नवी दिल्‍ली, 28 डिसेंबर 2025

केंद्रीय गृहमंत्री आणि सहकार मंत्री अमित शाह यांनी गुजरातमधील अहमदाबाद येथे नवा वंजार गावातील 205 कुटुंबांना जमीन वाटप प्रमाणपत्रे वितरित केली. या प्रसंगी गुजरातचे मुख्यमंत्री भूपेंद्र पटेल आणि अनेक मान्यवर उपस्थित होते.

कार्यक्रमाला संबोधित करताना केंद्रीय गृहमंत्री अमित शाह म्हणाले की आज वंजार गावात लहानसा पण अत्यंत महत्त्वाचा कार्यक्रम झाला आहे. त्यांनी सांगितले की विरोधी पक्षाच्या सरकारने विस्थापित लोकांना तात्पुरते पुनर्वसित केले आणि त्यांच्या भवितव्याबद्दल त्यांना अनिश्चिततेत सोडले, परंतु आमच्या सरकारने त्यांना शोधून त्यांना जमीन हक्कपत्रे दिली आहेत.

गृहमंत्री अमित शाह म्हणाले की पंतप्रधान नरेंद्र मोदी यांनी सुरू केलेल्या एएमआरयूटी- अमृत योजनेचा, मुख्यमंत्री भूपेंद्र पटेल यांनी सुरू केलेल्या शहरी विकास योजनांचा आणि अहमदाबाद महानगरपालिकेच्या निधीचा वापर करून आता या 15 लाख लोकांच्या घरांमधून निर्माण होणाऱ्या सांडपाण्याची नियमित व्यवस्था सुमारे ₹400 कोटींच्या खर्चातून कायमस्वरूपी करण्यात आली आहे. शाह म्हणाले की पश्चिम मुख्य सांडपाणी वाहिनीचे उद्घाटन इतक्या कमी वेळात होईल यावर त्यांचा विश्वास बसत नव्हता. त्यांनी सांगितले की या प्रकल्पात आशियामध्ये प्रथमच सूक्ष्म बोगदा तंत्रज्ञानाचा वापर करण्यात आला आहे. याचा अर्थ सर्व जलवाहिन्या पूर्णपणे भूमिगत टाकण्यात आल्या असून, जमिनीवर कोणतेही उत्खनन करावे लागले नाही. त्यामुळे दैनंदिन वाहतूक आणि हालचाल यात कुठलाही व्यत्यय आला नाही. महानगरपालिका अधिकाऱ्यांनी शहराची सांडपाणी वाहिनी इतक्या कमी वेळात पूर्ण केल्याबद्दल त्यांनी समाधान व्यक्त केले.

अमित शाह म्हणाले की लोकसभेतील चर्चेदरम्यान विरोधी पक्षनेत्याने एक विचित्र प्रश्न विचारला, “आपण प्रत्येक वेळी निवडणूक का हरतो?” शाह म्हणाले की ते विरोधी पक्षनेत्याला विनंती करत आहेत  की हे दोन्ही कार्यक्रम समजून घ्यावेत आणि मग त्यांना समजेल की ते प्रत्येक वेळी निवडणुका का हरतात. शाह म्हणाले की विरोधी पक्षाच्या सरकारने ज्या लोकांना तात्पुरते पुनर्वसित करून अनिश्चिततेत सोडले होते, त्यांना आता नरेंद्र मोदी यांच्या नेतृत्वाखाली आपल्या पक्षाने शोधून जमीन हक्कपत्रे दिली आहेत.

* * *

शैलेश पाटील/नितीन गायकवाड/दर्शना राणे

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai