشہ چوکس رہنا چاہیے اور اپنے انٹیلی جنس نیٹ ورک کو مضبوط رکھنا چاہیے ۔

جناب امت شاہ نے کہا کہ سرحدوں کی حفاظت کے ساتھ ساتھ ایس ایس بی کو اسمگلنگ ، منشیات اور دیگر غیر قانونی سرگرمیوں پر بھی کڑی نظر رکھنی چاہیے ۔ انہوں نے کہا کہ ایس ایس بی کو تمام ممکنہ خطرات کا اندازہ لگانے کے قابل ایک معیاری آپریٹنگ طریقہ کار (ایس او پی) تیار کرنا چاہیے ۔ انہوں نے مزید کہا کہ کھلی سرحدوں کو محفوظ بناتے ہوئے سرحدی سلامتی کے بہت سے نئے پہلوؤں کو مدنظر رکھنے کی ضرورت ہے۔

مرکزی وزیر داخلہ نے کہا کہ وزیر اعظم جناب نریندر مودی نے درخشاں گاؤں پروگرام -1 اور  درخشاں گاؤں پروگرام-2 کے ذریعے گاؤں کی حالت میں نمایاں بہتری لانے کا نشانہ مقرر کیا ہے ۔ انہوں نے کہا کہ مودی حکومت کی ترجیح اس بات کو یقینی بنانا ہے کہ ہمارے اہلکاروں اور ان کے اہل خانہ کو تمام ضروری سہولیات حاصل ہوں ۔

جناب امت شاہ نے کہا کہ آج ویر ساورکر جی کی برسی ہے ۔ انہوں نے کہا کہ ویر ساورکر جی نہ صرف ہندوستان کی جدوجہد آزادی کے ایک بے مثال جنگجو تھے بلکہ ایک بے خوف محب وطن بھی تھے ۔ انہوں نے مزید کہا کہ ویر ساورکر جی کی تحریریں بھی اتنی ہی طاقتور تھیں  اور ان کی عبارت اور انہوں نے اپنی نشر اور شاعری کے ذریعے ویر ساورکر جی نے ملک بھر میں حب الوطنی کی لہر کو دوڑائی ۔ جناب شاہ نے کہا کہ جب کہ لوگ پہلے 1857 کی مسلح بغاوت کو بغاوت کہتے تھے ، یہ ویر ساورکر جی ہی تھے جنہوں نے اسے جنگ آزادی کا نام دیا ۔ انہوں نے کہا کہ اس نقطہ نظر نے پوری قوم کو غلامی کی زنجیروں کو توڑنے اور آزادی حاصل کرنے کے جذبے سے سرشار کیا ۔

***

(ش ح ۔ ا س۔ ت ح)

U. No.:3099