ಭಾರತದ ಆರ್ಥಿಕತೆಯು ಬೆಳೆಯುತ್ತಿರುವಂತೆ ಮತ್ತು ಬಳಕೆಯು ವೈವಿಧ್ಯಮಯವಾಗುತ್ತಿದ್ದಂತೆ, ಸರಕು ಸಾಗಣೆಯು ತೀವ್ರವಾಗಿ ಹೆಚ್ಚಾಗಿದೆ, ಇದು ರಸ್ತೆಗಳು, ಇಂಧನ ಬಳಕೆ ಮತ್ತು ಗಾಳಿಯ ಗುಣಮಟ್ಟದ ಮೇಲೆ ಒತ್ತಡವನ್ನು ಹೇರುತ್ತಿದೆ. ಇದನ್ನು ಪರಿಹರಿಸಲು, ಭಾರತೀಯ ರೈಲ್ವೆಯು ತನ್ನ ದೂರದೃಷ್ಟಿಯ 'ಮೀಸಲಾದ ಸರಕು ಕಾರಿಡಾರ್' (ಡಿ ಎಫ್‌ ಸಿ) ಉಪಕ್ರಮದ ಮೂಲಕ ನವೀನ 'ಟ್ರಕ್ಸ್-ಆನ್-ಟ್ರೈನ್ಸ್' (ಟಿಒಟಿ) ಸೇವೆಯನ್ನು ಪರಿಚಯಿಸಿದೆ. ಭಾರತೀಯ ರೈಲ್ವೆಯ ದೀರ್ಘಕಾಲೀನ ಸರಕು ಸಾಗಣೆ ಪರಿವರ್ತನೆ ಕಾರ್ಯತಂತ್ರದ ಭಾಗವಾಗಿ ರೂಪಿಸಲಾದ ಡಿ ಎಫ್‌ ಸಿ ಜಾಲವು ಹೊಸ ಪೀಳಿಗೆಯ ಬಹುಮಾದರಿ ಲಾಜಿಸ್ಟಿಕ್ಸ್ ಅನ್ನು ಸಕ್ರಿಯಗೊಳಿಸುವ ಬೆನ್ನೆಲುಬಾಗಿದೆ.

'ಟ್ರಕ್ಸ್-ಆನ್-ಟ್ರೈನ್ಸ್ ಸೇವೆಯು ರಸ್ತೆ ಸಾರಿಗೆಯ ನಮ್ಯತೆಯನ್ನು ಭಾರತೀಯ ರೈಲ್ವೆಯ ಮೀಸಲಾದ ಸರಕು ಕಾರಿಡಾರ್ ಕಾರ್ಯಕ್ರಮದ ಅಡಿಯಲ್ಲಿ ಅಭಿವೃದ್ಧಿಪಡಿಸಲಾದ ವಿದ್ಯುದೀಕೃತ ರೈಲು ಮೂಲಸೌಕರ್ಯದ ದಕ್ಷತೆ ಮತ್ತು ಪರಿಸರ ಪ್ರಯೋಜನಗಳೊಂದಿಗೆ ಸಂಯೋಜಿಸುತ್ತದೆ. ಈ ಸೇವೆಯು ಲೋಡ್ ಮಾಡಲಾದ ಟ್ರಕ್‌‌ ಗಳನ್ನು ವಿಶೇಷವಾಗಿ ಮಾರ್ಪಡಿಸಿದ ಫ್ಲಾಟ್ ವ್ಯಾಗನ್‌ ಗಳ ಮೇಲೆ ಮೀಸಲಾದ ಸರಕು ಕಾರಿಡಾರ್ ಉದ್ದಕ್ಕೂ ಸಾಗಿಸಲು ಅನುವು ಮಾಡಿಕೊಡುತ್ತದೆ. ಟ್ರಕ್‌ ಗಳು ದೀರ್ಘವಾದ, ದಟ್ಟಣೆಯಿಂದ ಕೂಡಿದ ಹೆದ್ದಾರಿ ಪ್ರಯಾಣಗಳನ್ನು ತಪ್ಪಿಸಿ ಮುಖ್ಯ ಸಾಗಣೆಗಾಗಿ ರೈಲಿನ ಮೂಲಕ ಪ್ರಯಾಣಿಸುತ್ತವೆ. ನಂತರ ಅವು ಕೇವಲ ಅಲ್ಪ ದೂರದ ಮೊದಲ ಮತ್ತು ಕೊನೆಯ ಮೈಲಿ ರಸ್ತೆ ಸಂಚಾರವನ್ನು ಪೂರ್ಣಗೊಳಿಸುತ್ತವೆ.

ಕಡಿಮೆ ವೆಚ್ಚ ಹಾಗೂ ವಿಶ್ವಾಸಾರ್ಹ

ಪ್ರಸ್ತುತ, ಟಿಒಟಿ ಸೇವೆಯು ಪಶ್ಚಿಮ ಡಿಎಫ್‌ಸಿ ಜಾಲದಲ್ಲಿ ನ್ಯೂ ರೇವಾರಿ ಮತ್ತು ನ್ಯೂ ಪಾಲನ್‌ಪುರ್ ನಡುವೆ ಕಾರ್ಯನಿರ್ವಹಿಸುತ್ತಿದೆ. ಮೂಲಸೌಕರ್ಯ ಅಭಿವೃದ್ಧಿಯು ಪ್ರಗತಿಯಲ್ಲಿರುವಂತೆ ಇದನ್ನು ಹೆಚ್ಚುವರಿ ವಿಭಾಗಗಳಿಗೆ ವಿಸ್ತರಿಸಲಾಗುವುದು. ನ್ಯೂ ಪಾಲನ್‌ಪುರ್ - ನ್ಯೂ ರೇವಾರಿ ಕಾರಿಡಾರ್‌ ನಲ್ಲಿ, ಈ ಸೇವೆಯು ಸರಿಸುಮಾರು 636 ಕಿಲೋಮೀಟರ್‌ ಗಳವರೆಗೆ ವ್ಯಾಪಿಸಿದ್ದು, ರಸ್ತೆಯ ಮೂಲಕ ಸುಮಾರು 30 ಗಂಟೆಗಳ ಕಾಲ ತೆಗೆದುಕೊಳ್ಳುತ್ತಿದ್ದ ಒಟ್ಟಾರೆ ಸಾಗಣೆ ಸಮಯವನ್ನು ಟಿಒಟಿ ಸೇವೆಯ ಮೂಲಕ ಸುಮಾರು 12 ಗಂಟೆಗಳಿಗೆ ಇಳಿಸುತ್ತದೆ. ಈ ಸಂಯೋಜಿತ ರಸ್ತೆ-ರೈಲು ಪರಿಹಾರವು ಸಾಗಣೆಯ ವಿಶ್ವಾಸಾರ್ಹತೆಯನ್ನು ಹೆಚ್ಚಿಸುತ್ತದೆ, ವಹಿವಾಟಿನ ಸಮಯವನ್ನು ಕಡಿಮೆ ಮಾಡುತ್ತದೆ ಮತ್ತು ಒಟ್ಟಾರೆ ಲಾಜಿಸ್ಟಿಕ್ಸ್ ವೆಚ್ಚವನ್ನು ತಗ್ಗಿಸುತ್ತದೆ, ಜೊತೆಗೆ ಹೆದ್ದಾರಿ ಸಾರಿಗೆಯಲ್ಲಿ ಸಹಜವಾಗಿರುವ ಅನಿಶ್ಚಿತತೆಗಳಿಂದ ದೂರದ ಸರಕು ಸಾಗಣೆಯನ್ನು ರಕ್ಷಿಸುತ್ತದೆ.

ಟಿಒಟಿಯ ಒಂದು ಪ್ರಮುಖ ಶಕ್ತಿಯು ಅದರ ಸರಳ ಮತ್ತು ಸ್ಪರ್ಧಾತ್ಮಕ ಬೆಲೆ ರಚನೆಯಲ್ಲಿ ಅಡಗಿದೆ. ಸರಕು ಸಾಗಣೆಗೆ ಪಾರದರ್ಶಕ ತೂಕದ ಸ್ಲ್ಯಾಬ್‌ ಗಳ ಆಧಾರದ ಮೇಲೆ ಶುಲ್ಕ ವಿಧಿಸಲಾಗುತ್ತದೆ: 25 ಟನ್‌ ವರೆಗಿನ ಟ್ರಕ್‌ ಗಳಿಗೆ ಪ್ರತಿ ವ್ಯಾಗನ್‌ ಗೆ ₹25,543, 25-45 ಟನ್‌ ಗಳಿಗೆ ₹29,191 ಮತ್ತು 45-58 ಟನ್‌ ಗಳಿಗೆ ₹32,000, ಹಾಗೆಯೇ ಖಾಲಿ ಟ್ರಕ್‌ ಗಳನ್ನು ಪ್ರತಿ ವ್ಯಾಗನ್‌ ಗೆ ಕೇವಲ ₹21,894 ಕ್ಕೆ ಸಾಗಿಸಲಾಗುತ್ತದೆ. ಡೈರಿ ವಲಯಕ್ಕೆ ಹೆಚ್ಚಿನ ಬೆಂಬಲ ನೀಡಲು, ಹಾಲಿನ ಟ್ಯಾಂಕರ್‌ ಗಳ ಮೇಲೆ ಯಾವುದೇ ಜಿ ಎಸ್‌ ಟಿ ವಿಧಿಸಲಾಗುವುದಿಲ್ಲ, ಇದು ಈ ಸೇವೆಯನ್ನು ಸಮಯಕ್ಕೆ ತಲುಪಿಸಬೇಕಾದ ಮತ್ತು ಬೇಗನೆ ಹಾಳಾಗುವ ಸರಕುಗಳಿಗೆ ವಿಶೇಷವಾಗಿ ಆಕರ್ಷಕವಾಗಿಸುತ್ತದೆ. ಕಾರ್ಯಾಚರಣೆಯ ನಮ್ಯತೆಯನ್ನು ಹೆಚ್ಚಿಸಲು, ಜನವರಿ 2024 ರಿಂದ 'ಓಪನ್ ಇಂಡೆಂಟ್' ಬುಕಿಂಗ್ ಲಭ್ಯವಿದ್ದು, ಗ್ರಾಹಕರು ತಮ್ಮ ಲಾಜಿಸ್ಟಿಕ್ಸ್ ಅವಶ್ಯಕತೆಗಳಿಗೆ ಅನುಗುಣವಾಗಿ ಸಾಗಣೆಯನ್ನು ಯೋಜಿಸಲು ಅನುವು ಮಾಡಿಕೊಡುತ್ತದೆ.

ಪ್ರಸ್ತುತ ಹಣಕಾಸು ವರ್ಷದ ಕಾರ್ಯಾಚರಣೆಯ ಡೇಟಾವು ಈ ಸೇವೆಯ ಬೆಳೆಯುತ್ತಿರುವ ಜನಪ್ರಿಯತೆಯನ್ನು ಸ್ಪಷ್ಟವಾಗಿ ಪ್ರತಿಬಿಂಬಿಸುತ್ತದೆ. ಹಣಕಾಸು ವರ್ಷ 2025 ರ ಅವಧಿಯಲ್ಲಿ (ಏಪ್ರಿಲ್-ಡಿಸೆಂಬರ್), ಟ್ರಕ್ಸ್-ಆನ್-ಟ್ರೈನ್ಸ್ ಸೇವೆಯು ಒಟ್ಟು 545 ರೇಕ್‌ ಗಳನ್ನು ನಿರ್ವಹಿಸಿದೆ, 3 ಲಕ್ಷ ಟನ್‌ ಗಳಿಗಿಂತ ಹೆಚ್ಚು ಸರಕುಗಳನ್ನು ಸಾಗಿಸಿದೆ ಮತ್ತು ₹36.95 ಕೋಟಿ ಆದಾಯವನ್ನು ಗಳಿಸಿದೆ. ಈ ಪ್ರಮಾಣವು ಟಿಒಟಿಯು ಕೇವಲ ಪ್ರಾಯೋಗಿಕ ಹಂತದ ಆವಿಷ್ಕಾರವಾಗಿ ಉಳಿಯದೆ, ವಾಣಿಜ್ಯಿಕವಾಗಿ ಕಾರ್ಯಸಾಧ್ಯವಾದ ಮತ್ತು ವಿಸ್ತರಿಸಬಹುದಾದ ಲಾಜಿಸ್ಟಿಕ್ಸ್ ಉತ್ಪನ್ನವಾಗಿ ಹೊರಹೊಮ್ಮಿರುವುದನ್ನು ಒತ್ತಿಹೇಳುತ್ತದೆ.

ಮೂಲದ ಆಧಾರಿತ ಕಾರ್ಯಕ್ಷಮತೆಯು ಅದರ ಬಲವನ್ನು ಮತ್ತಷ್ಟು ಎತ್ತಿ ತೋರಿಸುತ್ತದೆ. ನ್ಯೂ ಪಾಲನ್‌ಪುರ್ ಒಂದೇ 273 ರೇಕ್‌ ಗಳನ್ನು ನಿರ್ವಹಿಸಿದ್ದು, ಸುಮಾರು 2 ಲಕ್ಷ ಟನ್‌ ಗಳಿಗಿಂತ ಹೆಚ್ಚು ಸರಕನ್ನು ಸಾಗಿಸಿ ₹₹20.18 ಕೋಟಿ ಆದಾಯ ಗಳಿಸಿದೆ; ಇದು ಪಶ್ಚಿಮ ಭಾರತದ ಸರಕು ಸಮೂಹಗಳಿಂದ, ವಿಶೇಷವಾಗಿ ಡೈರಿ ಮತ್ತು ಎಫ್‌ ಎಂ ಸಿ ಜಿ ವಿಭಾಗಗಳಿಂದ ಬಲವಾದ ಸ್ವೀಕಾರವನ್ನು ಪ್ರದರ್ಶಿಸುತ್ತದೆ. ನ್ಯೂ ರೇವಾರಿ ಕಾರ್ಯಾಚರಣೆಯ ವಿಷಯದಲ್ಲಿ ಸಮಾನ ಕೊಡುಗೆ ನೀಡಿದ್ದು, 272 ರೇಕ್‌ ಗಳ ಮೂಲಕ ಸುಮಾರು 0.1004 ಮಿಲಿಯನ್ ಟನ್‌ ಗಳನ್ನು ಸಾಗಿಸಿ ₹16.76 ಕೋಟಿ ಆದಾಯ ಗಳಿಸಿದೆ. ಒಟ್ಟಾಗಿ, ಈ ಟರ್ಮಿನಲ್‌ ಗಳು ಡಿ ಎಫ್‌ ಸಿ ಯಲ್ಲಿನ ಕಾರ್ಯತಂತ್ರದ ನೋಡ್‌ ಗಳು ಹೇಗೆ ಸುಸ್ಥಿರ ಬಹುಮಾದರಿ ಸರಕು ಹರಿವಿಗೆ ಸ್ಥಿರತೆಯನ್ನು ನೀಡಬಲ್ಲವು ಮತ್ತು ಕಾರಿಡಾರ್ ಆಧಾರಿತ ಲಾಜಿಸ್ಟಿಕ್ಸ್ ದಕ್ಷತೆಯನ್ನು ಹೇಗೆ ಚಾಲನೆ ಮಾಡಬಲ್ಲವು ಎಂಬುದನ್ನು ವಿವರಿಸುತ್ತವೆ. ಈ ಸೇವೆಯು ಪಶ್ಚಿಮ ಭಾರತದ ಸರಕು ಸಮೂಹಗಳಿಂದ ಬಲವಾದ ಪ್ರೋತ್ಸಾಹವನ್ನು ಪಡೆದಿದೆ, ವಿಶೇಷವಾಗಿ ಗುಜರಾತ್ ಕೋ-ಆಪರೇಟಿವ್ ಮಿಲ್ಕ್ ಮಾರ್ಕೆಟಿಂಗ್ ಫೆಡರೇಶನ್ (ಅಮುಲ್) ನಂತಹ ಪ್ರಮುಖ ಗ್ರಾಹಕರಿಂದ ಹಾಲು ಮತ್ತು ಡೈರಿ ಉತ್ಪನ್ನಗಳಿಗೆ, ಜೊತೆಗೆ ಇತರ ಲಾಜಿಸ್ಟಿಕ್ಸ್ ಸೇವಾ ಪೂರೈಕೆದಾರರಿಂದಲೂ ಉತ್ತಮ ಸ್ಪಂದನೆ ದೊರೆತಿದೆ. ಜೂನ್ 2023 ರಲ್ಲಿ ಜಿಸಿಎಂಎಂಎಫ್ ನೊಂದಿಗೆ ಮಾಡಿಕೊಂಡ ತಿಳುವಳಿಕೆ ಪತ್ರದ ಮೂಲಕ ಟ್ರಕ್ಸ್-ಆನ್-ಟ್ರೈನ್ಸ್ ಸೇವೆಯ ಮರುಪ್ರಾರಂಭವು ಉದ್ಯಮದ ವಿಶ್ವಾಸವನ್ನು ಗಮನಾರ್ಹವಾಗಿ ಬಲಪಡಿಸಿತು ಮತ್ತು ಡೈರಿ ವಲಯದಿಂದ ನಿಯಮಿತ ಸಾಗಣೆಯನ್ನು ಖಚಿತಪಡಿಸಲು ಸಹಾಯ ಮಾಡಿತು.

ಮಾದರಿ ಬದಲಾವಣೆಯ ಪ್ರವರ್ತಕ

ಪಶ್ಚಿಮ ಮೀಸಲಾದ ಸರಕು ಕಾರಿಡಾರ್ ನ ಟ್ರಕ್ಸ್-ಆನ್-ಟ್ರೈನ್ಸ್ ಸೇವೆಯ ಅತ್ಯಂತ ಮಹತ್ವದ ಕಾರ್ಯತಂತ್ರದ ಫಲಿತಾಂಶವೆಂದರೆ ದೀರ್ಘಾವಧಿಯ ಸರಕು ಸಾಗಣೆಯು ರಸ್ತೆಯಿಂದ ರೈಲಿಗೆ ವರ್ಗಾವಣೆಯಾಗಿರುವುದು. ಟ್ರಕ್ ಪ್ರಯಾಣದ ಸುದೀರ್ಘ ಮತ್ತು ಅತಿ ಹೆಚ್ಚು ಇಂಧನ ಬಳಸುವ ಭಾಗವನ್ನು ವಿದ್ಯುದೀಕೃತ, ಹೆಚ್ಚಿನ ಸಾಮರ್ಥ್ಯದ ಮೀಸಲಾದ ಸರಕು ಕಾರಿಡಾರ್‌ ಗಳಿಗೆ ವರ್ಗಾಯಿಸುವ ಮೂಲಕ, ಟಿಒಟಿ ಮಾದರಿಯು ಹೆದ್ದಾರಿಗಳ ದಟ್ಟಣೆಯನ್ನು ಕಡಿಮೆ ಮಾಡಲು, ಆಮದು ಮಾಡಿದ ಪಳೆಯುಳಿಕೆ ಇಂಧನದ ಮೇಲಿನ ಅವಲಂಬನೆಯನ್ನು ತಗ್ಗಿಸಲು ಮತ್ತು ರಾಷ್ಟ್ರೀಯ ಲಾಜಿಸ್ಟಿಕ್ಸ್ ವೆಚ್ಚವನ್ನು ಉತ್ತಮಗೊಳಿಸಲು ಸಹಾಯ ಮಾಡುತ್ತದೆ. ಪ್ರತಿ ಸರಕು ರೈಲು ಡಜನ್ಗಟ್ಟಲೆ ದೂರದ ಟ್ರಕ್‌ ಗಳನ್ನು ಬದಲಿಸುವ ಸಾಮರ್ಥ್ಯವನ್ನು ಹೊಂದಿದೆ, ಇದರಿಂದ ಸುಗಮ ಸಂಚಾರ ಹರಿವು, ಕಡಿಮೆ ಅಪಘಾತದ ಅಪಾಯಗಳು, ಕಡಿಮೆ ಡೀಸೆಲ್ ಬಳಕೆ ಮತ್ತು ರಸ್ತೆ ಮೂಲಸೌಕರ್ಯಗಳ ಸವೆತ ಕಡಿಮೆಯಾಗುತ್ತದೆ.

ಸಾಗಣೆದಾರರಿಗೆ ಒಂದು ಪ್ರಮುಖ ಆರ್ಥಿಕ ಪ್ರಯೋಜನವೆಂದರೆ ಹೆದ್ದಾರಿ ಟೋಲ್ ವೆಚ್ಚಗಳ ತಪ್ಪಿಸುವಿಕೆ. ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ದೂರದ ಟ್ರಕ್ ಸಾಗಣೆಯು ಟೋಲ್ ಪ್ಲಾಜಾಗಳ ಮೇಲೆ ಗಮನಾರ್ಹ ವೆಚ್ಚವನ್ನು ಒಳಗೊಂಡಿರುತ್ತದೆ, ಇದು ಲಾಜಿಸ್ಟಿಕ್ಸ್ ವೆಚ್ಚವನ್ನು ಹೆಚ್ಚಿಸುತ್ತದೆ ಮತ್ತು ಪ್ರಯಾಣದ ಅನಿಶ್ಚಿತತೆಯನ್ನು ಹೆಚ್ಚಿಸುತ್ತದೆ. ದೂರದ ಪ್ರಯಾಣದ ಭಾಗವನ್ನು ರೈಲಿಗೆ ಬದಲಿಸುವ ಮೂಲಕ, ಟ್ರಕ್ಸ್-ಆನ್-ಟ್ರೈನ್ಸ್ ಈ ಪುನರಾವರ್ತಿತ ಟೋಲ್ ವೆಚ್ಚಗಳನ್ನು ಸಂಪೂರ್ಣವಾಗಿ ಬೈಪಾಸ್ ಮಾಡಲು ನಿರ್ವಾಹಕರಿಗೆ ಅನುವು ಮಾಡಿಕೊಡುತ್ತದೆ, ಇದು ವೆಚ್ಚ ಮತ್ತು ಲಾಭದ ಪ್ರಮಾಣವನ್ನು ಸುಧಾರಿಸುತ್ತದೆ, ವಿಶೇಷವಾಗಿ ಹೆಚ್ಚಿನ ಆವರ್ತನದ ಮತ್ತು ದೂರದ ಸಂಚಾರಗಳಿಗೆ ಇದು ಪ್ರಯೋಜನಕಾರಿಯಾಗಿದೆ.

ಸ್ವಚ್ಛ ಮತ್ತು ಸುರಕ್ಷಿತ ಸಾರಿಗೆ

ಇಡೀ ಡಿ ಎಫ್‌ ಸಿ ಜಾಲವು ಸಂಪೂರ್ಣವಾಗಿ ವಿದ್ಯುದೀಕರಣಗೊಂಡಿದೆ ಎಂಬ ಅಂಶದಿಂದ ಪರಿಸರದ ಪ್ರಯೋಜನಗಳು ಮತ್ತಷ್ಟು ಬಲಗೊಂಡಿವೆ. ಟ್ರಕ್‌ ಗಳನ್ನು ರಸ್ತೆಯಿಂದ ರೈಲಿಗೆ ಬದಲಾಯಿಸುವುದು ಇಂಗಾಲದ ಡೈಆಕ್ಸೈಡ್, ಸಾರಜನಕ ಆಕ್ಸೈಡ್‌ ಮತ್ತು ಕಣಗಳ ಹೊರಸೂಸುವಿಕೆಯನ್ನು ಗಮನಾರ್ಹವಾಗಿ ಕಡಿಮೆ ಮಾಡುತ್ತದೆ. ಭಾರತದ ವಿದ್ಯುತ್ ಉತ್ಪಾದನಾ ಮಿಶ್ರಣವು ಕ್ರಮೇಣ ನವೀಕರಿಸಬಹುದಾದ ಇಂಧನದ ಹೆಚ್ಚಿನ ಪಾಲನ್ನು ಅಳವಡಿಸಿಕೊಳ್ಳುತ್ತಿರುವಂತೆ, ಟಿಒಟಿ ಮಾದರಿಯ ಅಡಿಯಲ್ಲಿ ರೈಲು ಆಧಾರಿತ ಸರಕು ಸಾಗಣೆಯ ಇಂಗಾಲದ ಹೆಜ್ಜೆಗಳು ಮತ್ತಷ್ಟು ಕುಸಿಯುವ ನಿರೀಕ್ಷೆಯಿದೆ. ಹೊರಸೂಸುವಿಕೆಯನ್ನು ಮೀರಿ, ಟ್ರಕ್ಸ್-ಆನ್-ಟ್ರೈನ್ಸ್ ರಸ್ತೆ ಧೂಳಿನ ಮಾಲಿನ್ಯದ ಸಮಸ್ಯೆಯನ್ನೂ ಪರಿಹರಿಸುತ್ತದೆ. ಭಾರೀ ಟ್ರಕ್ ಸಂಚಾರವು ಹೆದ್ದಾರಿಗಳಲ್ಲಿ ಧೂಳಿನ ಉತ್ಪಾದನೆಗೆ ಪ್ರಮುಖ ಕಾರಣವಾಗಿದ್ದು, ಇದು ಸಾರ್ವಜನಿಕ ಆರೋಗ್ಯ, ಕೃಷಿ ಮತ್ತು ರಸ್ತೆ ಬದಿಯ ಪರಿಸರ ವ್ಯವಸ್ಥೆಗಳ ಮೇಲೆ ಕೆಟ್ಟ ಪರಿಣಾಮ ಬೀರುತ್ತದೆ. ಟ್ರಕ್ ಸಂಚಾರವನ್ನು ರೈಲು ಕಾರಿಡಾರ್‌ ಗಳಿಗೆ ಸ್ಥಳಾಂತರಿಸುವ ಮೂಲಕ, ಟಿಒಟಿ ಪ್ರಮುಖ ಸಾರಿಗೆ ಮಾರ್ಗಗಳ ಉದ್ದಕ್ಕೂ ವಾಸಿಸುವ ಸಮುದಾಯಗಳಿಗೆ ಗಾಳಿಯ ಗುಣಮಟ್ಟವನ್ನು ಸುಧಾರಿಸಲು ಸಹಾಯ ಮಾಡುತ್ತದೆ. ಈ ಬದಲಾವಣೆಯ ಸ್ಪಷ್ಟ ಪರಿಣಾಮವು ಸುಮಾರು 636 ಕಿಲೋಮೀಟರ್‌ ಗಳಷ್ಟು ವ್ಯಾಪಿಸಿರುವ ಪಾಲನ್‌ಪುರ್ - ರೇವಾರಿ ಕಾರಿಡಾರ್‌ ನಲ್ಲಿ ಸ್ಪಷ್ಟವಾಗಿ ಕಂಡುಬರುತ್ತದೆ. ಈ ಮಾರ್ಗದಲ್ಲಿ ಟ್ರಕ್ಕಿಂಗ್ ಅನ್ನು ರೈಲಿಗೆ ಬದಲಾಯಿಸಿದಾಗ, ಸುಮಾರು 48,875 ಟ್ರಕ್‌ ಗಳನ್ನು ಮುಖ್ಯ ಪ್ರಯಾಣಕ್ಕಾಗಿ ಹೆದ್ದಾರಿಗಳಿಂದ ಪರಿಣಾಮಕಾರಿಯಾಗಿ ತೆಗೆದುಹಾಕಿದಂತಾಗುತ್ತದೆ; ಇವು ಕೇವಲ ಮೊದಲ ಮತ್ತು ಕೊನೆಯ ಮೈಲಿ ವಿತರಣೆಗಾಗಿ ಮಾತ್ರ ರಸ್ತೆಯಲ್ಲಿ ಕಾರ್ಯನಿರ್ವಹಿಸುತ್ತವೆ. ಈ ಬದಲಾವಣೆಯು ಅಂದಾಜು 88,81,285 ಲೀಟರ್ ಡೀಸೆಲ್ ಉಳಿತಾಯಕ್ಕೆ ಕಾರಣವಾಗುತ್ತದೆ, ಜೊತೆಗೆ ಸುಮಾರು 2,30,91,343 ಕಿಲೋಗ್ರಾಂಗಳಷ್ಟು ಇಂಗಾಲದ ಡೈಆಕ್ಸೈಡ್ ಹೊರಸೂಸುವಿಕೆಯನ್ನು ತಡೆಯುತ್ತದೆ. ಕಾರಿಡಾರ್ ಆಧಾರಿತ ಮಾದರಿ ವರ್ಗಾವಣೆಯು ಹೇಗೆ ದೊಡ್ಡ ಪ್ರಮಾಣದಲ್ಲಿ ಪರಿಸರ ಮತ್ತು ಇಂಧನ ಪ್ರಯೋಜನಗಳನ್ನು ನೀಡುತ್ತದೆ ಎಂಬುದನ್ನು ಈ ಅಂಕಿಅಂಶಗಳು ತೋರಿಸುತ್ತವೆ.

ಸೇವೆಯ ಮತ್ತೊಂದು ನಿರ್ಣಾಯಕ ಪ್ರಯೋಜನವೆಂದರೆ ಪ್ರತಿಕೂಲ ಹವಾಮಾನ ಪರಿಸ್ಥಿತಿಗಳನ್ನು ಎದುರಿಸುವ ಅದರ ಸಾಮರ್ಥ್ಯ. ಭಾರತದ ಅನೇಕ ಭಾಗಗಳಲ್ಲಿ ರಸ್ತೆ ಸಾರಿಗೆಯು ಮಂಜು, ಭಾರಿ ಮಳೆ, ತೀವ್ರ ಶಾಖ ಮತ್ತು ಕಳಪೆ ಗೋಚರತೆಗೆ ಹೆಚ್ಚು ತುತ್ತಾಗುತ್ತದೆ, ವಿಶೇಷವಾಗಿ ಚಳಿಗಾಲದಲ್ಲಿ ಉತ್ತರ ಭಾರತದ ಪ್ರದೇಶಗಳಲ್ಲಿ ದಟ್ಟವಾದ ಮಂಜು ಹೆದ್ದಾರಿ ಸಂಚಾರಕ್ಕೆ ಅಡ್ಡಿಪಡಿಸುತ್ತದೆ ಮತ್ತು ಅಪಘಾತದ ಅಪಾಯಗಳನ್ನು ಹೆಚ್ಚಿಸುತ್ತದೆ. ಸುಧಾರಿತ ಸಿಗ್ನಲಿಂಗ್ ಮತ್ತು ನಿಯಂತ್ರಿತ ರೈಟ್-ಆಫ್-ವೇ ಹೊಂದಿರುವ ಮೀಸಲಾದ ಸರಕು ಕಾರಿಡಾರ್‌ ಗಳಲ್ಲಿನ ರೈಲು ಕಾರ್ಯಾಚರಣೆಗಳು ಇಂತಹ ಅಡಚಣೆಗಳಿಗೆ ತುತ್ತಾಗುವುದು ಬಹಳ ಕಡಿಮೆ. ದೀರ್ಘ ಪ್ರಯಾಣದ ಭಾಗವನ್ನು ರೈಲಿಗೆ ಬದಲಿಸುವ ಮೂಲಕ, ಟಿಒಟಿ ವೇಳಾಪಟ್ಟಿಯ ವಿಶ್ವಾಸಾರ್ಹತೆಯನ್ನು ಹೆಚ್ಚಿಸುತ್ತದೆ ಮತ್ತು ಸವಾಲಿನ ಹವಾಮಾನ ಪರಿಸ್ಥಿತಿಗಳಲ್ಲಿಯೂ ಪೂರೈಕೆ ಸರಪಳಿಗಳ ನಿರಂತರತೆಯನ್ನು ಖಚಿತಪಡಿಸುತ್ತದೆ.

ದೂರದ ಟ್ರಕ್ ಚಾಲನೆಯು ದೈಹಿಕವಾಗಿ ಕಷ್ಟಕರ ಮತ್ತು ಅಪಘಾತಕ್ಕೆ ಒಳಗಾಗುವ ಸಾಧ್ಯತೆ ಹೆಚ್ಚು. ನಿರಂತರ ಮತ್ತು ದೀರ್ಘ ಚಾಲನೆಯ ಸಮಯವನ್ನು ಕಡಿಮೆ ಮಾಡುವ ಮೂಲಕ, ಟಿಒಟಿ ಮಾದರಿಯು ಚಾಲಕರ ಆಯಾಸವನ್ನು ಕಡಿಮೆ ಮಾಡುತ್ತದೆ, ಕೆಲಸದ ಪರಿಸ್ಥಿತಿಗಳನ್ನು ಸುಧಾರಿಸುತ್ತದೆ ಮತ್ತು ಕಡಿಮೆ ಅಪಘಾತ ಹಾಗೂ ಸಾವುನೋವುಗಳೊಂದಿಗೆ ಸುರಕ್ಷಿತ ಹೆದ್ದಾರಿಗಳಿಗೆ ಕೊಡುಗೆ ನೀಡುತ್ತದೆ. ರಸ್ತೆ ಸಂಚಾರ ಕಡಿಮೆಯಾಗುವುದು ಮೂಲಸೌಕರ್ಯ ಹಾನಿಯನ್ನು ಕಡಿಮೆ ಮಾಡುತ್ತದೆ ಮತ್ತು ರಸ್ತೆ ನಿರ್ವಹಣೆಯ ಮೇಲಿನ ಸಾರ್ವಜನಿಕ ವೆಚ್ಚವನ್ನು ತಗ್ಗಿಸುತ್ತದೆ.

ರೈಲು ಆಧಾರಿತ ಲಾಜಿಸ್ಟಿಕ್ಸ್‌ ನ ಹೊಸ ಆದಾಯದ ಮೂಲ

ವಾಣಿಜ್ಯ ದೃಷ್ಟಿಕೋನದಿಂದ, ಟ್ರಕ್ಸ್-ಆನ್-ಟ್ರೈನ್ಸ್ ರೈಲು ಆಧಾರಿತ ಲಾಜಿಸ್ಟಿಕ್ಸ್‌ ನಲ್ಲಿ ಹೊಸ ಮತ್ತು ಸುಸ್ಥಿರ ಆದಾಯದ ಮೂಲವಾಗಿ ಹೊರಹೊಮ್ಮಿದೆ. ಪ್ರಾರಂಭದಿಂದಲೂ, ಈ ಸೇವೆಯು 1,955 ಕ್ಕೂ ಹೆಚ್ಚು ಟ್ರಿಪ್‌ ಗಳನ್ನು ಪೂರ್ಣಗೊಳಿಸಿದೆ, ಒಂದು ಮಿಲಿಯನ್ ಟನ್‌ ಗಳಿಗಿಂತ ಹೆಚ್ಚು ಸರಕನ್ನು ನಿರ್ವಹಿಸಿದೆ ಮತ್ತು ಒಟ್ಟು ₹131 ಕೋಟಿಗೂ ಅಧಿಕ ಆದಾಯವನ್ನು ಗಳಿಸಿದೆ. ಡೈರಿ, ಆಟೋಮೊಬೈಲ್ಸ್, ವೇಗವಾಗಿ ಮಾರಾಟವಾಗುವ ಗ್ರಾಹಕ ಸರಕುಗಳು ಮತ್ತು ಆಹಾರ ಸಂಸ್ಕರಣೆಯಂತಹ ವಲಯಗಳಿಂದ ಈ ಸೇವೆಗೆ ಸಿಕ್ಕಿರುವ ಬಲವಾದ ಬೆಂಬಲವು ಈ ಮಾದರಿಯ ಮೇಲೆ ಉದ್ಯಮಕ್ಕಿರುವ ವಿಶ್ವಾಸವನ್ನು ಪ್ರತಿಬಿಂಬಿಸುತ್ತದೆ. ಜೂನ್ 2023 ರಲ್ಲಿ ಗುಜರಾತ್ ಕೋ-ಆಪರೇಟಿವ್ ಮಿಲ್ಕ್ ಮಾರ್ಕೆಟಿಂಗ್ ಫೆಡರೇಶನ್ ನೊಂದಿಗೆ ಮಾಡಿಕೊಂಡ ತಿಳುವಳಿಕೆ ಒಪ್ಪಂದದ ಮೂಲಕ ಸೇವೆಯ ಮರುಪ್ರಾರಂಭವು ದೊಡ್ಡ ಸಾಂಸ್ಥಿಕ ರವಾನೆದಾರರಲ್ಲಿ ಅದರ ವಿಶ್ವಾಸಾರ್ಹತೆಯನ್ನು ಮತ್ತಷ್ಟು ಬಲಪಡಿಸಿತು.

ಭವಿಷ್ಯದತ್ತ ಗಮನ ಹರಿಸಿದರೆ, ಫ್ಲಾಟ್ ಮಲ್ಟಿಪರ್ಪಸ್ (ಎಫ್‌ ಎಂ ಪಿ) ಪ್ಲಾಟ್‌ಫಾರ್ಮ್ ಅಡಿಯಲ್ಲಿ ಹೊಸ ಪೀಳಿಗೆಯ ವ್ಯಾಗನ್ ವಿನ್ಯಾಸಗಳ ಅಭಿವೃದ್ಧಿಯ ಮೂಲಕ ವಿಸ್ತರಣೆಯನ್ನು ಬಲಪಡಿಸಲಾಗುತ್ತಿದೆ. ಟ್ರಕ್‌ ಗಳನ್ನು ಹೆಚ್ಚು ದಕ್ಷತೆಯಿಂದ, ಸುರಕ್ಷಿತವಾಗಿ ಮತ್ತು ಹೆಚ್ಚಿನ ಪೇಲೋಡ್‌ ಗಳಲ್ಲಿ ಸಾಗಿಸಲು ಇವುಗಳನ್ನು ವಿನ್ಯಾಸಗೊಳಿಸಲಾಗಿದೆ. ಈ ವ್ಯಾಗನ್‌ ಗಳು ವಿಭಿನ್ನ ಟ್ರಕ್ ಸಂರಚನೆಗಳಲ್ಲಿ ಲೋಡಿಂಗ್ ದಕ್ಷತೆ ಮತ್ತು ಕಾರ್ಯಾಚರಣೆಯ ನಮ್ಯತೆಯನ್ನು ಹೆಚ್ಚಿಸುತ್ತವೆ. ಏಕಕಾಲದಲ್ಲಿ, ಡಿ ಎಫ್‌ ಸಿ ಜಾಲದಾದ್ಯಂತ ಹೆಚ್ಚುವರಿ ಪ್ರಾರಂಭಿಕ ಮತ್ತು ತಲುಪುವ ಸ್ಥಳಗಳು ಹಾಗೂ ಟರ್ಮಿನಲ್‌ ಗಳ ಪರಿಚಯವು ಮೊದಲ ಮತ್ತು ಕೊನೆಯ ಮೈಲಿ ವೆಚ್ಚಗಳನ್ನು ಕಡಿಮೆ ಮಾಡುತ್ತದೆ ಮತ್ತು ಹೊಸ ಕೈಗಾರಿಕಾ ಸಮೂಹಗಳಿಗೆ ಸೇವೆಯ ವ್ಯಾಪ್ತಿಯನ್ನು ವಿಸ್ತರಿಸುತ್ತದೆ.

ಭವಿಷ್ಯದ ದೃಷ್ಟಿಕೋನದಿಂದ, ನಿಗದಿತ ಸಾಗಣೆ ಸಮಯದೊಂದಿಗೆ ವಿಶ್ವಾಸಾರ್ಹ, ಅಖಿಲ ಭಾರತ ಮಾರುಕಟ್ಟೆ ಪ್ರವೇಶವನ್ನು ಬಯಸುವ ಭಾರತೀಯ ಉದ್ಯಮಗಳಿಗೆ ಈ ಸೇವೆಯು ಹೊಸ ಸಾಧ್ಯತೆಗಳನ್ನು ತೆರೆಯುತ್ತದೆ. ಬೇಗನೆ ಹಾಳಾಗುವ ಕೃಷಿ ಉತ್ಪನ್ನಗಳು ಮತ್ತು ಆಹಾರ ಸಂಸ್ಕರಣಾ ಉದ್ಯಮಗಳಿಗೆ, ಟಿಒಟಿ ನಿಜವಾದ ಮೊದಲ ಮೈಲಿಯಿಂದ ಕೊನೆಯ ಮೈಲಿಯವರೆಗಿನ ಏಕೀಕರಣವನ್ನು ಶಕ್ತಗೊಳಿಸುತ್ತದೆ. ಮಹಾರಾಷ್ಟ್ರದಲ್ಲಿ ಬೆಳೆದ ತಾಜಾ ಸಪೋಟಾವನ್ನು ತೋಟಗಳಿಂದ ಹತ್ತಿರದ ಟಿಒಟಿ ಟರ್ಮಿನಲ್‌ ಗಳಿಗೆ ಸಾಗಿಸಬಹುದು, ಮೀಸಲಾದ ಸರಕು ಕಾರಿಡಾರ್‌ ನಲ್ಲಿ ವೇಗವಾಗಿ ಸಾಗಿಸಬಹುದು ಮತ್ತು ಕನಿಷ್ಠ ನಿರ್ವಹಣೆ ಹಾಗೂ ಸಮಯದ ನಷ್ಟವಿಲ್ಲದೆ ದೂರದ ಬಳಕೆಯ ಕೇಂದ್ರಗಳಿಗೆ ರಸ್ತೆಯ ಮೂಲಕ ತಲುಪಿಸಬಹುದು. ಅದೇ ರೀತಿ, ಭಾರತದ ಪ್ರಮುಖ ತೋಟಗಾರಿಕಾ ಕೇಂದ್ರಗಳಲ್ಲಿ ಒಂದಾದ ನಾಸಿಕ್‌ ನ ಈರುಳ್ಳಿಯು ಉತ್ತರ ಮತ್ತು ಪೂರ್ವ ಮಾರುಕಟ್ಟೆಗಳನ್ನು ಸಮರ್ಥವಾಗಿ ತಲುಪಬಹುದು, ಇದು ಕೊಳೆಯುವಿಕೆಯನ್ನು ಮತ್ತು ಬೆಲೆಯ ಅಸ್ಥಿರತೆಯನ್ನು ಕಡಿಮೆ ಮಾಡುತ್ತದೆ.

ಬೃಹತ್ ಬಹುಮಾದರಿ ದೃಷ್ಟಿಕೋನದ ಭಾಗ

ಟ್ರಕ್ಸ್-ಆನ್-ಟ್ರೈನ್ಸ್ ಕೇವಲ ಒಂದು ಪ್ರತ್ಯೇಕ ಉಪಕ್ರಮವಲ್ಲ, ಆದರೆ ಇದು ಡೆಡಿಕೇಟೆಡ್ ಫ್ರೈಟ್ ಕಾರಿಡಾರ್ ಕಾರ್ಪೊರೇಶನ್ ಆಫ್ ಇಂಡಿಯಾ ಲಿಮಿಟೆಡ್‌ನ (ಡಿ ಎಫ್‌ ಸಿ ಸಿ ಐ ಎಲ್) ವಿಶಾಲವಾದ ಬಹುಮಾದರಿ ಲಾಜಿಸ್ಟಿಕ್ಸ್ ದೃಷ್ಟಿಕೋನದ ಪ್ರಮುಖ ಅಂಶವಾಗಿದೆ. ಹೆಚ್ಚಿನ ಸಾಮರ್ಥ್ಯದ ಸರಕು ಕಾರಿಡಾರ್‌‌ ಗಳು, ಮಲ್ಟಿಮೋಡಲ್ ಕಾರ್ಗೋ ಟರ್ಮಿನಲ್‌ ಗಳು ಮತ್ತು ಲಾಜಿಸ್ಟಿಕ್ಸ್ ಪಾರ್ಕ್‌ ಗಳ ಜೊತೆಗೆ, ಈ ಸೇವೆಯು ರಸ್ತೆ ಮತ್ತು ರೈಲು ಪರಸ್ಪರ ಪೂರಕವಾಗಿರುವುದನ್ನು ಖಚಿತಪಡಿಸುತ್ತದೆ, ಪ್ರತಿಯೊಂದು ಮಾದರಿಯನ್ನು ಅತ್ಯಂತ ದಕ್ಷ, ವೆಚ್ಚದಾಯಕವಾಗಿಸುತ್ತದೆ ಮತ್ತು ಪರಿಸರವನ್ನು ಸುಸ್ಥಿರವಾಗಿಸುತ್ತದೆ.

ಒಟ್ಟಾರೆಯಾಗಿ, ಟ್ರಕ್ಸ್-ಆನ್-ಟ್ರೈನ್ಸ್ ಭಾರತದ ಸರಕು ಸಾರಿಗೆ ಮಾದರಿಯಲ್ಲಿ ಒಂದು ರಚನಾತ್ಮಕ ಬದಲಾವಣೆಯನ್ನು ಪ್ರತಿನಿಧಿಸುತ್ತದೆ. ನಾವೀನ್ಯತೆ, ವಿದ್ಯುದೀಕೃತ ಮೂಲಸೌಕರ್ಯ, ಸ್ಪರ್ಧಾತ್ಮಕ ಬೆಲೆ, ಕಾರ್ಯಾಚರಣೆಯ ಸ್ಥಿತಿಸ್ಥಾಪಕತ್ವ ಮತ್ತು ಸ್ಪಷ್ಟ ಪರಿಸರ ಹಾಗೂ ಸಾಮಾಜಿಕ ಪ್ರಯೋಜನಗಳನ್ನು ಸಂಯೋಜಿಸುವ ಮೂಲಕ, ಸರಕು ಸಾಗಣೆಯು ಏಕಕಾಲದಲ್ಲಿ ದಕ್ಷ, ವಿಶ್ವಾಸಾರ್ಹ ಮತ್ತು ಜವಾಬ್ದಾರಿಯುತವಾಗಿರಲು ಸಾಧ್ಯ ಎಂಬುದನ್ನು ಡಿ ಎಫ್‌ ಸಿ ಸಿ ಐ ಎಲ್ ತೋರಿಸುತ್ತಿದೆ.

*****