কেন্দ্ৰীয় গৃহমন্ত্ৰী তথা সমবায় দপ্তৰৰ মন্ত্ৰী শ্ৰী অমিত শ্বাহৰ সভাপতিত্বত আজি নতুন দিল্লীৰ বিজ্ঞান ভৱনত নাৰ্কো-কৰ্ডিনেচন চেণ্টাৰৰ নৱম শীৰ্ষ পৰ্যায়ৰ বৈঠক অনুষ্ঠিত হয়। এই উপলক্ষে কেন্দ্ৰীয় গৃহমন্ত্ৰীগৰাকীয়ে অমৃতসৰত মাদক দ্ৰব্য নিয়ন্ত্ৰণ ব্যুৰো (এন চি বি)ৰ কাৰ্যালয় উদ্বোধন কৰে। এনচিবিয়ে হাইব্ৰিড মোডত আয়োজন কৰা এই বৈঠকত কেন্দ্ৰীয় চৰকাৰৰ মন্ত্ৰালয় আৰু বিভাগসমূহৰ গুৰুত্বপূৰ্ণ অংশীদাৰ আৰু ৰাজ্য চৰকাৰৰ লগতে ড্ৰাগছ আইন প্ৰয়োগকাৰী সংস্থাসমূহৰ প্ৰতিনিধিয়ে অংশগ্ৰহণ কৰে।

ভাষণ প্ৰসংগত  কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে ড্ৰাগছৰ বিৰুদ্ধে যুঁজত ভাৰত চৰকাৰৰ সকলো বিভাগে ২০২৯ চনলৈকে ৰোডমেপ প্ৰস্তুত কৰি ইয়াৰ কাৰ্যকৰীকৰণৰ বাবে সময়সীমাবদ্ধ পৰ্যালোচনা ব্যৱস্থা স্থাপন কৰিব লাগে। তেওঁ কয় যে এই প্ৰত্যাহ্বান আইন-শৃংখলাৰ সৈতে নহয়, নাৰ্কো-টেৰ’ৰ বিষয়টোৰ সৈতে বেছিকৈ জড়িত আৰু আটাইতকৈ গুৰুত্বপূৰ্ণ কথাটো হ’ল, ই দেশৰ আগন্তুক প্ৰজন্মক ধ্বংস কৰাৰ এক  ষড়যন্ত্ৰ। শ্ৰী শ্বাহে কয় যে যুৱক-যুৱতীসকলৰ স্বাস্থ্য, তেওঁলোকৰ চিন্তা আৰু পৰিবেশন ক্ষমতা, সমাজত ক্ৰমবৰ্ধমান অসন্তুষ্টি এই সকলোবোৰ এই সমস্যাৰ সৈতে জড়িত।

গৃহমন্ত্ৰীগৰাকীয়ে কয় যে ২০২৬ চনৰ ৩১ মাৰ্চৰ পৰা আমি সকলোৱে মিলি এই সমস্যাৰ বিৰুদ্ধে তিনি বছৰীয়া সামূহিক অভিযান আৰম্ভ কৰিম, য’ত ড্ৰাগছ সেৱনৰ বিৰুদ্ধে সকলো স্তম্ভৰ কৰ্ম পদ্ধতি নিৰ্ধাৰণ কৰা হ’ব, লক্ষ্য নিৰ্ধাৰণ কৰা হ’ব, আৰু সময়সীমা নিৰ্ধাৰিত পৰ্যালোচনা কৰা হ’ব।শ্ৰী অমিত শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত বিগত ১১ বছৰত আমি ড্ৰাগছৰ বিৰুদ্ধে যুঁজত যথেষ্ট সফলতা লাভ কৰিছো, আৰু ২০১৯ চনত এন চি অ’ আৰ ডিৰ পুনৰ্গঠনৰ পিছত এই সমস্যাৰ ওপৰত সম্পূৰ্ণ নিয়ন্ত্ৰণৰ পথো আমি নিশ্চিত কৰিছো। এতিয়া আমি গতি লাভ কৰিছো আৰু তিনিফালৰ কাৰ্য্য পৰিকল্পনাৰে আগবাঢ়ি যাম। তেওঁ কয় যে ড্ৰাগছ যোগান শৃংখলৰ প্ৰতি সামূহিক নিৰ্দয় পন্থা, চাহিদা হ্ৰাসৰ দিশত কৌশলগত দৃষ্টিভংগী, ক্ষতি হ্ৰাসৰ দিশত মানৱীয় দৃষ্টিভংগী গ্ৰহণ কৰিলেহে আমি ড্ৰাগছমুক্ত ভাৰতৰ লক্ষ্যত উপনীত হ’ব পাৰিম।

কেন্দ্ৰীয় গৃহমন্ত্ৰীগৰাকীয়ে কয় যে এন চি অ’ ডিৰ বৈঠকৰ সংখ্যা বৃদ্ধি পাইছে যদিও আৰু অধিক বৃদ্ধি কৰাৰ প্ৰয়োজন আছে। জিলা পর্যায় আৰু ৰাজ্যিক পর্যায়ৰ বৈঠক নিয়মীয়াকৈ অনুষ্ঠিত হ’ব লাগে বুলিও তেওঁ কয়৷ শ্ৰী শ্বাহে কয় যে ভাৰত চৰকাৰৰ দৃষ্টিভংগী অতি স্পষ্ট যে ড্ৰাগছ প্ৰস্তুত কৰা বা বিক্ৰী কৰাসকলৰ প্ৰতি কোনো মমতা থাকিব নালাগে। তেওঁ কয় যে আমি ড্ৰাগছৰ বলি হোৱা লোকসকলৰ প্ৰতি মানৱীয় দৃষ্টিভংগীৰে আগবাঢ়িব লাগে।

গৃহমন্ত্ৰীগৰাকীয়ে কয় যে আমি এই যুঁজত আগবাঢ়িব লাগিব কেৱল নিৰ্দেশ, অনুপালন আৰু জবাবদিহিতা শক্তিশালী কৰি। এতিয়া সভাৰ সংখ্যাৰ পৰিৱৰ্তে আমি সেইবোৰৰ ফলাফল পুনৰীক্ষণ কৰা উচিত। তেওঁ কয় যে ড্ৰাগছ ব্যৱসায়ৰ মূল লোক, বিত্তীয়, আৰু লজিষ্টিক সমৰ্থনৰ  বিৰুদ্ধে গ্ৰহণ কৰা কঠোৰ ব্যৱস্থা আমাৰ পৰ্যালোচনাৰ বিষয় হ’ব লাগে।শ্ৰী শ্বাহে লগতে কয় যে আমি ফৰেনছিক বিজ্ঞান লেব (এফ এছ এল)ৰ ব্যৱহাৰ আৰু সময়মতে চাৰ্জ শ্বীট দাখিল কৰাৰ হাৰ বৃদ্ধি আৰু দোষী সাব্যস্ত কৰাটো আমাৰ লক্ষ্যত অন্তৰ্ভুক্ত কৰিব লাগে। তেওঁ কয় যে সমগ্ৰ ড্ৰাগছ নেটৱৰ্কৰ তদন্তৰ বাবে ওপৰৰ পৰা তললৈ আৰু তলৰ পৰা ওপৰলৈ পদ্ধতি গ্ৰহণ  অত্যন্ত প্ৰয়োজনীয়।

শ্ৰী অমিত শ্বাহে কয় যে ২০০৪ চনৰ পৰা ২০১৩ চনৰ ভিতৰত ৪০ হাজাৰ কোটি টকা মূল্যৰ ২৬ লাখ কিলোগ্ৰাম ড্ৰাগছ জব্দ কৰা হৈছে, আনহাতে ২০১৪ চনৰ পৰা ২০২৫ চনলৈকে ১ লাখ ৭১ হাজাৰ কোটি টকাৰ ১ কোটি ১১ লাখ কিলোগ্ৰাম মূল্যৰ ড্ৰাগছ জব্দ কৰা হৈছে। শ্ৰী শ্বাহে কয় যে ড্ৰাগছৰ বিৰুদ্ধে আমাৰ অভিযান উৎসাহজনক হৈ আহিছে। আমি ড্ৰাগছ ধ্বংসৰ পৰিমাণো ১১গুণ বৃদ্ধি লাভ কৰিছো। তেওঁ কয় যে ২০২০ চনত ১০,৭৭০ একৰ মাটিত আফিঙৰ খেতি ধ্বংস কৰা হৈছিল আৰু ২০২৫ চনৰ নৱেম্বৰ মাহলৈকে ৪০ হাজাৰ একৰ মাটিৰ আফিং  ধ্বংস কৰা হৈছে।

কেন্দ্ৰীয় গৃহমন্ত্ৰী তথা সমবায় দপ্তৰৰ  মন্ত্ৰী শ্ৰীযুত অমিত শ্বাহে সকলো বিভাগকে নিৰ্দেশ দিছে যে ড্ৰাগছৰ সমস্যাৰ সৈতে মোকাবিলা কৰাৰ ক্ষেত্ৰত নিজ নিজ দায়িত্ব অনুসৰি ৩১ মাৰ্চৰ ভিতৰত এখন ৰোডমেপ প্ৰস্তুত কৰি নিৰীক্ষণ ব্যৱস্থা স্থাপন কৰি  এই বিষয়ত সম্পূৰ্ণ মনোনিৱেশ কৰিব লাগিব। যাতে এই সমস্যাৰ সৰ্বাংগীন সমাধান লাভ কৰিব পৰা যায়।

তেওঁ কয় যে আগন্তুক তিনি বছৰত আমি সমগ্ৰ দেশতে ড্ৰাগছৰ বিৰুদ্ধে সকলো প্ৰান্ততে  যুঁজিব লাগিব আৰু ভাৰতক ‘ড্ৰাগছ ফ্ৰী ইণ্ডিয়া’ হিচাপে গঢ়ি তুলিব লাগিব।  দেশৰ যুৱক-যুৱতীসকলক ড্ৰাগছৰ পৰা ৰক্ষা কৰিবলৈ সকলো প্ৰচেষ্টা চলাব লাগিব। তেওঁ কয় যে নিৰন্তৰ সজাগতাইহে আমাক সুৰক্ষিত ৰাখিব পাৰে। তেওঁ কয় যে আমি এনে এক স্থায়ী ব্যৱস্থা সৃষ্টি কৰিব বিচাৰো যিয়ে আমাক এই যুদ্ধখন যুঁজিবলৈ সক্ষম কৰি তোলে ।

শ্ৰী অমিত শ্বাহে কয় যে ড্ৰাগছৰ বিৰুদ্ধে যুঁজত ফৰেনছিক বিজ্ঞান পৰীক্ষাগাৰৰ (FSL) অতি গুৰুত্বপূৰ্ণ ভূমিকা আছে। জব্দ কৰা ড্ৰাগছ ধ্বংস কৰাৰ গতি লেহেমীয়া হোৱা ৰাজ্যসমূহে ইয়াক দ্ৰুত কৰিব লাগিব। তেওঁ সকলো ৰাজ্যৰ আৰক্ষী সঞ্চালক প্ৰধানক তেওঁলোকৰ ৰাজ্যত ৰোডমেপ প্ৰস্তুত কৰি সময়মতে ড্ৰাগছ ধ্বংস কৰাৰ বাবে সুনিৰ্দিষ্ট পদক্ষেপ গ্ৰহণ কৰিবলৈ আহ্বান জনায়।

কেন্দ্ৰীয় গৃহমন্ত্ৰীগৰাকীয়ে কয় যে প্ৰধানমন্ত্ৰী শ্ৰী নৰেন্দ্ৰ মোদীয়ে ২০৪৭ চনৰ ভিতৰত, যেতিয়া স্বাধীনতাৰ শতবাৰ্ষিকী উদযাপন কৰা হ'ব, তেতিয়া ভাৰতক প্ৰতিটো ক্ষেত্ৰতে বিশ্বৰ ভিতৰতে এক নম্বৰ স্থান হিচাপে গঢ়ি তোলাৰ লক্ষ্য নিৰ্ধাৰণ কৰিছে। এনে এখন  ভাৰত সৃষ্টিৰ বাবে নৱপ্ৰজন্মক ড্ৰাগছৰ পৰা সম্পূৰ্ণ সুৰক্ষা প্ৰদান কৰাটো আমাৰ সকলোৰে দায়িত্ব। শ্ৰী শ্বাহে কয় যে এই যুঁজখন বৰ্তমান এনে পৰ্যায়ত আছে যে আমি জয়ী হ’ব পাৰো। গৃহমন্ত্ৰীগৰাকীয়ে কয় যে আমি দেশৰ পৰৱৰ্তী প্ৰজন্মক ৰক্ষাৰ কামটো সৰ্বোচ্চ অগ্ৰাধিকাৰ দি সম্পন্ন কৰিম।

এন চি অ’ আৰ ডি ব্যৱস্থাটোৰ চাৰিটা স্তৰৰ গাঁথনি আছে এপেক্স লেভেল এন চি অ’ আৰ ডি কমিটিৰ সৈতে, যাৰ নেতৃত্বত আছে কেন্দ্ৰীয় গৃহ সচিব, কাৰ্যবাহী পৰ্যায়ৰ এন চি অ’ আৰ ডি কমিটি, যাৰ নেতৃত্বত আছে বিশেষ সচিব, গৃহ পৰিক্ৰমা মন্ত্ৰালয়, ৰাজ্যিক পৰ্যায়ৰ এন চি অ’ আৰ ডি কমিটি, ৰাজ্যৰ মুখ্য সচিব আৰু জিলা পৰ্যায়ৰ এন চি অ’ আৰ ডি কমিটিৰ নেতৃত্বত  আছে  জিলা দণ্ডাধীশ। ড্ৰাগছৰ বিপদৰ প্ৰত্যাহ্বানক সামগ্ৰিকভাৱে মোকাবিলা কৰাৰ ক্ষেত্ৰত ৰাজ্য, গৃহ পৰিক্ৰমা মন্ত্ৰালয় আৰু সংশ্লিষ্ট অংশীদাৰসকলৰ মাজত সমন্বয় বৃদ্ধিৰ বাবে ২০১৬ চনত এন চি অ’ আৰ ডি ব্যৱস্থা স্থাপন কৰা হৈছিল।

*****

RK/PR/PS/DM