ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯವು 19 ಜನವರಿ 2026 ರಂದು ಮುಂಬೈನಲ್ಲಿ ಅಪ್ ಸ್ಟ್ರೀಮ್-ಕೇಂದ್ರಿತ ಸರಣಿ ಕಾರ್ಯಕ್ರಮಗಳನ್ನು ಆಯೋಜಿಸಿತ್ತು.

ದಿನವಿಡೀ ನಡೆದ ಈ ಕಾರ್ಯಕ್ರಮದಲ್ಲಿ ದೇಶೀಯ ಮತ್ತು ಅಂತಾರಾಷ್ಟ್ರೀಯ ಅಪ್ ಸ್ಟ್ರೀಮ್ ನಿರ್ವಾಹಕರು, ಇ&ಪಿ (E&P - ಪರಿಶೋಧನೆ ಮತ್ತು ಉತ್ಪಾದನೆ) ಸೇವಾ ಪೂರೈಕೆದಾರರು, ಜಾಗತಿಕ ಸಲಹಾ ಸಂಸ್ಥೆಗಳು, ಪ್ರಮುಖ ಸಾರ್ವಜನಿಕ ಹಾಗೂ ಖಾಸಗಿ ವಲಯದ ಹಣಕಾಸು ಸಂಸ್ಥೆಗಳು, ವಿಮಾದಾರರು, ಶಿಕ್ಷಣ ತಜ್ಞರು ಮತ್ತು ಉದ್ಯಮದ ಪರಿಣಿತರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿದ್ದರು. ಈ ವೈವಿಧ್ಯಮಯ ಭಾಗವಹಿಸುವಿಕೆಯು ಭಾರತದ ಅಪ್ಸ್ಟ್ರೀಮ್ ಸುಧಾರಣಾ ಕಾರ್ಯಸೂಚಿ ಮತ್ತು ಹೂಡಿಕೆಯ ಅವಕಾಶಗಳ ಮೇಲೆ ಈ ಇಡೀ ವಲಯದಲ್ಲಿ ಮೂಡಿರುವ ಹೆಚ್ಚುತ್ತಿರುವ ಆಸಕ್ತಿಯನ್ನು ಪ್ರತಿಬಿಂಬಿಸಿತು.

ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವರಾದ ಶ್ರೀ ಹರ್ ದೀಪ್ ಸಿಂಗ್ ಪುರಿ ಅವರು ತಮ್ಮ ವರ್ಚುವಲ್ ಭಾಷಣದಲ್ಲಿ, ಇತ್ತೀಚಿನ ಶಾಸಕಾಂಗ, ನಿಯಂತ್ರಕ ಮತ್ತು ನೀತಿ ಸುಧಾರಣೆಗಳು ಭಾರತದ ಅಪ್ ಸ್ಟ್ರೀಮ್ ವಲಯದ ಪ್ರಗತಿಪರ ರೂಪಾಂತರದಲ್ಲಿ ಒಂದು ಮೈಲಿಗಲ್ಲಾಗಿವೆ ಎಂದು ತಿಳಿಸಿದರು. ಈ ಸುಧಾರಣೆಗಳು ಮತ್ತು ದತ್ತಾಂಶ ಆಧಾರಿತ ಪರಿಶೋಧನಾ ಕ್ರಮಗಳು ಭಾರತದ ಕಡಲಾಚೆಯ ಮತ್ತು ಗಡಿ ಪ್ರದೇಶಗಳಲ್ಲಿ ವ್ಯಾಪಕವಾದ ಹೂಡಿಕೆಯ ಅವಕಾಶಗಳನ್ನು ಮುಕ್ತಗೊಳಿಸಿವೆ ಎಂದು ಅವರು ಒತ್ತಿ ಹೇಳಿದರು. ಅಲ್ಲದೆ, ಸುಸ್ಥಿರ ದೇಶೀಯ ಮತ್ತು ಅಂತಾರಾಷ್ಟ್ರೀಯ ಹೂಡಿಕೆಯನ್ನು ಆಕರ್ಷಿಸಲು ಸ್ಥಿರವಾದ, ಪಾರದರ್ಶಕ ಮತ್ತು ಜಾಗತಿಕವಾಗಿ ಸ್ಪರ್ಧಾತ್ಮಕವಾದ ಚೌಕಟ್ಟನ್ನು ಒದಗಿಸುವ ಸರ್ಕಾರದ ಬದ್ಧತೆಯನ್ನು ಅವರು ಪುನರುಚ್ಚರಿಸಿದರು.

ಕಾರ್ಯಕ್ರಮದ ಪ್ರಮುಖ ಅಂಶಗಳು

ಈ ಕಾರ್ಯಕ್ರಮವು ಈ ಕೆಳಗಿನವುಗಳನ್ನು ಒಳಗೊಂಡಿತ್ತು:

a. ಭಾರತದ ಇ&ಪಿ (E&P) ಬೆಳವಣಿಗೆಗೆ ಹಣಕಾಸು ಒದಗಿಸುವ ಕುರಿತಾದ ಕಾರ್ಯಾಗಾರ.

b. ತಿದ್ದುಪಡಿ ಮಾಡಲಾದ ತೈಲಕ್ಷೇತ್ರಗಳ (ನಿಯಂತ್ರಣ ಮತ್ತು ಅಭಿವೃದ್ಧಿ) ಕಾಯ್ದೆ, ಪರಿಷ್ಕೃತ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ನಿಯಮಗಳು ಹಾಗೂ ಮಾದರಿ ಆದಾಯ ಹಂಚಿಕೆ ಒಪ್ಪಂದದ (MRSC) ಕುರಿತಾದ ಅಧಿವೇಶನ.

c. ಮುಂಬರುವ ಅಪ್ ಸ್ಟ್ರೀಮ್ ಬಿಡ್ ಸುತ್ತುಗಳಿಗಾಗಿ ಹರಾಜು ಪ್ರಕ್ರಿಯೆ ಪ್ರಚಾರ ಕಾರ್ಯಕ್ರಮ.

ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ (MoPNG) ಮತ್ತು ಹೈಡ್ರೋಕಾರ್ಬನ್ ಗಳ ಮಹಾನಿರ್ದೇಶನಾಲಯದ (DGH) ಹಿರಿಯ ಅಧಿಕಾರಿಗಳು ಎಲ್ಲಾ ಅಧಿವೇಶನಗಳಲ್ಲಿ ಭಾಗವಹಿಸಿದವರೊಂದಿಗೆ ಸುದೀರ್ಘವಾಗಿ ಸಂವಾದ ನಡೆಸಿದರು.

a. ಭಾರತದ ಇ&ಪಿ (E&P) ಬೆಳವಣಿಗೆಗೆ ಹಣಕಾಸು ಒದಗಿಸುವಿಕೆ

ಭಾರತದ ಇ&ಪಿ ಬೆಳವಣಿಗೆಗೆ ಹಣಕಾಸು ಒದಗಿಸುವಿಕೆ” ಕುರಿತಾದ ಕಾರ್ಯಾಗಾರವು, 'ಸಮುದ್ರ ಮಂಥನ'ದಂತಹ ಉಪಕ್ರಮಗಳನ್ನು ಒಳಗೊಂಡಂತೆ ಸರ್ಕಾರದ ವಿಸ್ತರಿತ ಪರಿಶೋಧನೆ ಮತ್ತು ಉತ್ಪಾದನಾ ಕಾರ್ಯಕ್ರಮದ ಅಡಿಯಲ್ಲಿ ಉದ್ದೇಶಿಸಲಾದ ಅಪ್ಸ್ಟ್ರೀಮ್ ಹೂಡಿಕೆಯ ಪ್ರಮಾಣ, ಆಳ ಮತ್ತು ನಿರಂತರತೆಯನ್ನು ಬೆಂಬಲಿಸಲು ಭಾರತದ ಹಣಕಾಸು ಪರಿಸರ ವ್ಯವಸ್ಥೆಯ ಸಿದ್ಧತೆಯನ್ನು ಪರಿಶೀಲಿಸಿತು.

ಈ ಅಧಿವೇಶನದಲ್ಲಿ S&P ಗ್ಲೋಬಲ್, ಡೆಲಾಯ್ಟ್, ಎ.ಟಿ. ಕಿರ್ನಿ ಮತ್ತು ಇವೈ (EY) ಸೇರಿದಂತೆ ಜಾಗತಿಕ ಸಲಹಾ ಸಂಸ್ಥೆಗಳು ಸಕ್ರಿಯವಾಗಿ ಭಾಗವಹಿಸಿದ್ದವು. ಈ ಸಂಸ್ಥೆಗಳು ಅಪ್ಸ್ಟ್ರೀಮ್ ಹಣಕಾಸು ಮಾದರಿಗಳು, ಅಪಾಯದ ಹಂಚಿಕೆ ಮತ್ತು ಬಂಡವಾಳ ಕ್ರೋಡೀಕರಣದ ಕುರಿತು ಅಂತಾರಾಷ್ಟ್ರೀಯ ದೃಷ್ಟಿಕೋನಗಳನ್ನು ಹಂಚಿಕೊಂಡವು.

ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ, ನ್ಯೂ ಇಂಡಿಯಾ ಅಶ್ಯೂರೆನ್ಸ್ ಮತ್ತು ಬಜಾಜ್ ಅಲಿಯಾನ್ಸ್ ಸೇರಿದಂತೆ ಹಣಕಾಸು ಸಂಸ್ಥೆಗಳು ಮತ್ತು ವಿಮಾದಾರರು ಸಹ ತಮ್ಮ ದೃಷ್ಟಿಕೋನಗಳನ್ನು ಹಂಚಿಕೊಂಡರು. ಇವು ಅಪಾಯದ ಮೌಲ್ಯಮಾಪನ ಚೌಕಟ್ಟುಗಳು, ಎಕ್ಸ್ ಪೋಸರ್ ಪರಿಗಣನೆಗಳು, ಬ್ಯಾಂಕ್ ಗ್ಯಾರಂಟಿ ರಚನೆಗಳು ಮತ್ತು ವಿಮೆ-ಆಧಾರಿತ ಶ್ಯೂರಿಟಿ ಬಾಂಡ್ಗಳಂತಹ ಉದಯೋನ್ಮುಖ ಅಪಾಯ-ಶಮನಕಾರಿ ಸಾಧನಗಳನ್ನು ಒಳಗೊಂಡಿದ್ದವು.

ಪರಿಶೋಧನೆ ಮತ್ತು ಅಭಿವೃದ್ಧಿ ಚಟುವಟಿಕೆಗಳು ವಿಸ್ತರಣೆಯಾಗುತ್ತಿದ್ದಂತೆ, ಬಂಡವಾಳದ ಅವಶ್ಯಕತೆಗಳು ತೀವ್ರವಾಗಿ ಹೆಚ್ಚಾಗುವ ನಿರೀಕ್ಷೆಯಿದೆ ಮತ್ತು ಆರಂಭಿಕ ಹಂತದಲ್ಲೇ ಹೆಚ್ಚಿನ ಹೂಡಿಕೆಯ ಅಗತ್ಯವಿರುತ್ತದೆ  ಎಂದು ಈ ಸಂದರ್ಭದಲ್ಲಿ ಒತ್ತಿಹೇಳಲಾಯಿತು. ಇದು ಅಪ್ಸ್ಟ್ರೀಮ್ ಅಪಾಯದ ಪ್ರೊಫೈಲ್ ಗಳು ಮತ್ತು ಹೂಡಿಕೆಯ ಚಕ್ರಗಳಿಗೆ ಅನುಗುಣವಾದ ಹಣಕಾಸು ರಚನೆಗಳನ್ನು ಅನಿವಾರ್ಯವಾಗಿಸುತ್ತದೆ ಎಂದು ತಿಳಿಸಲಾಯಿತು.

ಚರ್ಚಿಸಲಾದ ವಿಷಯಗಳು:

• ಅಪ್ ಸ್ಟ್ರೀಮ್ ಯೋಜನೆಗಳಲ್ಲಿನ ಪ್ರಸ್ತುತ ಹಣಕಾಸು ಪದ್ಧತಿಗಳು.
• ಬ್ಯಾಲೆನ್ಸ್-ಶೀಟ್ ಆಧಾರಿತ ಸಾಲ ನೀಡಿಕೆಯಿಂದ ಉಂಟಾಗುವ ನಿರ್ಬಂಧಗಳು.
• ಬಂಡವಾಳದ ದಕ್ಷತೆಯ ಮೇಲೆ ಬ್ಯಾಂಕ್ ಗ್ಯಾರಂಟಿ ಅಗತ್ಯತೆಗಳ ಪ್ರಭಾವ.
• ಇತ್ತೀಚಿನ ನೀತಿ ಕ್ರಮಗಳಿಂದ ಸಾಧ್ಯವಾದ ವಿಮೆ-ಆಧಾರಿತ ಶ್ಯೂರಿಟಿ ಬಾಂಡ್ ಗಳು ಸೇರಿದಂತೆ, ಉದಯೋನ್ಮುಖ ಅಪಾಯ-ಶಮನಕಾರಿ ಮತ್ತು ಹಣಕಾಸು ಸಾಧನಗಳು.

ಬ್ಯಾಂಕುಗಳು ಮತ್ತು ವಿಮಾದಾರರು ಸೇರಿದಂತೆ ಹಣಕಾಸು ಸಂಸ್ಥೆಗಳು ಮತ್ತು ಸಾಲದಾತರು ಅಪಾಯದ ಮೌಲ್ಯಮಾಪನ ಚೌಕಟ್ಟುಗಳು, ಎಕ್ಸ್ ಪೋಸರ್ ನಿಯಮಗಳು ಮತ್ತು ಸಾಂಸ್ಥಿಕ ಪರಿಗಣನೆಗಳ ಕುರಿತು ತಮ್ಮ ದೃಷ್ಟಿಕೋನಗಳನ್ನು ಹಂಚಿಕೊಂಡರು. ಬಂಡವಾಳದ ಹೆಚ್ಚಿನ ಭಾಗವಹಿಸುವಿಕೆಯನ್ನು ಸುಲಭಗೊಳಿಸಲು ಅಪಾಯ-ಹಂಚಿಕೆ ಕಾರ್ಯವಿಧಾನಗಳು ಮತ್ತು ನೀತಿ ಸ್ಪಷ್ಟತೆಯ ಪ್ರಾಮುಖ್ಯತೆಯನ್ನು ಅವರು ಈ ಸಂದರ್ಭದಲ್ಲಿ ಒತ್ತಿಹೇಳಿದರು.

ತಮ್ಮ ದಿಕ್ಸೂಚಿ ಭಾಷಣದಲ್ಲಿ, ಶ್ರೀ ನೀರಜ್ ಮಿತ್ತಲ್ (ಕಾರ್ಯದರ್ಶಿ, MoPNG) ಅವರು, ಅಪ್ಸ್ಟ್ರೀಮ್ ಕಾರ್ಯಗತಗೊಳಿಸುವಿಕೆಯಲ್ಲಿ ಬಂಡವಾಳವು ಸಕಾಲದಲ್ಲಿ ಮತ್ತು ಸಮರ್ಪಕವಾಗಿ ಲಭ್ಯವಿರುವುದು ನಿರ್ಣಾಯಕ ಅಂಶವಾಗಿದೆ ಎಂದು ಒತ್ತಿ ಹೇಳಿದರು. ಭಾರತದ ಅಪ್ಸ್ಟ್ರೀಮ್ ಮಹತ್ವಾಕಾಂಕ್ಷೆಗಳಿಗೆ ಅನುಗುಣವಾಗಿ ಹಣಕಾಸು ಚೌಕಟ್ಟುಗಳನ್ನು ಬಲಪಡಿಸಲು ನೀತಿ ನಿರೂಪಕರು, ನಿರ್ವಾಹಕರು ಮತ್ತು ಹಣಕಾಸುದಾರರ ನಡುವೆ ನಿರಂತರ ತೊಡಗಿಸಿಕೊಳ್ಳುವಿಕೆಗೆ ಅವರು ಕರೆ ನೀಡಿದರು.

b. ತಿದ್ದುಪಡಿ ಮಾಡಲಾದ ORD ಕಾಯ್ದೆ, PNG ನಿಯಮಗಳು ಮತ್ತು ಮಾದರಿ ಆದಾಯ ಹಂಚಿಕೆ ಒಪ್ಪಂದ

ತಿದ್ದುಪಡಿ ಮಾಡಲಾದ ತೈಲಕ್ಷೇತ್ರಗಳ (ನಿಯಂತ್ರಣ ಮತ್ತು ಅಭಿವೃದ್ಧಿ) ಕಾಯ್ದೆ (ORD Act), ಪರಿಷ್ಕೃತ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ನಿಯಮಗಳು ಮತ್ತು ನವೀಕರಿಸಿದ ಮಾದರಿ ಆದಾಯ ಹಂಚಿಕೆ ಒಪ್ಪಂದವನ್ನು (MRSC) ನಿರ್ವಾಹಕರಿಗೆ ಪರಿಚಯಿಸಲು ಒಂದು ವಿಶೇಷ ಅಧಿವೇಶನವನ್ನು ನಡೆಸಲಾಯಿತು.

ಸ್ಥಿರವಾದ, ಊಹಿಸಬಹುದಾದ ಮತ್ತು ಹೂಡಿಕೆದಾರ ಸ್ನೇಹಿ ಅಪ್ಸ್ಟ್ರೀಮ್ ನಿಯಂತ್ರಕ ಚೌಕಟ್ಟನ್ನು ಸ್ಥಾಪಿಸಲು ನಡೆಸಿದ ಒಂದು ದಶಕದ ಸುದೀರ್ಘ ಪ್ರಯತ್ನವನ್ನು ಈ ಇತ್ತೀಚಿನ ಸುಧಾರಣೆಗಳು ಪೂರ್ಣಗೊಳಿಸುತ್ತವೆ ಎಂದು MoPNG ಎತ್ತಿ ತೋರಿಸಿತು. ಇದು ನಿಯಮಗಳ ವ್ಯಾಖ್ಯಾನದಲ್ಲಿನ ಅಸ್ಪಷ್ಟತೆಗಳನ್ನು ಕಡಿಮೆ ಮಾಡುವ ಮತ್ತು ಪರಿಶೋಧನಾ ಚಟುವಟಿಕೆಗಳು ವಿಸ್ತರಣೆಯಾಗುತ್ತಿರುವಾಗ ದೀರ್ಘಾವಧಿಯ ಯೋಜನೆಯನ್ನು ಬೆಂಬಲಿಸುವ ಗುರಿಯನ್ನು ಹೊಂದಿದೆ.

ನವೀಕರಿಸಿದ MRSC ಯು ಶಾಸನಾತ್ಮಕ ಮತ್ತು ನಿಯಂತ್ರಕ ಸುಧಾರಣೆಗಳ ಮೂಲಕ ತರಲಾದ ಬದಲಾವಣೆಗಳನ್ನು ಹೇಗೆ ಕಾರ್ಯಗತಗೊಳಿಸುತ್ತದೆ ಎಂಬುದನ್ನು DGH ವಿವರಿಸಿತು. ಇದು ಸರ್ಕಾರದ ನೀತಿ ಉದ್ದೇಶ ಮತ್ತು ಒಪ್ಪಂದದ ಅನುಷ್ಠಾನದ ನಡುವೆ ಸುಸಂಬದ್ಧತೆಯನ್ನು ಖಚಿತಪಡಿಸುತ್ತದೆ.

ಉದ್ಯಮದ ಭಾಗವಹಿಸುವವರಿಂದ ವ್ಯಕ್ತವಾದ ರಚನಾತ್ಮಕ ಮತ್ತು ಉತ್ತೇಜನಕಾರಿ ಪ್ರತಿಕ್ರಿಯೆಯನ್ನು MoPNG ಕಾರ್ಯದರ್ಶಿಗಳು ಗಮನಿಸಿದರು. ಮುಂದಿನ ದಿನಗಳಲ್ಲಿ ಇವುಗಳನ್ನು ದೊಡ್ಡ ಪ್ರಮಾಣದಲ್ಲಿ ಪರಿಣಾಮಕಾರಿಯಾಗಿ ಮತ್ತು ಸ್ಥಿರವಾಗಿ ಅನುಷ್ಠಾನಗೊಳಿಸುವುದರ ಮೇಲೆ ಗಮನ ಹರಿಸಲಾಗುವುದು, ಇದರಿಂದಾಗಿ ನೀತಿಯ ನಿಶ್ಚಿತತೆಯು ಸ್ಪಷ್ಟವಾದ (Tangible) ಫಲಿತಾಂಶಗಳಾಗಿ ಪರಿವರ್ತನೆಗೊಳ್ಳುತ್ತದೆ ಎಂದು ಅವರು ಒತ್ತಿ ಹೇಳಿದರು.

c. ಹೊಸ ಅಪ್ಸ್ಟ್ರೀಮ್ ಬಿಡ್ ಸುತ್ತುಗಳು – ಸುಧಾರಣೆಯನ್ನು ಅವಕಾಶವಾಗಿ ಪರಿವರ್ತಿಸುವುದು

ಬಿಡ್ ಪ್ರಚಾರ ಕಾರ್ಯಕ್ರಮವು ಇತ್ತೀಚಿನ ಸುಧಾರಣೆಗಳು ಮತ್ತು ದತ್ತಾಂಶ-ಚಾಲಿತ ಪರಿಶೋಧನಾ ಉಪಕ್ರಮಗಳಿಂದ ಹೊರಹೊಮ್ಮುತ್ತಿರುವ ಹೂಡಿಕೆಯ ಅವಕಾಶಗಳನ್ನು ಪ್ರದರ್ಶಿಸಿತು. ಇದು ಭಾರತದ ಅಪ್ಸ್ಟ್ರೀಮ್ ವಲಯದಲ್ಲಿ ವ್ಯಾಪಕವಾದ ದೇಶೀಯ ಮತ್ತು ಜಾಗತಿಕ ಭಾಗವಹಿಸುವಿಕೆಯನ್ನು ಉತ್ತೇಜಿಸುವ ಗುರಿಯನ್ನು ಹೊಂದಿತ್ತು.

ಈ ಅಧಿವೇಶನವು ಇವುಗಳು ಹೇಗೆ ಎಂಬುದನ್ನು ಎತ್ತಿ ತೋರಿಸಿತು:

• ನಿಯಂತ್ರಕ ವಿಕಸನ 
• ಸುಧಾರಿತ ದತ್ತಾಂಶ ಲಭ್ಯತೆ
• ಸರ್ಕಾರಿ ನೇತೃತ್ವದ ಪರಿಶೋಧನಾ ಉಪಕ್ರಮಗಳು
• ದೇಶೀಯ ಸಾಮರ್ಥ್ಯಗಳ ಬಲವರ್ಧನೆ

ಇವೆಲ್ಲವೂ ಒಟ್ಟಾಗಿ ಭಾರತದ ಅಪ್ ಸ್ಟ್ರೀಮ್ ಹೂಡಿಕೆಯ ಭೂದೃಶ್ಯವನ್ನು ಮರುರೂಪಿಸುತ್ತಿವೆ.

ಹೈಡ್ರೋಕಾರ್ಬನ್ಗಳ ಮಹಾನಿರ್ದೇಶನಾಲಯದ (DGH) ಮಹಾನಿರ್ದೇಶಕರಾದ ಶ್ರೀ ಶ್ರೀಕಾಂತ್ ನಾಗುಲಪಲ್ಲಿ ಅವರು ಮುಂಬರುವ ಬಿಡ್ ಸುತ್ತುಗಳ ವಿವರಗಳನ್ನು ಪ್ರಸ್ತುತಪಡಿಸಿದರು:

• OALP ಬಿಡ್ ಸುತ್ತು X: 1,82,589 ಚದರ ಕಿ.ಮೀ ವಿಸ್ತೀರ್ಣವನ್ನು ಒಳಗೊಂಡಿರುವ 25 ಪರಿಶೋಧನಾ ಬ್ಲಾಕ್ಗಳು. ಇದರಲ್ಲಿ ಶೇ. 91 ರಷ್ಟು ಭಾಗ ಕಡಲಾಚೆಯ (Offshore) ಪ್ರದೇಶವಾಗಿದೆ.
• DSF ಬಿಡ್ ಸುತ್ತು IV: 55 ಆವಿಷ್ಕಾರಗಳನ್ನು ಒಳಗೊಂಡಿರುವ 9 ಗುತ್ತಿಗೆ ಪ್ರದೇಶಗಳು. ಇವು ಸುಮಾರು 200 MMTOE ನಷ್ಟು '2P' ಮೀಸಲು ಸಂಗ್ರಹವನ್ನು ಹೊಂದಿವೆ.
• CBM ಬಿಡ್ ಸುತ್ತುಗಳು 2025–26: ಒಟ್ಟು 16 ಬ್ಲಾಕ್ಗಳು. ಇವುಗಳಲ್ಲಿ 2025 ರಲ್ಲಿ 74 BCM ಮತ್ತು 2026 ರಲ್ಲಿ 200 BCM ನಷ್ಟು ಅಂದಾಜು ಅನಿಲ ಸಂಗ್ರಹವನ್ನು ನಿರೀಕ್ಷಿಸಲಾಗಿದೆ.

ಹೂಸ್ಟನ್ ವಿಶ್ವವಿದ್ಯಾನಿಲಯವು ಜಾಗತಿಕ ಸಾದೃಶ್ಯಗಳು ಮತ್ತು ಜಲಾನಯನ ಪ್ರದೇಶಗಳ ಮೌಲ್ಯಮಾಪನ ವಿಧಾನಗಳನ್ನು ಬಳಸಿಕೊಂಡು, ಭಾರತದ ಪೂರ್ವ ಕರಾವಳಿಯ ಜಲಾನಯನ ಪ್ರದೇಶಗಳಲ್ಲಿರುವ ಹೈಡ್ರೋಕಾರ್ಬನ್ ಸಾಧ್ಯತೆಗಳ ಕುರಿತು ಪ್ರಮುಖ ಒಳನೋಟಗಳನ್ನು ಪ್ರಸ್ತುತಪಡಿಸಿತು.

ಶ್ಲಂಬರ್ಗರ್ ಸಂಸ್ಥೆಯು ಡಿಜಿಟಲ್ ಪರಿಹಾರಗಳ ಮೂಲಕ ಸಾಧ್ಯವಾಗುವ ಜಲಾನಯನ ಪ್ರದೇಶಗಳ ಮಟ್ಟದ ಹೂಡಿಕೆಯ ಅವಕಾಶಗಳ ಕುರಿತು ಪ್ರಸ್ತುತಿ ನೀಡಿತು. ಸುಧಾರಿತ ಭೂಗರ್ಭದ ಚಿತ್ರಣ, ದತ್ತಾಂಶ ವಿಶ್ಲೇಷಣೆ ಮತ್ತು ಸಂಯೋಜಿತ ಡಿಜಿಟಲ್ ಕಾರ್ಯಪ್ರವಾಹಗಳು, ವಿಶೇಷವಾಗಿ ಗಡಿ ಪ್ರದೇಶಗಳಲ್ಲಿ ಹಾಗೂ ಕಡಿಮೆ ಪರಿಶೋಧನೆಗೆ ಒಳಪಟ್ಟ ಜಲಾನಯನ ಪ್ರದೇಶಗಳಲ್ಲಿ ಹೈಡ್ರೋಕಾರ್ಬನ್ ದೊರೆಯುವ ಸಾಧ್ಯತೆಯ ತಿಳುವಳಿಕೆಯನ್ನು ಹೇಗೆ ಹೆಚ್ಚಿಸಬಹುದು ಎಂಬುದನ್ನು ಇದು ಪ್ರದರ್ಶಿಸಿತು.

ಈ ಅಧಿವೇಶನವು ಭಾರತದ ಹೈಡ್ರೋಕಾರ್ಬನ್ ವಲಯದ ಕಾರ್ಯತಂತ್ರದ ಹೂಡಿಕೆಯ ಅಂಶಗಳನ್ನು ಈ ಕೆಳಗಿನಂತೆ ವಿವರಿಸಿತು:

• 3.9 ಶತಕೋಟಿ ಟನ್ ತೈಲಕ್ಕೆ ಸಮಾನವಾದ ಇನ್ನೂ ಪತ್ತೆಯಾಗದ ಬೃಹತ್ ಸಂಪನ್ಮೂಲ ಸಾಮರ್ಥ್ಯ.
• ಸಂಪೂರ್ಣ ಮಾರುಕಟ್ಟೆ ಮತ್ತು ಬೆಲೆ ನಿಗದಿಯ ಸ್ವಾತಂತ್ರ್ಯ ಹೊಂದಿರುವ ದೊಡ್ಡ ಹಾಗೂ ಬೆಳೆಯುತ್ತಿರುವ ದೇಶೀಯ ಮಾರುಕಟ್ಟೆ.
• ಆದಾಯ ಹಂಚಿಕೆ ಒಪ್ಪಂದಗಳ ಅಡಿಯಲ್ಲಿ ತುಲನಾತ್ಮಕವಾಗಿ ಕಡಿಮೆ ಇರುವ ನಿಯಂತ್ರಕ ಹೊರೆ.
• ರಾಷ್ಟ್ರೀಯ ದತ್ತಾಂಶ ಭಂಡಾರದ ಮೂಲಕ ಉತ್ತಮ ಗುಣಮಟ್ಟದ ಇ&ಪಿ (E&P) ದತ್ತಾಂಶದ ಲಭ್ಯತೆ.
• ದೇಶೀಯ ಉತ್ಪಾದನೆ ಮತ್ತು ಇಂಧನ ಭದ್ರತೆಯನ್ನು ಹೆಚ್ಚಿಸುವಲ್ಲಿ ನೀತಿಗಳ ಮೇಲೆ ಬಲವಾದ ಗಮನ.

*****