ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್‌ ಶಾ ಅವರು ಅಂಡಮಾನ್‌ ಮತ್ತು ನಿಕೋಬಾರ್‌ ದ್ವೀಪಗಳ ಶ್ರೀ ವಿಜಯ ಪುರಂನಲ್ಲಿ ಗೃಹ ಸಚಿವಾಲಯದ ಸಂಸದೀಯ ಸಲಹಾ ಸಮಿತಿಯ ಸಭೆಯ ಅಧ್ಯಕ್ಷತೆ ವಹಿಸಿದ್ದರು. ಸೆಂಟ್ರಲ್‌ ಫೊರೆನ್ಸಿಕ್‌ ಸೈನ್ಸ್‌ ಲ್ಯಾಬೊರೇಟರಿ (ಸಿಎಫ್‌ಎಸ್‌ಎಲ್‌) ಮತ್ತು ನ್ಯಾಷನಲ್‌ ಫೊರೆನ್ಸಿಕ್‌ ಸೈನ್ಸಸ್‌ ಯೂನಿವರ್ಸಿಟಿ (ಎನ್‌ಎಫ್‌ಎಸ್‌ಯು) ಸಭೆಯ ವಿಷಯವಾಗಿತ್ತು. ಕೇಂದ್ರ ಗೃಹ ವ್ಯವಹಾರಗಳ ರಾಜ್ಯ ಸಚಿವರಾದ ಶ್ರೀ ನಿತ್ಯಾನಂದ ರೈ, ಶ್ರೀ ಬಂಡಿ ಸಂಜಯ್‌ ಕುಮಾರ್‌, ಸಂಸದೀಯ ಸಲಹಾ ಸಮಿತಿಯ ಸದಸ್ಯರು, ಕೇಂದ್ರ ಗೃಹ ಕಾರ್ಯದರ್ಶಿ, ಎನ್‌ಎಫ್‌ಎಸ್‌ಯುನ ಉಪಕುಲಪತಿ, ಪೊಲೀಸ್‌ ಸಂಶೋಧನೆ ಮತ್ತು ಅಭಿವೃದ್ಧಿ ಬ್ಯೂರೋ (ಬಿಪಿಆರ್‌ ಮತ್ತು ಡಿ) ಮಹಾನಿರ್ದೇಶಕರು ಮತ್ತು ಇತರ ಹಿರಿಯ ಅಧಿಕಾರಿಗಳು ಸಭೆಯಲ್ಲಿ ಉಪಸ್ಥಿತರಿದ್ದರು.

ಸಭೆಯನ್ನುದ್ದೇಶಿಸಿ ಮಾತನಾಡಿದ ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್‌ ಶಾ, ಗೃಹ ವ್ಯವಹಾರಗಳ ಸಚಿವಾಲಯವು 2019ರಿಂದ ಇಲ್ಲಿಯವರೆಗೆ ಸಂಸದೀಯ ಸಲಹಾ ಸಮಿತಿಯ 12 ಸಭೆಗಳನ್ನು ನಡೆಸಿದೆ. ಅವು ಉತ್ತಮ ಫಲಿತಾಂಶಗಳನ್ನು ನೀಡಿವೆ ಎಂದು ಹೇಳಿದರು. ಹೊಸ ಕ್ರಿಮಿನಲ್‌ ಕಾನೂನುಗಳನ್ನು ಸಂಪೂರ್ಣವಾಗಿ ಜಾರಿಗೆ ತಂದ ನಂತರ, ಸಮಯಕ್ಕೆ ಸರಿಯಾಗಿ ನ್ಯಾಯ ನೀಡಬೇಕು ಎಂಬುದು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ದೃಷ್ಟಿಕೋನವಾಗಿದೆ ಎಂದು ಅವರು ಹೇಳಿದರು. ಎಫ್‌ಐಆರ್‌ನಿಂದ ಸುಪ್ರೀಂ ಕೋರ್ಟ್‌ವರೆಗೆ ಸಂಪೂರ್ಣ ನ್ಯಾಯಾಂಗ ಪ್ರಕ್ರಿಯೆಯನ್ನು ಮೂರು ವರ್ಷಗಳಲ್ಲಿ ಪೂರ್ಣಗೊಳಿಸುವಂತಹ ವ್ಯವಸ್ಥೆಯನ್ನು ನಾವು 2029 ರ ವೇಳೆಗೆ ರಚಿಸುತ್ತೇವೆ ಎಂದು ಶ್ರೀ ಅಮಿತ್‌ ಶಾ ಹೇಳಿದರು. 2022 ರಿಂದ ಕೈಗೊಂಡ ಸುಧಾರಣೆಗಳು ಈ ದಿಕ್ಕಿನಲ್ಲಿನ ಪ್ರಯತ್ನಗಳಾಗಿವೆ ಎಂದು ಅವರು ಉಲ್ಲೇಖಿಸಿದರು. ಎಫ್‌ಐಆರ್‌ನಿಂದ ಸುಪ್ರೀಂ ಕೋರ್ಟ್‌ ನ್ಯಾಯಮೂರ್ತಿಯವರೆಗೆ ಸಂಪೂರ್ಣ ಪ್ರಕ್ರಿಯೆಯನ್ನು ಮೂರು ವರ್ಷಗಳಲ್ಲಿ ಪೂರ್ಣಗೊಳಿಸುವ ದೃಷ್ಟಿಕೋನವನ್ನು ಸಾಕಾರಗೊಳಿಸಲು, ಗೃಹ ಸಚಿವಾಲಯವು ಈ ಪ್ರಯತ್ನಗಳ 360 ಡಿಗ್ರಿ ಮೇಲ್ವಿಚಾರಣೆಯನ್ನು ಮಾಡುತ್ತಿದೆ ಮತ್ತು ಯಾವುದೇ ನ್ಯೂನತೆಗಳನ್ನು ಪರಿಹರಿಸಲು ಕೆಲಸ ಮಾಡುತ್ತಿದೆ ಎಂದು ಗೃಹ ಸಚಿವರು ಹೇಳಿದರು.

ನ್ಯಾಯ ಒದಗಿಸುವ ಪ್ರಕ್ರಿಯೆಗಾಗಿ ವಿಧಿವಿಜ್ಞಾನ ಸಾಮರ್ಥ್ಯ‌ಗಳನ್ನು ಹೆಚ್ಚಿಸಲು ಮತ್ತು ವಿಸ್ತರಿಸಲು ಭಾರತ ಸರ್ಕಾರವು 2020ರಿಂದಲೇ ವಿಧಿವಿಜ್ಞಾನದ ಮೇಲೆ ಗಮನ ಹರಿಸುತ್ತಿದೆ ಮತ್ತು ಕೆಲಸ ಮಾಡುತ್ತಿದೆ ಎಂದು ಕೇಂದ್ರ ಗೃಹ ಸಚಿವ ಶ್ರೀ ಅಮಿತ್‌ ಶಾ ಹೇಳಿದರು. ಹೊಸ ಕ್ರಿಮಿನಲ್‌ ಕಾನೂನುಗಳು 2024 ರ ಜುಲೈನಿಂದ ಜಾರಿಗೆ ಬಂದವು, ಆದರೆ ನಾವು ಈಗಾಗಲೇ 2020ರಿಂದ ವಿಧಿವಿಜ್ಞಾನದ ದೃಷ್ಟಿಕೋನದಿಂದ ಅವುಗಳನ್ನು ಕಾರ್ಯಗತಗೊಳಿಸುವ ಕೆಲಸವನ್ನು ಪ್ರಾರಂಭಿಸಿದ್ದೇವೆ ಮತ್ತು ಈಗ ಸಕಾರಾತ್ಮಕ ಫಲಿತಾಂಶಗಳನ್ನು ಕಾಣಲಾಗುತ್ತಿದೆ ಎಂದು ಅವರು ಹೇಳಿದರು.

ಹೊಸ ಕ್ರಿಮಿನಲ್‌ ಕಾನೂನುಗಳನ್ನು ಪರಿಚಯಿಸಿದ ನಂತರ, ತನಿಖೆಯ ವೇಗ ಮತ್ತು ಶಿಕ್ಷೆಯ ಪ್ರಮಾಣದಲ್ಲಿ ಹೆಚ್ಚಳವಾಗಿದೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್‌ ಶಾ ಹೇಳಿದರು. ಪಶ್ಚಿಮ ಬಂಗಾಳದಲ್ಲಿಅಪ್ರಾಪ್ತ ಬಾಲಕಿಯ ಮೇಲೆ ಅತ್ಯಾಚಾರ ಎಸಗಿದ ಆರೋಪಿಗೆ ಕೇವಲ 62 ದಿನಗಳಲ್ಲಿ ಮರಣದಂಡನೆ ವಿಧಿಸಲಾಗಿದೆ ಎಂದು ಅವರು ಹೇಳಿದರು. ಬಿಹಾರದ ಸಿವಾನ್‌ ಜಿಲ್ಲೆಯಲ್ಲಿ ನಡೆದ ತ್ರಿವಳಿ ಕೊಲೆ ಪ್ರಕರಣದಲ್ಲಿಇಬ್ಬರು ಆರೋಪಿಗಳಿಗೆ ಕೇವಲ 50 ದಿನಗಳಲ್ಲಿ ಶಿಕ್ಷೆ ವಿಧಿಸಲಾಗಿದೆ. ಈ ಪ್ರಕರಣಗಳು ನಾವು ಸಕಾರಾತ್ಮಕ ಫಲಿತಾಂಶಗಳನ್ನು ಪಡೆಯುತ್ತಿದ್ದೇವೆ ಎಂಬುದನ್ನು ಸಾಬೀತುಪಡಿಸುತ್ತವೆ. ಆದರೆ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುವ ಅವಶ್ಯಕತೆಯಿದೆ ಎಂದು ಶ್ರೀ ಅಮಿತ್‌ ಶಾ ಹೇಳಿದರು.

ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್‌ ಶಾ ಅವರು ಈ ಹಿಂದೆ ನಾವು ಐದು ಸವಾಲುಗಳನ್ನು ಎದುರಿಸಿದ್ದೇವೆ. ಅವುಗಳೆಂದರೆ ವಿಧಿವಿಜ್ಞಾನ ತನಿಖೆಯಲ್ಲಿನ ಪ್ರಮುಖ ತಂತ್ರಜ್ಞಾನದ ಅಂತರ, ಕಸ್ಟಡಿ ಸರಪಳಿಯ ಸಮಸ್ಯೆಗಳಿಂದಾಗಿ ಸಾಕ್ಷ್ಯಗಳ ಸೀಮಿತ ಗುಣಮಟ್ಟ, ಪೊಲೀಸರು ನ್ಯಾಯಾಲಯಗಳಿಗೆ ವಿಧಿವಿಜ್ಞಾನ ತನಿಖಾ ವರದಿಗಳನ್ನು ಸಲ್ಲಿಸದ ನಿದರ್ಶನಗಳು, ನುರಿತ ವೃತ್ತಿಪರರು ಮತ್ತು ವಿಧಿವಿಜ್ಞಾನ ಪ್ರಯೋಗಾಲಯಗಳ ಕೊರತೆ ಮತ್ತು ರಾಷ್ಟ್ರವ್ಯಾಪಿ ಮಾನದಂಡಗಳ ಕೊರತೆ ಸೇರಿವೆ ಎಂದು ಹೇಳಿದರು. ಹೊಸ ಕಾನೂನುಗಳ ನಿಬಂಧನೆಗಳಿಗೆ ಅನುಗುಣವಾಗಿ, ವಿಧಿವಿಜ್ಞಾನ ಪ್ರಯೋಗಾಲಯಗಳು ಈಗ ತಮ್ಮ ವರದಿಗಳನ್ನು ನೇರವಾಗಿ ನ್ಯಾಯಾಲಯಕ್ಕೆ ಕಳುಹಿಸುತ್ತವೆ ಮತ್ತು ಪೊಲೀಸರಿಗೆ ಪ್ರತಿಯನ್ನು ಒದಗಿಸುತ್ತವೆ ಎಂದು ಅವರು ಹೇಳಿದರು. ದೇಶಾದ್ಯಂತ ವಿಧಿವಿಜ್ಞಾನ ಪ್ರಯೋಗಾಲಯಗಳ ಜಾಲವನ್ನು ನಿರ್ಮಿಸಲು ಭಾರತ ಸರ್ಕಾರ ಮತ್ತು ರಾಜ್ಯ ಸರ್ಕಾರಗಳು ಮುಂದಿನ ಐದು ವರ್ಷಗಳಲ್ಲಿ30 ಸಾವಿರ ಕೋಟಿ ರೂಪಾಯಿಗಳನ್ನು ಹೂಡಿಕೆ ಮಾಡಲಿವೆ ಎಂದು ಶ್ರೀ ಅಮಿತ್‌ ಶಾ ಹೇಳಿದರು. ಇದರೊಂದಿಗೆ, ರಾಷ್ಟ್ರವ್ಯಾಪಿ ಮಾನದಂಡಗಳ ಕೊರತೆಯನ್ನು ಪರಿಹರಿಸಲು ವೈಜ್ಞಾನಿಕ ಕಾರ್ಯವಿಧಾನವನ್ನು ಸ್ಥಾಪಿಸಲಾಗಿದೆ. ಉತ್ತಮ ರೂಢಿಗಳು ಮತ್ತು ನ್ಯೂನತೆಗಳನ್ನು ಹಂಚಿಕೊಳ್ಳುವ ಮೂಲಕ, ರಾಷ್ಟ್ರವ್ಯಾಪಿ ಮಾನದಂಡವನ್ನು ನಿರ್ಧರಿಸಲಾಗುವುದು ಎಂದು ಅವರು ಉಲ್ಲೇಖಿಸಿದರು.

ವೈಜ್ಞಾನಿಕ ಸುಧಾರಣೆಗಳು, ಸುರಕ್ಷಿತ ಡೇಟಾಬೇಸ್‌ಗಳ ಅಭಿವೃದ್ಧಿ, ತಂತ್ರಜ್ಞಾನ ಮತ್ತು ಮಾನವ ಸಂಪನ್ಮೂಲ ಸಾಮರ್ಥ್ಯ‌ ವರ್ಧನೆ, ಸಂಸ್ಥೆಗಳ ಸಬಲೀಕರಣ ಮತ್ತು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ನಡುವೆ ಉತ್ತಮ ಸಮನ್ವಯದತ್ತ ನಾವು ಕ್ರಮಗಳನ್ನು ತೆಗೆದುಕೊಂಡಿದ್ದೇವೆ ಎಂದು ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರು ಹೇಳಿದರು. ಹೊಸ ಕ್ರಿಮಿನಲ್‌ ಕಾನೂನುಗಳು ತಂತ್ರಜ್ಞಾನಕ್ಕೆ ಪ್ರಾಮುಖ್ಯತೆ ನೀಡಿವೆ ಎಂದು ಅವರು ಹೇಳಿದರು. ಇ-ಸಮನ್ಸ್‌ ಮತ್ತು ಇ-ಸಾಕ್ಷ್ಯದಂತಹ ಸುಧಾರಣೆಗಳನ್ನು ಪರಿಚಯಿಸಲಾಗಿದೆ. ಪೊಲೀಸ್‌, ನ್ಯಾಯಾಲಯಗಳು, ಕಾರಾಗೃಹಗಳು, ವಿಧಿವಿಜ್ಞಾನ ಮತ್ತು ಪ್ರಾಸಿಕ್ಯೂಷನ್‌ ಎಂಬ ಐದು ಸ್ತಂಭಗಳನ್ನು ಸಂಪೂರ್ಣವಾಗಿ ಆಧುನೀಕರಿಸುವ ಮೂಲಕ ವಿದ್ಯುನ್ಮಾನವಾಗಿ ಡೇಟಾವನ್ನು ಸಂಗ್ರಹಿಸಲು, ಅವುಗಳ ನಡುವೆ ಡೇಟಾ ಪರಸ್ಪರ ಕಾರ್ಯಸಾಧ್ಯತೆಯನ್ನು ಸಕ್ರಿಯಗೊಳಿಸಲು ಮತ್ತು ಕೃತಕ ಬುದ್ಧಿಮತ್ತೆ (ಎಐ) ಆಧಾರದ ಮೇಲೆ ನಿರಂತರ ವಿಶ್ಲೇಷಣೆಯನ್ನು ನಡೆಸಲು ದೃಢವಾದ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ ಎಂದು ಅವರು ಹೇಳಿದರು. ಏಳು ವರ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಶಿಕ್ಷೆಯಾಗಿರುವ ಎಲ್ಲಾ ಕ್ರಿಮಿನಲ್‌ ಪ್ರಕರಣಗಳಲ್ಲಿ ವಿಧಿವಿಜ್ಞಾನ ಭೇಟಿಯನ್ನು ಕಡ್ಡಾಯಗೊಳಿಸಲಾಗಿದೆ ಎಂದು ಅವರು ಉಲ್ಲೇಖಿಸಿದರು.

ನಾವು ಕೇವಲ ಸುತ್ತೋಲೆಗಳ ಮೂಲಕ ಮಾತ್ರವಲ್ಲ, ನ್ಯಾಯಾಂಗ ದೃಷ್ಟಿಕೋನದಿಂದಲೂ ಕಸ್ಟಡಿ ಸರಪಳಿಯನ್ನು ಬಲಪಡಿಸಿದ್ದೇವೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್‌ ಶಾ ಹೇಳಿದರು. ಪೊಲೀಸರ ವಿರುದ್ಧ ಯಾವುದೇ ಸುಳ್ಳು ಆರೋಪಗಳನ್ನು ಮಾಡದಂತೆ ವಶಪಡಿಸಿಕೊಳ್ಳುವಿಕೆಯ ವಿಡಿಯೊಗ್ರಫಿಯನ್ನು ಕಡ್ಡಾಯಗೊಳಿಸಲಾಗಿದೆ. ಡಿಜಿಟಲ್‌ ಮತ್ತು ವಿದ್ಯುನ್ಮಾನ ಪುರಾವೆಗಳನ್ನು ಈಗ ಸ್ಪಷ್ಟವಾಗಿ ವ್ಯಾಖ್ಯಾನಿಸಲಾಗಿದೆ ಎಂದು ಅವರು ಹೇಳಿದರು. ಡಿಜಿಟಲ್‌ ಮತ್ತು ವಿಧಿವಿಜ್ಞಾನ ಸಾಕ್ಷ್ಯಗಳಿಗೆ ನಿರ್ಣಾಯಕ ಕಾನೂನು ಆಧಾರವನ್ನು ಒದಗಿಸುವ ಮೂಲಕ, ಇದನ್ನು ಸ್ವೀಕಾರಾರ್ಹ ಪುರಾವೆಯಾಗಿ ಸ್ಥಾಪಿಸಲಾಗಿದೆ. ಸೈಬರ್‌ ಅಪರಾಧ, ಸಂಘಟಿತ ಅಪರಾಧ, ಭಯೋತ್ಪಾದನೆ ಮತ್ತು ಡಿಜಿಟಲ್‌ ವಂಚನೆಯನ್ನು ಈ ಹಿಂದೆ ಸ್ಪಷ್ಟವಾಗಿ ವ್ಯಾಖ್ಯಾನಿಸಿರಲಿಲ್ಲ, ಆದರೆ ನಾವು ಈಗ ಅವುಗಳನ್ನು ಸ್ಪಷ್ಟವಾಗಿ ವ್ಯಾಖ್ಯಾನಿಸಿದ್ದೇವೆ, ಆ ಮೂಲಕ ನ್ಯಾಯಾಲಯಗಳಿಗೆ ಬೂದು ಪ್ರದೇಶಗಳನ್ನು ಕಡಿಮೆ ಮಾಡಿದ್ದೇವೆ ಎಂದು ಅವರು ಹೇಳಿದರು. ಅನುಪಸ್ಥಿತಿಯಲ್ಲಿ ವಿಚಾರಣೆಯ ಅನುಷ್ಠಾನವು ಆರೋಪಿಗಳು ದೇಶದಿಂದ ಪಲಾಯನ ಮಾಡುವ ಪ್ರವೃತ್ತಿಯನ್ನು ನಿಗ್ರಹಿಸುತ್ತದೆ. ಹೊಸ ಕ್ರಿಮಿನಲ್‌ ಕಾನೂನುಗಳಲ್ಲಿಮಹಿಳೆಯರು ಮತ್ತು ಮಕ್ಕಳ ಮೇಲಿನ ಅಪರಾಧಗಳಿಗೆ ಆದ್ಯತೆ ನೀಡಲಾಗಿದೆ ಎಂದು ಅವರು ಉಲ್ಲೇಖಿಸಿದರು. ಇ-ಎಫ್‌ಐಆರ್‌ ಮತ್ತು ಶೂನ್ಯ ಎಫ್‌ಐಆರ್‌ ಬಡವರು ಮತ್ತು ಮಹಿಳೆಯರಿಗೆ ದೊಡ್ಡ ಪರಿಹಾರವನ್ನು ಪ್ರತಿನಿಧಿಸುತ್ತದೆ ಎಂದು ಅವರು ಹೇಳಿದರು.

ನವೆಂಬರ್‌ 2025ರ ಹೊತ್ತಿಗೆ, ದೇಶದ ಪ್ರತಿಯೊಂದು ಪೊಲೀಸ್‌ ಠಾಣೆಯನ್ನು ಅಪರಾಧ ಮತ್ತು ಅಪರಾಧ ಪತ್ತೆಹಚ್ಚುವಿಕೆ ಜಾಲ ಮತ್ತು ವ್ಯವಸ್ಥೆಗಳು (ಸಿಸಿಟಿಎನ್‌ಎಸ್‌) ಗೆ ಆನ್‌ಲೈನ್‌ ತರಲಾಗಿದೆ ಎಂದು ಕೇಂದ್ರ ಗೃಹ ಸಚಿವ ಶ್ರೀ ಅಮಿತ್‌ ಶಾ ಹೇಳಿದರು. ಇಂದು ಪ್ರತಿ ಎಫ್‌ಐಆರ್‌ ಸೆಂಟ್ರಲ್‌ ಸರ್ವರ್ ನಲ್ಲಿ ಲಭ್ಯವಿದೆ ಎಂದು ಅವರು ಹೇಳಿದರು. ಬರಲಿರುವ ದಿನಗಳಲ್ಲಿಅಪರಾಧಗಳ ಮ್ಯಾಪಿಂಗ್‌ಗಾಗಿ ಕಾರ್ಯಾಚರಣಾ ವಿಧಾನ ಬ್ಯೂರೋವನ್ನು ಸ್ಥಾಪಿಸಲಾಗುವುದು. 7 ಲಕ್ಷ ಎಫ್‌ಐಆರ್‌ಗಳ ದತ್ತಾಂಶದೊಂದಿಗೆ ಸರಿಸುಮಾರು 36 ಕೋಟಿ ಪರಂಪರೆಯ ದತ್ತಾಂಶವು ಆನ್‌ಲೈನಲ್ಲಿ ಲಭ್ಯವಿದೆ. 22 ಸಾವಿರ ನ್ಯಾಯಾಲಯಗಳನ್ನು ಇ-ನ್ಯಾಯಾಲಯಗಳಿಗೆ ಸಂಪರ್ಕಿಸಲಾಗಿದೆ. ಇ-ಕಾರಾಗೃಹಗಳಲ್ಲಿ, ದೇಶಾದ್ಯಂತದ ಜೈಲುಗಳ 2 ಕೋಟಿ 20 ಲಕ್ಷ  ಕೈದಿಗಳ ಡೇಟಾವು ಕೇಂದ್ರ ಸರ್ವರ್ನಲ್ಲಿಲಭ್ಯವಿದೆ. ಇ-ಪ್ರಾಸಿಕ್ಯೂಷನ್‌ನಲ್ಲಿ, ಸುಮಾರು 2 ಕೋಟಿ ಪ್ರಾಸಿಕ್ಯೂಷನ್‌ ಪ್ರಕರಣಗಳ ದತ್ತಾಂಶ ಲಭ್ಯವಿದೆ. ಹೊಸ ಪ್ರಾಸಿಕ್ಯೂಷನ್‌ ವ್ಯವಸ್ಥೆಯಲ್ಲಿ, ಎಲ್ಲಾ ಪ್ರಕರಣಗಳ ಮಾಹಿತಿಯನ್ನು ಈಗ ಇ-ಪ್ರಾಸಿಕ್ಯೂಷನ್‌ ನಲ್ಲಿಲಭ್ಯವಾಗುವಂತೆ ಮಾಡಲಾಗುತ್ತಿದೆ. ಇ-ಫೋರೆನ್ಸಿಕ್‌ನಲ್ಲಿ30 ಲಕ್ಷ  54 ಸಾವಿರ ಪ್ರಕರಣಗಳ ದತ್ತಾಂಶ ಲಭ್ಯವಿದೆ. ಇದರಿಂದ ಪೊಲೀಸರು ಅದನ್ನು ಬಳಸಬಹುದು. ನ್ಯಾಷನಲ್‌ ಆಟೋಮೇಟೆಡ್‌ ಫಿಂಗರ್‌ಪ್ರಿಂಟ್‌ ಐಡೆಂಟಿಫಿಕೇಶನ್‌ ಸಿಸ್ಟಮ್‌ (ಎನ್‌ಎಎಫ್‌ಐಎಸ್‌) ನಲ್ಲಿ1 ಕೋಟಿ 21 ಲಕ್ಷ  ಬೆರಳಚ್ಚುಗಳು ಲಭ್ಯವಿದ್ದು, ಇದು ಪ್ರಕರಣಗಳ ತನಿಖೆಯಲ್ಲಿ ಪೊಲೀಸರಿಗೆ ಸಹಾಯ ಮಾಡುತ್ತಿದೆ. 9 ಲಕ್ಷ  44 ಸಾವಿರ ಮಾದಕವಸ್ತು ಅಪರಾಧಗಳ ದತ್ತಾಂಶ ಆನ್‌ ಲೈನ್‌ ನಲ್ಲಿಲಭ್ಯವಿದೆ. ಮಾನವ ಕಳ್ಳಸಾಗಣೆಯಲ್ಲಿ ಭಾಗಿಯಾಗಿರುವ 3 ಲಕ್ಷ  65 ಸಾವಿರ ಅಪರಾಧಗಳ ಡೇಟಾವನ್ನು ಆನ್‌ಲೈನ್‌ನಲ್ಲಿ ಮಾಡಲಾಗಿದೆ. ಕಾನೂನುಬಾಹಿರ ಚಟುವಟಿಕೆಗಳು (ತಡೆಗಟ್ಟುವಿಕೆ) ಕಾಯ್ದೆ (ಯುಎಪಿಎ) ಅಡಿಯಲ್ಲಿ ದಾಖಲಾದ ಎಲ್ಲಾ ಭಯೋತ್ಪಾದನಾ ಪ್ರಕರಣಗಳ ಡೇಟಾವನ್ನು ಎನ್‌ಐಎ ಡೇಟಾಬೇಸ್ನಲ್ಲಿ ಪ್ರತ್ಯೇಕವಾಗಿ ದಾಖಲಿಸಲಾಗುತ್ತಿದೆ ಎಂದು ಅವರು ಹೇಳಿದರು.

ಪ್ರಸ್ತುತ ದೇಶದಲ್ಲಿ7 ಸಿಎಫ್‌ಎಸ್‌ಎಲ್‌ಗಳು (ಕೇಂದ್ರೀಯ ವಿಧಿವಿಜ್ಞಾನ ಪ್ರಯೋಗಾಲಯಗಳು) ಇದ್ದು, 8 ಹೊಸ ಸಿಎಫ್‌ಎಸ್‌ಎಲ್‌ಗಳನ್ನು ಸ್ಥಾಪಿಸಲಾಗುತ್ತಿದೆ ಎಂದು ಕೇಂದ್ರ ಗೃಹ ಸಚಿವರಾದ ಶ್ರೀ ಅಮಿತ್‌ ಶಾ ಹೇಳಿದರು. ಎನ್‌ಎಫ್‌ಎಸ್‌ಯು ಅಥವಾ ಸಿಎಫ್‌ಎಸ್‌ಎಲ್‌ ಇಲ್ಲದೆ ಯಾವುದೇ ರಾಜ್ಯ ಅಥವಾ ಕೇಂದ್ರಾಡಳಿತ ಪ್ರದೇಶ ಉಳಿಯುವುದಿಲ್ಲಎಂದು ಅವರು ಹೇಳಿದರು. ರಾಜ್ಯಗಳ ಎಫ್‌.ಎಸ್‌.ಎಲ್‌.ಗಳು, ವಿಧಿವಿಜ್ಞಾನ ವ್ಯಾನ್‌ಗಳು ಮತ್ತು ಪ್ರಾದೇಶಿಕ ಪ್ರಯೋಗಾಲಯಗಳನ್ನು ಬಲಪಡಿಸಲು ನಾವು ಅಂದಾಜು 1,000 ಕೋಟಿ ರೂಪಾಯಿಗಳ ಅನುದಾನವನ್ನು ಒದಗಿಸಿದ್ದೇವೆ ಎಂದು ಹೇಳಿದರು. ವಿಧಿವಿಜ್ಞಾನ ವಿಭಾಗಗಳ ಪ್ರಮಾಣೀಕರಣಕ್ಕಾಗಿ ಮಾರ್ಗಸೂಚಿಗಳನ್ನು ಹೊರಡಿಸಲಾಗಿದೆ ಎಂದು ಶ್ರೀ ಅಮಿತ್‌ ಶಾ ಹೇಳಿದರು. ಇ-ವಿಧಿವಿಜ್ಞಾನಕ್ಕಾಗಿ ಐಟಿ ವೇದಿಕೆಯನ್ನು ಸಹ ಪ್ರಾರಂಭಿಸಲಾಗಿದೆ ಮತ್ತು ಸಿಎಫ್‌ಎಸ್‌ಎಲ್‌ಗಳು ಸೇರಿದಂತೆ ದೇಶಾದ್ಯಂತ 143 ಪ್ರಯೋಗಾಲಯಗಳನ್ನು ಈಗಾಗಲೇ ಇದರೊಂದಿಗೆ ಸಂಪರ್ಕಿಸಲಾಗಿದೆ.

2029 ರ ವೇಳೆಗೆ 35 ಸಾವಿರ ವಿದ್ಯಾರ್ಥಿಗಳು ಎನ್‌ಎಫ್‌ಎಸ್‌ಯುನಲ್ಲಿ ವಿಧಿವಿಜ್ಞಾನ ಅಧ್ಯಯನ ಮಾಡಲಿದ್ದಾರೆ ಮತ್ತು 3-4 ವರ್ಷಗಳಲ್ಲಿನಾವು ಗರಿಷ್ಠ ಮಟ್ಟವನ್ನು ತಲುಪುತ್ತೇವೆ ಎಂದು ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರು ಹೇಳಿದರು. ಎನ್‌ಎಫ್‌ಎಸ್‌ಯು ಶೇ. 100 ರಷ್ಟು ಉದ್ಯೋಗವನ್ನು ಹೊಂದಿದೆ ಎಂದು ಅವರು ಹೇಳಿದರು. ಇಲ್ಲಿಯವರೆಗೆ, ಎನ್‌ಎಫ್‌ಎಸ್‌ಯುನ 14 ಕ್ಯಾಂಪಸ್‌ಗಳನ್ನು ಸ್ಥಾಪಿಸಲಾಗಿದೆ ಮತ್ತು ಈ ವಿಶ್ವವಿದ್ಯಾಲಯವು ಪ್ರಸ್ತುತ 100ಕ್ಕೂ ಹೆಚ್ಚು ತರಬೇತಿ ಕಾರ್ಯಕ್ರಮಗಳನ್ನು ನಡೆಸುತ್ತಿದೆ ಎಂದು ಗೃಹ ಸಚಿವರು ಹೇಳಿದರು. ಕಳೆದ 4 ವರ್ಷಗಳಲ್ಲಿ16 ಸಾವಿರಕ್ಕೂ ಹೆಚ್ಚು ಅಧಿಕಾರಿಗಳಿಗೆ ತರಬೇತಿ ನೀಡಲಾಗಿದೆ ಮತ್ತು ಮುಂದಿನ 4 ವರ್ಷಗಳಲ್ಲಿಈ ಸಂಖ್ಯೆಯನ್ನು ಮೂರು ಪಟ್ಟು ಹೆಚ್ಚಿಸುವ ಗುರಿಯನ್ನು ಹೊಂದಲಾಗಿದೆ ಎಂದು ಅವರು ಹೇಳಿದರು.

ಎನ್‌ಎಫ್‌ಎಸ್‌ಯು ಇದುವರೆಗೆ 46 ಪೇಟೆಂಟ್‌ಗಳನ್ನು ನೋಂದಾಯಿಸಿದೆ. ಅದರಲ್ಲಿ 30 ಪೇಟೆಂಟ್‌ಗಳನ್ನು 2024ರಲ್ಲೇ ನೋಂದಾಯಿಸಲಾಗಿದೆ ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. 96 ದೇಶಗಳು ಎನ್‌ಎಫ್‌ಎಸ್‌ಯು ನೊಂದಿಗೆ 103 ತಿಳಿವಳಿಕೆ ಒಪ್ಪಂದಗಳಿಗೆ ಸಹಿ ಹಾಕಿವೆ ಎಂದು ಅವರು ಹೇಳಿದರು. ಹೆಚ್ಚುವರಿಯಾಗಿ, ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ 117 ಸಂಸ್ಥೆಗಳು ಎನ್‌ಎಫ್‌ಎಸ್‌ಯುನೊಂದಿಗೆ ಒಪ್ಪಂದಗಳನ್ನು ಮಾಡಿಕೊಂಡಿವೆ. ದೀರ್ಘಕಾಲೀನ ಮಾರ್ಗಸೂಚಿಯಲ್ಲಿ, ಸಮಗ್ರ ವಿಧಿವಿಜ್ಞಾನ ರಚನೆಯನ್ನು ರಚಿಸುವ ಕೆಲಸವನ್ನು ಕೈಗೊಳ್ಳಲಾಗಿದೆ ಮತ್ತು ನಾವು ನಾವೀನ್ಯತೆಯನ್ನು ಉತ್ತೇಜಿಸುತ್ತಿದ್ದೇವೆ ಎಂದು ಶ್ರೀ ಅಮಿತ್‌ ಶಾ ಹೇಳಿದರು. ಮುಂಬರುವ ದಿನಗಳಲ್ಲಿ, ನಾವು ವಿಧಿವಿಜ್ಞಾನ ಗುಪ್ತಚರದಲ್ಲಿಉತ್ತಮ ಕೆಲಸ ಮಾಡುತ್ತೇವೆ. ಇದರೊಂದಿಗೆ, ವಿಧಿವಿಜ್ಞಾನ ಫಲಿತಾಂಶಗಳ ಕೃತಕ ಬುದ್ಧಿಮತ್ತೆ ಆಧಾರಿತ ವಿಶ್ಲೇಷಣೆ ಮತ್ತು ಸಾಫ್ಟ್‌ವೇರ್‌ನ ನಿರಂತರ ನವೀಕರಣವನ್ನು ಸಹ ಕೈಗೊಳ್ಳಲಾಗುತ್ತದೆ.

ಮೂರು ಹೊಸ ಕ್ರಿಮಿನಲ್‌ ಕಾನೂನುಗಳ ಅನುಷ್ಠಾನದ ನಂತರ, ತ್ವರಿತ ಫಲಿತಾಂಶಗಳನ್ನು ನೀಡುವ ಪ್ರಯತ್ನಗಳಿಂದ ಉತ್ತಮ ಆರಂಭಿಕ ಫಲಿತಾಂಶಗಳನ್ನು ಕಾಣಲಾಗುತ್ತಿದೆ ಎಂದು ಗೃಹ ಸಚಿವರು ಹೇಳಿದರು.

*****