ఈ రోజు న్యూఢిల్లీలో జరిగిన భారత క్రీడా సాధికార సంస్థ (సాయ్) పాలకమండలి (జీబీ) సమావేశానికి కేంద్ర యువజన వ్యవహారాలు, క్రీడా శాఖ మంత్రి డాక్టర్ మన్షుక్ మాండవీయ అధ్యక్షత వహించారు. ఈ సమావేశంలో దేశవ్యాప్తంగా మౌలిక వసతులను అభివృద్ధి చేసే, మెరుగుపరిచే వివిధ ప్రాజెక్టులను ఆమోదించారు.

‘‘ప్రస్తుతం భారత క్రీడా వ్యవస్థ అభివృద్ధి చెందుతున్న దశలో ఉంది. దీనికి ఉజ్వల భవిష్యత్తు అందించే దిశగా అన్ని రకాలుగా ఈ రంగాన్ని బలోపేతం చేయాల్సిన తక్షణావసరం ఉంది. క్రీడాకారులే కేంద్రంగా, కామన్వెల్త్, ఒలింపిక్ క్రీడల్లో పతకాలను సాధించడమే దృష్టిలో పెట్టుకొని వారికి ఉత్తమ మౌలిక వసతులను అందించడమే ఈ రోజు మనం తీసుకున్న నిర్ణయాల లక్ష్యం’’ అని సాయ్ పాలకమండలిని ఉద్దేశించి డాక్టర్ మాండవీయ అన్నారు.

ముఖ్యమైన ప్రాజెక్టుల్లో ఒకటిగా బెంగళూరులోని సాయ్ ఎన్ఎస్ఎస్‌సీ కోసం పాలిగ్రాస్ ప్యారిస్ జీటీ హాకీ టర్ఫును ఏర్పాటు చేయాలని పాలకమండలి సిఫార్సు చేసింది. ఇది భారత పురుషుల, మహిళల జాతీయ, ‘ఎ’ హాకీ బృందాలకు శిక్షణా కేంద్రంగా పనిచేస్తుంది.

భారత దేశంలో అత్యుత్తమ, వర్థమాన షూటర్లకు శిక్షణ అందిస్తున్న కర్ణి సింగ్ షూటింగ్ రేంజ్ (కేఎస్ఎస్ఆర్)లో ప్రస్తుతం ఉపయోగిస్తున్న ఎలక్ట్రానిక్ షూటింగ్ టార్గెట్ల స్థానంలో లేజర్ టార్గెట్ వ్యవస్థలను ఏర్పాటు చేసేందుకు పాలకమండలి అంగీకరించింది.

ఈ కీలక నిర్ణయాలతో పాటుగా.. సాయ్ ఎన్‌సీవోఈ ఛత్రపతి శంభాజీ నగర్ (గతంలో సాయ్ ఔరంగాబాద్), సాయ్ ఎన్ఎస్ఎన్ఐఎస్‌ పటియాలా, సాయ్ ఎల్ఎన్‌సీపీఈ త్రివేండ్రంలో మూడు మల్టీపర్పస్ హాళ్లను నిర్మించేందుకు కూడా పాలకమండలి ఆమోదం తెలిపింది. ఇవి క్రీడాకారులకు అవసరమైన శిక్షణకు, సమగ్రాభివృద్ధికి దోహదపడతాయి.

సాయ్ ఎన్‌సీఈవో ఛత్రపతి శంభాజీనగర్‌లో ఏర్పాటు చేసే ఈ సౌకర్యం.. వాతావరణ అనుకూల బాక్సింగ్ శిక్షణ జోన్‌గా, క్రీడాకారుల బలం, సామర్థ్యాన్ని పెంపొందించే కేంద్రంగా పని చేస్తుంది. వాలీబాల్, బ్యాడ్మింటన్ కోసం ప్రత్యేకంగా ఇండోర్ స్థలాలను కేటాయిస్తారు. అలాగే సాయ్ ఎన్ఎస్ఎన్ఐఎస్ పటియాలాలో ఏర్పాటు చేసే ఇండోర్ శిక్షణ హాలు.. ఇండోర్ శిక్షణ సామర్థ్యాన్ని విస్తరిస్తుందని, క్రీడల్లో మెరుగైన ప్రదర్శనకు, స్పోర్ట్స్ సైన్స్ సహకారానికి, సామర్థ్య నిర్మాణానికి, గాయాల నుంచి కోలుకోవడానికి అవసరమైన ఆధునికమైన, సమీకృత వ్యవస్థను అందిస్తుందని అంచనా.

దేశంలో ప్రముఖ విద్యా సంస్థ, మెరుగైన క్రీడా శిక్షణ అందించే కేంద్రమైన ఎల్ఎన్‌సీపీఈ త్రివేండ్రానికి సైతం కొత్త మల్టీపర్పస్ హాల్ మంజూరు చేశారు. ఇది ఏడాది పొడవునా శిక్షణ, విద్యా కార్యకలాపాలు నిరంతరాయంగా కొనసాగేందుకు తోడ్పడుతుంది.

పశ్చిమ బెంగాల్లో సాయ్ ఎస్‌టీసీ జల్పాయ్‌గురిలో 400-మీటర్లు, 8-లేన్ల సింథటిక్ అథ్లెటిక్స్ ట్రాక్ నిర్మాణానికి సైతం జీబీ ఆమోదం తెలిపింది. క్రీడా శిక్షణలో ముఖ్యమైన కేంద్రంగా సాయ్ ఎస్టీ‌సీ జల్పాయ్‌గురి ఆవిర్భవిస్తోంది. పరిమితమైన మౌలిక వసతులున్నప్పటికీ.. ప్రాంతీయ, జాతీయ స్థాయిలో నిలకడగా రాణిస్తోంది.

సాయ్ ఎస్టీసీ జల్పాయ్‌గురితో పాటుగా.. భోపాల్లోని సాయ్ సీఆర్‌సీలో కొత్త సింథటిక్ ట్రాకు ఏర్పాటు చేయడానికి కమిటీ ఆమోదం తెలిపింది. ఈ కేంద్రంలో వివిధ క్రీడా విభాగాలకు చెందినవారు శిక్షణ పొందుతున్నారు. ఇద్దరు ఒలింపియన్లతో సహా అంతర్జాతీయ స్థాయి క్రీడాకారులను ఈ కేంద్రం అందించింది.

***