فٹ انڈیا کی فلیگ شپ عوامی فٹنس تحریک ’’سنڈے آن سائیکل‘‘ (ایس او سی) نے اتوار کے روز قومی دارالحکومت نئی دہلی میں ایک بھرپور اور متحرک واپسی کی۔ اس موقع پر 1000 سے زائد افراد نے شرکت کی، جن میں 500 سے زیادہ ینگ لیڈرز شامل تھے۔ فٹنس فیسٹیول کے بعد منعقدہ سائیکلنگ ریلی نے صبح 7 بجے 6 ڈگری کی شدید سردی کو مات دے دی۔

اس سائیکلنگ ریلی کی قیادت نوجوانوں کے امور اور کھیل، نیز محنت و روزگار کے مرکزی وزیر ڈاکٹر منسکھ مانڈویہ نے کی۔ ان کے ہمراہ ٹینس کے عالمی شہرت یافتہ کھلاڑی لیینڈر پیس، بیڈمنٹن لیجنڈ پلیلا گوپی چند اور ابھرتی ہوئی بین الاقوامی پہلوان شیوانی پوار بھی شریک رہیں۔

ملک بھر سے آئے وہ نوجوان لیڈر جو یہاں چار روزہ وکست بھارت ینگ لیڈرز ڈائیلاگ 2026 میں شرکت کے لیے موجود ہیں—جو عوامی زندگی میں شمولیت کے خواہش مند نوجوانوں کی شناخت اور رہنمائی کے لیے ایک قومی پلیٹ فارم ہے—فٹ انڈیا سنڈے آن سائیکل کے 56ویں ایڈیشن میں بطور خصوصی مہمان مرکزی توجہ کا مرکز رہے۔ اس ایڈیشن کا انعقاد ملک بھر میں 15,000 مقامات پر کیا گیا، جبکہ بھوپال میں ایک بڑا پروگرام منعقد ہوا، جس میں مدھیہ پردیش کے نوجوانوں کے امور اور کھیلوں کے وزیر جناب وشواس کیلاش سارنگ نے شرکت کی۔ انہوں نے اداکارہ پائل روہتگی اور اولمپین جوڈوکا گریما چودھری سمیت ممتاز کھلاڑیوں کی موجودگی میں سائیکلنگ ریلی کو جھنڈی دکھا کر روانہ کیا۔

دہلی میں منعقدہ تقریب سے خطاب کرتے ہوئے ڈاکٹر مانڈویہ نے کہا:“ایک صحت مند جسم مضبوط قیادت کی بنیاد ہے۔ سائیکلنگ ہمیں قیادت کے اہم اسباق سکھاتی ہے—یہ ہمیں بتاتی ہے کہ کب تیزی سے آگے بڑھنا ہے، کب رفتار کم کرنی ہے، اور سب سے بڑھ کر یہ کہ زندگی میں آگے بڑھتے رہنے کے لیے توازن کس طرح برقرار رکھا جائے۔”

مرکزی وزیر کے سنڈے آن سائیکل اقدام کے وژن کی ستائش کرتے ہوئے پلیلا گوپی چند نے کہا:“یہ نہایت حوصلہ افزا ہے کہ ایک وزیر نہ صرف فٹنس کو روزمرہ زندگی کا حصہ بنانے پر غور کر رہا ہے بلکہ خود پوری تحریک کی قیادت بھی کر رہا ہے۔ ایک ہفتے کی سخت محنت کے بعد اتوار کی صبح خود اس سرگرمی میں شریک ہونا، فٹ انڈیا کے لیے ان کے عزم کو واضح کرتا ہے۔”
انہوں نے مزید کہا:“آج ہم موبائل اسکرینوں تک محدود ہو گئے ہیں اور فطرت کے ساتھ جینے، باہر نکلنے اور حقیقی دنیا کا حصہ بننے کو بھول گئے ہیں۔ میں ان تمام لوگوں کی تعریف کرتا ہوں جو آج یہاں شریک ہوئے۔”

کمیونٹی فٹنس مہمات کی اہمیت پر روشنی ڈالتے ہوئے لیینڈر پیس نے کہا:“فٹنس ایک انفرادی عمل نہیں ہے؛ اس کے لیے ایک دوسرے کی حوصلہ افزائی اور کمیونٹی کا حصہ بننا ضروری ہے۔ فٹنس صرف مضبوط جسم کا نام نہیں بلکہ ایک صحت مند دماغ بھی ہے، جو ایسے اجتماعی پروگراموں میں شرکت سے پروان چڑھتا ہے۔ میں کھیلوں کے مرکزی وزیر کو اس منفرد پہل پر مبارکباد دیتا ہوں، اور یہ حقیقت کہ یہ پروگرام پورے ملک میں بیک وقت منعقد ہو رہا ہے، واقعی قابلِ تحسین ہے۔”

تقریب کے تہوارانہ ماحول کو مزید خوشگوار بنانے کے لیے صبح کے وقت پرجوش زومبا سیشن، یوگا کی پُرسکون مشقیں، اور کھلاڑیوں کی جانب سے الیکٹرک ملاکھمب اور رسی کودنے کی شاندار پرفارمنس پیش کی گئیں، جنہیں حاضرین کی جانب سے زبردست داد ملی۔ فٹ انڈیا کی سفیر تمسی بیکٹر اور دیویا آہوجا نے بھی اس موقع پر شرکت کی اور موسمِ سرما کے لیے اہم فٹنس مشورے دیے، جن میں گھر پر باقاعدہ ورزش اور آسان وارم اپ کی اہمیت پر زور دیا گیا، خصوصاً بزرگ افراد کے لیے جو گھروں سے باہر نہیں نکل سکتے۔

بھوپال میں منعقدہ تقریب کے دوران وزیر کھیل جناب وشواس کیلاش سارنگ نے وزیر اعظم جناب نریندر مودی کے دیے گئے منتر “فٹ انڈیا، ہٹ انڈیا” کو دہرایا اور نوجوانوں کے امور اور کھیلوں کی مرکزی وزارت اور اسپورٹس اتھارٹی آف انڈیا کو اس سائیکلنگ تحریک کے ذریعے ملک گیر سطح پر فٹنس کا پیغام عام کرنے پر مبارکباد دی۔

اس موقع پر موجود بھارتی اداکارہ پائل روہتگی نے کہا کہ فٹ انڈیا سنڈے آن سائیکل جیسے پروگرام فٹنس کے بارے میں نہایت ضروری بیداری پیدا کر رہے ہیں۔
انہوں نے کہا:“اگر ہماری آبادی صحت مند طرزِ زندگی کو اپنائے، تو مستقبل میں ہمیں مزید کھلاڑی اور اولمپین میسر آئیں گے۔ یہ حقیقت کہ ہمارے مرکزی وزیر کھیل خود ایک شوقین سائیکل سوار ہیں اور مسلسل اس ایونٹ میں حصہ لیتے رہے ہیں، واقعی قابلِ ستائش ہے۔”

تقریب میں کرکٹر انیکیت اوماشنکر ورما، جونیئر ہاکی انٹرنیشنل عبدل احاد، فٹبالر وشال جون، کینو اسپرنٹ ایتھلیٹ جسپریت سنگھ، جوڈوکا شردھا کدوبل چوپڑے، یش گنگاس اور نوجوان پردھان منتری راشٹریہ بال پرسکار ایوارڈ یافتہ یوگیتا منڈاوی بھی شریک تھے۔ ان کی موجودگی نے اس ایونٹ کو مزید متاثرکن بنا دیا، جو اب ایک مستقل عوامی تحریک کی شکل اختیار کر چکا ہے۔

درحقیقت، نوجوان لیڈرز کے لیے مخصوص فٹ انڈیا سنڈے آن سائیکل کا 56واں ایڈیشن—جس میں عام شہریوں، کھلاڑیوں اور فٹنس کے شوقین افراد نے بھرپور شرکت کی—اس پیغام کو مزید مضبوط کرتا ہے کہ جسمانی فٹنس قوم کی تعمیر اور مؤثر قیادت کے لیے ناگزیر ہے۔ سائیکل پر فٹ انڈیا سنڈے اب وکست بھارت کے سفر کا ایک لازمی جزو بن چکا ہے۔اس پہل کو سائیکلنگ فیڈریشن آف انڈیا، یوگاسن بھارت، مائی بھارت اور فٹ انڈیا سائیکلنگ کلبز کی جانب سے باضابطہ شراکت داری کے تحت تعاون حاصل ہے۔

***

UR-422

(ش ح۔اس ک  )