صدر جمہوریہ ہند محترمہ دروپدی مرمو نے آج (23 جنوری 2025 کو) راشٹرپتی بھون میں گرنتھ کٹیر کا افتتاح کیا۔ گرنتھ کٹیر میں بھارت کی 11 کلاسیکی زبانوں، یعنی تمل، سنسکرت، کنڑ، تیلگو، ملیالم، اڑیہ، مراٹھی، پالی، پراکرت، آسامی اور بنگالی میں مخطوطات اور کتابوں کا ایک مالامال مجموعہ ہے۔

گرنتھ کٹیر ہندوستان کی بھرپور اور متنوع ثقافتی، فلسفیانہ، ادبی اور فکری ورثے کی نمائش کرتا ہے۔ اس کٹیر میں ہندوستان کی 11 ہندوستانی کلاسیکی زبانوں میں تقریباً 2,300 کتابوں کا مجموعہ ہے۔ حکومت ہند نے 03 اکتوبر 2024 کو مراٹھی، پالی، پراکرت، آسامی اور بنگالی زبانوں کو 'کلاسیکی زبان' کا درجہ دیا تھا۔ اس سے قبل چھ زبانوں کو کلاسیکی زبان کا درجہ حاصل تھا۔ گرنتھ کٹیر مجموعہ ان زبانوں میں مہاکاوی، فلسفہ، لسانیات، تاریخ، حکمرانی، سائنس، اور عقیدت پر مبنی ادب کے ساتھ ساتھ ہندوستان کے آئین جیسے موضوعات کی ایک وسیع رینج کا احاطہ کرتا ہے۔ 50 کے قریب مخطوطات بھی اس مجموعے کا حصہ ہیں۔ ان میں سے بہت سے مخطوطات روایتی مواد جیسے کھجور کی پتی، کاغذ، چھال اور کپڑے پر ہاتھ سے لکھے گئے ہیں۔

گرنتھ کٹیر کو مرکزی حکومت، ریاستی حکومتوں، یونیورسٹیوں، تحقیقی اداروں، ثقافتی تنظیموں اور ملک بھر کے انفرادی عطیہ دہندگان کے اشتراک سے تیار کیا گیا ہے۔ وزارت تعلیم اور وزارت ثقافت اور ان سے وابستہ اداروں نے اس پہل کی حمایت کی ہے۔ اندرا گاندھی نیشنل سینٹر فار دی آرٹس (آئی جی این سی اے) مخطوطات کے انتظام، تحفظ، دستاویزات اور نمائش میں پیشہ ورانہ مہارت فراہم کر رہا ہے۔

گرنتھ کٹیر کو تیار کرنے کا مقصد ہندوستان کے مالامال ثقافتی اور ادبی ورثے کے بارے میں شہریوں میں بیداری بڑھانا ہے۔ نوآبادیاتی ذہنیت کے آثار کو مٹانے کے قومی عزم کے مطابق، گرنتھ کٹیر کو کثرت میں وحدت کے جذبے کو فروغ دیتے ہوئے نمایاں کاموں کے ذریعے مالامال ورثے کی نمائش کے لیے تیار کیا گیا ہے۔ گرنتھ کٹیر گیان بھارتم مشن کے وژن کی حمایت کرنے کی ایک کوشش ہے، جو کہ ہندوستان کے وسیع مخطوطہ ورثے کو محفوظ رکھنے، ڈیجیٹلائز کرنے اور پھیلانے کے لیے ایک قومی پہل  قدمی ہے، اور آنے والی نسلوں کے لیے تکنالوجی کے ساتھ روایت کو مربوط کرتا ہے۔

اس سے قبل، ولیم ہوگرتھ کے اصل کاموں کا کیٹلاگ، کیڈلسٹن کے لارڈ کرزن کی تقاریر، کیڈلسٹن کے لارڈ کرزن کی انتظامیہ کا خلاصہ، لارڈ کرزن کی زندگی، پنچ میگزینیں اور دیگر جیسی کتابیں یہاں رکھی گئی تھیں۔ اب انہیں راشٹرپتی بھون اسٹیٹ کے اندر ایک علیحدہ جگہ پر منتقل کر دیا گیا ہے۔ یہ کتابیں، جو آرکائیو کے مجموعے کا ایک حصہ ہیں، کو ڈیجیٹائز کر دیا گیا ہے اور محقق اسکالرز کے ذریعے آن لائن رسائی کے لیے دستیاب کرایا جائے گا۔

شائقین راشٹرپتی بھون سرکٹ 1 کے اپنے کئے گئے دورے کے دوران کاموں اور مخطوطات کی ایک جھلک ملاحظہ کر سکیں گے۔ اس کے علاوہ، لوگ اس مجموعے کی معلومات تک رسائی حاصل کر سکتے ہیں اور کتابیں اور مخطوطات پڑھ سکتے ہیں جو آن لائن پورٹل کے ذریعے بھی دستیاب ہوں گے۔ محققین گرنتھ کٹیر تک جسمانی رسائی کے لیے پورٹل کے ذریعے بھی درخواست دے سکتے ہیں۔

چند قدیم تخلیق جنہوں نے ان زبانوں کو کلاسیکی زبان کا درجہ دلانے میں تعاون دیا ہے، وہ ہیں سنسکرت میں وید، پُران اور اُپ نشد؛ گاتھا سپتشی، جو مراٹھی کی قدیم ترین  تسلیم کی جانے والی ادبی تخلیق ہے؛ پالی میں وِنے پٹک جس میں بودھ راہبوں  کے لیے مٹھ کے اصولوں کو اجاگر کیا گیا ہے؛ جین آگم اور  پراکرت نوشتہ جات جو اہم تاریخی ریکارڈ ہیں؛ آسامی، بنگالی او راڑیہ میں چریہ پد، قدیم بود تانترک  متن؛ تروکّورل، زندگی کے مختلف پہلوؤں پر کلاسیکی تمل مقالے؛ تیلگو میں مہابھارت؛ کنڑ میں کوی راج مارگ، جو بیان ، شاعری اور گرامر پر دستیاب سب سے پرانی تخلیق ہے اور ملیالم میں رام چریتم  ہے۔

کٹیر کے افتتاح کے بعد اجتماع سے خطاب کرتے ہوئے صدر جمہوریہ نے کہا کہ کلاسیکی زبانوں نے ہندوستانی ثقافت کی بنیاد فراہم کی ہے۔ سائنس، یوگا، آیوروید، اور ہندوستان کی کلاسیکی زبانوں میں لکھے گئے ادب کے علم نے صدیوں سے دنیا کی رہنمائی کی ہے۔ ترکّورل اور ارتھ شاستر جیسی عبارتیں آج بھی اہمیت کی حامل ہیں۔ ان زبانوں کے ذریعے ریاضی، فلکیات، آیوروید اور گرامر جیسے مضامین تیار کیے گئے ہیں۔ پانینی کی گرامر، آریہ بھٹ کی ریاضی، اور چرک اور سُشرُت کی طبی سائنس آج بھی دنیا کو حیران کر رہی ہے۔ ان کلاسیکی زبانوں نے جدید ہندوستانی زبانوں کی ترقی میں بھی اہم کردار ادا کیا ہے۔ ان زبانوں کی خدمات کو خراج تحسین پیش کرنے اور ان کے تحفظ اور ترقی کو فروغ دینے کے لیے انھیں کلاسیکی زبانوں کا خصوصی درجہ دیا گیا ہے۔

صدر جمہوریہ نے کہا کہ کلاسیکی زبانوں میں جمع علم کی دولت ہمیں اپنے شاندار ماضی سے سیکھنے اور روشن مستقبل کی تعمیر کی تحریک دیتی ہے۔ ورثے اور ترقی کا یہ امتزاج، جو ہمارا رہنما اصول ہے، کلاسیکی زبانوں کی اہمیت کو بھی واضح کرتا ہے۔

صدر نے کہا کہ یہ تمام فرض شناس لوگوں کی اجتماعی ذمہ داری ہے کہ وہ اپنی زبانوں کی میراث کی حفاظت کریں اور اسے فروغ دیں۔ یونیورسٹیوں میں کلاسیکی زبانوں کے مطالعہ کو فروغ دینا، نوجوانوں کو کم از کم ایک کلاسیکی زبان سیکھنے کی ترغیب دینا، اور ان زبانوں میں زیادہ کتابیں لائبریریوں میں دستیاب کرانا ان زبانوں کے تحفظ اور فروغ کے لیے بہت ضروری ہے۔

صدر جمہوریہ نے کہا کہ گرنتھ کُٹیر ہندوستان کی کلاسیکی زبانوں کے تحفظ اور فروغ کی سمت راشٹرپتی بھون کی اجتماعی کوشش کا حصہ ہے۔ انہوں نے یقین ظاہر کیا کہ اس کٹیر میں کلاسیکی زبانوں سے متعلق مواد کا ذخیرہ بڑھتا رہے گا۔ وہ اس بات پر بھی یقین رکھتی تھیں کہ اس کُٹیر کا مجموعہ تمام مہمانوں، خاص طور پر نوجوانوں کو کلاسیکی زبانوں کے بارے میں جاننے اور سمجھنے کی ترغیب دے گا۔

اس موقع پر موجود معززین میں ثقافت کے وزیر مملکت جناب راؤ اندرجیت سنگھ، تعلیم کے وزیر مملکت جناب جینت چودھری، ماہرینِ مضمون، عطیہ دہندگان اور ریاستی نمائندے موجود تھے۔

صدر جمہوریہ کی تقریر ملاحظہ کرنے کے لیے یہاں کلک کریں۔

**********

 (ش ح –ا ب ن)

U.No:1010

(रिलीज़ आईडी: 2217902) आगंतुक पटल : 6