وزیرِ اعظم جناب نریندر مودی نے آج نئی دہلی میں منعقدہ انڈیا-اے آئی امپیکٹ سمٹ میں شرکت کے لیے بھارت آئے ہوئے سری لنکا کے صدر عزت مآب انورا کمارا دسانائیکا سے ملاقات کی۔ صدر دسانائیکا کا منصبِ صدارت سنبھالنے کے بعد دسمبر 2024 میں ہونے والے سرکاری دورے کے بعد یہ ان کا بھارت کا دوسرا دورہ ہے۔

دونوں رہنماؤں نے حالیہ اعلیٰ سطحی دوروں کے نتیجے میں شروع کی گئی دوطرفہ پہل کاریوں کی پیش رفت کا جائزہ لیا، جن میں اپریل 2025 میں وزیرِ اعظم کے سری لنکا کے سرکاری دورے کے نتائج بھی شامل ہیں۔ رہنماؤں نے مادی، ڈیجیٹل اور توانائی رابطہ کاری کے اہم ستونوں کے تحت تعاون کو مزید تیز کرنے کے مشترکہ عزم کا اعادہ کیا۔ ترقیاتی اہداف کے حصول میں ٹیکنالوجی کے کردار کو تسلیم کرتے ہوئے انہوں نے مصنوعی ذہانت کے استعمال میں ہم آہنگی کے امکانات پر بھی تبادلۂ خیال کیا۔

صدر دسانائیکا نے سائیکلون دِتواہ کے بعد بھارت کی فوری اور غیر مشروط امداد پر اظہارِ تشکر کیا۔ فرسٹ ریسپانڈر کے طور پر بھارت نے ’آپریشن ساگر بندھو‘ کے تحت ہنگامی امدادی سامان فوری طور پر روانہ کیا اور تلاش و بچاؤ کی کارروائیوں میں معاونت فراہم کی۔ دونوں رہنماؤں نے 450 ملین امریکی ڈالر کے امدادی پیکیج کے ذریعے تعمیرِ نو اور بحالی کے لیے بھارت کی جاری معاونت میں ہونے والی پیش رفت پر اطمینان کا اظہار کیا۔

سری لنکا میں حال ہی میں مقدس دیونیموری تبرکات کی نمائش کے کامیاب انعقاد کا خیرمقدم کرتے ہوئے دونوں رہنماؤں نے اس بات پر زور دیا کہ تہذیبی روابط کی مضبوطی بھارت–سری لنکا شراکت داری کو ایک منفرد اور بے مثال قوت فراہم کرتی ہے۔

رہنماؤں نے اس عزم کا اظہار کیا کہ وہ سری لنکا کی پائیدار ترقیاتی ضروریات کو پورا کرنے اور بحرِ ہند کے خطے کے استحکام میں معاونت کے لیے دوطرفہ تعاون کو مزید آگے بڑھانے کے لیے مشترکہ طور پر کام جاری رکھیں گے۔

******

ش ح۔ ش ا ر۔ ول

Uno-2836