આપણે જ્યારે નવવર્ષ 2026 ને આવકારી રહ્યા છીએ, ત્યારે હું ભારતમાં અને સમગ્ર વિશ્વમાં વસતા મારા ભાઈઓ અને બહેનોને હાર્દિક અભિવાદન અને શુભકામનાઓ પાઠવું છું.

વર્ષ 2025 નવા આત્મવિશ્વાસ, સામૂહિક સંકલ્પ અને રાષ્ટ્રીય ગૌરવના વર્ષ તરીકે યાદ રાખવામાં આવશે. આપણી સાર્વભૌમત્વ અને સુરક્ષાના રક્ષણથી લઈને વિવિધ ક્ષેત્રોમાં ભારતની વૈશ્વિક સ્થિતિને મજબૂત કરવા સુધી, રાષ્ટ્ર ઉદ્દેશ્યની એકતા અને વિઝનની સ્પષ્ટતા સાથે આગળ વધ્યું છે.

'ઓપરેશન સિંદૂર' એ તેના નાગરિકોની રક્ષા કરવાના ભારતના સંકલ્પને રેખાંકિત કર્યો છે અને આતંકવાદીઓ તથા તેમના સમર્થકોને સ્પષ્ટ સંદેશ આપ્યો છે કે ન્યાય અને સુરક્ષાનો વિજય થશે, અને આપણા સાર્વભૌમત્વ સામેના કોઈપણ ખતરાનો દૃઢ અને મક્કમ કાર્યવાહી સાથે સામનો કરવામાં આવશે.

વર્ષ દરમિયાન, સંસદે વિકસિત ભારત તરફ રાષ્ટ્રની મક્કમ કૂચને પ્રતિબિંબિત કરતા ઐતિહાસિક કાયદાઓ ઘડ્યા હતા, જ્યારે વંદે માતરમના 150મા વર્ષની ઉજવણી સહિતના મહત્વપૂર્ણ વિચાર-વિમર્શ પણ જોયા હતા.

રાષ્ટ્રએ ગુરુ તેગ બહાદુર જીની શહીદીની 350મી જયંતિ;  ભગવાન બિરસા મુંડા જી અને સરદાર વલ્લભભાઈ પટેલ જીની 150મી જન્મજયંતિ; ડૉ. શ્યામા પ્રસાદ મુખર્જીની 125મી જન્મજયંતિ; અને શ્રી અટલ બિહારી વાજપેયી જીની 100મી જન્મજયંતિ સહિત અનેક સીમાચિહ્નરૂપ પ્રસંગોની ગંભીરતાપૂર્વક ઉજવણી કરી હતી.

વર્ષ 2025 એ મુખ્ય સાંસ્કૃતિક, આધ્યાત્મિક અને સભ્યતાના સીમાચિહ્નો પણ જોયા. રામ મંદિરમાં ધ્વજારોહણ સમારોહ અને ભવ્ય મહાકુંભે ભારતની જીવંત વિરાસત તરફ વિશ્વનું ધ્યાન ખેંચ્યું.

આ ગૌરવમાં વધારો કરતા, દિવાળીને યુનેસ્કો (UNESCO) ની અમૂર્ત સાંસ્કૃતિક વારસાની સૂચિમાં સામેલ કરવામાં આવી હતી, જે અંધકાર પર પ્રકાશ, અજ્ઞાન પર જ્ઞાન અને અધર્મ પર ધર્મના સાર્વત્રિક મૂલ્યોને પુનઃપુષ્ટ કરે છે. કાશી તમિલ સંગમમ જેવી પહેલોએ ભારતની સાંસ્કૃતિક એકતા અને સભ્યતાના બંધનોને વધુ મજબૂત બનાવ્યા છે.

2025 દરમિયાન વિજ્ઞાન, ટેકનોલોજી અને અવકાશમાં ભારતની સિદ્ધિઓએ વૈશ્વિક ઇનોવેશન હબ તરીકે તેની સ્થિતિને વધુ મજબૂત બનાવી છે. ઈસરો (ISRO) ના નેતૃત્વ હેઠળ, સફળ 'SPADEX' મિશને સેટેલાઇટ ડોકિંગ ક્ષમતાઓ દર્શાવી, જ્યારે LVM 3-M6 લોન્ચે ભારતની વધતી જતી હેવી-લિફ્ટ ક્ષમતાનું પ્રદર્શન કર્યું. ઇન્ટરનેશનલ સ્પેસ સ્ટેશન પર ભારતીય અવકાશયાત્રી શુભાંશુ શુક્લાના મિશને ભારતની વિસ્તરતી માનવ અવકાશ ઉડાનની મહત્વાકાંક્ષાઓમાં એક મહત્વપૂર્ણ પગલું ભર્યું છે.

રમતગમત ક્ષેત્રે, 2025 એ રાષ્ટ્રીય ગૌરવની અનેક ક્ષણો આપી. આપણી પુરૂષ ક્રિકેટ ટીમે ICC ચેમ્પિયન્સ ટ્રોફી જીતી, જ્યારે ભારતીય મહિલા ક્રિકેટ ટીમે પ્રથમ વખત ICC મહિલા ક્રિકેટ વર્લ્ડ કપ જીતીને ઇતિહાસ રચ્યો. ભારતે ખો-ખો વર્લ્ડ કપમાં પુરૂષ અને મહિલા બંને ટાઇટલ પણ જીત્યા હતા. ભારતની દીકરીઓ અને પેરા-એથ્લેટ્સ મુખ્ય આંતરરાષ્ટ્રીય ચેમ્પિયનશીપમાં ઉત્કૃષ્ટ પ્રદર્શન દ્વારા રાષ્ટ્રને પ્રેરણા આપતા રહ્યા છે. દિવ્યા દેશમુખ મહિલા ચેસ વર્લ્ડ કપ ચેમ્પિયન તરીકે ઉભરી અને શીતલ દેવીએ પેરા-આર્ચરી (તીરંદાજી) વર્લ્ડ ટાઇટલ જીત્યું, જ્યારે મહિલા બ્લાઈન્ડ T20 વર્લ્ડ કપમાં ભારતની જીત એ સામૂહિક સિદ્ધિને પ્રતિબિંબિત કરે છે.

આપણે જ્યારે 2026 માં પ્રવેશ કરી રહ્યા છીએ, ત્યારે હું ભારતના યુવાનોને, જે રાષ્ટ્રના ભવિષ્યના રક્ષકો છે, તેમને આ નવા વર્ષમાં ભારત માતા માટે નીચેની પાંચ પ્રતિજ્ઞાઓ લેવા આહ્વાન કરું છું:

1. નશીલી દવાઓ અને તમામ પ્રકારના વ્યસનોથી સંપૂર્ણપણે મુક્ત રહેવું, અને શિસ્ત, સ્પષ્ટતા અને ઉદ્દેશ્યથી ભરેલું જીવન જીવવું.
2. ટેકનોલોજીને જવાબદારીપૂર્વક અને નૈતિક રીતે અપનાવવી, રાષ્ટ્ર નિર્માણ અને સર્વસમાવેશક વિકાસ માટે ઇનોવેશન અને ડિજિટલ સાધનોનો ઉપયોગ કરવો.
3. યોગ, રમતગમત અને સક્રિય, સંતુલિત જીવનશૈલી અપનાવીને શારીરિક અને માનસિક સ્વાસ્થ્ય પર ધ્યાન કેન્દ્રિત કરવું.
4. બંધારણીય મૂલ્યો, અખંડિતતા અને સામાજિક સંવાદિતા જાળવવી અને ભારતીય લોકશાહીના પાયાને મજબૂત કરવા.
5. સેવા, કાર્યમાં શ્રેષ્ઠતા અને ભારતના આદર્શો પ્રત્યેની પ્રતિબદ્ધતા દ્વારા રાષ્ટ્રની પ્રગતિમાં નિઃસ્વાર્થપણે યોગદાન આપવું.

આ મૂલ્યો દ્વારા માર્ગદર્શન મેળવીને, આપણા યુવાનોની ઊર્જાથી પ્રેરિત થઈને અને આપણી સમૃદ્ધ સાંસ્કૃતિક નૈતિકતામાં મૂળ જમાવીને, ભારત વિકસિત ભારત@2047 ના વિઝન તરફ તેની મક્કમ કૂચ જાળવી રાખશે.

નવું વર્ષ આપણા દરેક માટે શાંતિ, સમૃદ્ધિ અને પ્રગતિ લાવે.

હું આપ સૌને સ્વસ્થ, સમૃદ્ધ અને સુખમય નવવર્ષ 2026ની કામના કરું છું.

જય હિન્દ! ભારત માતાની જય!

SM/DK/GP/JD