ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે શ્રીનગરમાં કાશ્મીર યુનિવર્સિટીના 21મા પદવીદાન સમારોહને મુખ્ય અતિથિ તરીકે સંબોધિત કર્યો હતો, જે ઉપરાષ્ટ્રપતિ તરીકે જમ્મુ અને કાશ્મીર કેન્દ્રશાસિત પ્રદેશની તેમની પ્રથમ મુલાકાત હતી.

સ્નાતક થયેલા વિદ્યાર્થીઓને અભિનંદન આપતા, ઉપરાષ્ટ્રપતિએ અવલોકન કર્યું કે જ્યારે યુનિવર્સિટીઓ ઇન્ફ્રાસ્ટ્રક્ચર અને શૈક્ષણિક શ્રેષ્ઠતા માટે જાણીતી હોઈ શકે છે, ત્યારે તેમનો સાચો વારસો તેમના સ્નાતકોના ચારિત્ર્ય અને યોગદાનમાં પ્રતિબિંબિત થાય છે. તેમણે 1948માં સ્થપાયેલી કાશ્મીર યુનિવર્સિટીની ગૌરવશાળી વિરાસત અને વિસ્તરી રહેલા શૈક્ષણિક પદચિન્હની પ્રશંસા કરી હતી. તેમણે યુનિવર્સિટીના NAAC A++ ગ્રેડ, NIRF યુનિવર્સિટી કેટેગરીમાં 34મા રેન્ક, 2019 થી 7,700 થી વધુ સંશોધન પ્રકાશનો અને નેશનલ હિમાલયન આઇસ-કોર લેબોરેટરી જેવી અગ્રણી પહેલોની પ્રશંસા કરી હતી, જે તેની વધતી જતી વૈશ્વિક હાજરીને રેખાંકિત કરે છે.

ઉપરાષ્ટ્રપતિએ પદવીદાન સમારોહના ત્રણ મહત્વપૂર્ણ પાસાઓ પર વિશેષ આનંદ વ્યક્ત કર્યો: કે ઉચ્ચ શિક્ષણ મંત્રી એક મહિલા છે, યુનિવર્સિટીના વાઇસ ચાન્સેલર એક મહિલા છે અને સુવર્ણ ચંદ્રક મેળવનારાઓમાં બહુમતી મહિલાઓની હતી. તેમણે આને જમ્મુ અને કાશ્મીરમાં મહિલા સશક્તિકરણ અને પ્રગતિના શક્તિશાળી પ્રતિબિંબ તરીકે વર્ણવ્યું હતું.

વિદ્યાર્થીઓને સંબોધતા તેમણે નોંધ્યું હતું કે તેઓ ઝડપથી બદલાતા વિશ્વમાં સ્નાતક થઈ રહ્યા છે અને તેમને યાદ અપાવ્યું કે “પરિવર્તન એ જ એકમાત્ર સ્થિરતા છે.” તેમણે તેમને સતત અનુકૂલિત થવા, નવી કૌશલ્યોથી સજ્જ થવા અને નવીનતા અપનાવવા વિનંતી કરી. ભારત ટેકનોલોજીના સંશોધક તરીકે ઉભરી રહ્યું છે તેના પર ભાર મૂકતા, તેમણે યુવાનોને રાષ્ટ્રીય પ્રાથમિકતાઓ સાથે સુસંગત સ્વદેશી ઇનોવેશન્સને આગળ ધપાવવા અને વિકસિત ભારત@2047 ના વિઝનમાં યોગદાન આપવા પ્રોત્સાહિત કર્યા.

પ્રધાનમંત્રી શ્રી નરેન્દ્ર મોદીના નેતૃત્વમાં પ્રદેશમાં શ્રીનગર ઇન્ટરનેશનલ એરપોર્ટનું વિસ્તરણ અને ચિનાબ રેલ બ્રિજ જેવા સીમાચિહ્નરૂપ ઇન્ફ્રાસ્ટ્રક્ચર પ્રોજેક્ટ્સ સહિતની વિકાસલક્ષી પહેલો પર પ્રકાશ પાડતા, ઉપ-રાષ્ટ્રપતિએ કહ્યું કે આ પહેલો નવી તકો ઊભી કરે છે અને સામાજિક સૌહાર્દને મજબૂત કરે છે. તેમણે આશા વ્યક્ત કરી હતી કે લેફ્ટનન્ટ ગવર્નર અને મુખ્યમંત્રીના નેતૃત્વમાં શ્રીનગર સ્વચ્છતા સર્વેક્ષણ હેઠળ દેશના સૌથી સ્વચ્છ શહેર તરીકે ઉભરી આવશે.

ઝારખંડના રાજ્યપાલ તરીકેના તેમના કાર્યકાળને યાદ કરતા, ઉપરાષ્ટ્રપતિએ શેર કર્યું કે જમ્મુ અને કાશ્મીરનું એક પ્રતિનિધિમંડળ એક ભારત શ્રેષ્ઠ ભારત પહેલ હેઠળ તે રાજ્યની મુલાકાતે આવ્યું હતું અને તેમનું ઉષ્માભર્યું સ્વાગત કરવામાં આવ્યું હતું. તેમણે રેખાંકિત કર્યું કે લોકશાહીમાં અન્યની લાગણીઓનો આદર કરવો એ પોતાની લાગણીઓનો આદર કરવા જેટલું જ મહત્વપૂર્ણ છે અને આવા આદાનપ્રદાન રાષ્ટ્રીય એકતાને ગાઢ બનાવે છે.

તેમના સમાપન વક્તવ્યમાં, ઉપરાષ્ટ્રપતિએ યુવાનોને ડ્રગ્સથી દૂર રહેવા અને સોશિયલ મીડિયાનો જવાબદારીપૂર્વક ઉપયોગ કરવા વિનંતી કરી. તેમણે તેમને યાદ અપાવ્યું કે જીવન વર્ગખંડની બહાર તેમની ધીરજ, સાહસ અને ચારિત્ર્યની કસોટી કરશે. એકતા અને આપનાપણાના સુર સાથે તેમના સંબોધનનો અંત લાવતા તેમણે કહ્યું, “યહ ના મેરા કાશ્મીર હૈ, ના તુમ્હારા કાશ્મીર હૈ — યહ હમ સબકા કાશ્મીર હૈ.”

આ સમારોહમાં જમ્મુ અને કાશ્મીરના લેફ્ટનન્ટ ગવર્નર અને કાશ્મીર યુનિવર્સિટીના ચાન્સેલર શ્રી મનોજ સિંહા; જમ્મુ અને કાશ્મીરના મુખ્યમંત્રી અને કાશ્મીર યુનિવર્સિટીના પ્રો-ચાન્સેલર શ્રી ઓમર અબ્દુલ્લા; જમ્મુ-કાશ્મીરના ઉચ્ચ શિક્ષણ મંત્રી સુશ્રી સકીના મસૂદ ઇટૂ; કાશ્મીર યુનિવર્સિટીના વાઇસ ચાન્સેલર પ્રો. નીલોફર ખાન; વરિષ્ઠ ફેકલ્ટી સભ્યો, પ્રતિષ્ઠિત મહેમાનો, વાલીઓ અને સ્નાતક વિદ્યાર્થીઓ ઉપસ્થિત રહ્યા હતા.

SM/GP/DK/JD