بھارت کا اگلا زرعی انقلاب مصنوعی ذہانت کی قیادت میں برپا ہوگا۔ یہ بات آج مرکزی وزیر برائے سائنس و ٹیکنالوجی اور ارضیاتی علوم ڈاکٹر جتیندر سنگھ نے ممبئی میں منعقدہ اے آئی 4 ایگری 2026 سمٹ کے دوران کہی، جہاں انہوں نے زرعی پالیسی، تحقیق اور سرمایہ کاری کے ڈھانچے میں اے آئی کو مرکزی ستون قرار دیا۔

"زراعت میں اے آئی پر عالمی کانفرنس اور سرمایہ کاروں کی سمٹ 2026” کے افتتاحی اجلاس سے خطاب کرتے ہوئے وزیر موصوف نے کہا کہ اے آئی پہلی مرتبہ زرعی پیداوار کو محدود کرنے والے ساختی مسائل — بے ترتیب موسمی حالات، معلومات کی عدم مساوات اور منڈیوں کی تقسیم — کے لیے قابلِ توسیع حل فراہم کر رہی ہے۔ انہوں نے کہا: “اے آئی کوئی نیا مرض نہیں بتا رہی، بلکہ پہلی بار ایسا نسخہ دے رہی ہے جو وسیع پیمانے پر نافذ کیا جا سکتا ہے۔” انہوں نے نشاندہی کی کہ اگر عالمِ جنوب کے 60 کروڑ کسانوں کی پیداوار میں صرف 10 فیصد اضافہ بھی ہو جائے تو یہ صدی میں غربت کے خاتمے کا سب سے بڑا موقع ثابت ہو سکتا ہے۔

ڈاکٹر جتیندر سنگھ نے زراعت کو روایتی نہیں بلکہ اسٹریٹجک شعبہ قرار دیتے ہوئے اے آئی کے فروغ کو 10,372 کروڑ روپے کے انڈیا اے آئی مشن سے جوڑا، جو خودمختار کمپیوٹ صلاحیت، ڈیٹا سیٹس اور اسٹارٹ اپ بنیادی ڈھانچے کی بڑے پیمانے پر تعمیر کر رہا ہے۔ انہوں نے بھارت جین کا ذکر کیا، جو حکومت کی ملکیت والا بڑے پیمانے پر لسانی ماڈل ایکو سسٹم ہے اور جس نے “ایگری پرم” نامی زرعی ماڈل جاری کیا ہے، جو 22 بھارتی زبانوں میں کام کرتا ہے اور کسانوں کو ان کی مادری زبان میں مشاورتی سہولت فراہم کرتا ہے۔ لسانی شمولیت کی اہمیت پر زوردیتے ہوئے انہوں نے کہا: "یہ وہ اے آئی ہے جو کسان سے مراٹھی، بھوجپوری یا کنڑ میں بات کرتا ہے"۔

وزیر موصوف نے کہا کہ محکمہ سائنس و ٹیکنالوجی  (ڈی ایس ٹی )ایک کھلے اور باہم مربوط انڈیا اے آئی اوپن اسٹیک کی حمایت کر رہا ہے تاکہ ملک میں تیار ہونے والے زرعی اے آئی حل قومی فریم ورک سے منسلک ہو سکیں۔ انوسندھان نیشنل ریسرچ فاؤنڈیشن آئی آئی ٹیز، آئی آئی ایس سی اور آئی سی اے آر کے اشتراک سے ڈیپ ٹیک اور اے آئی تحقیق کو مالی معاونت فراہم کر رہی ہے، جس میں زرعی اطلاقات بھی شامل ہیں۔

ڈاکٹر جتیندر سنگھ نے بتایا کہ ڈرون اور سیٹلائٹ میپنگ پہلے ہی مٹی کی زرخیزی کارڈ اور سوامِتوا مشن کو مستند زمین اور مٹی کے ڈیٹا کے ذریعے مضبوط بنا رہی ہے۔ انہوں نے موسمی ذہانت میں سرمایہ کاری کا ذکر کرتے ہوئے کہا کہ ارضیاتی علوم اور اے آئی کو ابتدائی انتباہی نظاموں میں یکجا کیا جا رہا ہے تاکہ کسان “گھبرائیں نہیں بلکہ منصوبہ بندی کریں۔” انہوں نے کہا کہ بایوٹیکنالوجی کا کردار بھی نہایت اہم ہوگا، خصوصاً بیماریوں اور کیڑوں سے مزاحم فصلوں کی تیاری، پودوں کی بیماریوں کی ابتدائی علامات کی شناخت، اور سرکلر کراپ اکانومی کے فروغ میں۔

مواقع کی وسعت اجاگر کرتے ہوئے انہوں نے کہا کہ بھارت کی 14 کروڑ زرعی ملکیتیں — جن میں اکثریت چھوٹے اور حاشیائی کسانوں کی ہے — اگر اے آئی پر مبنی مشاورت کے ذریعے ہر کسان سالانہ کم از کم 5,000 روپے کی بچت کر لے تو مجموعی طور پر 70,000 کروڑ روپے سالانہ قدر پیدا ہو سکتی ہے۔ انہوں نے مہاراشٹر کی 500 کروڑ روپے کی مہا ایگری-اے آئی پالیسی 2025–29 کو ایک ماڈل قرار دیا اور کہا کہ مرکز ایسی ریاستی پہل کو ہم آہنگ اور وسعت دے گا۔

مرکزی بجٹ 2026–27 میں ‘بھارت-وستار’ کی تجویز پیش کی گئی ہے — ایک کثیر لسانی اے آئی ٹول جو ایگری اسٹیک پورٹلز اور آئی سی اے آر کے زرعی طریقہ کار کو اے آئی نظام سے جوڑ کر کسانوں کو حسبِ ضرورت مشاورت فراہم کرے گا اور زرعی خطرات کم کرے گا۔ وزیرموصوف نے کہا کہ توجہ ایسے چھوٹے اور مخصوص اے آئی ماڈلز پر ہے جو بھارتی مٹی، موسمی زونز اور فصلوں کی اقسام پر تربیت یافتہ ہوں اور کم کنیکٹیویٹی والے دیہی علاقوں میں بھی موبائل فون اور زرعی آلات کے ذریعے قابلِ استعمال ہوں۔

ڈاکٹر جتیندر سنگھ نے وفاقی قومی ڈھانچے کی ضرورت پر زور دیتے ہوئے کہا کہ مہا ایگری ایکس جیسے زرعی ڈیجیٹل عوامی بنیادی ڈھانچے کو قومی ایگری ڈیٹا کامنز میں تبدیل ہونا چاہیے۔ انہوں نے مجوزہ نیشنل ایگری-اے آئی ریسرچ نیٹ ورک میں شراکت کی دعوت دی، جو ڈی ایس ٹی، ریاستی حکومتوں، آئی سی آر آئی سی اے ٹی، آئی سی اے آر اور عالمی اداروں کے اشتراک سے بھارت سے متعلق بنیادی ڈیٹا سیٹس تیار کرے گا۔

وزیر موصوف نے سرمایہ کاروں سے براہِ راست اپیل کرتے ہوئے زرعی اے آئی کو “دنیا کی سب سے بڑی غیر استعمال شدہ پیداواری منڈی” قرار دیا اور کہا کہ الگ الگ پائلٹس کے بجائے قابلِ توسیع پلیٹ فارمز میں صبر آزما سرمایہ کاری کی جائے۔ انہوں نے کہا کہ اس کانفرنس کی کامیابی کا پیمانہ تقاریر نہیں بلکہ یہ ہوگا کہ کتنے پائلٹس پلیٹ فارم بنتے ہیں اور ایک سال بعد کتنے کسان بہتر فیصلے کرتے ہیں۔

انہوں نے اختتام پر کہا: “کسان کو محض اے آئی نہیں چاہیے، اسے مفید اے آئی چاہیے۔ یہی ہمارا رہنما اصول ہونا چاہیے۔” انہوں نے باہمی تعاون پر مبنی عمل درآمد کی اپیل کی اور اس عزم کا اعادہ کیا کہ بھارت عالمی زرعی اے آئی فریم ورک میں محض وصول کنندہ نہیں بلکہ شریک معمار کے طور پر کردار ادا کرے گا۔

************

ش ح ۔   م  د ۔  م  ص

(U :  2877  )