તેના ચાલુ મિશન-મોડ અભિયાન હેઠળ એક નોંધપાત્ર સિદ્ધિમાં, યુનિક આઈડેન્ટિફિકેશન ઓથોરિટી ઓફ ઈન્ડિયા (UIDAI) એ દેશભરની 83000 શાળાઓમાં અભ્યાસ કરતા શાળાના બાળકો માટે એક કરોડથી વધુ મેન્ડેટરી બાયોમેટ્રિક અપડેટ્સ (MBUs) પૂર્ણ કરવાનો સીમાચિહ્ન પાર કર્યો છે.

UIDAI એ યુનિફાઇડ ડિસ્ટ્રિક્ટ ઇન્ફોર્મેશન સિસ્ટમ ફોર એજ્યુકેશન પ્લસ (UDISE+) એપ્લિકેશન સાથે સફળ ટેકનોલોજીકલ સંકલન પછી સપ્ટેમ્બર 2025 માં શાળાના બાળકો માટે આ વિશેષ MBU અભિયાન શરૂ કર્યું હતું, જેણે શાળાઓમાં બાળકોના MBUs સ્ટેટસની દૃશ્યતા સક્ષમ કરી હતી. આ મહત્વપૂર્ણ સફળતાએ UIDAI અને શાળાઓને સંયુક્ત રીતે એવા બાળકોને ઓળખવામાં મદદ કરી કે જેમના MBU બાકી હતા, અને MBU પૂર્ણ કરવા માટે શાળાઓમાં કેમ્પ યોજવામાં આવ્યા.

UIDAI ના CEO શ્રી ભુવનેશ કુમારે તમામ રાજ્યો અને કેન્દ્રશાસિત પ્રદેશોના મુખ્ય સચિવોને પત્ર લખીને UIDAI દ્વારા કરવામાં આવેલી આ પહેલથી માહિતગાર કર્યા હતા અને શાળાઓમાં કેન્દ્રિત MBU કેમ્પ યોજવામાં તેમના સહકારની વિનંતી કરી હતી. દેશમાં આઠ સ્થળોએ ફેલાયેલી UIDAI પ્રાદેશિક કચેરીઓએ તમામ હિતધારકો, એટલે કે રાજ્યો અને કેન્દ્રશાસિત પ્રદેશોના શિક્ષણ વિભાગો, જિલ્લા કક્ષાના વહીવટીતંત્ર, UIDAI રજિસ્ટ્રાર અને શાળા સત્તાવાળાઓ સાથે આ વિશાળ કવાયતનું સંકલન કરવા માટે પાંચ મહિના સુધી અથાગ મહેનત કરી છે. જ્યાં સુધી દેશની તમામ શાળાઓને આવરી લેવામાં ન આવે ત્યાં સુધી આ મિશન મોડ અભિયાન કાર્યરત રહેશે. આ પહેલથી પહેલેથી જ 83,000 શાળાઓમાં 1 કરોડ બાળકોને લાભ થયો છે અને બીજા ઘણા બાળકોને તેનો લાભ મળવાનો છે.

પાંચ વર્ષથી ઓછી ઉંમરના બાળકનું આધારમાં નોંધણી ફોટોગ્રાફ, નામ, જન્મ તારીખ, લિંગ, સરનામું અને જન્મ પ્રમાણપત્ર આપીને કરવામાં આવે છે. પાંચ વર્ષથી ઓછી ઉંમરના બાળકના ફિંગરપ્રિન્ટ્સ અને આઇરિસ (આંખની કીકી) બાયોમેટ્રિક્સ આધાર નોંધણી માટે લેવામાં આવતા નથી કારણ કે તે ઉંમરે તે પરિપક્વ હોતા નથી. તેથી, 5 અને 15 વર્ષની ઉંમર વટાવ્યા પછી, MBU ની પ્રક્રિયાને અનુસરીને આધારમાં ફિંગરપ્રિન્ટ્સ અને આઇરિસ માહિતી આપવી એ બાળકો માટે આવશ્યક જરૂરિયાત છે. આધારમાં MBU ના અભાવે વિવિધ સરકારી યોજનાઓ હેઠળ લાભ મેળવવા માટે ઓથેન્ટિકેશન (પ્રમાણીકરણ) કરવામાં, NEET, JEE, CUET વગેરે જેવી સ્પર્ધાત્મક અને યુનિવર્સિટી પરીક્ષાઓમાં નોંધણી કરવામાં મુશ્કેલીઓ ઊભી થઈ શકે છે.

બાળકોને MBU પૂર્ણ કરવા માટે પ્રોત્સાહિત કરવા અને સેવાને તમામ માટે સુલભ બનાવવા માટે, UIDAI એ 7-15 વય જૂથના બાળકો માટે 1 ઓક્ટોબર 2025 થી એક વર્ષના સમયગાળા માટે MBU માટે ચૂકવવાપાત્ર શુલ્ક માફ કરી દીધા હતા. વધુમાં, 5-7 વર્ષ અને 15-17 વર્ષની વયના બાળકો માટે MBU મફત જ રહેશે.

શાળાઓમાં યોજાયેલા કેમ્પો ઉપરાંત, બાળકો દેશભરમાં ચાલતા કોઈપણ આધાર નોંધણી કેન્દ્રો અને આધાર સેવા કેન્દ્રો પર પણ તેમનું MBU પૂર્ણ કરી શકે છે. આ કેન્દ્રોની મુલાકાત લેતા બાળકો દ્વારા સમાન સમયગાળામાં અંદાજે 1.3 કરોડ MBU ટ્રાન્ઝેક્શન પણ પૂર્ણ કરવામાં આવ્યા છે.

SM/DK/GP/JD