इंडिया एआय इम्पॅक्ट समिट 2026 ला संबोधित करताना गुगलचे सीईओ सुंदर पिचाई यांनी कृत्रिम बुद्धिमत्तेचे वर्णन दशकातील निर्णायक सामर्थ्य असे केले आणि त्याचे फायदे व्यापकपणे सामायिक केले जातील याची खात्री करण्यासाठी जागतिक सहकार्याचे महत्त्व अधोरेखित केले.

आपण अतिप्रगतीच्या आणि नवीन शोधांच्या उंबरठ्यावर आहोत तरीही उत्कृष्ट निकालांची कोणतीही हमी देता येणार नाही. सर्वांना आणि सर्व ठिकाणी एआयचे लाभ उपलब्ध होण्याच्या दृष्टीने आपण सर्वांनी एकत्र येऊन काम करण्याची गरज आहे, असे सांगत त्यांनी जलद नवोन्मेषाच्या साथीने येणाऱ्या जबाबदारीवर भर दिला.

 

द्विपक्षीय सहकार्याच्या धोरणात्मक महत्त्वावर भर देताना पिचाई यांनी नमूद केले की, "अमेरिका आणि भारत यांच्यातील भागीदारीची भूमिका महत्त्वाची आहे." भारताच्या नेतृत्वावर विश्वास व्यक्त करताना ते पुढे म्हणाले, "मला विश्वास वाटतो की भारताला एआयमध्ये असाधारण प्रगती करण्याची संधी लाभेल आणि आम्ही उत्पादने, प्रमाण आणि पायाभूत सुविधांसह पूर्ण वचनबद्धतेने त्याचे समर्थन करत आहोत.”

त्यांनी उत्पादने, कौशल्य आणि पायाभूत सुविधा या तीन प्रमुख स्तंभांवर आधारित गुगलच्या प्रयत्नांची रूपरेषा मांडली. वास्तविक जगातील अनुप्रयोगांबद्दल बोलताना, त्यांनी "शेतकऱ्यांना वेळेवर मान्सूनचा अंदाज पोहोचवणे" ते आरोग्यसेवा कर्मचाऱ्यांना "डायबेटिक रेटिनोपॅथीसारख्या आजारांची तपासणी करण्यास मदत करणे" तसेच भारतीय भाषांमध्ये एआय टूल्सची उपलब्धता वाढवणे, यासारख्या उपक्रमांकडे लक्ष वेधले.

कार्यबल विकासाबाबत त्यांनी घोषणा केली की "एआय स्किल हाऊसच्या माध्यमातून आम्ही 1 कोटी भावी भारतीय नेत्यांना जागतिक प्रगतीसाठी साधनांनी सुसज्ज करण्यासाठी काम करत आहोत." पायाभूत सुविधांबाबत, त्यांनी भारतात गुगलच्या 15 अब्ज डॉलर्सच्या गुंतवणुकीचा उल्लेख केला, ज्यामध्ये विझागमधील एआय हबचा समावेश आहे जो "पूर्ण झाल्यावर गिगावॅट स्केल कॉम्प्युट ठेवेल" आणि देशभरातील व्यवसायांमध्ये अत्याधुनिक क्षमता आणेल.

पिचाई यांनी भारत-अमेरिका कनेक्ट उपक्रमावरही प्रकाश टाकला, जो दोन्ही राष्ट्रांमधील समुद्राखालील केबल मार्गांचा विस्तार करेल आणि "आपल्या दोन्ही देशांमधील एक सेतू" म्हणून काम करेल. लवचिकतेच्या गरजेवर भर देत ते पुढे म्हणाले, "सामायिक विश्वासाच्या पायावर बांधलेल्या स्थिर पुरवठा साखळ्यांशिवाय हे काहीही शक्य होणार नाही."

या भाषणाने एक स्पष्ट संदेश दिला: भारताचे एआय भविष्य केवळ तांत्रिक प्रगतीनेच नव्हे तर विश्वासार्ह भागीदारी, मोठ्या प्रमाणावरील कौशल्य आणि मजबूत अमेरिका-भारत सहकार्यात स्थित शाश्वत पायाभूत सुविधा गुंतवणुकीने आकार घेईल.

***

शैलेश पाटील/नंदिनी मथुरे/परशुराम कोर

 

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com

(Release ID: 2231056) अभ्यागत कक्ष : 11