குடியரசு தினக் கொண்டாட்டங்கள் –2026-ன் ஒரு பகுதியாக ஏற்பாடு செய்யப்பட்ட தேசிய பள்ளி இசைக்குழுப் போட்டி 7, 2025–26-ன் மாபெரும் இறுதிப் போட்டி, இன்று புது தில்லியில் உள்ள தேசிய பால பவனில், பள்ளிக் கல்வி மற்றும் எழுத்தறிவுத் துறைச் செயலாளர் திரு. சஞ்சய் குமார், பாதுகாப்புத் துறைச் செயலாளர் திரு. ராஜேஷ் குமார் சிங் ஆகியோரால் கூட்டாகத் தொடங்கி வைக்கப்பட்டது. இது நாடு முழுவதும் உள்ள பள்ளி மாணவர்களிடையே ஒழுக்கம், குழுப்பணி மற்றும் இசையில் சிறந்து விளங்குவதை ஊக்குவிப்பதில் ஒரு குறிப்பிடத்தக்க மைல்கல்லைக் குறிக்கிறது.

தேசிய பள்ளி இசைக்குழுப் போட்டி 7, 2025–26, நாடு முழுவதிலுமிருந்து 18 பள்ளி இசைக்குழுக்களை ஒன்றிணைத்து, குடியரசு தினக் கொண்டாட்டங்களின் ஒரு பகுதியாக ஒரு தேசிய மேடையில் தங்கள் திறமைகளை வெளிப்படுத்துகிறது. மேலும், இது இந்தியாவின் இளைஞர்களிடையே ஒற்றுமை, ஒழுக்கம் மற்றும் கலாச்சாரப் பெருமையை வளர்ப்பதற்கான ஒரு தனித்துவமான தளமாகத் தொடர்ந்து செயல்படுகிறது. இந்த ஆண்டு, மாநில மற்றும் மண்டல அளவிலான போட்டிகள் மூலம் 11 மாநிலங்களைச் சேர்ந்த 18 இசைக்குழுக்கள் இறுதிப் போட்டிக்குத் தேர்ந்தெடுக்கப்பட்டுள்ளன. மாநில அளவிலான போட்டிகளில் 18013 குழந்தைகள் அடங்கிய 763 அணிகள் பங்கேற்றன, அதே நேரத்தில் மண்டல அளவில் 94 அணிகள் தேர்ந்தெடுக்கப்பட்டன.

கூட்டத்தில் உரையாற்றிய திரு. சஞ்சய் குமார், மாணவர்களிடையே தலைமைத்துவம், ஒழுக்கம், குழுப்பணி மற்றும் முழுமையான வளர்ச்சியை வளர்ப்பதில் தேசிய பள்ளி இசைக்குழுப் போட்டி போன்ற இணைப் பாடத்திட்ட தளங்களின் முக்கியத்துவத்தை வலியுறுத்தினார். தேசிய கல்விக் கொள்கை 2020-ன் தொலைநோக்குப் பார்வை மற்றும் நோக்கங்களுக்கு இணங்க, வகுப்பறைக்கு அப்பாற்பட்ட பல்வேறு திறமைகளை ஊக்குவிப்பதில் கல்வி அமைச்சகத்தின் தொடர்ச்சியான அர்ப்பணிப்பை அவர் மீண்டும் வலியுறுத்தினார்.

திரு. ராஜேஷ் குமார் சிங் தனது உரையில், குடியரசு தினக் கொண்டாட்டங்களின் ஒரு பகுதியாக இந்தப் போட்டியை நிறுவனமயமாக்குவதில் பாதுகாப்பு அமைச்சகம் மற்றும் கல்வி அமைச்சகத்திற்கு இடையேயான ஒத்துழைப்பைப் பாராட்டினார். மாணவர்களின் அர்ப்பணிப்பு, துல்லியம் மற்றும் இசையில் சிறந்து விளங்கியதற்காக அவர்களைப் பாராட்டிய அவர், இதுபோன்ற முயற்சிகள் இளம் கற்பவர்களிடையே தேசபக்தி மற்றும் தேசிய சேவை உணர்வை ஆழமாக ஏற்படுத்துகின்றன என்று குறிப்பிட்டார்.

மேலும் விவரங்களுக்கு இந்த ஆங்கிலச் செய்திக்குறிப்பைக் காணவும் https://www.pib.gov.in/PressReleasePage.aspx?PRID=2218115&reg=3&lang=1

***

TV/PKV/RJ