મંગળવારથી લેહમાં શરૂ થઈ રહેલી 2026ની ખેલો ઇન્ડિયા વિન્ટર ગેમ્સના લદ્દાખ લેગમાં એથ્લેટ્સ, કોચ અને ટેકનિકલ અધિકારીઓ સહિત 1000થી વધુ પુરુષો અને મહિલાઓ ભાગ લેશે. નવાંગ દોરજાન સ્તોબદાન (NDS) સ્ટેડિયમ, આર્મી રિંક અને થીજી ગયેલું ગુપુખનું તળાવ 26 જાન્યુઆરીએ ગેમ્સ સમાપ્ત થાય ત્યાં સુધી આકર્ષણના કેન્દ્રો રહેશે. KIWG 2026 નું ઉદઘાટન મંગળવારે બપોરે યોજાશે.

બે આઇસ સ્પોર્ટ્સ – સ્કેટિંગ અને હોકીમાં 472 એથ્લેટ્સ ભાગ લેશે. આ વર્ષે નવું આકર્ષણ ફિગર સ્કેટિંગનો સમાવેશ છે, જે એક ઓલિમ્પિક ઇવેન્ટ છે. ગયા વર્ષે KIWG ના લદ્દાખ લેગમાં, યજમાન લદ્દાખ 13 ગોલ્ડ મેડલમાંથી ચાર ગોલ્ડ મેડલ સાથે મેડલ ટેલીમાં ટોચ પર રહ્યું હતું. તમિલનાડુ અને મહારાષ્ટ્ર બીજા અને ત્રીજા સ્થાને રહ્યા હતા

https://www.instagram.com/reel/DTsHbANE0jb/?igsh=MTZrbTA1YWNyYmxvYg==

ખેલો ઇન્ડિયા વિન્ટર ગેમ્સ 2026 ના પ્રથમ તબક્કાનું આયોજન સ્પોર્ટ્સ ઓથોરિટી ઓફ ઇન્ડિયાની દેખરેખ હેઠળ લદ્દાખ કેન્દ્રશાસિત પ્રદેશના યુવા સેવા અને રમતગમત વિભાગ દ્વારા કરવામાં આવ્યું છે. ગેમ્સના સંચાલન માટેની ટેકનિકલ કુશળતા આઇસ સ્પોર્ટ્સનું સંચાલન કરતી નેશનલ સ્પોર્ટ્સ પ્રમોશનલ બોડીઝ/ફેડરેશન દ્વારા પૂરી પાડવામાં આવે છે.

https://www.instagram.com/reel/DTr0Ut2gaZr/?igsh=MTM3MHo5MGV5MjFmYw==

KIWG 2026 એ આ વર્ષે ખેલો ઇન્ડિયા કેલેન્ડરની બીજી ઇવેન્ટ છે. પ્રથમ ઇવેન્ટ 5-10 જાન્યુઆરી દરમિયાન દીવમાં યોજાયેલી ખેલો ઇન્ડિયા બીચ ગેમ્સ હતી. તમામ એથ્લેટ્સ અને તેમના સપોર્ટ સ્ટાફ માટે, લેહ ગેમ્સ એ જોશે કે એથ્લેટ્સ માઈનસ ડિગ્રી તાપમાન અને ઓછા ઓક્સિજન જેવી પડકારરૂપ ઊંચાઈવાળી આબોહવાની પરિસ્થિતિઓમાં કેવું પ્રદર્શન કરે છે.

“તાજેતરમાં દીવમાં સંપન્ન થયેલી ખેલો ઇન્ડિયા બીચ ગેમ્સ 2026 સહિત, શરૂઆતના મહિનામાં બે ખેલો ઇન્ડિયા ગેમ્સના આયોજન સાથે ભારતીય રમતગમત માટે વર્ષની શરૂઆત મજબૂત ગતિ સાથે થઈ છે. ખેલો ઇન્ડિયા વિન્ટર ગેમ્સ હવે એક બીજું મહત્વનું પરિમાણ ઉમેરે છે, જે એથ્લેટ્સ માટે વિન્ટર સ્પોર્ટ્સમાં સ્પર્ધા કરવા અને ઉત્કૃષ્ટ દેખાવ કરવા માટેના માર્ગો બનાવે છે, આ એક એવું ક્ષેત્ર છે જેમાં ઐતિહાસિક રીતે ભારતમાં મર્યાદિત સ્પર્ધાત્મક એક્સપોઝર જોવા મળ્યું છે. મોદી સરકારના સતત અને કેન્દ્રિત પ્રયાસોને કારણે જ ભારત આજે રાષ્ટ્રીય સ્તરની, મલ્ટી-સ્પોર્ટ વિન્ટર ગેમ્સનું આયોજન કરે છે, જે દેશના ઘરેલું સ્પર્ધાના માળખામાં વિન્ટર સ્પોર્ટ્સને મજબૂત રીતે સ્થાપિત કરે છે,” તેમ માનનીય કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાએ જણાવ્યું હતું.

KIWG લદ્દાખમાં આઇસ હોકી મુખ્ય આકર્ષણ રહેવા છતાં, ફિગર સ્કેટિંગને આવકારદાયક ઉમેરો તરીકે જોવામાં આવે છે. ગયા વર્ષે ફેબ્રુઆરીમાં ચીનના હાર્બિનમાં યોજાયેલી એશિયન વિન્ટર ગેમ્સમાં ભારતે 23 આઇસ સ્કેટર અને કુલ 59 એથ્લેટ્સ મોકલ્યા હતા, જે ગેમ્સ માટે અત્યાર સુધીની સૌથી મોટી ટીમ હતી. યુએસ સ્થિત તારા પ્રસાદે એકંદરે આઠમું સ્થાન મેળવ્યું હતું, જે એશિયન ગેમ્સમાં ભારતનું શ્રેષ્ઠ ફિગર સ્કેટિંગ ફિનિશ છે. મંજેશ તિવારી પુરુષોમાં 15મા ક્રમે રહ્યો હતો.

“હાર્બિનમાં, અમે ભલે મેડલ જીત્યા ન હોય પણ અમે બતાવ્યું છે કે અમે સ્પર્ધા કરી શકીએ છીએ. વધુ સ્પર્ધા એટલે વધુ તકો અને તેથી જ ખેલો ઇન્ડિયા વિન્ટર ગેમ્સની આ આવૃત્તિ એક સીમાચિહ્નરૂપ છે,” તેમ લદ્દાખના વરિષ્ઠ રાષ્ટ્રીય કોચ મોહમ્મદ અબ્બાસ નોરડાકે જણાવ્યું હતું.

ડૉ. માંડવિયાએ ઉમેર્યું હતું કે, “આગામી મહિનાઓમાં, ખેલો ઇન્ડિયા બહુવિધ ફોર્મેટ સાથે વિસ્તરણ કરવાનું ચાલુ રાખશે, જેની શરૂઆત આવતા મહિને ખેલો ઇન્ડિયા ટ્રાઇબલ ગેમ્સથી થશે અને ત્યારબાદ દેશભરમાં અન્ય વેરિઅન્ટ્સ આવશે. ખેલો ઇન્ડિયા કેલેન્ડર હવે આખરી ઓપ આપીને સંસ્થાગત બનાવવામાં આવ્યું છે, અને આ નિશ્ચિત સ્પર્ધા ચક્ર એક ગેમ ચેન્જર સાબિત થશે, જે ઘરેલું રમતગમતના ઇકોસિસ્ટમને મજબૂત બનાવશે અને લાયક એથ્લેટ્સને સ્પર્ધા કરવા, પ્રગતિ કરવા અને શ્રેષ્ઠતા પ્રાપ્ત કરવા માટે ઘણી તકો પૂરી પાડશે.”

ભાગ લેનારા 21 રાજ્યો અને કેન્દ્રશાસિત પ્રદેશોમાં હરિયાણા (62), હિમાચલ પ્રદેશ (55) અને યજમાન લદ્દાખ (52) એથ્લેટ્સની દ્રષ્ટિએ સૌથી મોટું પ્રતિનિધિત્વ ધરાવે છે. KIWG 2026 લદ્દાખ લેગમાં 17 ગોલ્ડ મેડલ દાવ પર હશે. જેમાંથી 15 આઇસ સ્કેટિંગ માટે હશે.

KIWG વિશે વધુ માટે: કૃપા કરીને www.Winter.kheloindia.gov.in પર ક્લિક કરો.

SM/BS/GP/JD