குடியரசு துணைத்தலைவர் திரு. சி. பி. ராதாகிருஷ்ணன், இன்று புது தில்லியில் உள்ள டாக்டர் அம்பேத்கர் சர்வதேச மையத்தில், திரு. விஜய் கோயல் எழுதிய "அடல் பிஹாரி வாஜ்பாய்: சாகாவரம் பெற்ற அரசியல் மேதை" என்ற தலைப்பிலான காபி டேபிள் புத்தகத்தை வெளியிட்டார்.

குடியரசு துணைத் தலைவர் இந்த நிகழ்வை ஒரு கௌரவமான மற்றும் உணர்ச்சிமிக்க தருணமாக விவரித்தார். மேலும், இந்தியாவின் தலைசிறந்த தலைவர்களில் ஒருவரான பாரத ரத்னா  அடல் பிஹாரி வாஜ்பாயிக்கு இந்தப் புத்தகம் ஒரு பொருத்தமான அஞ்சலியாகும் என்றும் கூறினார். இந்தப் பிரசுரம் வெறும் புகைப்படங்களின் தொகுப்பு மட்டுமல்ல, மாறாக நாட்டைத் தொடர்ந்து ஊக்குவிக்கும் ஒரு அரசியல் மேதைக்கு அளிக்கப்படும் மரியாதை என்றும் அவர் கூறினார்.

திரு. வாஜ்பாயியுடனான தனது தனிப்பட்ட தொடர்பை நினைவு கூர்ந்த குடியரசு துணைத்தலைவர், திரு. வாஜ்பாயி பிரதமராக இருந்த காலத்தில் 12 மற்றும் 13-வது மக்களவை உறுப்பினராகப் பணியாற்றிய பாக்கியம் தனக்குக் கிடைத்ததாகக் கூறினார். 1974-ல் கோவையில் திரு. வாஜ்பாயி உரையாற்றிய பொதுக் கூட்டத்தை ஏற்பாடு செய்த நினைவுகளைப் பகிர்ந்து கொண்ட அவர், பொது வாழ்வில் தனது ஆரம்ப ஆண்டுகளில் அந்த அனுபவம் மிகவும் உத்வேகம் அளித்ததாக விவரித்தார்.

நாடாளுமன்ற உறுப்பினரிலிருந்து பிரதமராக திரு. வாஜ்பாயி உயர்ந்த பயணம் இந்திய ஜனநாயகத்தின் வலிமையைப் பிரதிபலிக்கிறது என்று குடியரசு துணைத்தலைவர் குறிப்பிட்டார். கடுமையான அரசியல் போட்டிகள் நிறைந்த காலங்களிலும்கூட, அவர் தனது நேர்மை, அனைவரையும் உள்ளடக்கிய அணுகுமுறை மற்றும் கண்ணியமான நடத்தையால் கட்சி எல்லைகளைக் கடந்து மரியாதையைப் பெற்றார்.

திரு வாஜ்பாயியின் தலைமைத்துவத்தின் முக்கிய மைல்கற்களை விளக்கிய  துணைத் தலைவர், போக்ரான் அணுசக்தி சோதனைகள் மற்றும் தில்லி மெட்ரோ போன்ற தொலைநோக்கு உள்கட்டமைப்பு முயற்சியைக் குறிப்பிட்டார். வலிமையுடன் உணர்திறனும் கைகோர்த்துச் செல்ல முடியும் என்பதை திரு வாஜ்பாயி வெளிப்படுத்தியதாகவும், அவர் உரையாடல், ஜனநாயகம் மற்றும் வளர்ச்சி ஆகியவற்றை வழிகாட்டும் கொள்கைகளாக தொடர்ந்து நிலைநிறுத்தியதாகவும் அவர் குறிப்பிட்டார்.

அவர் ஒரு சிறந்த கவிஞர், தொலைநோக்கு பார்வையாளர் மற்றும் நாடாளுமன்றவாதி என்று விவரித்த குடியரசு துணைத்தலைவர், அவரது உரைகள் நாடாளுமன்றத்தையும் தேசத்தையும் ஒரே நேரத்தில் நெகிழ வைத்தன என்றும், விரும்பத்தகாத முறையில் கருத்து வேறுபாடு கொள்ளாமல் மாறுபடும் அரிதான திறன் அவருக்கு இருந்தது என்றும் கூறினார் — இது பொது வாழ்வில் ஒரு இன்றியமையாத குணமாகும்.

இந்த அட்டவணைப் புத்தகத்தைத் தொகுத்தளித்ததற்காக திரு. விஜய் கோயலைப் பாராட்டிய திரு சிபி ராதாகிருஷ்ணன்,  இந்தப் படைப்பு அரிய புகைப்படங்கள், தனிப்பட்ட நிகழ்வுக் குறிப்புகள் மற்றும் ஆவணப் பொருட்கள் மூலம் வரலாற்றை ஒரு வாழும் நினைவாகப் பாதுகாக்கிறது என்று கூறினார். இந்தப் புத்தகம் நாடு முழுவதும் உள்ள வீடுகளையும் நிறுவனங்களையும் சென்றடையும் என்றும், குறிப்பாக இளம் தலைமுறையினரை தேசிய ஒற்றுமை, ஜனநாயகம் மற்றும் சமூக நல்லிணக்கத்தின் லட்சியங்களை உள்வாங்கிக்கொள்ளத் தூண்டும் என்றும் அவர் நம்பிக்கை தெரிவித்தார்.

இந்த நிகழ்வில் பிகார் ஆளுநர் திரு. ஆரிஃப் முகமது கான், ஹரியானா ஆளுநர் பேராசிரியர் அஷிம் குமார் கோஷ், ராஜஸ்தான் ஆளுநர் திரு. ஹரிபாய் கிசான்ராவ் பாக்டே, முன்னாள் மத்திய அமைச்சர் டாக்டர் முர்ளி மனோகர் ஜோஷி,  காந்தி ஸ்மிருதி மற்றும் தர்ஷன் சமிதியின் துணைத் தலைவர் திரு. விஜய் கோயல் ஆகியோரும், பிற முக்கிய விருந்தினர்களும் கலந்து கொண்டனர்.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்: https://www.pib.gov.in/PressReleasePage.aspx?PRID=2231299&reg=3&lang=1

***

TV/PKV/RK