مصنوعی ذہانت اب کوئی مستقبل کا تصور نہیں رہی۔ یہ پہلے ہی اس انداز کو بدل رہی ہے کہ ہندوستانی کس طرح سیکھتے ہیں، کام کرتے ہیں، خدمات تک رسائی حاصل کرتے ہیں اور روزمرہ مسائل حل کرتے ہیں۔ یہ پیغام 6 فروری 2026 کو منعقدہ ’’ڈیجیٹل انڈیا – اپنے ماہرین سے پوچھیں‘‘ کے تازہ ترین ایپی سوڈ میں مرکزی حیثیت رکھتا تھا، جس میں آنے والے ’’انڈیا اے آئی امپیکٹ سمٹ‘‘ کے حوالے سے جناب ابھیشیک سنگھ، سی ای او، انڈیا اے آئی مشن کے ساتھ ایک دلچسپ اور فکر انگیز گفتگو شامل تھی۔

اس ایپی سوڈ میں اس بات کو اجاگر کیا گیا کہ یہ سمٹ عوام مرکوز پلیٹ فارم کے طور پر کام کرے گا اور محض تکنیکی مباحث سے آگے بڑھتے ہوئے اس پر توجہ دے گا کہ شہری مصنوعی ذہانت کو اپنے فائدے کے لیے کیسے استعمال کر سکتے ہیں، خاص کرتعلیم، صحت، زراعت، حکمرانی، اسٹارٹ اپس، خدمات اور روزگار کے شعبوں میں۔

سمٹ کا مقصد عالمی سطح پر مصنوعی ذہانت سے متعلق گفتگو کو عملی، قابلِ استعمال نتائج میں ڈھالنا ہے تاکہ زمینی سطح پر لوگوں کو فائدہ پہنچ سکے، خصوصاً ترقی پذیر معیشتوں اور عالمی خطۂ جنوب میں۔ جناب سنگھ نے کہا: ’’انڈیا اے آئی امپیکٹ سمٹ کے ذریعے بھارت عالمی اے آئی گفتگو کو ارادے سے اثر تک لے جا رہا ہے—یہ یقینی بناتے ہوئے کہ اے آئی کی جدت، مہارتیں اور فوائد سب کے لیے قابلِ رسائی ہوں، خاص طور پر گلوبل ساؤتھ کے ممالک کے لیے۔‘‘

گفتگو کے دوران اس بات پر زور دیا گیا کہ مصنوعی ذہانت کسانوں کو فصل کی بہتر منصوبہ بندی میں مدد دے سکتی ہے، ڈاکٹروں کو تیز تر اور زیادہ درست تشخیص کرنے کے قابل بنا سکتی ہے، اساتذہ کو ذاتی نوعیت کے تعلیمی ٹولز فراہم کر سکتی ہے، چھوٹے کاروباروں اور اسٹارٹ اپس کو تیزی سے ترقی کرنے میں سہولت دے سکتی ہے اور ملازمت کے متلاشی افراد کو نئے کیریئر راستے دریافت کرنے میں مدد کر سکتی ہے۔ سمٹ میں ایسے عملی استعمال کے نمونے پیش کیے جائیں گے، جو یہ دکھائیں گے کہ مصنوعی ذہانت محض آٹومیشن نہیں بلکہ شمولیت، کارکردگی اور بااختیار بنانے کا ذریعہ بھی بن سکتی ہے۔

جناب سنگھ نے کہا: ’’مصنوعی ذہانت کا مقصد انسانوں کی جگہ لینا نہیں بلکہ اس کا مقصد انہیں بااختیار بنانا ہے۔ انڈیا اے آئی امپیکٹ سمٹ اس بات کے بارے میں ہے کہ شہری سمجھ سکیں کہ اے آئی روزمرہ زندگی کو کیسے بہتر بنا سکتی ہے، نئے مواقع پیدا کر سکتی ہے اور بھارت کو مستقبل کے لیے تیار کر سکتی ہے۔‘‘

عام خدشات اور غلط فہمیوں کے حوالے سے جناب سنگھ نے واضح کیا کہ اے آئی انسانوں کو تبدیل کرنے کے لیے نہیں بلکہ انسانی صلاحیت میں اضافہ کرنے کے لیے ہے۔ اگرچہ بعض کاموں کی نوعیت میں تبدیلی آئے گی، تاہم توقع ہے کہ اے آئی نئی ملازمتیں، نئی مہارتیں اور نئے مواقع پیدا کرے گی—خصوصاً بھارت کے نوجوانوں، پیشہ ور افراد، محققین اور کاروباری افراد کے لیے۔ شہریوں کو ترغیب دی گئی کہ وہ تبدیلی کے خوف کے بجائے مسلسل سیکھنے، خود کو ڈھالنے کی صلاحیت اور اے آئی سے متعلق بنیادی آگاہی پر توجہ دیں۔

اس ایپی سوڈ میں یہ بھی بتایا گیا کہ مختلف گروہوں کو اس سمٹ سے کیا فائدہ حاصل ہو سکتا ہے:

• طلبہ مستقبل کے کیریئر راستوں کو دریافت کر سکیں گے۔
• پیشہ ور افراد نئی مہارتیں سیکھنے (ری اسکلنگ) کے مواقع کو سمجھ سکیں گے۔
• کسان جان سکیں گے کہ اے آئی فصل کی منصوبہ بندی، موسم کی معلومات اور دیگر امور میں کیسے مدد دے سکتی ہے۔
• اسٹارٹ اپس نیٹ ورکنگ، پالیسی بصیرت اور عالمی تعاون تک رسائی حاصل کر سکیں گے۔
• محققین اور ماہرینِ تعلیم جدید ترین اے آئی کام میں شمولیت اختیار کر سکیں گے۔
• پالیسی ساز اور ادارے ذمہ دار اے آئی فریم ورک کی مشترکہ تشکیل کر سکیں گے۔

گفتگو کے اختتام پر ماہر نے شہریوں سے اپیل کی کہ وہ انڈیا اے آئی امپیکٹ سمٹ میں فعال طور پر حصہ لیں اور اس بات پر زور دیا کہ بھارت کا اے آئی سفر اسی وقت کامیاب ہوگا جب لوگ اے آئی کو سمجھیں، اس پر اعتماد کریں اور اسے ذمہ داری کے ساتھ استعمال کریں۔ ان کے مطابق یہ سمٹ صرف ٹیکنالوجی کے بارے میں نہیں—بلکہ ایسے اے آئی مستقبل کی تشکیل کے بارے میں ہے جو ہر ہندوستانی کے لیے کارآمد ہو۔

لائیو سیشن میں ملک بھر کے ناظرین نے بھرپور شرکت کی اور ماہر کی جانب سے دی گئی واضح اور آسان فہم وضاحتوں کو سراہا۔ ایپی سوڈ 41 کی مکمل ریکارڈنگ درج ذیل لنک پر دستیاب ہے:

https://www.youtube.com/live/Bvf1CMQNIVA?si=BeOO5F7dugTXWiJ1

’’ڈیجیٹل انڈیا – اپنے ماہرین سے پوچھیں‘‘ کا سلسلہ شہریوں اور شعبہ جاتی ماہرین کے درمیان براہِ راست مکالمے کو مسلسل فروغ دے رہا ہے، جس کا مقصد باخبر شمولیت اور ڈیجیٹل ٹیکنالوجیز کے ذمہ دارانہ استعمال کی حوصلہ افزائی کرنا ہے۔ یہ سلسلہ ڈیجیٹل انڈیا کے یوٹیوب چینل پر براہِ راست نشر کیا جاتا ہے:

https://www.youtube.com/@DigitalIndiaofficial

آنے والے ایپی سوڈز اور ڈیجیٹل انڈیا کے اقدامات سے متعلق تازہ ترین معلومات کے لیے ملاحظہ کریں:

www.digitalindia.gov.in
www.negd.gov.in

******

ش ح۔ ش ا ر۔ ول

Uno-1885