آج صبح ملک بھر میں فٹ انڈیا سنڈیز آن سائیکل کا 57واں ایڈیشن منعقد ہوا، جس کی قیادت کابینہ وزیر برائے کھیل ڈاکٹر منسکھ مانڈویا نے راجکوٹ کے نزدیک گونڈل میں کی جبکہ کابینہ وزیر جناب جی کشن ریڈی نے حیدرآباد میں تقریب کا افتتاح کیا، جس میں ایک ہزار سے زائد شرکاء نے حصہ لیا۔ گونڈل میں سنڈیز آن سائیکل ایونٹ میں 250 سائیکل سواروں نے بھرپور حصہ لیا اور صحت و پائیداری کا اہم پیغام عام کیا۔ ڈاکٹر منسکھ مانڈویا نے آج ایکس (سابقہ ٹویٹر) پر پوسٹ کرتے ہوئے کہا کہ بھارت کو فٹ بنانے کے لیے ہمیں سنڈیز آن سائیکل میں حصہ لینا ہوگا۔

تقریب سے خطاب کرتے ہوئے، جو کہ ڈاکٹر مانڈویا کے لیے باقاعدہ ایونٹ ہے، انہوں نے کہا ’’سائیکلنگ تمام عمر کے گروپ کے لیے بہترین ورزش ہے اور یہ کاربن کے نشان کم کرنے میں بھی مددگار ہے۔ ہمیں سب کو مل کر باقاعدگی سے سائیکلنگ کرنی چاہیے۔ میں اتنے لوگوں کے ساتھ سائیکلنگ سے لطف اندوز ہوتا ہوں، یہ ہمیں کمیونٹی کا احساس دیتا ہے، جو بہت اہم ہے۔ میں بھارت کے تمام شہریوں سے اپیل کرتا ہوں کہ ہر اتوار اپنے شہر میں کسی مقام پر شریک ہوں۔‘‘ انہوں نے جسمانی اور ذہنی فٹنس کی اہمیت پر زور دیتے ہوئے کہا کہ ایک ملک اتنا ہی مضبوط ہے جتنا اس کے شہری۔ اگر ہمیں اپنے خوابوں کا وکست بھارت تعمیر کرنا ہے تو ہمیں یہ یقینی بنانا ہوگا کہ ہر بھارتی اپنی بہترین جسمانی اور ذہنی فٹنس میں ہو تاکہ وہ ملک کی ترقی میں بھرپور حصہ ڈال سکے۔ یہ وہ ویژن ہے جو عزت مآب وزیرِ اعظم جناب نریندر مودی نے ہمارے لیے رکھا ہے۔

وزیر نے شرکاء سے بات چیت کے دوران متعدد کہانیاں سنائیں، جو سائیکلنگ کو کمیونٹی بونڈنگ کے ایک موثر ذریعہ کے طور پر ظاہر کرتی ہیں۔ فٹ انڈیا سنڈیز آن سائیکل نے ملک گیر جَن انقلاب کی شکل اختیار کر لی ہے، جس میں 22 لاکھ سے زائد شہریوں نے 2 لاکھ سے زیادہ مقامات پر حصہ لیا۔ یہ پہل عزت مآب وزیرِ اعظم جناب نریندر مودی کے ویژن ’فٹنس کی ڈوز، آدھا گھنٹہ روز‘ کے مطابق ہے اور موٹاپے سے لڑنے اور پائیدار، کم کاربن طرزِ زندگی کو فروغ دینے کے قومی اہداف سے ہم آہنگ ہے۔

اسی جذبے کے تحت گچی باؤلی اسٹیڈیم حیدرآباد میں منعقد تقریب، جو ہارٹفلنس انسٹی ٹیوٹ کے تعاون سے ہوئی، میں کئی معزز شخصیات اور کھیل کے آئیکونز نے شرکت کی، جن میں کابینہ وزیر برائے کوئلہ اور کانیں جناب جی کشن ریڈی، صدر اسپورٹس اتھارٹی آف تلنگانہ جناب شیوا سینا ریڈی، بیڈمنٹن کے لیجنڈ پلیلا گوپی چند، ارجن ایوارڈ یافتہ شوٹر ایشا سنگھ، پیرالمپک برونز میڈلسٹ دیپتھی جیونجی، کمشنر آف پولیس سائبرآباد سٹی ڈاکٹر ایم رمیش ریڈی، آئی پی ایس اور حیدرآباد کے دیگر کھلاڑی، فٹ انڈیا ایمبیسیڈرز، چیمپیئنز اور سائیکلنگ لیڈرز شامل تھے، جنہیں صحت اور فٹنس کے پیغام کو عام کرنے میں ان کے کردار کے لیے اعزاز دیا گیا۔

اس موقع پر جناب جی کشن ریڈی نے روزمرہ زندگی میں فٹنس کو شامل کرنے کی اہمیت پر زور دیا اور کہا کہ سنڈیز آن سائیکل جیسے اقدامات وزیرِ اعظم نریندر مودی کے ویژن کے مطابق صحت مند اور فعال معاشرہ قائم کرنے کی نمائندگی کرتے ہیں۔ انہوں نے مزید کہا کہ ایک صحت مند بھارت ہمارے عزت مآب وزیرِ اعظم جناب نریندر مودی کا حتمی مقصد ہے اور فٹ انڈیا مشن کے ذریعے ہم جدید طرز زندگی کی وجہ سے پیدا ہونے والے صحت کے مسائل کو دور کرنے کی کوشش کر رہے ہیں۔ آج کے دور میں خوراک میں تبدیلی، جسمانی سرگرمی کی کمی اور ماحولیاتی عوامل کے سبب موٹاپا اور ذہنی دباؤ بڑھ رہا ہے۔ اس سے نمٹنے کے لیے وزیرِ اعظم نے شہریوں سے کھانے کے تیل کے استعمال کو کم کرنے کی بھی اپیل کی ہے۔ ہمیں یاد رکھنا چاہیے کہ گرچہ ٹیکنالوجی نے زندگی آسان بنا دی ہے، لیکن اس نے وہ جسمانی محنت کم کر دی ہے جو پچھلی نسلوں کو صحت مند رکھتی تھی، ہمیں روزمرہ زندگی میں شعوری طور پر حرکات کو دوبارہ شامل کرنا ہوگا۔

اس دوران پلیلا گوپی چند نے مسلسل جسمانی سرگرمی کی اہمیت پر زور دیا، جو کھیل میں اعلیٰ کارکردگی اور منظم طرزِ زندگی کو فروغ دیتی ہے۔ فٹ انڈیا مہم کا آغاز 29 اگست 2019 کو عزت مآب وزیرِ اعظم نے کیا تھا، جس کا مقصد فٹنس کو ہماری روزمرہ زندگی کا لازمی حصہ بنانا ہے۔

******

ش ح۔ ش ا ر۔ ول

Uno- 739