نائب صدرِ جمہوریہ ہند جناب سی۔ پی۔ رادھا کرشنن نے آج نئی دہلی کے ڈاکٹر امبیڈکر انٹرنیشنل سینٹر میں منعقدہ “مصنوعی ذہانت کا ارتقا – اے آئی کا مہاکمبھ” کے عنوان سے قومی فلیگ شپ کانکلیو میں شرکت کی۔ اس کانکلیو کا انعقاد گرو گوبند سنگھ اندرپرسٹھ یونیورسٹی نے آل انڈیا کونسل فار ٹیکنیکل ایجوکیشن (اے آئی سی ٹی ای) اور آؤٹ لک میگزین کے اشتراک سے کیا تھا۔

مخاطبین سے خطاب کرتے ہوئے نائب صدر نے اس بات پر زور دیا کہ مصنوعی ذہانت اب مستقبل کا تصور نہیں بلکہ حال کی حقیقت ہے۔ یہ صحت کے شعبے میں تشخیص، ماحولیاتی ماڈلنگ، حکمرانی، تعلیم، مالیات اور قومی سلامتی سمیت مختلف شعبوں پر اثر انداز ہو رہی ہے اور معاشروں کی ترقی اور افراد کی زندگی و کام کرنے کے طریقے کو نئے سرے سے تشکیل دے رہی ہے۔

نائب صدر نے کہا کہ جدید سائنسی اور تکنیکی ترقیات کے بارے میں منفی سوچ رکھنے کی کوئی ضرورت نہیں ہے۔ انہوں نے کمپیوٹر کے آغاز کی مثال دی، جو ابتدا میں مزاحمت کا سامنا کر رہا تھا مگر بعد میں دنیا کو بدل کر رکھ دیا، اور اس بات پر روشنی ڈالی کہ ہر تکنیکی پیش رفت کے مثبت اور منفی پہلو ہوتے ہیں۔ انہوں نے زور دیا کہ ذمہ داری اس بات کی ہے کہ ٹیکنالوجی کو مثبت اور تعمیری انداز میں استعمال کرنے کے طریقے تلاش کیے جائیں۔

نائب صدر نے کہا کہ بھارت اب مصنوعی ذہانت کے میدان میں عالمی سطح پر سرکردہ ممالک میں شامل ہو چکا ہے۔ دنیا میں تیزی سے تبدیلیوں کو مدنظر رکھتے ہوئے، انہوں نے سست روی سے خبردار کیا اور کہا کہ بھارت کو ترقی یافتہ ممالک کے ساتھ مصنوعی ذہانت کے میدان میں دوڑ میں پیچھے نہیں رہنا چاہیے۔

انہوں نے اس موقع پر مصنوعی ذہانت کے نصاب کے آغاز پر اطمینان کا اظہار کیا۔ نائب صدر نے اس بات پر زور دیا کہ مصنوعی ذہانت اسکولوں اور کالجوں کے نصاب کا لازمی حصہ ہونی چاہیے۔ انہوں نے کہا کہ ابتدائی سطح پر اے آئی سے تعارف طلبہ کو تنقیدی سوچ، مسئلہ حل کرنے کی مہارت اور مستقبل کے لیے ضروری صلاحیتیں فراہم کرے گا، جو ٹیکنالوجی پر مبنی دنیا میں اہم ہیں۔ اس کے علاوہ، انہوں نے زور دیا کہ تعلیمی اداروں کو تیزی سے بدلتی ہوئی تکنیکی دنیا کے مطابق مسلسل ترقی کرنی ہوگی تاکہ وہ مہارت، جدت اور علمی برتری کے مراکز بن سکیں۔

بھارت کے ڈیموگرافک ایڈوانٹیج کی طرف اشارہ کرتے ہوئے نائب صدر نے کہا کہ ملک کی تقریباً 65 فیصد آبادی 35 سال سے کم عمر کی ہے۔ انہوں نے کہا کہ اگر اس ڈیموگرافک ڈیویڈنڈ کو درست طریقے سے استعمال کیا جائے تو بھارت مصنوعی ذہانت کے میدان میں دنیا کا سرکردہ ملک بن سکتا ہے۔

انہوں نے کہا کہ مصنوعی ذہانت بھارت کے خود مختار، جامع اور تکنیکی طور پر بااختیار بھارت@2047 کے سفر میں ایک اہم کردار ادا کرے گی۔

نائب صدر نے ذمہ دار اور اخلاقی مصنوعی ذہانت کی اہمیت پر زور دیتے ہوئے کہا کہ کوئی بھی سائنسی پیش رفت انسانیت کو نقصان نہیں پہنچا سکتی اور ٹیکنالوجی کا مقصد بالآخر لوگوں کی زندگی کو خوشحال، باوقار اور بہتر بنانا ہونا چاہیے۔ انہوں نے کہا کہ مصنوعی ذہانت انسانی ذہانت کو بڑھائے اور اخلاقی اصولوں کے تحت کام کرے تاکہ سماجی بھلائی اور عوامی مفاد کو فروغ دیا جا سکے۔

اپنے خطاب کے اختتام پر نائب صدر نے اعتماد کا اظہار کیا کہ بھارت اپنی صلاحیتوں، وژن اور اقدار کے ساتھ نہ صرف مصنوعی ذہانت کو ذمہ داری کے ساتھ اپنائے گا بلکہ دنیا کو اس کے مستقبل کی تشکیل میں رہنمائی بھی فراہم کرے گا۔

جناب آشیش سود، وزیرِ تعلیم، حکومت دہلی؛ پروفیسر (ڈاکٹر) مہیش ورما، وائس چانسلر، گرو گوبند سنگھ اندرپرستھ یونیورسٹی؛ پروفیسر ٹی۔ جی۔ سیتارمن، اے آئی سی ٹی ای؛ آؤٹ لک میگزین کے نمائندےجناب سندیپ گھوش کے ساتھ ساتھ سائنسدان، محققین، تعلیمی ماہرین اور طلبہ نے اس کانکلیو میں شرکت کی۔

****

ش ح۔ ا م ۔ اک م

U- 3826