કેન્દ્રીય ગૃહમંત્રી અને સહકારિતા મંત્રી શ્રી અમિત શાહે આજે શ્રી વિજયપુરમમાં અંદામાન અને નિકોબાર પ્રશાસનના વિવિધ વિકાસ પ્રોજેક્ટ્સનું ઉદ્ઘાટન અને શિલાન્યાસ કર્યો હતો. આ પ્રસંગે કેન્દ્રીય ગૃહ રાજ્ય મંત્રી શ્રી નિત્યાનંદ રાય, શ્રી બંડી સંજય કુમાર, અંદામાન અને નિકોબાર ટાપુઓના લેફ્ટનન્ટ ગવર્નર એડમિરલ ડી. કે. જોશી (નિવૃત્ત) અને કેન્દ્રીય ગૃહ સચિવ શ્રી ગોવિંદ મોહન સહિત અન્ય અનેક મહાનુભાવો ઉપસ્થિત રહ્યા હતા. કેન્દ્રીય ગૃહમંત્રી અને સહકારિતા મંત્રી શ્રી અમિત શાહે શ્રી વિજયપુરમમાં ત્રણ નવા કાયદાઓ પર આધારિત પ્રદર્શનનું ઉદ્ઘાટન પણ કર્યું હતું.

આ પ્રસંગે પોતાના સંબોધનમાં કેન્દ્રીય ગૃહમંત્રી અને સહકારિતા મંત્રી શ્રી અમિત શાહે જણાવ્યું હતું કે, આ જ ભૂમિ પર ભારતની આઝાદી માટે લડનારા અનેક શહીદ સ્વતંત્રતા સેનાનીઓએ અંગ્રેજો દ્વારા બનાવવામાં આવેલી સેલ્યુલર જેલમાં તેમના જીવનના વર્ષો વિતાવ્યા હતા. તેમણે કહ્યું કે અનેક લોકોએ અહીં અંતિમ શ્વાસ લીધા, ભારતની આઝાદીની લડતને મજબૂત કરી અને અનેક વીર આત્માઓને ફાંસી આપવામાં આવી. તેમણે કહ્યું કે આજે સેલ્યુલર જેલમાં વીર સાવરકરનું સ્મારક અને પ્રજ્વલિત અખંડ જ્યોત સમગ્ર વિશ્વને જણાવે છે કે અહીં અનેક મહાન આત્માઓએ પોતાના જીવનનું બલિદાન આપ્યું છે. શ્રી શાહે કહ્યું કે નેતાજી સુભાષચંદ્ર બોઝે આઝાદ ભારતના આ સ્થળે સૌપ્રથમ ત્રિરંગો લહેરાવ્યો હતો અને તેમની યાદમાં અને તેમના શબ્દોના સન્માનમાં પ્રધાનમંત્રી શ્રી નરેન્દ્ર મોદીએ બે ટાપુઓના નામ શહીદ અને સ્વરાજ રાખ્યા છે. તેમણે કહ્યું કે પ્રધાનમંત્રી મોદીએ આ દ્વીપસમૂહના દરેક ટાપુનું નામ ભારતીય સ્વાતંત્ર્ય સંગ્રામના નાયકો પર રાખવાનું કાર્ય હાથ ધર્યું છે. તેમણે કહ્યું કે આ ભૂમિ આઝાદ ભારતના દરેક નાગરિક માટે તીર્થસ્થળ છે, કારણ કે અહીં જ આપણા સ્વાતંત્ર્ય સેનાનીઓએ વેદનાને શક્તિ તરીકે, એકાંતને સંકલ્પ તરીકે અને યાતનાને આઝાદીના માર્ગ તરીકે સહન કરી હતી અને અંતે આઝાદી મેળવી હતી.

શ્રી અમિત શાહે જણાવ્યું હતું કે પ્રધાનમંત્રી મોદીએ આ ટાપુને વ્યૂહાત્મક શક્તિમાં બદલી નાખ્યો છે. તેમણે કહ્યું કે અગાઉની સરકાર અંદામાન અને નિકોબારને તિજોરી પર બોજ માનતી હતી; મોદી સરકાર હેઠળ, તે દેશની તિજોરીમાં યોગદાન આપશે. તેમણે કહ્યું કે છેલ્લા 11 વર્ષોમાં જોવા મળેલો આ બદલાવ દેશના દરેક કણને ભારત માતા માનીને રાષ્ટ્રની સેવામાં પોતાની જાતને સમર્પિત કરવાના સંકલ્પનું પરિણામ છે. તેમણે કહ્યું કે આ વિઝનને અનુરૂપ આજે અહીં નવ મોટા વિકાસ પ્રોજેક્ટ્સનું ઉદ્ઘાટન અને બે પ્રોજેક્ટ્સનો શિલાન્યાસ કરવામાં આવ્યો હતો અને એક જ દિવસમાં આ ટાપુને ₹373 કરોડના વિકાસ કાર્યોની ભેટ આપવામાં આવી હતી. શ્રી શાહે જણાવ્યું હતું કે આ વિકાસ પ્રોજેક્ટ્સમાં ₹229 કરોડના ખર્ચ સાથે ઈન્ટિગ્રેટેડ કમાન્ડ એન્ડ કંટ્રોલ સેન્ટરનો સમાવેશ થાય છે. તેમણે કહ્યું કે ₹33 કરોડના ખર્ચે જિલ્લા હોસ્પિટલના ફેઝ-1નું ઉદ્ઘાટન, ફોરેન્સિક સાયન્સ લેબોરેટરીનું ઉદ્ઘાટન અને ₹50 કરોડના ખર્ચે અન્ય છ યોજનાઓનું ઉદ્ઘાટન પણ આજે કરવામાં આવ્યું હતું. કેન્દ્રીય ગૃહમંત્રીએ કહ્યું કે આ વિકાસ પ્રોજેક્ટ્સ દ્વારા આજે આપણા ટાપુઓના વિકાસમાં એક નવો અધ્યાય શરૂ થઈ રહ્યો છે.

કેન્દ્રીય ગૃહમંત્રી અને સહકારિતા મંત્રીએ જણાવ્યું હતું કે આજે અહીં ત્રણ નવા ફોજદારી કાયદાઓને પ્રદર્શિત કરતા પ્રદર્શનનું પણ ઉદ્ઘાટન કરવામાં આવ્યું હતું. તેમણે કહ્યું કે દરેકે આ પ્રદર્શનની મુલાકાત લેવી જોઈએ જેથી કરીને તેઓ આગામી દિવસોમાં ફોજદારી ન્યાય પ્રણાલીમાં આવનારા મૂળભૂત ફેરફારો અને ટેકનોલોજીને મળેલા કાયદાકીય સમર્થન વિશે સમજ મેળવી શકે. તેમણે કહ્યું કે અહીંના તમામ વકીલો, યુવાન વિદ્યાર્થીઓ અને ખાસ કરીને મહિલાઓએ આ પ્રદર્શન જોવું જોઈએ.

શ્રી અમિત શાહે જણાવ્યું હતું કે પ્રધાનમંત્રી મોદીએ દેશને વસાહતી શાસનના પ્રતીકોમાંથી મુક્ત કરવા માટે દેશવ્યાપી અભિયાન શરૂ કર્યું છે અને તેથી જ પોર્ટ બ્લેયરનું નામ બદલીને શ્રી વિજયપુરમ રાખવામાં આવ્યું છે અને ટાપુઓના નામ આપણા બહાદુર સ્વાતંત્ર્ય સેનાનીઓ પર રાખવામાં આવ્યા છે. તેમણે કહ્યું કે આજે અંદામાન અને નિકોબાર ટાપુઓ એક રીતે આપણી સ્વતંત્રતા, સાર્વભૌમત્વ, દરિયાઈ શક્તિ અને આર્થિક પ્રવૃત્તિઓના કેન્દ્ર તરીકે ઉભરી રહ્યા છે. તેમણે કહ્યું કે અંદામાન અને નિકોબાર ટાપુઓ બ્લુ ઇકોનોમી અને પ્રવાસન માટે અપાર સંભાવનાઓ પ્રદાન કરે છે, સાથે જ તે દેશના દરેક પ્રદેશના સ્વાતંત્ર્ય સેનાનીઓની યાદોને પણ પ્રતિબિંબિત કરે છે. શ્રી શાહે કહ્યું કે મોદી સરકાર આ ટાપુને વિકસિત ભારતનો અભિન્ન અંગ બનાવવા માટે પ્રતિબદ્ધ છે, સાથે જ તેના વારસાને જાળવી રાખવા, પર્યાવરણનું રક્ષણ કરવા અને સુરક્ષાને મજબૂત કરવા માટે પણ પ્રતિબદ્ધ છે.

કેન્દ્રીય ગૃહમંત્રીએ કહ્યું કે પ્રવાસન હોય કે પર્યાવરણ, મત્સ્યઉદ્યોગ હોય કે કૃષિ, MSMEs હોય કે સ્વચ્છ ઊર્જા, અહીં દરેક ક્ષેત્રમાં વિકાસ થવા લાગ્યો છે. તેમણે કહ્યું કે ગ્રેટ નિકોબારમાં આગામી પ્રોજેક્ટ અંદામાન અને નિકોબાર ટાપુઓને વિશ્વના નકશા પર એક મહત્વપૂર્ણ વૈશ્વિક વેપાર હબ અને વ્યૂહાત્મક સુરક્ષાનું કેન્દ્ર બનાવશે. તેમણે કહ્યું કે આ પ્રોજેક્ટ પૂર્ણ થયાના એક દાયકા પછી આ સ્થળ વિશ્વના પ્રવાસીઓ દ્વારા સૌથી વધુ મુલાકાત લેવાયેલા સ્થળોમાંનું એક બની જશે.

શ્રી અમિત શાહે જણાવ્યું હતું કે સ્કુબા ડાઇવિંગ માટે ISO ધોરણો અનુસાર અંદામાન અને નિકોબાર ટાપુઓને અપગ્રેડ કરીને આ સ્થળને સ્કુબા ડાઇવિંગ અને એડવેન્ચર વોટર સ્પોર્ટ્સ માટે વૈશ્વિક ગંતવ્ય તરીકે વિકસાવવા માટે અનેક પગલાં લેવામાં આવ્યા છે. તેમણે કહ્યું કે પ્રધાનમંત્રી મોદીની ‘એક પેડ મા કે નામ’ ની અપીલ હેઠળ અહીં 24 લાખ વૃક્ષો વાવવામાં આવ્યા છે, જે પર્યાવરણ પ્રત્યેની ચિંતા દર્શાવે છે. તેમણે કહ્યું કે શ્રી વિજયપુરમ મ્યુનિસિપલ કાઉન્સિલ દ્વારા 98% ઘરોમાંથી કચરો એકઠો કરવો એ સ્વચ્છ ભારત મિશનની ઐતિહાસિક સફળતા છે. તેમણે કહ્યું કે પ્રધાનમંત્રી મોદીના નેતૃત્વમાં ભારત વિશ્વની 11મી સૌથી મોટી અર્થવ્યવસ્થામાંથી ચોથા સ્થાને પહોંચ્યું છે અને માત્ર બે વર્ષમાં દેશ ત્રીજા સ્થાને પહોંચી જશે. શ્રી શાહે કહ્યું કે રાષ્ટ્ર આર્થિક વૃદ્ધિ જોઈ રહ્યું છે, વૈશ્વિક ઉત્પાદન હબ બની રહ્યું છે, વધુ સુરક્ષિત બની રહ્યું છે અને પરંપરાઓને પુનર્જીવિત કરીને અને તેની સંસ્કૃતિ અને ઇતિહાસમાંથી શક્તિ મેળવીને આગળ વધી રહ્યું છે. તેમણે કહ્યું કે પ્રધાનમંત્રી મોદીના નેતૃત્વમાં ભારતના લોકોએ દરેક ક્ષેત્રમાં વ્યાપક પરિવર્તન લાવીને સર્વાંગી વિકાસના નવા અધ્યાયની શરૂઆત કરી છે.

કેન્દ્રીય ગૃહમંત્રીએ કહ્યું કે પ્રધાનમંત્રી મોદીએ સંકલ્પ લીધો છે અને 130 કરોડ ભારતીયોને પણ પ્રતિજ્ઞા લેવા પ્રેરિત કર્યા છે કે આઝાદીના શતાબ્દી સમયે ભારત દરેક ક્ષેત્રમાં વિશ્વમાં પ્રથમ ક્રમે હશે. તેમણે કહ્યું કે આ લક્ષ્ય પ્રાપ્ત કરવા માટે આત્મનિર્ભર ભારત અને ભારતીયો દ્વારા સ્વદેશી ઉત્પાદનોનો ઉપયોગ અત્યંત મહત્વપૂર્ણ છે. તેમણે કહ્યું કે વિકસિત રાષ્ટ્ર બનવા માટે દેશે દરેક ક્ષેત્રમાં આત્મનિર્ભર બનવું જોઈએ અને દરેક ભારતીયએ સ્વદેશી ઉત્પાદનોનો ઉપયોગ કરવાની પ્રતિજ્ઞા પણ લેવી જોઈએ.

SM/IJ/GP/JD