بھارتی ریلوے اپنی جدید کاری کے سفر میں ایک اور اہم سنگ میل حاصل کرنے کی تیاری کر رہا ہے۔ وندے بھارت ایکسپریس کے سلیپر ورژن کے آغاز کے ساتھ ہی بھارت میں طویل فاصلے کے ٹرین سفر کو عام مسافروں کے لیے مزید تیز، محفوظ اور آرام دہ بنایا جا رہا ہے۔ آج کے مسافروں کی بدلتی ہوئی توقعات کو مدِنظر رکھتے ہوئے تیار کی گئی وندے بھارت سلیپر ٹرین کا مقصد رات کے سفر کو محض منزل تک پہنچنے کا ذریعہ نہیں بلکہ ایک خوشگوار تجربہ بنانا ہے۔ جدید ٹیکنالوجی، بہتر حفاظتی خصوصیات اور مسافر دوست سہولیات کو یکجا کر کے مناسب کرایوں پر اعلیٰ معیار کا آرام فراہم کیا جا رہا ہے۔

پہلی وندے بھارت سلیپر ٹرین آسام کے گوہاٹی اور مغربی بنگال کے ہاوڑہ کے درمیان چلائی جائے گی، جو ملک میں طویل فاصلے کے رات کے ریلوے سفر میں ایک انقلابی قدم ثابت ہوگی۔ اس ٹرین کے آزمائشی مراحل، جانچ اور سرٹیفکیشن کا مکمل عمل کامیابی کے ساتھ مکمل کر لیا گیا ہے۔ جنوری کے مہینے میں اس روٹ پر پہلی وندے بھارت سلیپر ٹرین کو جلد ہی جھنڈی دکھا کر روانہ کیا جائے گا۔ یہ اہم راہداری مشرقی اور شمال مشرقی بھارت کو جوڑتی ہے اور روزانہ ہزاروں مسافر اس سے استفادہ کرتے ہیں جن میں طلبہ، محنت کش، تاجر اور خاندان شامل ہیں۔ نئی سروس سے دونوں خطوں کے درمیان رابطہ نمایاں طور پر بہتر ہونے کی توقع ہے اور یہ رات کے ریلوے سفر کے تجربے کو یکسر بدل دے گی۔ تیز رفتار اور جدید ڈیزائن کے ساتھ، وندے بھارت سلیپر سفری وقت میں کمی لائے گی اور ہموار و آرام دہ سفر فراہم کرے گی۔ طویل فاصلے کا سفر کرنے والے مسافروں کے لیے اس کا مطلب بہتر آرام، زیادہ تحفظ اور ایک زیادہ قابلِ اعتماد سفری سہولت ہے۔

اس روٹ پر وندے بھارت سلیپر کا آغاز بھارتی ریلوے کی جدید اور مسافر مرکوز خدمات پر مسلسل توجہ کی عکاسی کرتا ہے۔ یہ ایک ایسے مستقبل کی جانب قدم ہے جہاں ٹرین سفر رفتار، آرام اور تحفظ کا حسین امتزاج پیش کرے گا، جس سے ملک بھر میں طویل فاصلے کے سفر کے لیے ریلوے کو ایک ترجیحی انتخاب بنایا جا سکے گا۔

مسافروں کا آرام اور عالمی معیار کی سہولیات

طویل فاصلے کے سفر کے لیے خصوصی طور پر ڈیزائن کی گئی وندے بھارت سلیپر ٹرین میں مسافروں کے آرام کو مرکزی حیثیت حاصل ہے۔ یہ ٹرین 16 جدید کوچ پر مشتمل ہے جن کی مجموعی گنجائش 823 مسافروں کی ہے اور یہ رفتار، کشادگی اور آرام کا بہترین امتزاج پیش کرتی ہے۔

اس کا جدید ایروڈائنامک ڈیزائن ہوا کی مزاحمت کو کم کرتا ہے، جس سے بلند رفتار پر بھی سفر مستحکم اور ہموار رہتا ہے۔ 180 کلومیٹر فی گھنٹہ تک کی رفتار سے چلنے کی صلاحیت کے ساتھ، یہ ٹرین سفری وقت میں نمایاں کمی لاتی ہے اور خاموش و اعلیٰ معیار کا سفری تجربہ فراہم کرتی ہے۔

ارگونومک انداز میں ڈیزائن کی گئی سلیپنگ برتھ جسم کو بہتر سہارا فراہم کرتی ہیں، جس سے رات کے سفر کے دوران زیادہ آرام اور بہتر نیند ممکن ہوتی ہے۔ کوچ کے درمیان ویسٹی بیولز کے ساتھ خودکار دروازے ٹرین کے اندر محفوظ اور سہل آمد و رفت کو یقینی بناتے ہیں۔ جدید سسپنشن سسٹم جھٹکوں اور ارتعاش کو کم سے کم کر کے سفری معیار کو مزید بہتر بناتا ہے، جس کے نتیجے میں پرسکون اور تھکن سے پاک سفر میسر آتا ہے۔

وندے بھارت سلیپر ٹرینوں میں سامان رکھنے کے لیے وافر اور منظم جگہ فراہم کی گئی ہے، جس میں چھوٹے بیگ کے لیے اوپر والے ریک اور برتھ کے نیچے اسٹوریج، جبکہ بڑے سوٹ کیسوں کے لیے کوچ کے داخلی دروازوں کے قریب مخصوص مقامات شامل ہیں، جس سے اندرونی ماحول کشادہ اور آرام دہ رہتا ہے۔ طویل فاصلے کے سفر کو مد نظر رکھتے ہوئے ڈیزائن کی گئی اس ٹرین میں ارگونومک سلیپر برتھ، یو ایس بی چارجنگ پورٹ اور بہتر حفاظتی نظام موجود ہیں۔ معذور افراد کے لیے موزوں سہولیات، ماڈیولر پینٹریاں اور جدید فائر سیفٹی سسٹم بھی مسافروں کی سہولت میں اضافہ کرتے ہیں، جس سے محفوظ، مؤثر اور جدید رات کے سفر کا تجربہ فراہم ہوتا ہے۔

صاف، ستھرا اور صحت مند سفر

وندے بھارت سلیپر کے تجربے میں صفائی اور حفظانِ صحت کے اعلیٰ معیار کو شامل کیا گیا ہے۔ ٹرین میں جدید بیت الخلاء اور جدید جراثیم کش ٹیکنالوجی موجود ہے، جو پورے سفر کے دوران اعلیٰ سطح کی صفائی کو برقرار رکھنے میں مدد فراہم کرتی ہے۔ یہ خاص طور پر طویل رات کے سفر کے لیے ایک صاف، محفوظ اور صحت دوست ماحول کو یقینی بناتا ہے۔

ہاوڑہ–گوہاٹی: ایک اہم ریلوے راہداری

ہاوڑہ–گوہاٹی روٹ ملک کی سب سے اہم ریلوے راہداریوں میں سے ایک ہے، جو روزانہ لاکھوں مسافروں کی نقل و حرکت کو سہارا دیتی ہے۔ وندے بھارت سلیپر ٹرینیں مغربی بنگال اور آسام کے مسافروں کے لیے ایک تیز، جدید اور قابلِ اعتماد سفری سہولت فراہم کریں گی۔

مغربی بنگال کے اضلاع کوچ بہار، جَلپائیگوڑی، مالدا، مرشدآباد، پوربا بردھمن، ہوگلی اور ہاوڑہ اور آسام کے کام روپ میٹروپولیٹن اور بونگائی گاؤں کو براہ راست فائدے حاصل ہوں گے۔ یہ سروس خاص طور پر عام مسافروں، طلبا، پیشے ور افراد، مزدوروں، تاجروں اور مذہبی زائرین کے لیے انتہائی مفید ثابت ہوگی۔ کالِ گھاٹ مندر اور کاماکھیا دیوی مندر جیسے اہم زیارت مقامات کی زیارت آسان، محفوظ اور سہل ہو جائے گی۔

ہاوڑہ–گوہاٹی روٹ پر نئی وندے بھارت سلیپر ٹرین موجودہ تیز ترین سروس، سَرائے گھاٹ ایکسپریس (12345/12346) کے مقابلے میں سفر کے وقت کو نمایاں طور پر کم کر دے گی۔ سَرائے گھاٹ ایکسپریس تقریباً 966 کلومیٹر کے فاصلے کو ہاوڑہ اور گوہاٹی/کاماکھیا کے درمیان طے کرنے میں تقریباً 17 گھنٹے لیتی ہے، جبکہ وندے بھارت سلیپر متوقع طور پر اسی فاصلے کو تقریباً 14 گھنٹے میں طے کرے گی، جس سے روٹ پر تقریباً 3 گھنٹے کی بچت ہوگی۔ سفر کے وقت میں کمی علاقائی تجارت، سیاحت، روزگار اور سماجی رابطوں کو بھی فروغ دے گی اور مختلف علاقوں کے درمیان اقتصادی اور ثقافتی تعلقات کو مضبوط کرے گی۔

معیاری پریمیم سفر

وندے بھارت سلیپر کی نمایاں خصوصیات میں سے ایک اس کا ہوائی سفر کے مقابلے میں کم لاگت ہونا ہے۔ متوقع کرایے اس طرح طے کیے گئے ہیں کہ مسافروں کو اعلیٰ معیار کا آرام فراہم کیا جائے، لیکن ہوائی جہاز کے مقابلے میں کافی کم قیمت پر۔

اندازاً کرایے تقریباً 2300 روپے برائے 3 اے سی، 3000 روپے برائے 2 اے سی اور 3600 روپے برائے فرسٹ اے سی ہوں گے۔ یہ کرایے وندے بھارت سلیپر کو ایک پرکشش اختیار بناتے ہیں، جو کم قیمت اور اعلیٰ معیار کی سہولیات اور خدمات کا حسین امتزاج پیش کرتا ہے۔

سفر کے دوران علاقائی ذائقے

وندے بھارت سلیپر ٹرین کے مسافر اعلیٰ معیار کی آن بورڈ کیٹرنگ خدمات سے لطف اندوز ہوں گے، جو طویل رات کے سفر کو زیادہ آرام دہ اور پریشانی سے پاک بنائیں گی۔ سفر کے دوران مسافروں کو مخصوص علاقوں کے روایتی پکوان پیش کیے جائیں گے۔ گوہاٹی سے روانہ ہونے والی ٹرین میں مستند آسامیز کھانے دستیاب ہوں گے، جبکہ کولکتہ سے روانہ ہونے والی ٹرین میں روایتی بنگالی لذیذ پکوان فراہم کیے جائیں گے، جس سے سفر پر خوش ذائقہ اور ثقافتی اعتبار سے بھرپور کھانے کا تجربہ ممکن ہوگا۔

اسٹاف سپورٹ اور ہموار آپریشن

وندے بھارت سلیپر ٹرین ریلوے اسٹاف کے لیے بھی نمایاں بہتری فراہم کرتی ہے۔ لوکو پائلٹس کے لیے، ٹرین میں ارگونومک انداز میں ڈیزائن شدہ ڈرائیور کیبن شامل ہیں، جو طویل ڈیوٹی کے دوران جسمانی دباؤ اور تھکن کو کم کرتے ہیں اور صفائی اور سہولت کو یقینی بنانے کے لیے مخصوص اور مکمل سہولیات والے بیت الخلاء بھی دستیاب ہیں۔

آن بورڈ اسٹاف، جیسے کہ ٹی ٹی ای اور پینٹری عملہ کے لیے مخصوص کیبن اور کمپارٹمنٹ فراہم کیے گئے ہیں، جن میں بہتر برتھ اور سہولیات شامل ہیں، تاکہ ڈیوٹی کے دوران مناسب آرام ممکن ہو اور اس سے کارکردگی، ہوشیاری اور مجموعی خدمات کے معیار میں بہتری آئے۔

دیسی ٹیکنالوجی کے ذریعے محفوظ سفر

حفاظت ہمیشہ اولین ترجیح ہے۔ وندے بھارت سلیپر میں دیسی کوچ خودکار ٹرین تحفظ نظام نصب ہے، جو ٹکراؤ کو روکنے اور محفوظ ٹرین آپریشن کو یقینی بنانے میں اہم کردار ادا کرتا ہے۔

ٹرین میں خودکار دروازے، بہتر فائر سیفٹی نظام، جراثیم کش ٹیکنالوجی اور تمام کوچ میں سی سی ٹی وی نگرانی جیسی خصوصیات بھی موجود ہیں۔ ایک جدید ایمرجنسی ٹاک بیک سسٹم مسافروں کو ہنگامی صورتحال میں براہِ راست عملے سے رابطہ کرنے کی سہولت فراہم کرتا ہے، جس سے فوری مدد یقینی بنتی ہے۔ یہ تمام نظام مل کر ریلوے حفاظت کے نئے معیار قائم کرتے ہیں اور مسافروں کو مکمل ذہنی سکون فراہم کرتے ہیں۔

بروقت آمد و رفت اور قابلِ اعتماد سفر

تیز رفتار کی صلاحیت، جدید ٹرین کنٹرول سسٹم اور بہتر آپریشنل کارکردگی زیادہ بروقت آمد و رفت اور قابلِ اعتماد سفر کو یقینی بناتے ہیں۔ تیز رفتاری اور رکاؤٹ کے وقت میں کمی، وقت کے شیڈول کو برقرار رکھنے میں مدد دیتی ہے، جس سے طویل فاصلے کے رات کے سفر کو زیادہ قابلِ پیش گوئی اور بھروسے مند بنایا جاتا ہے۔

ریلوے سفر کا مستقبل

وندے بھارت سلیپر جدید، مسافر مرکوز ڈیزائن کے ساتھ رات کے ریلوے سفر کی تعریف بدل دیتا ہے۔ ارگونومک انداز میں ڈیزائن شدہ نشستیں اور برتھ طویل سفر کے دوران بہتر آرام فراہم کرتی ہیں، جبکہ سامان رکھنے کے انتظامات، مخصوص علاقوں کے روایتی کھانے، اور آن بورڈ اسٹاف اور لوکو پائلٹس کے لیے بہتر سہولیات تھکن کو کم کرتی ہیں اور ہموار خدمات کو یقینی بناتی ہیں۔ یہ تمام خصوصیات مل کر ایک مستقبل کے مطابق ریلوے سفر کا تصور پیش کرتی ہیں، جہاں سوچ سمجھ کر بنایا گیا ڈیزائن، جدید ٹیکنالوجی اور آپریشنل کارکردگی مجموعی سفری تجربے کو بلند کرتی ہیں۔

*************

ش ح۔ ف ش ع

                                                                                                                                          U: 605