نائب صدر جمہوریہ ہند جناب سی پی رادھا کرشنن نے آج نئی دہلی کے بھارت منڈپم میں مہامنا پنڈت مدن موہن مالویہ کے جمع کردہ کاموں کی آخری سیریز ”مہامنا ونگمے“ کا اجرا کیا۔

اجتماع سے خطاب کرتے ہوئے نائب صدر جمہوریہ نے مہامنا مالویہ کو ایک بلند پایہ قوم پرست، صحافی، سماجی مصلح، وکیل، سیاست دان، ماہر تعلیم اور قدیم ہندوستانی ثقافت کا ایک ممتاز عالم قرار دیا۔ انہوں نے کہا کہ پنڈت مالویہ انوکھی بصیرت رکھتے تھے جن کا پختہ یقین تھا کہ ہندوستان کا مستقبل اس کے ماضی کو ترک کرنے میں نہیں ہے، بلکہ اسے نئے سرے سے زندہ کرنے میں ہے، اس طرح وہ ہندوستان کی قدیم اقدار اور جدید جمہوری امیدوں کے درمیان ایک پل کا کام کر رہے ہیں۔

پنڈت مالویہ کی سائنسی اور تکنیکی تعلیم کے عزم کو اجاگر کرتے ہوئے نائب صدر جمہوریہ نے کہا کہ یہ قدیم اور جدید تہذیبوں کے بہترین عناصر کو ہم آہنگ کرنے کی ان کی صلاحیت کو ظاہر کرتا ہے۔

نوآبادیاتی حکمرانی کے دوران قومی بیداری کے سب سے مضبوط ہتھیار کے طور پر تعلیم پر مہامنا مالویہ کے ایمان کو یاد کرتے ہوئے نائب صدر نے کہا کہ بنارس ہندو یونیورسٹی کا قیام ان کے اس یقین کا زندہ ثبوت ہے کہ جدید تعلیم اور ہندوستانی ثقافت کو ایک ساتھ بڑھنا چاہیے۔

نائب صدر جمہوریہ نے کہا کہ مہامنا مالویہ کا ایک مضبوط، خود انحصار اور روشن خیال ہندوستان کا وژن وزیر اعظم جناب نریندر مودی کے ذریعے شروع کیے گئے آتم نربھر بھارت، میک ان انڈیا اور 2047 تک وکست بھارت کے مشن جیسی آج کی پہلوں سے گہرائی سے جڑا ہوا ہے جو پنڈت مالویہ کی مستحکم وراثت کو آگے بڑھا رہے ہیں۔

انہوں نے مزید کہا کہ مہامنا مالویہ کا جامع، قدر پر مبنی اور مہارت پر مبنی تعلیم پر زور قومی تعلیمی پالیسی 2020 میں مضبوط عکاسی کرتا ہے۔

مہامنا ونگمے کو تحریروں کے ایک مجموعہ سے کہیں زیادہ بتاتے ہوئے نائب صدر نے کہا کہ یہ ہندوستان کی جدوجہد آزادی کے دانشورانہ ڈی این اے اور ملک کی ثقافتی نشاۃ ثانیہ کے بلیو پرنٹ کی نمائندگی کرتا ہے۔ انہوں نے مہامنا مالویہ مشن اور پبلیکیشنز ڈویژن کو ان کی یادگار کاوش کے لیے مبارکباد پیش کی اور یونیورسٹیوں، اسکالروں اور نوجوان محققین سے زور دے کر کہا کہ وہ ان جلدوں کے ساتھ فعال طور پر مشغول ہوں اور کہا کہ وہ عصری چیلنجوں کا پائیدار حل پیش کرتے ہیں۔

تقریباً 3500 صفحات پر پھیلی ہوئی 12 جلدوں پر مشتمل مہامنا ونگمے کی دوسری اور آخری سیریز پنڈت مدن موہن مالویہ کی تحریروں اور تقریروں کا ایک جامع مجموعہ ہے۔ اس تقریب کا اہتمام مہامنا مالویہ مشن نے کیا تھا، جبکہ کتابیں وزارت اطلاعات و نشریات کے پبلیکیشنز ڈویژن نے شائع کی ہیں۔ جمع کیے گئے کاموں کی پہلی سیریز وزیر اعظم جناب نریندر مودی نے 2023 میں جاری کی تھی۔

اس موقع پر موجود معززین میں مرکزی وزیر ارجن رام میگھوال، ممبر پارلیمنٹ جناب انوراگ سنگھ ٹھاکر؛ صدر، اندرا گاندھی نیشنل سینٹر فار آرٹس، جناب رام بہادر رائے؛ صدر، مہامنا مالویہ مشن، جناب ہری شنکر سنگھ اور پرنسپل ڈائرکٹر جنرل پبلیکیشنز ڈویژن، جناب بھوپیندر کینتھولا شامل تھے۔

**********

ش ح۔ ف ش ع

                                                                                                                                       U: 3920