نائب صدر جمہوریہ ہند جناب سی پی رادھا کرشنن نے آج سی ایم آر انسٹی ٹیوٹ آف ٹیکنالوجی (سی ایم آر آئی ٹی) بنگلورو کی سلور جوبلی تقریبات میں مہمان خصوصی کے طور پر شرکت کی اور تکنیکی تعلیم کے شعبے میں نمایاں خدمات کے 25 سال مکمل کرنے پر ادارے کو مبارکباد پیش کی۔

نائب صدر جمہوریہ نے سلور جوبلی کو محض وقت میں ایک سنگ میل نہیں ، بلکہ وژن ، استقامت اور مقصد کا جشن قرار دیا ۔ انہوں نے سی ایم آر انسٹی ٹیوٹ آف ٹیکنالوجی کی تعریف کی کہ وہ اپنے اس بنیادی عقیدے کے لیے پرعزم ہے کہ تکنیکی تعلیم سے نہ صرف ہنر مند پیشہ ور بلکہ ذمہ دار شہری اور اخلاقی رہنما بھی پیدا ہونے چاہئیں ۔ انہوں نے این اے اے سی کے ذریعے انسٹی ٹیوٹ کو اعلی ترین اے + + گریڈ کی منظوری ملنے پر خوشی کا اظہار کیا اور اس موقع پر انکیوبیشن سینٹر اور آڈیٹوریم کا افتتاح کیا ۔

گورنر کے طور پر اپنے تجربے کو یاد کرتے ہوئے نائب صدر نے کہا کہ انہوں نے تعلیمی اداروں کی درجہ بندی اور معیار کو بہتر بنانے پر مسلسل زور دیا ہے ۔ انہوں نے کہا کہ ناقص ادارہ جاتی درجہ بندی اکثر فیکلٹی کے خالی عہدوں کا نتیجہ ہوتی ہے ، اور فیکلٹی کی صلاحیت کو مضبوط کرنا براہ راست تعلیمی معیار ، ساکھ اور عوامی اعتماد کو بڑھاتا ہے ۔
طلباء سے خطاب کرتے ہوئے انہوں نے انہیں مشورہ دیا کہ وہ واضح اہداف طے کریں اور دوسروں کے ساتھ اپنے سفر کا موازنہ کیے بغیر اپنی رفتار سے ان کی طرف بڑھیں ۔ اگرچہ قسمت ہر وقت ہر کسی کے حق میں نہ ہو ، لیکن انہوں نے کہا کہ محنت اور دیانتداری ہمیشہ کامیابی حاصل کرے گی ، خواہ  وہ  فوری طور پر  حاصل نہ ہو  لیکن ایک وقت میں  یقینی طور پر حاصل ہوگی۔

ہندوستان کی اختراع پر مبنی ترقی کا حوالہ دیتے ہوئے نائب صدر جمہوریہ نے کہا کہ ملک اب محض ٹیکنالوجی کو اپنانے والا نہیں رہا بلکہ ٹیکنالوجی کے تخلیق کار کے طور پر مسلسل ابھر رہا ہے ۔ انہوں نے یاد دلایا کہ جب وزیر اعظم جناب نریندر مودی نے کووڈ-19 وبا کے دوران ہندوستان کے سائنسدانوں کو واضح اپیل کی تو ملک نے اس چیلنج کا مقابلہ کیا اور کامیابی کے ساتھ اپنی ویکسین تیار کی ، جس سے ہندوستان کی سائنسی صلاحیت اور خود انحصاری  کا مظاہرہ ہوا ۔ ڈیجیٹل انڈیا ، اسٹارٹ اپ انڈیا اور میک ان انڈیا جیسے اقدامات پر روشنی ڈالتے ہوئے ، انہوں نے اپنے انوویشن اینڈ انکیوبیشن سینٹر کے ذریعے 50 سے زیادہ اسٹارٹ اپس کو پروان چڑھانے کے لیے سی ایم آر آئی ٹی کی تعریف کی ، جو ایک متحرک اور مضبوط کاروباری ماحولیاتی نظام میں تعاون دے  رہا ہے ۔

نائب صدر جمہوریہ نے کہا کہ تعلیمی ادارے نوجوانوں کے لیے رہنما روشنی ہیں اور ملک کے مستقبل کی تشکیل میں ناگزیر کردار ادا کرتے ہیں ۔ انہوں نے کہا کہ وکست بھارت @2047 کا مقصد ایک مضبوط اور طاقتور ملک  کی تعمیر کرنا ہے ، دوسرے ممالک پر شرائط عائد کرنا نہیں ، بلکہ اس بات کو یقینی بنانا ہے کہ کوئی بھی کبھی بھی مادرے وطن  بھارت پر شرائط عائد نہ کرے ۔ انہوں نے اس بات پر زور دیا کہ ملک کی  طاقت کو خود انحصاری ، علم ، اختراع اور اخلاقی اعتماد پر منحصر ہونا چاہیے ۔

قومی تعلیمی پالیسی 2020 کا حوالہ دیتے ہوئے نائب صدر جمہوریہ نے کہا کہ یہ ہندوستان کے نوجوانوں کو اعتماد کے ساتھ مستقبل کے چیلنجوں کا سامنا کرنے کے لیے ایک جامع روڈ میپ فراہم کرتی ہے ، کثیر موضوعاتی تعلیم کی حوصلہ افزائی کرتی ہے  اور ہندوستانی ثقافت ، روایت اور اخلاقیات میں گہری جڑیں رکھتی ہے ۔

نائب صدر جمہوریہ نے طلباء کو ہر قسم کی نشے کے خلاف خبردار کیا اور ان پر زور دیا کہ وہ نشہ آور اشیاء کے استعمال کے خطرات کے خلاف محتاط رہیں ۔ انہوں نے نوجوانوں سے "منشیات کو نہ " کہنے اور اپنے ساتھیوں کو بھی ایسا کرنے کی ترغیب دینے کی اپیل کی ۔

سلور جوبلی کو ایک سنگ میل اور غور و فکر کا لمحہ قرار دیتے ہوئے نائب صدر جمہوریہ نے کہا کہ یہ نہ صرف کامیابیوں کا جشن منانے کا موقع ہے بلکہ معاشرے کی بہتر خدمت کرنے ، ذمہ داری کے ساتھ اختراع کرنے اور بنیادی اقدار کو کھوئے  بغیر اس کی معنویت کو برقرار رکھنے کے عزم کا اعادہ  کرنے کا   بھی موقع ہے ۔ انہوں نے اس اعتماد کا اظہار کیا کہ سی ایم آر انسٹی ٹیوٹ آف ٹیکنالوجی اپنی مضبوط بنیاد ، دور اندیش قیادت اور نوجوان توانائی کے ساتھ وکست بھارت کی طرف ہندوستان کے سفر میں بامعنی تعاون جاری رکھے گا ۔

کرناٹک کے گورنر جناب تھاور چند گہلوت ؛  سی ایم آر گیاندھرا ٹرسٹ کے صدر اور چانسلر ، سی ایم آر یونیورسٹی ، ڈاکٹر سبیتا رامامورتی ؛ چیئرمین ، سی ایم آر گروپ آف انسٹی ٹیوشنز ، ڈاکٹر کے سی رامامورتی اور دیگر معززین اس موقع پر موجود تھے ۔

****

ش ح۔م ش۔ خ م

U. No. 888