ભારતના રાષ્ટ્રપતિ શ્રીમતી દ્રૌપદી મુર્મુએ આજે (16 ફેબ્રુઆરી 2026) નવી દિલ્હીમાં સંસ્કૃતિ મંત્રાલય દ્વારા આયોજિત ઓલ ચિકી લિપિની શતાબ્દી ઉજવણીનું ઉદ્ઘાટન કર્યું હતું.

આ પ્રસંગે બોલતા રાષ્ટ્રપતિએ કહ્યું હતું કે સંથાલ સમુદાયને પોતાની ભાષા, સાહિત્ય અને સંસ્કૃતિ છે. જોકે, પોતાની લિપિના અભાવે સંથાલી ભાષા શરૂઆતમાં રોમન, દેવનાગરી, ઉડિયા અને બંગાળી લિપિમાં લખવામાં આવતી હતી. નેપાળ, ભૂતાન અને મોરેશિયસમાં રહેતા સંથાલ સમુદાયના સભ્યો પણ તે દેશોમાં પ્રચલિત લિપિમાં લખતા હતા. આ લિપિઓ સંથાલી ભાષાના મૂળ શબ્દોનો સાચો ઉચ્ચાર કરવામાં સક્ષમ ન હતી. 1925 માં પંડિત રઘુનાથ મુર્મુએ ઓલ ચિકી લિપિની શોધ કરી હતી. ત્યારથી તેનો ઉપયોગ સંથાલી ભાષા માટે કરવામાં આવે છે. હવે, આ લિપિ વિશ્વભરમાં સંથાલ ઓળખનું એક શક્તિશાળી પ્રતીક છે. તે સંથાલ સમુદાય વચ્ચે એકતા સ્થાપિત કરવાનું એક અસરકારક માધ્યમ પણ છે.

રાષ્ટ્રપતિએ કહ્યું કે ઓલ ચિકીની શતાબ્દી ઉજવણી આ લિપિને પ્રોત્સાહન આપવા માટે સંકલ્પ લેવાનો પ્રસંગ હોવો જોઈએ. જ્યારે બાળકો હિન્દી, અંગ્રેજી, ઉડિયા અને બંગાળી અથવા અન્ય કોઈ પણ ભાષામાં શિક્ષણ મેળવી શકે છે, ત્યારે તેમણે ઓલ ચિકી લિપિમાં તેમની માતૃભાષા સંથાલી પણ શીખવી જોઈએ.

રાષ્ટ્રપતિએ એ નોંધીને આનંદ વ્યક્ત કર્યો કે ઘણા લેખકો તેમના કાર્યો દ્વારા સંથાલી સાહિત્યને સમૃદ્ધ બનાવી રહ્યા છે. તેમણે લેખકોને તેમના લખાણો દ્વારા લોકોને જગાડવાની સલાહ આપી હતી.

રાષ્ટ્રપતિએ કહ્યું કે ભારત અનેક ભાષાઓના બગીચા જેવું છે. ભાષા અને સાહિત્ય એ એવા તાંતણા છે જે સમુદાયોમાં એકતા જાળવી રાખે છે. સાહિત્યનું આદાન-પ્રદાન ભાષાઓને સમૃદ્ધ બનાવી શકે છે. સંથાલી સાહિત્યને અનુવાદ અને લેખન દ્વારા અન્ય ભાષાઓના વિદ્યાર્થીઓ માટે સુલભ બનાવવા અને તેનાથી ઉલટું પ્રયાસો કરવા જોઈએ.

આ પ્રસંગે રાષ્ટ્રપતિએ ઓલ ચિકીના 100 વર્ષ પૂર્ણ થવા પર એક સ્મારક સિક્કો અને ટપાલ ટિકિટ બહાર પાડી હતી. તેમણે સંથાલી લોકોમાં ઓલ ચિકી લિપિના વ્યાપક ઉપયોગને પ્રોત્સાહન આપવા બદલ સંથાલ સમુદાયના 10 સિદ્ધિ મેળવનારાઓનું સન્માન પણ કર્યું હતું.

રાષ્ટ્રપતિનું ભાષણ જોવા માટે મહેરબાની કરીને અહીં ક્લિક કરો.

SM/NP/GP/JD

(રીલીઝ આઈડી: 2228837) મુલાકાતી સંખ્યા : 12