حکومت ہند کےبالواسطہ ٹیکسوں اور محصولات کے مرکزی بورڈ (سی بی آئی سی) نے جنیوا میں عالمی تجارتی تنظیم (ڈبلیو ٹی او) میں ہندوستان کے مستقل مشن کے ساتھ مل کر، 24 فروری 2026 کو جنیوا میں ڈبلیو ٹی او کی تجارتی سہولت کاری سے متعلق کمیٹی کے اجلاس کے موقع پر تجارت سے متعلق خصوصی سیشنز کا انعقاد کیا۔

اسپیشل سکریٹری اور ممبر (کسٹمز) جناب سرجیت بھوجبل نے جنیوا میں ڈبلیو ٹی او میں منعقدہ سی بی آئی سی سیشنز میں ہندوستانی وفد کی قیادت کی۔ یہ تقریب تجارتی سہولت کاری اور صلاحیت سازی پر مشتمل دو خصوصی سیشنز پر مبنی تھی، جس میں ڈبلیو ٹی او کے تجارتی سہولت معاہدے (ٹی ایف اے) کے تحت ہندوستان کی انقلاب انگیز اصلاحات کو اجاگر کیا گیا۔ یہ پروگرام جولائی 2026 میں ہونے والے ہندوستان کے آٹھویں تجارت سے متعلق پالیسی جائزہ کی تیاری کے سلسلے میں بھی منعقد کیا گیا تھا۔ اس تقریب میں ڈبلیو ٹی او کے اراکین اور سکریٹریٹ کی جانب سے بھرپور شرکت دیکھی گئی، جس میں تقریباً 40 ممالک کے مندوبین شامل تھے، جو ہندوستان کے تجربات اور بہترین طور طریقوں میں عالمی سطح پر گہری دلچسپی کی عکاسی کرتے ہیں۔

ڈبلیو ٹی او کے تجارتی سہولت معاہدے (ٹی ایف اے) کے وعدوں کی تعمیل کے بعد، ہندوستان اب نیشنل ٹریڈ فیسیلیٹیشن ایکشن پلان (این ٹی ایف اے پی  3.0) کے تحت  ’’ٹی ایف اے پلس ‘‘  اقدامات کی طرف بڑھ گیا ہے، جس کا مقصد کم از کم ضروریات سے آگے بڑھنا اور ابھرتے ہوئے عالمی بہترین طور طریقوں کے ساتھ ہم آہنگ ہونا ہے۔ تجارتی سہولت کاری کے سیشن کے دوران، ہندوستانی کسٹمز کے وفد نے کسٹمز اصلاحات میں ’پوری حکومت کی شمولیت کے طریقۂ کار‘اور وسیع پیمانے پر ڈیجیٹلائزیشن اور طریقۂ کار کی تشکیل نو کے ذریعے چہرے، رابطے  اور کاغذ کی ضرورت سے مبرا کسٹمز ایکو سسٹم بنانے کی اپنی پیش قدمی کی کوششوں کو اجاگر کیا۔

ہندوستان نے مقررہ وقت کے اندر اپنے 100فیصد ٹی ایف اے وعدوں کی اطلاع دی ہے۔ یہ پیش رفت مندرجہ ذیل مقاصد کے لیے ہندوستان کے مسلسل عزم کی عکاسی کرتی ہے:

• شفافیت میں اضافہ
•     اداروں کے درمیان ہم آہنگی میں بہتری، اور
•     سرحد پار تجارتی طریقۂ کار کی سادہ سازی

سی بی آئی سی نے اپنے جدید اور مقامی طور پر تیار کردہ نظاموں کی نمائش کی، جو درج ذیل ہیں:

• سنگل ونڈو انٹرفیس کے ساتھ جامع کسٹمز آٹومیٹڈ سسٹم
•     ایک مضبوط رسک مینجمنٹ سسٹم(آر ایم ایس)
• دی آتھورائزڈ اکنامک آپریٹر(اے ای او) پروگرام
•  آمد سے قبل کسٹمز پروسیسنگ اور الیکٹرانک ایکسچینج آف اوریجن ڈیٹا(ای او ڈی ای ایس)
• الیکٹرانک کارگو ٹریکنگ سسٹم(ای سی ٹی ایس)
•     جدید کسٹمز کنٹرول لیبارٹریز کا نیٹ ورک، اور
•     مربوط بارڈر مینجمنٹ (سی بی ایم) اور ورچوئل ٹریڈ کوریڈورز (وی ٹی سی)سےمتعلق اقدامات

صلاحیت سازی سے متعلق سیشن میں ہندوستان کی جانب سے ترقی پذیر اور کم ترقی یافتہ ممالک، بالخصوص گلوبل ساؤتھ کے ممالک کے ساتھ اپنی مہارت بانٹنے کے فعال کردار پر زور دیا گیا۔ نیشنل اکیڈمی آف کسٹمز، ان ڈائریکٹ ٹیکسز اینڈ نارکوٹکس (این اے سی آئی این) کے ذریعے، ہندوستان ہندوستانی اور غیر ملکی کسٹمز انتظامیہ کے افسران کے لیے منظم تربیتی پروگرام منعقد کرتا ہے۔ ہندوستان کی سینٹرل ریونیو کنٹرول لیبارٹری (سی آر سی ایل) کی جانب سے بین الاقوامی شرکاء کے لیے منعقد کیے گئے تربیتی کورسز کو بھی اجاگر کیا گیا۔ یہ دونوں ادارے بالترتیب ایشیا پیسیفک کے لیے ریجنل ٹریننگ سینٹر اور ریجنل کسٹمز لیبارٹری کے طور پر ڈبلیو سی او سے تسلیم شدہ ہیں۔ یہ بتایا گیا کہ 2022 سے اب تک، این اے سی آئی این نے 65 ٹریننگ سیشنز منعقد کیے ہیں جن سے تقریباً 30 ممالک کے 1,800 سے زائد بین الاقوامی شرکاء مستفید ہوئے ہیں۔ ان میں سے کئی پروگرام مختلف بین الاقوامی تنظیموں جیسے ڈبلیو سی او (ڈبلیو سی او)، ایشیائی ترقیاتی بینک (اے ڈی بی) اور دیگر کے تعاون سے مکمل کیے گئے۔ اسی طرح، سی آر سی ایل نے 300 سے زائد بین الاقوامی شرکاء کو تربیت دی۔ ہندوستان نے تجارتی سہولت کاری کے معاہدے کے وعدوں پر عمل درآمد کے لیے ممالک، بالخصوص ترقی پذیر ممالک کی صلاحیتوں کو مضبوط بنانے کے لیے شراکت داری کی خواہش کا اظہار کیا۔ شرکاء نے ان اداروں کے جدید ترین انفراسٹرکچر اور ہندوستان کے ان ممتاز اداروں کی جانب سے فراہم کردہ تربیت کی تعریف کی۔

اسپیشل سکریٹری اور ممبر (کسٹمز) جناب سرجیت بھوجبل نے کہا کہ گزشتہ دہائی کے دوران کسٹمز کے طریقۂ کار کا ڈیجیٹلائزیشن اور جدید کاری نے تجارت کی ترقی اور عالمی ویلیو چینز میں گہری شمولیت میں نمایاں کردار ادا کیا ہے۔ ہندوستانی کسٹمز کا ڈیجیٹل ایکو سسٹم تاجروں، کسٹمز حکام، بینکوں اور لاجسٹکس آپریٹرز کو جوڑتا ہے اور کسٹمز دستاویزات کی الیکٹرانک پروسیسنگ میں سہولت فراہم کرتا ہے، جس کے نتیجے میں لین دین کے اخراجات میں کمی اور تیزی سے کلیئرنس ممکن ہوتی ہے۔ ڈیجیٹل اصلاحات کے ذریعے بہت چھوٹی، چھوٹی اور درمیانے درجے کی صنعتوں (ایم ایس ایم ای) کو بااختیار بنانے پر خصوصی زور دیا گیا، جس سے تعمیل کے بوجھ میں کمی، پیش گوئی میں بہتری اور ای کامرس برآمدات میں ان کی زیادہ شرکت ممکن ہوئی ہے۔ سادہ دستاویزات، ایڈوانس رولنگز  اور آتھورائزڈ اکنامک آپریٹر (اے ای او) پروگرام جیسے اقدامات نے چھوٹے برآمد کاروں کو عالمی تجارتی نیٹ ورکس میں شامل کرنے میں مدد دی ہے۔

سی بی آئی سی کی 2026 کے لیے کاروبار کرنے میں آسانی (ای او ڈی بی) اصلاحات میں کسٹمز کلیئرنس کے لیے ایک واحد، باہم مربوط ڈیجیٹل ونڈو، کسٹمز انٹیگریٹڈ سسٹم اور بھروسہ پر مبنی نظاموں کے ذریعے ڈیجیٹل تجارتی سہولت کاری پر نئے سرے سے توجہ مرکوز کی گئی ہے۔ اس نظام کے تحت رسک سسٹمز میں تسلیم شدہ بھروسہ مند درآمد کاروں کی جسمانی تصدیق کے عمل کو کم کیا گیا ہے اور فیکٹری ٹو شپ کلیئرنس کو ممکن بنایا گیا ہے۔ اہم اصلاحات میں کورئیر برآمدات پر 10 لاکھ روپے کی مالیت کی حد کو ختم کرنا بھی شامل ہے، جس سے برآمد کاروں کو کسی بھی قیمت کا سامان کورئیر کے ذریعے بھیجنے کی اجازت مل گئی ہے؛ اس سے بہت چھوٹی، چھوٹی اور درمیانے درجے کی صنعتوں (ایم ایس ایم ای) اور ای کامرس برآمد کاروں کو فائدہ پہنچے گا۔ اس کے علاوہ، لاوارث یا غیر کلیئر شدہ بین الاقوامی کورئیر کھیپوں کو غیر ملکی بھیجنے والوں کو واپس کرنے کے لیے ریٹرن ٹو اوریجن (آر ٹی او) کی سہولت اور ای کامرس برآمدات سے ہونے والی آمدنی کو سنبھالنے کے لیےایک سادہ، خطرے پر مبنی کسٹمز فریم ورک بھی شامل ہے۔

ڈبلیو ٹی او جنیوا میں ہندوستان کے سفیر اور مستقل نمائندے، ڈاکٹر سینتھل پانڈیان نے کہا کہ ہندوستان نے تجارتی سہولت کاری کی اصلاحات کو اپنی تجارتی پالیسی کے ایک بنیادی ستون کے طور پر اپنایا ہے۔ یونیسکیپ کے عالمی سروے 2023 کے مطابق، ہندوستان نے تجارتی سہولت کاری کے نفاذ میں 93 فیصد سے زیادہ کا مجموعی اسکور حاصل کیا، جو اسے ایشیا پیسیفک خطے میں صفِ اول کے ممالک میں اور جنوبی ایشیا میں سب سے اوپر رکھتا ہے۔ ہندوستان نے شفافیت، ضابطے کی کارروائیوں، ادارہ جاتی انتظامات اور تعاون اور کاغذ کے بغیر تجارت  جیسے شعبوں میں مکمل نفاذ کا اسکور حاصل کیا۔ یہ نتائج ملکی اصلاحات کو تجارتی سہولت معاہدے (ٹی ایف اے) کے مقاصد اور ضوابط کے ساتھ ہم آہنگ کرنے کی مسلسل کوششوں کی عکاسی کرتے ہیں۔

اس تقریب کو شراکت دار ممالک کی جانب سے مثبت ردعمل ملا اور اس نے قومی تجربات کے تبادلے اور تکنیکی تعاون کے لیے ایک پلیٹ فارم کے طور پر ڈبلیو ٹی او کی اہمیت کی توثیق کی۔ ’’وسودھائیو کٹمبکم‘‘ — یعنی دنیا ایک کنبہ ہے — کے جذبے کے تحت، ہندوستان نے تجارتی سہولت کاری کے فریم ورک کو مضبوط بنانے اور ترقی پذیر ممالک میں صلاحیتوں کی تعمیر کے لیے اپنے عزم کا اعادہ کیا۔

******

ش ح۔ک ح

U. No. 308