జాతీయ మెడికల్ కమిషన్ (ఎన్ఎంసీ) అందించిన సమాచారం ప్రకారం విద్యా సంవత్సరం 2020-21 నుంచి 2025-26 నాటికి ఎంబీబీఎస్ సీట్లు 48,563, పీజీ సీట్లు 29,080 వరకూ పెరిగాయి. పెరిగిన ఎంబీబీఎస్, పీజీ సీట్ల వివరాలు అనుబంధంలో ఉన్నాయి. అంతేకాకుండా, ఆర్థిక సంవత్సరం 2025-26 నుంచి 2028-29 వరకు కేంద్ర ప్రభుత్వ ప్రాయోజిత పథకాల పరిధిలో ప్రభుత్వ కళాశాలల్లో 10,023 అదనపు సీట్లను చేర్చేందుకు ప్రభుత్వం ఆమోదం తెలిపింది.

వైద్యవిద్యలో పెరిగిన సీట్లు ప్రధానంగా వైద్య సేవలు అందని ప్రాంతాల్లో ఆరోగ్య రంగ నిపుణుల కొరతను తగ్గిస్తాయి. అలాగే రాష్ట్రాల్లో డాక్టర్-జనాభా నిష్పత్తిపై ప్రత్యక్ష ప్రభావాన్ని చూపిస్తాయి. మౌలిక వసతులు, బోధనా సిబ్బంది పెంపు, వైద్య విద్య సీట్ల పెరుగుదలతో దేశీయ సంస్థలు భారతీయ విద్యార్థులకు మరింతగా అందుబాటులోకి వస్తాయి.

వైద్య విద్య నాణ్యతా ప్రమాణాలను పర్యవేక్షించే ఉన్నత స్థాయి సంస్థ ఎన్ఎంసీ కీలక నియంత్రణలను జారీ చేసింది. వీటిలో కనీస ప్రమాణాల అవసరాలు (ఎంఎస్ఆర్), పట్టభద్ర వైద్య విద్య నియంత్రణలు (జీఎంఈఆర్)-2023, వైద్య విద్య ప్రమాణాల నిర్వహణ నియంత్రణలు-2023 (ఎంఎస్ఎంఈఆర్-2023), సామర్ధ్య ఆధారిత వైద్య విద్య (సీబీఎంఈ) బోధనా మార్గదర్శకాలు-2024 తదితరమైనవి ఉన్నాయి. ఇవి వైద్య విద్యలో నిర్దేశిత ప్రమాణాలు అమలుకు భరోసానిస్తాయి. దేశవ్యాప్తంగా వైద్య విద్య, శిక్షణ సమగ్రతను, నాణ్యతను కొనసాగించేందుకు ఈ నిబంధనలను రూపొందించారు.

***