ഇന്ത്യയുടെ സാമ്പത്തിക വൈവിധ്യത്തിന്റെ ചലനാത്മകമായ ഒരു പ്രദർശന വേദിയായി ഭാരത് മണ്ഡപം സമുച്ചയം മാറിയിരിക്കുന്നു. ഇത് പരമ്പരാഗത കരകൗശല വസ്തുക്കൾ, കാർഷിക സംരംഭങ്ങൾ, സ്റ്റാർട്ടപ്പ് നൂതനാശയങ്ങൾ, വിവിധ സംസ്ഥാനങ്ങളിൽ നിന്നുള്ള പ്രാദേശിക പ്രത്യേകതകൾ എന്നിവയെ ഒരുമിച്ച് കൊണ്ടുവരുന്നു. 'ഏക ഭാരതം, ശ്രേഷ്ഠ ഭാരതം' എന്ന പ്രമേയത്തിൽ  3,500-ലധികം പേർ പങ്കെടുക്കുന്ന 44-ാമത് ഇന്ത്യ അന്താരാഷ്ട്ര വ്യാപാര മേളയിൽ (IITF) ഓരോരുത്തരും അവരുടെ കഠിനാധ്വാനത്തിൻ്റെയും പൈതൃകത്തിൻ്റെയും അഭിലാഷത്തിൻ്റെയും കഥകൾ സംവഹിക്കുന്നു.

2025 നവംബർ 14-ന് ഉദ്ഘാടനം ചെയ്ത, ഈ പതിനാല് ദിവസത്തെ പരിപാടി കേവലം ഒരു വാണിജ്യ സമ്മേളനം മാത്രമല്ല, ഒന്നാം തലമുറ സംരംഭകർ, ഗ്രാമീണ കരകൗശല വിദഗ്ധർ, തദ്ദേശീയ ബ്രാൻഡുകൾ എന്നിവർക്ക് അവരുടെ ഉൽപ്പന്നങ്ങളുടെ ഡിമാൻഡ് പരീക്ഷിക്കാനും ഉപഭോക്താക്കളുമായി ബന്ധപ്പെടാനും സഹപ്രവർത്തകരിൽ നിന്ന് പഠിക്കാനും രാജ്യത്തിന്റെ പിന്തുണ സംവിധാനങ്ങൾ പ്രയോജനപ്പെടുത്താനും ലഭിക്കുന്ന ഒരു അവസര വേദിയാണ്. പല പ്രദർശകർക്കും IITF ഒരു വലിയ ദേശീയ വിപണിയിലേക്കുള്ള ചുവടുവെപ്പാണ് — ആത്മവിശ്വാസമുള്ളതും സ്ഥിരമായി വളരുന്നതും സ്വയംപര്യാപ്തവുമായ ഇന്ത്യയെ പ്രതിഫലിക്കുന്ന ഒരു വേദി.

ഇന്ത്യ ട്രേഡ് പ്രൊമോഷൻ ഓർഗനൈസേഷൻ (ITPO) 1980 മുതൽ എല്ലാ വർഷവും സംഘടിപ്പിച്ചുവരുന്ന IITF, എംഎസ്എംഇകൾ, കരകൗശല വിദഗ്ധർ, സ്റ്റാർട്ടപ്പുകൾ, വ്യവസായങ്ങൾ എന്നിവയ്ക്ക് ഉപഭോക്താക്കളുമായി ബന്ധപ്പെടാനും അവരുടെ വിപണി സാധ്യത വർദ്ധിപ്പിക്കാനുമുള്ള ഇന്ത്യയിലെ ഏറ്റവും പ്രധാനപ്പെട്ട വേദികളിൽ ഒന്നാണ്. വർഷങ്ങളായി, വൈവിധ്യമാർന്ന മേഖലകളിലെ ഇന്ത്യയുടെ ഉൽപ്പാദന ശക്തി, നൂതനാശയം, പരമ്പരാഗത കരകൗശല വസ്തുക്കൾ എന്നിവയുടെ പ്രദർശനമായി ഇത് വളർന്നു. 2024-ൽ, ഒരു ദശലക്ഷത്തിലധികം സന്ദർശകരെ ആകർഷിച്ച ഈ മേള, രാജ്യത്തെ ഏറ്റവും പ്രതീക്ഷയോടെ കാത്തിരിക്കുന്ന വ്യാപാര പരിപാടികളിലൊന്ന് എന്ന പദവി വീണ്ടും ഉറപ്പിച്ചു.

പ്രഗതി മൈതാൻ പരിസരത്ത് നിർമ്മിച്ച ആധുനിക കൺവെൻഷൻ ആൻഡ് എക്സിബിഷൻ സമുച്ചയമായ ഭാരത് മണ്ഡപത്തിൽ വെച്ചാണ് IITF നടക്കുന്നത്. ആഗോള പ്രദർശനങ്ങൾക്കും പ്രധാന ഉച്ചകോടികൾക്കുമായി ഇന്ത്യക്ക് ഒരു ലോകോത്തര വേദി നൽകുന്നതിനായി 2023-ൽ ഉദ്ഘാടനം ചെയ്ത ഇത് 123 ഏക്കറിൽ വ്യാപിച്ചുകിടക്കുന്നു. 7,000 പേർക്ക് ഇരിക്കാവുന്ന കൺവെൻഷൻ ഹാൾ, ഏഴ് എക്സിബിഷൻ ഹാളുകൾ, 1,00,000 ചതുരശ്ര മീറ്ററിലധികം വിസ്തീർണ്ണമുള്ള പ്രദർശന സ്ഥലം എന്നിവ ഇതിൽ ഉൾപ്പെടുന്നു. ഐടിപിഒ എല്ലാ വർഷവും ഏകദേശം 90 പരിപാടികൾ സംഘടിപ്പിക്കുകയും ന്യൂഡൽഹിയെ ഒരു പ്രമുഖ അന്താരാഷ്ട്ര എക്സിബിഷൻ ഡെസ്റ്റിനേഷനായി സ്ഥാപിക്കുകയും ചെയ്യുന്നു.

ബിഹാർ: ദേശീയ ശ്രദ്ധയിലേക്ക് ചുവടുവെച്ച് ഒരു കരകൗശല വിദഗ്ധ

ബിഹാർ പവലിയനിൽ, 45 വയസ്സുള്ള ശ്രീധി കുമാരി, കഴിഞ്ഞ 12 വർഷമായി താൻ പ്രാവീണ്യം നേടിയ ഭാഗൽപുരി സിൽക്ക്, സാരി വർക്ക്‌ക്രാഫ്റ്റുകളുടെ നിരകൾക്ക് മുന്നിൽ നിൽക്കുന്നു. ഐഐടിഎഫിലെ ആദ്യ പങ്കാളി എന്ന നിലയിൽ, ഭൂമിശാസ്ത്ര സൂചികാ (GI) ടാഗ് ഉള്ള ഭാഗൽപുരി സിൽക്ക് പ്രദർശിപ്പിച്ചുകൊണ്ട് അവർ വനിതാ സംരംഭകത്വത്തിൻ്റെ പ്രയാണത്തെ പ്രതിനിധീകരിക്കുന്നു. “ഞാൻ ഒരു അംഗീകൃത വിൽപ്പനക്കാരിയാണ്,” തൻ്റെ സാരികൾ അഭിമാനത്തോടെ ക്രമീകരിച്ചുകൊണ്ട് അവർ പറയുന്നു.

ബിഹാർ ​ഗവൺമെന്റ് തങ്ങളുടെ വനിതാ സംരംഭകത്വ പദ്ധതികളിലൂടെ പിന്തുണ നൽകിയതായി അവർ വിശദീകരിച്ചു. “ഞങ്ങളുടെ സെക്രട്ടറി എല്ലാ നടപടിക്രമങ്ങളിലും എന്നെ സഹായിച്ചു,” ആദ്യമായി പങ്കെടുക്കുന്നവർക്ക് ഭരണപരമായ സഹായം എത്രത്തോളം പ്രധാനമാണെന്ന് ഊന്നിപ്പറഞ്ഞുകൊണ്ട് അവർ കാര്യങ്ങൾ പങ്കുവെച്ചു. അവരുടെ കരകൗശലവസ്തുക്കൾ ബിഹാറിലെയും പശ്ചിമ ബംഗാളിലെയും നൈപുണ്യങ്ങളുടെ സഹകരണമാണ്, കാരണം അവരുടെ തൊഴിലാളികൾ ഇരു സംസ്ഥാനങ്ങളിൽ നിന്നുമുള്ളവരാണ്, ഇത് ഒരു അന്തർ-പ്രാദേശിക തുണിത്തര കൈമാറ്റത്തെ പ്രതിഫലിപ്പിക്കുന്നു.

ഐഐടിഎഫിൽ മുമ്പ് പങ്കെടുത്ത മറ്റൊരു കരകൗശല വിദഗ്ധയാണ് അവരെ പങ്കെടുക്കാൻ പ്രോത്സാഹിപ്പിച്ചത്. “മേളയിലും അതിനുശേഷവും നല്ല വരുമാന സാധ്യതകളുണ്ടെന്ന് അവർ എന്നോട് പറഞ്ഞു,” ശ്രീധി പറയുന്നു. “അത് എത്രത്തോളം വരുമാനമായി മാറും എന്നത് മേള അവസാനിച്ചതിനുശേഷം മാത്രമേ നമുക്കറിയാൻ കഴിയൂ.” 2025 മാർച്ചിൽ ജിഐ-മഹോത്സവത്തിൽ പങ്കെടുത്തത്, രണ്ടോ മൂന്നോ മാസത്തെ വരുമാനത്തിന് തുല്യമായ തുക നേടാൻ അവരെ സഹായിച്ചു, ഇത് അവർക്ക് ഈ വർഷം കൂടുതൽ വളർച്ച കൈവരിക്കാനുള്ള ആത്മവിശ്വാസം നൽകി.

നളന്ദയിൽ നിന്ന് ഡൽഹിയിലേക്ക്: എല്ലാ വർഷവും തിരിച്ചെത്തുന്ന നെയ്ത്തുകാരൻ

അവിടെ നിന്ന് അൽപ്പം അകലെ, നളന്ദയിൽ നിന്നുള്ള 49 വയസ്സുള്ള തരുൺ പാണ്ഡെ, മികച്ച രൂപകൽപ്പനകളോടെ നെയ്ത മൃദുലമായ ബാവൻബൂട്ടി സാരികൾ ക്രമീകരിക്കുന്നു. ഇത് അദ്ദേഹത്തിൻ്റെ എട്ടാമത്തെ ഐഐടിഎഫ് പങ്കാളിത്തമാണ്. ഒരു പരമ്പരാഗത നെയ്ത്ത് കരകൗശല വിദഗ്ധൻ എന്ന നിലയിൽ, ബിഹാറിലെ നിരവധി ഗ്രാമങ്ങളിൽ തലമുറകളായി പരിശീലിക്കുന്ന ഒരു നെയ്ത്ത് പാരമ്പര്യത്തെ അദ്ദേഹം പ്രതിനിധീകരിക്കുന്നു. ഓരോ സാരിയും കൃത്യമായ അധ്വാനത്തെയാണ് പ്രതിഫലിപ്പിക്കുന്നത്, പൂർത്തിയാക്കാൻ ഏകദേശം മൂന്നര ദിവസത്തോളം എടുക്കുന്നു, ഇത് അദ്ദേഹത്തിൻ്റെ ജോലിയെ സമയമെടുക്കുന്നതും സാംസ്കാരികമായി പ്രാധാന്യമുള്ളതുമാക്കുന്നു.

IITF ആണ് തൻ്റെ പ്രാഥമിക വാർഷിക പ്രദർശനമെന്ന് അദ്ദേഹം പങ്കുവെച്ചു. വരുമാന നേട്ടം വിശദീകരിച്ചുകൊണ്ട് അദ്ദേഹം പറഞ്ഞു, "IITF-ൽ നിന്ന് എൻ്റെ ഏകദേശം രണ്ടോ രണ്ടരയോ മാസത്തെ വരുമാനത്തിന് തുല്യമായ തുക ഞാൻ സമ്പാദിക്കുന്നു."

"ഞങ്ങൾ മറ്റ് മേളകളിലൊന്നും പങ്കെടുക്കാറില്ല, IITF ആണ് ഏറ്റവും പ്രധാനം," അദ്ദേഹം കൂട്ടിച്ചേർത്തു.

അദ്ദേഹത്തിൻ്റെ സാരികൾക്ക് ₹4,000 മുതൽ ₹6,000 വരെയാണ് വില. സങ്കീർണ്ണമായവയ്ക്ക് ₹10,000 വരെ വില വരും. എന്നാൽ, തന്നെ "നളന്ദയിൽ നിന്നുള്ള നെയ്ത്തുകാരൻ" എന്ന് തിരിച്ചറിഞ്ഞ് എല്ലാ വർഷവും എത്തുന്ന സ്ഥിരം ഉപഭോക്താക്കളാണ് തനിക്ക് കരുത്തേകുന്നതെന്ന് അദ്ദേഹം പറയുന്നു.

കർഷകനിൽ നിന്ന് സംരംഭകനിലേക്ക്, വികസിക്കുന്ന അവസരങ്ങൾ

മഹാരാഷ്ട്രയിലെ ഹിംഗോലി ജില്ലയിൽ നിന്നുള്ള 51 വയസ്സുകാരനായ പ്രഹ്ലാദ് രാമറാവു ബോർഗഡും അദ്ദേഹത്തിൻ്റെ ഭാര്യ കാവേരിയും ഭംഗിയായി പാക്ക് ചെയ്ത ജൈവ പയറുവർഗ്ഗങ്ങൾ, മഞ്ഞൾ, ഇഞ്ചി, അച്ചാറുകൾ, മറ്റ് സുഗന്ധവ്യഞ്ജനങ്ങൾ എന്നിവയുമായി സന്ദർശകരെ സ്വാഗതം ചെയ്യുന്നു. ജീവിതകാലം മുഴുവൻ കർഷകനായിരുന്ന ബോർഗഡ്, 2012-ൽ ജൈവകൃഷി സ്വീകരിക്കുകയും 2015-ൽ പ്രാദേശിക സ്വയം സഹായ സംഘത്തിൻ്റെയും സൂക്ഷ്മ, ചെറുകിട, ഇടത്തരം സംരംഭങ്ങളുടെ (MSME) വകുപ്പിൻ്റെയും പിന്തുണയോടെ 'സൂര്യ ഫാർമേഴ്‌സ്' എന്ന സംരംഭം ഔപചാരികമായി ആരംഭിക്കുകയും ചെയ്തു.

"IITF ഓൺലൈനിൽ പരസ്യം ചെയ്തത് കണ്ടപ്പോൾ ഞാൻ മഹാരാഷ്ട്ര ​ഗവൺമെന്റിനെ സമീപിച്ചു. അപേക്ഷാ നടപടികളിൽ അവർ ഞങ്ങളെ സഹായിച്ചു," അദ്ദേഹം പങ്കുവെച്ചു. IITF 2023-ൽ പ്രദർശിപ്പിച്ച ശേഷം ഇത് അദ്ദേഹത്തിൻ്റെ രണ്ടാമത്തെ പങ്കാളിത്തമാണ്. അദ്ദേഹം സരസ് മേള 2024-ലും ഭാഗമായിരുന്നു.

"ഇത്തരം വേദികൾ ഉൽപ്പന്നങ്ങൾ വിൽക്കുന്നതിനെക്കുറിച്ച് മാത്രമല്ല, സമ്പർക്കങ്ങൾ സ്ഥാപിക്കാനും ഉപഭോക്താക്കളുടെ പ്രതീക്ഷകൾ മനസ്സിലാക്കാനും നമ്മുടെ ജോലി എങ്ങനെ പ്രൊഫഷണലായി അവതരിപ്പിക്കണമെന്ന് പഠിക്കാനും  സഹായിക്കുന്നു. കർഷകർ എന്ന നിലയിൽ, ഈ കാര്യങ്ങൾ ഞങ്ങൾ സ്വന്തമായി പഠിക്കില്ല," ബോർഗഡ് പറഞ്ഞു. ബോർഗഡിന്റെ അഭിപ്രായത്തിൽ, ഐഐടിഎഫിൽ നിന്ന് അദ്ദേഹം നേടുന്ന ലാഭം തൻ്റെ നാല് മുതൽ അഞ്ച് മാസം വരെയുള്ള വരുമാനത്തിന് തുല്യമാണ്. കൂടാതെ, വീട്ടിൽ തിരിച്ചെത്തിയ ശേഷമോ ഉപഭോക്താക്കൾ തൻ്റെ ഉൽപ്പന്നങ്ങൾ പരീക്ഷിച്ച ശേഷമോ ഫോൺ വഴിയും അദ്ദേഹത്തിന് ഓർഡറുകൾ ലഭിക്കാറുണ്ട്.

ഒരു പരമ്പരാഗത കലയെ സംരക്ഷിക്കൽ: ലാത്തൂരിൽ നിന്നുള്ള ഗോധാരി

മഹാരാഷ്ട്ര പവലിയനിൽ, ലാത്തൂരിൽ നിന്നുള്ള രുക്മിണി ഗണേഷ്പത് സൽഗെ തൻ്റെ 15 വയസ്സുള്ള മകൾ ദീക്ഷയ്‌ക്കൊപ്പം സന്ദർശകരെ സ്വീകരിക്കുന്നു. തൻ്റെ പ്രദേശത്തെ സ്ത്രീകൾ തലമുറകളായി നിലനിർത്തിപ്പോരുന്ന ചരിത്രപരമായ ഗോധാരി കലാരൂപത്തിൽ നിർമ്മിച്ച കോസടികളാണ് അവരുടെ സ്റ്റാളിൽ പ്രദർശിപ്പിച്ചിരിക്കുന്നത്. എന്നിരുന്നാലും, കുറഞ്ഞ വിലയിൽ വിപണിയിൽ ലഭ്യമാകുന്ന, വൻതോതിൽ ഉൽപ്പാദിപ്പിക്കുന്ന ബദലുകളിൽ നിന്ന് ഈ കലാരൂപം വെല്ലുവിളി നേരിടുന്നു. "ഇത് എൻ്റെ ആദ്യത്തെ IITF പങ്കാളിത്തമാണ്," വർണ്ണാഭമായ ഒരു കോസടിയുടെ അരികുകൾ തലോടിക്കൊണ്ട് രുക്മിണി പറയുന്നു.

"ഓരോ ഗോധാരി കോസടിയും കൈകൊണ്ട് തുന്നിച്ചേർക്കാൻ നാലോ അഞ്ചോ ദിവസം എടുക്കും," അവർ പറഞ്ഞു. ₹1,000 ത്തിനും ₹6,000 ത്തിനും ഇടയിൽ വിലയുള്ള ഇവ ആധികാരികതയും സൂക്ഷ്മമായ കരകൗശല വൈദഗ്ധ്യവും കൊണ്ട് ശ്രദ്ധേയമാണ്.

രുക്മിണിയെ സംബന്ധിച്ചിടത്തോളം, IITF വിൽക്കുന്നതിനുള്ള ഒരിടം എന്നതിലുപരി, കൈകൊണ്ട് നിർമ്മിച്ച ഉൽപ്പന്നങ്ങൾക്ക് മൂല്യം കൽപ്പിക്കുന്ന ഉപഭോക്താക്കൾക്ക് തൻ്റെ കരകൗശലത്തെ പരിചയപ്പെടുത്താനും അന്യംനിന്നുപോയേക്കാവുന്ന ഒരു പാരമ്പര്യത്തെ നിലനിർത്താനും സഹായിക്കുന്നു.

ഝാർഖണ്ഡ്: 400 ആദിവാസി സ്ത്രീകളെ പ്രതിനിധീകരിക്കുന്ന ലാഖ് വളകൾ

സംസ്ഥാന രൂപീകരണത്തിന്റെ 25-ാം വാർഷികം ആഘോഷിക്കുന്ന ഝാർഖണ്ഡാണ് IITF 2025-ലെ പ്രധാന ശ്രദ്ധാകേന്ദ്രം. അവിടുത്തെ പവലിയനിൽ, 49 വയസ്സുകാരനായ കരകൗശല വിദഗ്ധൻ ഝാബർ മാൽ, ഗോത്രവർഗ്ഗക്കാർ തലമുറകളായി കൈമാറിവന്ന പരമ്പരാഗത വിദ്യകൾ ഉപയോഗിച്ച് നിർമ്മിച്ച ലാഖ് വളകൾ പ്രദർശിപ്പിക്കുന്നു. കഴിഞ്ഞ നാലോ അഞ്ചോ വർഷമായി പങ്കെടുക്കുന്ന അദ്ദേഹം, IITF - ൽ ലാക് വളകൾ വിൽക്കുന്ന ഏക കരകൗശല വിദഗ്ധൻ താനാണെന്ന് പറയുന്നു. "ഈ 14 ദിവസങ്ങളിൽ എനിക്ക് വലിയ വരുമാനം ലഭിക്കുന്നില്ല. എല്ലാ വർഷവും എന്നെ കാത്തിരിക്കുന്ന എൻ്റെ സ്ഥിരം ഉപഭോക്താക്കൾക്ക് വേണ്ടിയാണ് ഞാൻ ഐഐടിഎഫിൽ വരുന്നത്. അവരിൽ ചിലർ വളകൾ മുൻകൂട്ടി ഓർഡർ ചെയ്യുകയും ഇവിടെ നിന്ന് ശേഖരിക്കുകയും ചെയ്യും. IITF-ൽ ഇത് എന്റെ ആറാമത്തെ വർഷമാണ്," അദ്ദേഹം പറഞ്ഞു.

"മേളയ്ക്ക് ശേഷം ലഭിക്കുന്ന ഓർഡറുകൾ, ഝാർഖണ്ഡിൽ എന്നോടൊപ്പം പ്രവർത്തിക്കുന്ന ഏകദേശം 400 ആദിവാസി സ്ത്രീകളെ പിന്തുണയ്ക്കുന്നു," മാൽ കൂട്ടിച്ചേർത്തു. കരകൗശലത്തിലൂടെ ഗ്രാമീണ ഉപജീവനമാർഗ്ഗങ്ങൾ നിലനിർത്താൻ സമർപ്പിച്ചിട്ടുള്ള ലാഖ് ഹസ്ത്ശിൽപ് സഹകാരി സമിതി ലിമിറ്റഡിൻ്റെ ഭാഗമാണ് അദ്ദേഹം.

സാമ്പത്തിക ആവാസവ്യവസ്ഥയായി വ്യാപാര മേളകൾ

IITF പോലുള്ള വ്യാപാര മേളകൾ നേരിട്ടുള്ള വിൽപ്പന സുഗമമാക്കുന്നതിനേക്കാൾ വളരെ വിശാലമായ പങ്ക് വഹിക്കുന്നു. ചെറുകിട വ്യാപാരികൾക്ക് ശ്രദ്ധ നേടാനും ദീർഘകാല ഉപഭോക്താക്കളെ നേടാനും വിപണി സ്വഭാവം മനസ്സിലാക്കാനും കഴിയുന്ന സാമ്പത്തിക പിന്തുണ സംവിധാനങ്ങളായി അവ പ്രവർത്തിക്കുന്നു. മേളയ്ക്ക് ശേഷമുള്ള ഓർഡറുകൾ ഉടനടി വിൽപ്പന പോലെ തന്നെ പ്രധാനമാണെന്ന് പ്രദർശകർ പലപ്പോഴും ഊന്നിപ്പറയുന്നു, പലരും നിരവധി മാസത്തെ വരുമാനത്തിന് തുല്യമായ നേട്ടം റിപ്പോർട്ട് ചെയ്യുന്നു.

വികസിത ഭാരത് 2047 എന്ന ഇന്ത്യയുടെ വിശാലമായ കാഴ്ചപ്പാടുമായി 2025-ലെ പതിപ്പ് ചേർന്നുനിൽക്കുന്നു. സാമ്പത്തിക സ്ഥിരത, രാഷ്ട്രീയ ഭദ്രത, വിവിധ ആഗോള പങ്കാളികളുമായുള്ള നിലവിലുള്ള സ്വതന്ത്ര വ്യാപാര കരാറുകൾ ഉൾപ്പെടെയുള്ള വ്യാപാര ബന്ധങ്ങൾ വിപുലപ്പെടുത്തൽ എന്നിവ ഇത് എടുത്തുകാണിക്കുന്നു.

സന്ധ്യാ വിളക്കുകൾ പവലിയനുകളെ പ്രകാശമാനമാക്കുമ്പോൾ, ഓരോ സ്റ്റാളിന് പിന്നിലെയും കഥകൾ ഇന്ത്യയുടെ സംരംഭകത്വ ഭൂമികയുടെ ശ്രദ്ധേയമായ വൈവിധ്യത്തെയാണ് പ്രതിഫലിപ്പിക്കുന്നത്. വളരാനും പഠിക്കാനും സമ്പദ്‌വ്യവസ്ഥയിൽ കൂടുതൽ ആത്മവിശ്വാസത്തോടെ പങ്കുചേരാനും സഹായിക്കുന്ന ഒരു വേദിയിൽ പ്രവേശിക്കുന്നതിനായി നിരവധി പ്രദർശകർ നൂറുകണക്കിന് കിലോമീറ്ററുകൾ യാത്ര ചെയ്യുന്നു. ശ്രീധിക്കും തരുണിനും പ്രഹ്ലാദിനും രുക്മിണിക്കും ഝാബറിനും ഐഐടിഎഫ് എന്നത് പാരമ്പര്യം സംരംഭകത്വവുമായി ഒത്തുചേരുന്ന ഒരിടമാണ്, അവിടെ പ്രാദേശിക നൈപുണ്യങ്ങൾക്ക് ദേശീയ പ്രസക്തി ലഭിക്കുന്നു, കൂടാതെ ചെറുകിട ബിസിനസ്സുകൾക്ക് മുന്നോട്ട് പോകാൻ ആവശ്യമായ ഊർജ്ജം നേടാനും കഴിയുന്നു. 44-ാമത് പതിപ്പിൽ, ഇന്ത്യയുടെ സാമ്പത്തിക വളർച്ച വലിയ വ്യവസായങ്ങളിൽ നിന്ന് മാത്രമല്ല, രാജ്യത്തിൻ്റെ വികസിച്ചുകൊണ്ടിരിക്കുന്ന വിപണിക്ക് സംഭാവന നൽകുന്ന ചെറുകിട സംരംഭകരുടെ സ്ഥിരോത്സാഹം, സർഗ്ഗാത്മകത, അഭിലാഷം എന്നിവയിൽ നിന്നും ഒരുപോലെ ഉയരുന്നുവെന്ന് ഈ മേള സ്ഥാപിക്കുന്നു.

References

https://www.pib.gov.in/PressReleseDetailm.aspx?PRID=2190245

https://www.indiatradefair.com/aahardelhi/uploads/pdfs/Aahar%202025%20Fair%20Guide.pdf

https://www.pib.gov.in/PressReleasePage.aspx?PRID=1555538

https://www.pib.gov.in/PressReleasePage.aspx?PRID=2078289

Click here to see PDF

***

SK